རྒྱལ་སྤྱིའི་བོད་ཀྱི་ཆ་འཕྲིན།
རང་དབང་གི་འབོད་སྒྲ
ཕྱི་ལོ་༢༠༢༢་ཟླ་༤ཚེས་༢༦ཉིན། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་འཁོར་སྙན་ཐོ་ནང་དུ། བོད་ནང་གི་སྐད་ཡིག་དང་སློབ་གསོའི་ཁ་ཕྱོགས་རྒྱ་ནག་ཅན་དུ་བསྒྱུར་བཞིན་པ་དང་། <མི་རིགས་མཐུན་སྒྲིལ་>དང་<སྤྱི་ཚོགས་རིང་ལུགས་འཛུགས་བསྐྲུན>་གྱི་མིང་ཐོག་ནས་མི་རིགས་དང་རིག་གཞུང་རྒྱ་ནག་ཅན་དུ་བསྒྱུར་བཞིན་པ། བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བཞིན་འདུག ཅེས་འགྲེལ་བརྗོད་བྱས་འདུག
ཕྱི་ལོ་༢༠༢༢་ཟླ་༤་ཚེས་༡༨་ཉིན། བཞུགས་སྒར་རྡ་སར་རྒྱ་གར་རྒྱལ་ཡོངས་བཙན་བྱོལ་བོད་མིའི་ཚོང་པ་ཚོགས་པའི་སྐབས་ལྔ་པའི་འགན་འཛིན་ལྷན་ཚོགས་ཐེངས་དང་པོ་འགོ་འཛུགས་གནང་སོང་། ཐེངས་འདིའི་ཚོགས་འདུའི་ཐོག ཚོགས་པ་འདིའི་མ་འོངས་པའི་ལས་དོན་ཐད་གོ་བསྡུར་དང་འཆར་གཞི་སྒྲིག་རྒྱུ་ཡིན་འདུག
ཕྱི་ལོ་༢༠༢༢་ཟླ་༤་ཚེས་༤་ཉིན། བོད་མདོ་སྨད་རྔ་བ་ནས་ཡིན་པའི་རང་ལོ་༨༡་སོན་པའི་བོད་མི་བཀྲ་ཕུན་ལགས་ཀྱིས་རྔ་པ་ཀིརྟི་དགོན་པར་ལྟ་རྟོག་བྱེད་མཁན་གྱི་ཉེན་རྟོག་ལས་ཁུངས་མདུན་དུ། རྒྱ་གཞུང་གིས་བོད་ཐོག་འཛིན་པའི་གདུག་རྩུབ་ཅན་གྱི་སྲིད་བྱུས་ལ་ངོ་རྒོལ་བྱེད་ཆེད་རང་ལུས་མེར་བསྲེགས་གནང་ནས་འདས་གྲོངས་སུ་གྱུར་ཡོད་པར། བོད་ཀྱི་གཞུང་འབྲེལ་མིན་པའི་ཚོགས་པ་ལྔ་ཡི་གོ་སྒྲིག་འོག རྡ་སའི་བོད་མི་དང་བོད་དོན་རྒྱབ་སྐྱོར་བ་རྣམས་ཀྱིས་ཁོང་ལ་མྱ་ངན་དང་། ཁོང་གི་ནང་མི་རྣམས་ལ་གདུང་སེམས་མཉམ་བསྐྱེད་ཀྱི་མར་མེའི་ཁྲོམ་སྐོར་གནང་སོང་།
ཕྱི་ལོ་༢༠༢༢་ཟླ་༣་ཚེས་༡༨་དང་བོད་ཟླ་༡་ཚེས་༡༥་ཆོ་འཕྲུལ་དུས་ཆེན་ཉིན། ༧གོང་ས་མཆོག་གིས་གཙུག་ལག་ཁང་དུ་སྐྱེས་རབས་དང་སེམས་བསྐྱེད་ཀྱི་ཆོས་འབྲེལ་གནང་སྟེ། བྱང་ཆུབ་ཀྱི་སེམས་དང་འབྲེལ་བའི་སེམས་བཟང་པོ་བྱེད་དགོས་པ་དང་གཞོན་སྐྱེས་ཚོས་བོད་སྐད་ཡིག་ཧུར་ཐག་གིས་སྦྱོང་དགོས་སྐོར། ལུས་འདི་རྒྱ་གར་དུ་ཡོད་ཀྱང་། སེམས་ཀྱིས་བོད་གངས་ཅན་ལྗོངས་ཀྱི་བདེན་དོན་དང་། གཙོ་བོ་ཆོས་དང་རིག་གཞུང་བདག་པོ་བརྒྱབ་ནས་བསྡད་ཡོད། ཅེས་གསུངས་སོང་།
