ཕྱི་ལོ་༢༠༡༨ ཟླ་༡༢ ཚེས་༢༦ ཉིན། གནས་མཆོག་རྡོ་རྗེ་གདན་གྱི་དུས་དབང་གསུང་ཆོས་ར་བའི་ནང་དུ། ༧གོང་ས་མཆོག་གིས་ཝེ་དུ་ནམ་གྱི་དད་ལྡན་ཆོས་ཞུ་བ་དྲུག་བརྒྱ་ལྷག་ལ་བཀའ་སློབ་སྩོལ་དོན། སེམས་བཟང་པོ་བྱེད་པ་ནི་ཁ་ཡོད་ལག་ཡོད་ཀྱིས་ཕན་ཐོགས་ཡོད་པ་ཞིག་རེད། བྱམས་བརྩེ་ལ་བསམ་བློ་བཏང་ན་སེམས་ལ་ཞི་བདེ་ཡོང་བ་དང་། བློ་ལྷོད་ཤིག་གེར་འགྲོ་བ་ཞིག་རེད། ཁོང་ཁྲོ་དང་ང་རྒྱལ། ཕྲག་དོག་བཅས་ནི་སེམས་མ་བདེ་བ་ཡོང་རྐྱེན་ཞིག་རེད། གཞན་ཕན་གྱི་སེམས་བཟང་པོ་བྱེད་དགོས་པ་རེད་ཟེར་བ་ནི་དངོས་གནས་ཕན་ཐོགས་ཆེན་པོ་ཡོད་པ་ཞིག་རེད། ཁོང་ཁྲོ་དང་ང་རྒྱལ། ཕྲག་དོག་བཅས་རང་བཞིན་གྱིས་ཤུགས་ཆུང་དུ་གཏོང་བ་དང་། ཐ་ན་ཉིན་ཞག་རེ་རེའི་ནང་དུ་གཉིད་ཀྱང་ཡག་པོ་ཁུགས་ཐུབ་པ་ཞིག་རེད། ཅེས་གསུངས་འདུག

ཕྱི་ལོ་༢༠༢༢་ཟླ་༡༢་ཟླ་༡༠་ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། འགྲོ་བ་མིའི་ཐོབ་ཐང་ཉིན་མོ་དང་༸གོང་ས་མཆོག་ལ་ནོ་བྷེལ་ཞི་བདེའི་གཟེངས་རྟགས་ཕུལ་ནས་ལོ་ངོ་༣༣ འཁོར་བའི་དུས་དྲན་མཛད་སྒོ་ཚོགས་གནང་སོང་། སྐབས་དེར། བོད་མི་མང་སྤྱི་འཐུས་ལྷན་ཚོགས་ནས་རྒྱ་ནག་གཞུང་གི་ངན་བྱུས་དང་། བཙན་གནོན་འོག་གཞིས་ལུས་བོད་མི་རྣམས་ཉིན་མཚན་འཁྱོལ་དཀའི་མནར་གཅོད་སྡུག་སྦྱོང་མྱངས་དང་མྱོང་བཞིན་པའི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་དང་། ད་བར་གཞིས་བཞུགས་རྒྱལ་གཅེས་དཔའ་བོ་དཔའ་མོ་འདས་གསོན་ཡོངས་ཀྱི་ལྷག་བསམ་དང་། དཔའ་མཛངས་སྙིང་སྟོབས། བླ་ན་མེད་པའི་མཛད་རྗེས་བཅས་ལ་ཡི་རངས་བསྔགས་བརྗོད་བཅས་ཞུ་བཞིན་ཡོད། བོད་དོན་བདེན་མཐའ་གསལ་ཆེད་རང་དབང་ལུང་པར་ཡོད་པའི་བོད་མི་རྣམས་ནས་ཆིག་སྒྲིལ་གྱི་སྒོ་ནས་བོད་དོན་དྲིལ་བསྒྲགས་དང་ཞུ་སྐུལ་ལས་འགུལ་སོགས་ཀྱི་ཐོག་ལ་ནུས་པ་མཉམ་སྤུངས་དང་གོ་སྐབས་དམ་འཛིན་དགོས་པའི་ནན་སྐུལ་ཞུ་རྒྱུ་ཡིན། ཞེས་གསུངས་སོང་།

