ཕྱི་ལོ་༢༠༢༢་ཟླ་༧་ཚེས་༦ཉིན། བཞུགས་སྒར་རྡ་ས་ཐེག་ཆེན་ཆོས་གླིང་དུ། བོད་མིའི་སྒྲིག་འཛུགས་ཀྱིས་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་དགུང་གྲངས་༨༧་ཕེབས་པའི་༧སྐུའི་འཁྲུངས་སྐར་སྲུང་བརྩི་ཞུས་སོང་། སྐབས་དེར། ཡ་རབས་བཟང་སྤྱོད་དང་བྱམས་བརྩེ་ལྡན་པའི་བོད་མི་ཞིག་ཡོང་ཐབས་ཆེད་ཉམས་ལེན་ཞུ་རྒྱུའི་དམ་བཅའ་བསྐྱར་ནན་ཞུ་རྒྱུ་ནི་༸སྐུའི་འཁྲུངས་སྐར་སྲུང་བརྩི་ཞུ་རྒྱུའི་དགོས་དོན་སྙིང་པོ་དེ་ཆགས་ཡོད་པས་བོད་མི་ཡོངས་ཀྱི་ཉིན་རེའི་འཚོ་བའི་ནང་ལག་བསྟར་ཉམས་ལེན་དགོས་པའི་འབོད་སྐུལ་ནན་པོ་ཞུ་རྒྱུ་ཡིན་ཞེས་སྤྱི་འཐུས་ཚོགས་གཙོ་མཆོག་གིས་གསུངས་སོང་།

ཕྱི་ལོ་༢༠༢༢ ཟླ་༦ ཚེས་༢༤ ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བོད་པའི་ཚོགས་སྡེ་ཁགྷ་ལྔ་ཡིས་བརྟན་བཞུགས་བསྟར་འབུལ་ཞུས་སོང་། སྐབས་དེར། ༧གོང་ས་མཆོག་གིས་ངོས་རང་ད་དུང་ལོ་ཉི་ཤུ་ལྷག་སྲ་ཐག་ཐག་སྡོད་ཀྱི་རེད། ཁྱོད་རང་ཚོ་བོད་རྒྱ་ཆེའི་མི་མང་གིས་ཀྱང་སེམས་ཤུགས་བསྐྱེད་ནས་ཧུར་ཐག་བྱེད་དགོས་པ་རེད། ཧུར་ཐག་བྱེད་རྒྱུ་ཧ་ཅང་གལ་ཆེན་པོ་རེད། ང་ཚོའི་དུས་ཚོད་སྡུག་ཤོས་གཉན་འཕྲང་ཅན་ཕལ་ཆེར་ཡོལ་ཚར་བ་རེད། ད་ལྟ་ང་ཚོ་གནས་ཚུལ་གསར་པ་ཞིག་གི་འོག་ནས་རེ་བ་གསར་པ་ཞིག་རྒྱག་པའི་ཐོག་ལ་སླེབས་ཡོད། ཚང་མས་ཧུར་ཐག་གནང་ཤོག ཅེས་གསུངས་སོང་།

ཕྱི་ལོ་༢༠༢༢་ཟླ་༦་ཚེས་༡༦་ཉིན། རྡ་སར་མདོ་ཁམས་ཆུ་བཞི་སྒང་དྲུག་བོད་ཀྱི་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་ནས་ལོ་ངོ་༦༤་འཁོར་བའི་དུས་དྲན་སྲུང་བརྩི་ཞུ་སྐབས། རྒྱ་གཞུང་གི་དཔོན་རིགས་ཚོས་བོད་རྒྱའི་དཀའ་རྙོག་འདི་གང་མགྱོགས་གཙང་སེལ་མ་བྱས་ཚེ། འབྱུང་འགྱུར་བོད་རྒྱའི་དཀའ་རྙོག་འདིའི་རྐྱེན་རྩ་ཇི་ཡོང་ལ་རྒྱ་ནག་གཞུང་གིས་འགན་ཁུར་ཆ་ཚང་དགོས་ཞེས་དྲན་སྐུལ་ནན་མོ་བྱེད་འདོད་བྱུང་། ཞེས་བརྗོད་སོང་།

ཕྱི་ལོ་༢༠༢༢ཟླ་༧ཚེས༤ཉིན། རྒྱལ་སྤྱིའི་དགེ་ལྡན་ལྷན་ཚོགས་ཀྱིས་རྒྱ་གར་གཞུང་གི་ངོས་ལེན་ཡོད་པའི་ནང་པའི་སློབ་གཉེར་ཁང་གསར་འཛུགས་གནང་རྒྱུ་ཡིན་སྐོར་༧གོང་ས་མཆོག་ལ་སྙན་གསེང་ཞུས་ཡོད་པ་དང་། ༧གོང་ས་མཆོག་གིས་ནང་པའི་སློབ་གཉེར་ཁང་གསར་འཛུགས་དང་འབྲེལ་བའི་ཐོག་ལམ་སྟོན་དང་ཕྱག་ལས་གནང་མཁན་རྣམས་ལ་མཇལ་ཁ་གནང་ནས་བཀའ་སློབ་སྩལ་འདུག

ཕྱི་ལོ་༢༠༢༢་ཟླ་༦་ཚེས་༢༡ཉིན། བོད་དོན་ལས་འགུལ་བ་སངས་རྒྱས་སྐྱབས་དང་རབ་དགའ་གཉིས་ཀྱིས་རྒྱལ་སྤྱིའི་སྤྱི་ཚོགས་ལ་བོད་ནི་ད་བར་དུ་རྒྱ་གཞུང་གི་གདུག་རྩུབ་ཅན་ཀྱི་སྲིད་བྱུས་འོག་གནས་ཡོད་པ་དང་བོད་མི་བརྒྱ་དང་བདུན་ཅུ་ལྷག་གི་རང་ལུས་མེར་བསྲེག་བཏང་ཡོད་པས། བོད་ནང་གི་འགྲོ་བ་མིའི་ཐོབ་ཐང་ལ་རྒྱབ་སྐྱོར་གནང་རོགས་ཞེས་འབོད་སྐུལ་ཞུས་ནས་ཞི་བའི་གོམ་བགྲོད་ཀྱི་ལས་འགུལ་སྤེལ་བཞིན་འདུག

ཕྱི་ལོ་༢༠༢༢་ཟླ་༦་ཚེས་༡༤ཉིན། བོད་ལྗོངས་མདོ་སྨད་ཆོལ་ཁའི་ངོས་ནས་༧རོང་ཆེན་བསྟན་པའི་སྒྲོན་མེ་སྐུ་ཕྲེང་བཅུ་གཅིག་པ་བློ་བཟང་བསྟན་འཛིན་འཇིགས་མེད་ཡེ་ཤེས་རྒྱ་མཚོ་དཔལ་བཟང་པོ་མཆོག་དགུང་གྲངས་བརྒྱད་ཅུར་ཕེབས་པར་གྱ་སྟོན་བརྟན་བཞུགས་བསྟར་འབུལ་དང་བཀའ་དྲིན་རྗེས་དྲན་མཚོན་ཆེད་གསེར་གྱི་གཟེངས་རྟགས་ཤིག་ཕུལ་སོང་།