ཕྱི་ལོ་༢༠༢༣་ཟླ་༡་ཚེས་༡༦་ཉིན་སྤེལ། བོད་དོན་དང་བོད་དོན་རྒྱབ་སྐྱོར་ཚོགས་པ་བརྒྱ་དང་ཉི་ཤུ་ཡིས་རྒྱ་གཞུང་གིས་བོད་མིའི་རིགས་རྫས་རྐུ་འཁྱེར་བྱས་པར་ངོ་རྒོལ་དང་ཨ་རིའི་རིགས་རྫས་ཡོ་བྱད་ཚོང་མཁན་ཐེར་མོ-ཧྥི་ཤེར་(Thermo Fisher)་ཟེར་བའི་བཟོ་ལས་ཁང་ནས་རྒྱ་གཞུང་ལ་བོད་ནང་གི་བོད་མིའི་རིགས་རྫས་ལེན་བྱེད་ཀྱི་ཡོ་བྱད་ཚོང་བཞིན་པར་མཚམས་འཇོག་དགོས་པའི་མཚན་རྟགས་བསྡུ་རུབ་ལས་འགུལ་ཞིག་སྤེལ་བཞིན་འདུག

ཕྱི་ལོ་༢༠༢༢་ཟླ་༡༢་ཚེས་༣༠་ཉིན། གནས་མཆོག་རྡོ་རྗེ་གདན་གྱི་དུས་འཁོར་དབང་ཆེན་གསུང་ཆོས་ར་བའི་ནང་དུ། ༧གོང་ས་མཆོག་གིས་དད་ལྡན་མི་མང་རྣམས་ལ་རང་དོན་སྒྲུབ་པ་ལ་བྱང་ཆུབ་ཀྱི་སེམས་དང་། གཞན་དོན་སྒྲུབ་པ་ལའང་བྱང་ཆུབ་ཀྱི་སེམས། འཕྲད་དུ་བདེ་བའང་བྱང་ཆུབ་ཀྱི་སེམས། ལུས་བདེ་བའང་བྱང་ཆུབ་ཀྱི་སེམས། སེམས་སྐྱིད་པའང་བྱང་ཆུབ་ཀྱི་སེམས། ལུས་བདེ་དང་སེམས་སྐྱིད་པའི་ཐོག་ནས་མི་ཚེ་རིང་པོར་སྡོད་ཐུབ་པའི་ཚེ་སྒྲུབ་ཀྱི་མཆོག་ཀྱང་བྱང་ཆུབ་ཀྱི་སེམས་སྒོམ་པ་ཏན་ཏན་རེད། ཅེས་བཀའ་སློབ་བསྩལ་འདུག

ཕྱི་ལོ་༢༠༢༢ ཟླ་༡༢ ཚེས་༢༧ ཉིན། གནས་མཆོག་རྡོ་རྗེ་གདན་གྱི་ཐའེ་ཡི་ལྦཱ་ཊ་པ་དགོན་པར་རྒྱལ་སྤྱིའི་པཱ་ལི་དང་ལེགས་སྦྱར་ཆོས་བརྒྱུད་ཀྱི་དགེ་འདུན་པའི་དབར་ཤེས་ཡོན་བརྗེ་ལེན་གྱི་ལས་གཞིའི་དབུ་འབྱེད་མཛད་སྒོར་༧གོང་ས་མཆོག་ཆིབས་བསྒྱུར་བསྐྱབས་ནས་བཀའ་སློབ་གནང་དོན། མཐུན་པོ་ཟེར་བ་ནི་དངོས་གནས་བདེ་སྐྱིད་ཀྱི་རྩ་བ་རེད། ཆེ་ས་འཛམ་གླིང་ལ་དམག་འཁྲུག་དང་གོ་མཚོན་བཟོས་པ་རྣམས་མ་མཐུན་པའི་རྐྱེན་གྱིས་བྱུང་བ་རེད། འཛམ་གླིང་ཞི་བདེ་ཡོང་བར་སྨོན་ལམ་རྒྱག་པ་དང་ཆབས་ཅིག་སོ་སོའི་ལག་ལེན་དང་འབད་བརྩོན་གྱི་ཐོག་ནས་མཐུན་པོ་བཟོ་རྒྱུ་ཧ་ཅང་གལ་ཆེན་པོ་རེད།

