ཕྱི་ལོ་༢༠༢༤ ཟླ་༣ ཚེས་༤ཉིན་སྤེལ། བོད་ཁམས་ཉག་ཆུ་རྫོང་ནས་ཡིན་པའི་དགེ་འདུན་པ་བསྟན་འཛིན་མཁྱེན་རབ་ལགས་རྒྱ་གཞུང་ཉེན་རྟོག་པས་༸གོང་ས་མཆོག་གི་སྐུ་པར་ཉར་བའི་ཉེས་མིང་འོག་འཛིན་བཟུང་བྱས་ནས་ལོ་གཅིག་ལྷག་ཕྱིན་ཡོད་ཀྱང་། ད་ལྟའི་ཆར་ཁོང་གི་སྐོར་ལ་གནས་ཚུལ་གང་ཡང་གོ་ཐོས་བྱུང་མེད་པ་དང་། ཁོང་གི་ཨ་མས་ཁོང་ལ་སེམས་ཁྲལ་ཤུགས་ཆེན་བྱེད་བཞིན་ཡོད་ཅིང་ཁོ་མོ་ན་ནས་སྨན་ཁང་དུའང་ཁྲིད་ཡོད་འདུག

ཕྱི་ལོ་༢༠༢༤་ཟླ་༢ ཚེས་༥ཉིན་སྤེལ། རྔ་བ་ཀིརྟི་དགོན་གྱི་དཔེ་མཛོད་འགན་འཛིན་ཟུར་པ་དགེ་འདུན་པ་བློ་བཟང་ཐབས་མཁས་ལགས་རྒྱ་གཞུང་གིས་བོད་ཕྱི་ཕྱོགས་ཀྱི་དཔེ་དེབ་བོད་ནང་དཔར་བསྐྲུན་བྱས་པ་དང་བཙན་བྱོལ་དུ་ཡོད་པའི་བོད་མིར་འབྲེལ་བའི་བྱས་པའི་ཉེས་མིང་འོག་འཛིན་བཟུང་བྱས་ཡོད་འདུག ཁོང་ཟླ་བ་དྲུག་ཕྱིན་ཡོད་ཀྱང་ཁོང་གི་སྐོར་གནས་ཚུལ་གང་ཡང་ཤེས་རྟོགས་བྱུང་མེད་པ་རེད།

ཕྱི་ལོ་༢༠༢༣་ཟླ་༤་ཚེས་༧་ཉིན་སྤེལ། རྒྱ་གཞུང་གིས་“བོད་བཅིངས་གྲོལ་བཏང་བའི་ལོ་རྒྱུས”ཞེས་པ་ཁྱབ་བསྒྲགས་བྱེད་ཆེད་ཁང་པ་དང་འགྲེམས་སྟོན་ཁག་ཅིག་ལ་“རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་”ཟེར་བ་ཁག་ཅིག་གསར་དུ་མིང་བཏགས་ཡོད་འདུག་པ་མ་ཟད། ད་དུང་བོད་ལ་བཙན་འཛུལ་བྱས་པར་“བོད་བཅིངས་གྲོལ་བཏང་བ་”ཟེར་ནས་དྲིལ་བསྒྲགས་དང་སློབ་གསོ་ཡང་སྤེལ་བཞིན་ཡོད་འདུག

