ཕྱི་ལོ་༢༠༢༣ ཟླ་༣ ཚེས་༢༢་ཉིན་སྤེལ། གངས་ཅན་སྐྱིད་གཤོངས་ཀྱི་གྲོས་ཚོགས་ཚོགས་ཁང་དུ། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ལས་ཉིན་བདུན་པའི་ཚོགས་ཐུན་བཞི་པའི་ཐོག བོད་མིའི་སྒྲིག་འཛུགས་ཀྱི་དཔལ་འབྱོར་བཀའ་བློན་མཆོག་གིས་དཔྱ་དངུལ་འབུལ་འབབ་ཆག་ཡང་དང་འབྲེལ་བའི་གཞུང་འབྲེལ་གྲོས་ཆོད་གྲོས་འཆར་ཞིག་བཏོན་གནང་བར། སྤྱི་འཐུས་རྣམ་པས་བགྲོ་གླེང་ལྷུགས་པོ་གནང་རྗེས། རྒྱ་བལ་འབྲུག་གསུམ་དང་ཕྱི་རྒྱལ་ཡུལ་གྲུ་ཁག་ནང་གནས་པའི་བོད་རིགས་དཔྱ་དངུལ་ལོ་མང་འབུལ་ཆད་སོང་བ་དང་། གསར་བཟོ་མ་ཐུབ་པ་རྣམས་ལ་རྩིས་ལོ་༢༠༢༢་་་༢༣ བར་གྱི་དཔྱ་དངུལ་འབུལ་ཆད་ཇི་ཡོད་ཀྱི་བརྒྱ་ཆ་༩༠ ཆག་ཡང་དང་འཕྲོས་བརྒྱ་ཆ་༡༠ དོ་བདག་ནས་སྡེབ་འབུལ་དགོས་ཡོད་པའི་གྲོས་ཆོད་གྲོས་འཆར་སྤྱི་མོས་གཏན་འབེབ་གནང་སོང་།

ཕྱི་ལོ་༢༠༢༣ ཟླ་༣ ཚེས་༡༥་ཉིན། བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུས་སོང་། སྐབས་དེར། ༧གོང་ས་མཆོག་གིས་ངོས་རང་གཟུགས་པོ་བདེ་ཐག་ཆོད་ཡོད། ད་དུང་ཡང་བོད་ཀྱི་བསྟན་སྲིད་ཆེད་དུ་མི་ལོ་བཅུ་ཕྲག་ཆ་ཤས་བསྡད་ནས་ཞབས་འདེགས་ཞུ་ཐུབ་ཀྱི་རེད། ཅེས་གསུངས་སོང་།

ཕྱི་ལོ་༢༠༢༣་ཟླ་༣་ཚེས་༡༢ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་དཔའ་བོའི་རྡོ་རིང་མདུན་ནས་རྡ་ཤོད་ཀ་ཅ་རི་བར་དུ། དབུས་དང་ས་གནས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག བོད་ཀྱི་བུད་མེད་གཙོས་བོད་མི་རྒན་གཞོན་དར་གསུམ་ནས་ཞི་བའི་གོམ་བགྲོད་ལམ་ནས་བོད་ཀྱི་བུད་མེད་སྒེར་ལངས་ཐེངས་ ༦༤ པ་སྲུང་བརྩི་ཞུས་སོང་།

ཕྱི་ལོ་༢༠༢༣ ཟླ་༣ ཚེས་༢༠ཉིན་སྤེལ། གངས་ཅན་སྐྱིད་གཤོངས་ཀྱི་གྲོས་ཚོགས་ཚོགས་ཁང་དུ། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པའི་ཉིན་བཞི་པའི་ཚོགས་ཐུན་དང་པོའི་ཐོག བོད་ཀྱི་བདེན་པའི་འཐབ་རྩོད་ལ་རྒྱབ་སྐྱོར་ཤུགས་ཆེན་གནང་མཁན་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནེན་སི་པི་ལོ་སི་ (Nancy Pelosi) མཆོག་ལ་བོད་མི་མང་སྤྱི་འཐུས་ལྷན་ཚོགས་ཀྱིས་སྤྱི་མོས་ཐོག་ནས་གཞུང་འབྲེལ་ཐུགས་རྗེ་ཆེ་ཞུའི་གྲོས་ཆོད་གཏན་འབེབས་གནང་འདུག

ཕྱི་ལོ་༢༠༢༣ ཟླ་༣ ཚེས་༡༥ ཉིན། གངས་ཅན་སྐྱིད་གཤོངས་ཀྱི་གྲོས་ཚོགས་ཚོགས་ཁང་དུ། ཉིན་བཅུའི་རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་དབུ་འཛུགས་གནང་སོང་། སྐབས་དེར། ཚོགས་གཙོ་མཆོག་གིས་༸གོང་ས་མཆོག་གི་ཐུགས་དགོངས་གང་ཡོད་བསྒྲུབ་ཐུབ་པ་དང་སྐུ་ཚེ་ཡུན་རིང་འཚོ་བཞུགས་ཐུབ་པར་བོད་ཆོལ་ཁ་གསུམ་གྱི་བོད་མི་རྣམས་ཀྱིས་མཐུན་ལམ་རྡོག་རྩ་གཅིག་སྒྲིལ་གནང་དགོས་པ་དང་། བོད་ནང་གི་བོད་མི་ཚོས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས། བཙན་བྱོལ་བོད་མི་རྣམས་ལ་རེ་བ་དང་ཡིད་ཆེས་གནང་གི་ཡོད་རེད། དེར་བརྟེན་ཚང་མས་དེའི་ཐོག་བསམ་བློ་བཏང་ནས་མུ་མཐུད་ནས་འགན་ཁུར་བཞེས་དགོས་རྒྱུ་གལ་ཆེན་པོ་རེད་འདུག་ཅེས་ཞུ་རྒྱུ་ཡིན། ཅེས་གསུངས་སོང་།

ཕྱི་ལོ་༢༠༢༣་ཟླ་༣་ཚེས་༡༠་ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་ནས་རྡ་ཤོད་ཀ་ཅ་རི་བར་དུ། གཞུང་འབྲེལ་མིན་པའི་ཚོགས་པ་བཞི་ཡི་གོ་སྒྲིག་འོག བོད་མི་བརྒྱ་ཕྲག་འགའ་ཡིས་ཞི་བའི་གོམ་བགྲོད་ལམ་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༤ པ་སྲུང་བརྩི་ཞུས་སོང་།