ཕྱི་ལོ་༢༠༢༣་ཟླ་༡་ཚེས་༡་ཉིན། གནས་མཆོག་རྡོ་གདན་དུ་༸གོང་ས་མཆོག་ལ་རི་བོ་དགེ་ལྡན་པ་སྤྱི་ནས་བླ་མ་མཆོད་པའི་སྒོ་ནས་བརྟན་བཞུགས་བསྟར་འབུལ་ཞུས་ཡོད་པ་དང་། སྐབས་དེར༧གོང་ས་མཆོག་གིས་བོད་ཀྱི་རིས་སུ་མ་ཆད་པའི་ཆོས་བརྒྱུད་ཁག་གི་བླ་ཆེན་རྣམ་པ་ཚོ་བཅས་པས་དེ་རིང་འདིར་བརྟན་བཞུགས་གནང་བཞིན་ཡོད་པ་རེད། བརྟན་བཞུགས་ཀྱི་ནུས་པ་ཏན་ཏན་ཡོང་གི་རེད། ངོས་རང་གིས་སེམས་ཤུགས་བསྐྱེད་ནས་བསྡད་ཡོད། ལས་དང་སྨོན་ལམ་གྱི་འབྲེལ་བ་ཤུགས་ཆེན་པོ་ཡོད་པས་ངོས་རང་ལོ་བརྒྱ་དང་བཅུ་གྲངས་ཤིག་འཚོ་ཐུབ་པའི་ཕྱི་ནང་གི་རྟེན་འབྲེལ་འཛོམས་ཡོད་པ་ལྟ་བུ་འདུག །ངོས་ཀྱིས་སྨོན་ལམ་རྒྱག་པ་དང་ཁྱོད་ཚོས་ཀྱང་དེ་བཞིན་སྨོན་ལམ་ཡག་པོ་རྒྱོབས།

ཕྱི་ལོ་༢༠༢༢ ཟླ་༡༢ ཚེས་༢༩ ཉིན། གནས་མཆོག་རྡོ་རྗེ་གདན་དུ། ༸གོང་ས་མཆོག་གིས་རྒྱལ་ཁབ་ཕྱི་ནང་ཀུན་ནས་ཕེབས་པའི་དད་ལྡན་མང་ཚོགས་རྣམས་ལ་སེམས་བསྐྱེད་དང་བྱང་ཆུབ་སེམས་འགྲེལ་གྱི་བཀའ་ཆོས་དབུ་འཛུགས་གནང་འདུག སྐབས་དེར་༧གོང་ས་མཆོག་གིས་སེམས་རྒྱུད་འདུལ་དགོས་པ་ཆོས་ཀྱི་སྙིང་པོ་རེད། བྱང་ཆུབ་ཀྱི་སེམས་ནི་དངོས་གནས་སེམས་ཀྱི་གཏིང་ནས་རང་གཙོ་བོར་མི་བྱེད་པར་གཞན་གཅེས་པར་འཛིན་པ་དང་། རང་ནི་གཅིག་དང་གཞན་ནི་མཐའ་ཡས་པ་རེད། དེར་བརྟེན། མཐའ་ཡས་པའི་སེམས་ཅན་གྱི་དོན་དུ་སེམས་བཟང་པོ་བསྐྱེད་པ་ཡིན་ན་རང་དོན་ཞོར་ལ་འགྲུབ་པ་ཞིག་རེད། ཅེས་བཀའ་བསྩལ་འདུག

ཕྱི་ལོ་༢༠༡༨ ཟླ་༡༢ ཚེས་༢༦ ཉིན། གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བའི་ནང་དུ། ༧གོང་ས་མཆོག་གིས་ཝེ་དུ་ནམ་གྱི་དད་ལྡན་ཆོས་ཞུ་བ་དྲུག་བརྒྱ་ལྷག་ལ་བཀའ་སློབ་སྩོལ་དོན། སེམས་བཟང་པོ་བྱེད་པ་ནི་ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་ཞིག་རེད། བྱམས་བརྩེ་ལ་བསམ་བློ་བཏང་ན་སེམས་ལ་ཞི་བདེ་ཡོང་བ་དང་། བློ་ལྷོད་ཤིག་གེར་འགྲོ་བ་ཞིག་རེད། ཁོང་ཁྲོ་དང་ང་རྒྱལ། ཕྲག་དོག་བཅས་ནི་སེམས་མ་བདེ་བ་ཡོང་རྐྱེན་ཞིག་རེད། གཞན་ཕན་གྱི་སེམས་བཟང་པོ་བྱེད་དགོས་པ་རེད་ཟེར་བ་ནི་དངོས་གནས་ཕན་ཐོགས་ཆེན་པོ་ཡོད་པ་ཞིག་རེད། ཁོང་ཁྲོ་དང་ང་རྒྱལ། ཕྲག་དོག་བཅས་རང་བཞིན་གྱིས་ཤུགས་ཆུང་དུ་གཏོང་བ་དང་། ཐ་ན་ཉིན་ཞག་རེ་རེའི་ནང་དུ་གཉིད་ཀྱང་ཡག་པོ་ཁུགས་ཐུབ་པ་ཞིག་རེད། ཅེས་གསུངས་འདུག