ཕྱི་ལོ་༢༠༢༢་ཟླ་༤་ཚེས་༡༥་ཉིན། བོན་གྱི་གདན་ས་ཆེན་མོ་དཔལ་གཤེན་བསྟན་སྨན་རིའི་གླིང་དུ། བོད་ཀྱི་མཐོ་རིམ་སློབ་མའི་ཚོགས་ཆེན་སྐབས་བཅོ་ལྔ་པའི་ཚོགས་འདུ་མཇུག་སྡུད་གནང་འདུག དེར་ཚོགས་བཅར་༨༠་ལྷག་མཉམ་ཞུགས་གནང་ནས། ལོ་རྒྱུས་ཐོག་བོད་དེ་རང་རྐྱ་ཐུབ་པའི་རྒྱལ་ཁབ་ཅིག་ཡིན་པའི་སྒྲུབ་བྱེད་བཤད་པ་དང་། བོད་ཀྱི་ཆོས་དང་རིག་གཞུང་སྲུང་སྐྱོབ་ཆེད་ཁྱིམ་ཚང་ནང་དུ་བོད་ཡིག་ཉར་ཚགས་བྱ་ལུགས་དང་དགེ་ཕན་བཤད་པ། བོད་བཙན་པོའི་སྐབས་ཀྱི་ཤེས་འཇོན་གཉིས་ལྡན་གྱི་རླབས་ཆེའི་བུད་མེད་དག་ལ་མིག་དཔེར་བཟུང་སྟེ་དམིགས་བསལ་བུད་མེད་ལ་འཁྲི་བའི་འོས་འགན་གླེང་བ་སོགས་བརྗོད་གཞི་ཁག་༡༣ ཐོག་གཏམ་བཤད་དང་བགྲོ་གླེང་གནང་འདུག
ཕྱི་ལོ་༢༠༢༢་ཟླ་༣་ཚེས་༢༧་ཉིན། བཞུགས་སྒར་རྡ་ས་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། ཏཱ་ལའི་བླ་མའི་དགེ་རྩ་ཚོགས་པའི་མཐུན་སྦྱོར་འོག བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་གིས་དབྱིན་ཡིག་ནང་ཡོད་པའི་༸རྒྱལ་བའི་གསུང་རྩོམ་དཔེ་དེབ་བདུན་བོད་འགྱུར་བྱས་ནས་དབུ་འབྱེད་གནང་སོང་།
ཕྱི་ལོ་༢༠༢༢ ཟླ་༣ ཚེས་༡༤ ཉིན། བཞུགས་སྒར་རྡ་ས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་ཁང་དུ། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་གཉིས་པ་དབུ་འཛུགས་གནང་ནས། བོད་ནང་གི་ཛ་དྲག་གནས་སྟངས་ཐོག་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དང་། གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་ཁག་བཞག་གནང་རྒྱུ་ཡིན་འདུག
བོད་ཀྱི་ཆབ་སྲིད་བཙོན་ཟུར་གྲགས་ཅན་སོག་མཁར་བློ་གྲོས་སམ་བློ་གྲོས་རྒྱ་མཚོ་ལགས་ཀྱི་པར།
པར་དབུས་བོད་མིའི་སྒྲིག་འཛུགས་དྲ་བར་བླངས།
ཁེ་ན་ཌའི་གྲོས་ཚོགས་གོང་མའི་ནང་བོད་མི་ཆབ་སྲིད་བཙོན་པའི་གནས་སྟངས་རྟོག་ཞིབ་གནང་བ།
དཔལ་ལྡན་སྲིད་སྐྱོང་བློ་བཟང་སེངྒེ་མཆོག་གིས་ཁེ་ན་ཌའི་གྲོང་ཁྱེར་ཊོ་རོན་ཊོར་བོད་མི་རྣམས་ལ་གསུང་བཤད་གནང་བཞིན་པ། པར་དབང་དབུས་བོད་མིའི་སྒྲིག་འཛུགས་ལ་ཡོད།