ཕྱི་ལོ་༢༠༢༤ ཟླ ༢ ཚེས་༢༧་ཉིན་སྤེལ། ཉེ་ཆར་རྒྱ་གཞུང་གིས་བོད་ཁམས་སྡེ་དགེ་མི་མང་གི་དངོས་འདོད་ལ་མ་བསྟུན་པ་ས་ཁུལ་དེར་ཆུ་མཛོད་རྒྱག་རྒྱུ་ཡིན་པས་རྫོང་དེའི་དགོན་པ་དྲུག་དང་གྲོང་སྡེ་གཉིས་ཀྱི་བོད་མི་རྣམས་ས་གནས་གཞན་དུ་གནས་སྤོ་བྱེད་དགོས་པའི་བཙན་བཀའ་གཏོང་དུས། དགེ་འདུན་པ་གཙོས་པའི་བོད་མི་རྣམས་ཀྱིས་ས་གནས་སྲིད་གཞུང་དང་ལས་བྱེད་ལ་པུས་མོ་སར་བཙུགས་ཏེ་ངུ་འབོད་བྱས་ནས་ཆུ་མཛོད་མ་རྒྱག་རོགས། ང་ཚོའི་ལོ་རྒྱུས་ཡུད་རིང་ལྡན་པའི་དགོན་པ་གཏོར་བཤིག་མ་གཏོང་རོགས། ང་ཚོའི་ཕ་མེས་ཡས་མེས་ཀྱི་ཁྱིམ་གཞི་བཞག་ནས་འགྲོ་མ་བཅུག་རོགས་བཅས་ཞུ་བ་རིམ་པ་བྱས་དང་བྱེད་བཞིན་ཡོད་ཀྱང་། རྒྱ་གཞུང་གིས་བོད་མིའི་འདོད་ཐོག་ལ་བཞག་པའི་ཚབ་ཏུ་ད་དུང་ཞི་བའི་ངོ་རྒོལ་བྱེད་མཁན་ཚོ་གཅར་རྡུང་དང་བོད་མི་གཅིག་སྟོང་ལྷག་འཛིན་བཟུང་བཙན་ཁྲིད་བྱས་ཡོད་འདུག

བོད་རིགས་དཔོན་པོ་ཡེ་ཤེས་རྡོ་རྗེ། པར། བརྒྱུད་ལམ།

ཕྱི་ལོ་༢༠༢༤་ཟླ་༢ ཚེས་༣་ཉིན་སྤེལ། དེ་སྔ་དཀར་མཛེས་ཁུལ་རྟའུ་རྫོང་ཉེན་རྟོག་དཔོན་གཞོན་པ་ཟུར་པ་དང་། ལི་ཐང་རྫོང་སྲིད་གཞུང་གི་རྫོང་དཔོན་གཞོན་པ་ཟུར་པ་བོད་རིགས་ཡེ་ཤེས་རྡོ་རྗེ་ཟེར་བ་ཞིག་གིས་རྒྱ་ནག་སྲིད་གཞུང་གི་ཁྲིམས་འགལ་ཡོད་ཚུལ་དང་ལྐོག་རྔན་ལེན་པའི་ཉེས་མིང་འོག མི་ལོ་༡༣་བཙོན་འཇུག་ཁྲིམས་ཐག་བཅད་ཡོད་པ་དང་དངུལ་ཆད་རྒྱ་སྒོར་ཁྲི་༧༡་བཅད་ཡོད་འདུག

ཕྱི་ལོ་༢༠༢༣་ཟླ་༣་ཚེས་༡་ཉིན་སྤེལ། རྒྱ་གཞུང་གིས་ཕྱི་ལོ་༢༠༢༢་ལོའི་ནང་དུ་ནག་འཇོམས་ངན་སེལ་ཟེར་བའི་སྲིད་བྱུས་ཀྱི་འོག་ནས། ཚོགས་པ་མང་པོ་ཞིག་ནག་ཚོགས་དང་ཁྲིམས་འགལ་རེད་ཟེར་ནས་མེད་པར་བཟོས་ཡོད་སྐོར་གསལ་འདུག འདི་ནི་རྒྱ་གཞུང་གིས་རང་གི་ལྟ་བ་དང་མི་མཐུན་པའི་ཚོགས་པ་དང་མི་སྒེར་རྩ་མེད་བཟོ་བའི་སྲིད་བྱུས་ཞིག་དང་འགྲོ་བ་མིའི་ཐོབ་ཐང་ལ་རྡོག་རོལ་གཏོང་བའི་སྲིད་བྱུས་ཞིག་ཡིན་པར་བརྗོད་ཀྱི་འདུག