ཕྱི་ལོ་༢༠༢༢ཟླ་༡༢ ཚེས་༩ ཉིན། བཞུགས་སྒར་རྡ་སའི་ཡོངས་གླིང་སློབ་གྲྭ་རུ་ཁེ་ན་ཌར་རྟེན་གཞི་བྱས་པའི་གཡག་རྒོད་རྩོམ་སྒྲིག་ཚོགས་ཆུང་དང་འཇམ་དབྱངས་ཤེས་ཡོན་ཞབས་ཞུ་ཁང་། མུ་ཏིག་བྱིས་སྒྲུང་དཔེ་ཚོགས། བོད་ཀྱི་སྒྲ་སྒྱུར་དང་ཉམས་ཞིབ་ལྷན་ཁང་བཅས་མཉམ་འབྲེལ་ཐོག་ནས་བྱིས་སྒྲུང་རི་མོ་དང་བྱིས་སྒྲུང་དཔེ་དེབ་འགྲེམས་སྟོན་གནང་སོང་།

ཕྱི་ལོ་༢༠༢༢ཟླ་༡༢ཚེས་༡༠ཉིན། རྒྱལ་སྤྱིའི་འགྲོ་བ་མིའི་ཐོབ་ཐང་ཉིན་མོ་དང་བསྟུན་ནས། རྒྱ་གཞུང་གིས་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་ལ་རྡོག་རོལ་དང་། བོད་མིར་གཉའ་གནོན། འགྲོ་འོང་སོགས་དམ་དྲག་བྱས་དང་བྱེད་བཞིན་ཡོད་པར་ངོ་རྒོལ་བྱེད་ཆེད། རྒྱ་གར་དང་། ཨ་རི། ཨོ་གླིང་། ནིའུ་ཛི་ལེན་ཌི། དབྱིན་ལེན། ནེ་རྡར་ལེན་ཌི། སི་པེན། ཐེ་ཝན། ཉི་ཧོང་སོགས་སུ། བོད་དོན་ལས་འགུལ་བ་དང་བོད་དོན་རྒྱབ་སྐྱོར་བ་རྣམས་ཀྱིས་རྒྱ་གཞུང་ལ་ངོ་རྒོལ་གྱི་འབོད་ཚིག་བསྒྲགས་ནས་གཞི་རྒྱ་ཆེའི་ངོ་རྒོལ་གྱི་ལས་འགུལ་སྤེལ་འདུག

ཕྱི་ལོ་༢༠༢༢་ཟླ་༡༢་ཟླ་༡༠་ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་༸རྒྱལ་བའི་དབང་པོ་སྐུ་ཕྲེང་བཅུ་བཞི་པ་ཆེན་པོ་མཆོག་ལ་ནོ་བྷེལ་ཞི་བདེའི་གཟེངས་རྟགས་ཕུལ་ནས་ལོ་ངོ་༣༣ འཁོར་བའི་དུས་དྲན་མཛད་སྒོ་ཚོགས་གནང་སོང་། སྐབས་དེར། བཀའ་ཤག་གིས་བོད་དོན་བདེན་མཐའ་གསལ་བར་འབད་པ་བསྟེན་མཁན་གྱི་བོད་མི་རིགས་ལ་མཚོན་ནའང་། ༸མགོན་པོ་མཆོག་གི་གདམས་ངག་འདི་དག་ནི་ང་ཚོར་སྙིང་སྟོབས་དང་བློ་སྤོབས་འཕེལ་སྐྱེད་ཀྱི་སྨན་མཆོག་ཏུ་འཛིན་དགོས་ཤིང་། ང་ཚོས་དུས་ཆེན་སྲུང་བརྩིའི་དགོས་དོན་ངོ་མའང་འདི་ཡིན། ཞེས་གསུངས་སོང་།

ཕྱི་ལོ་༢༠༢༢་ཟླ་༡༢་ཚེས་༢ཉིན། བཞུགས་སྒར་རྡ་ས་མོག་གྷན་གྱི་སྤྱི་ཐང་དུ། དབུས་དང་ས་གནས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག རྡ་ས་མི་མང་གིས་བོད་ནང་གི་ཛ་དྲག་གི་གནས་སྟངས་དང་རྒྱ་ནག་ནང་ལ་ཏོག་ནད་གཙང་སེལ་གྱི་སྲིད་ཇུས་ཀྱིས་དཀའ་ངལ་འཕྲད་ནས་ངོ་རྒོལ་བྱས་དང་བྱེད་བཞིན་པ་མི་རྣམས་ལ་གདུང་སེམས་མཉམ་སྐྱེད་ཀྱི་མར་མེ་ཁྲོམ་སྐོར་གནང་སོང་།