ཕྱི་ལོ་༢༠༢༣ ཟླ་༣ ཚེས་༡༥་ཉིན། བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱིས་གཞིས་བྱེས་བོད་མི་ཡོངས་ཀྱི་ཚབ་ཞུས་ཏེ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུས་སོང་། སྐབས་དེར། ༧གོང་ས་མཆོག་གིས་ངོས་རང་གཟུགས་པོ་བདེ་ཐག་ཆོད་ཡོད། ད་དུང་ཡང་བོད་ཀྱི་བསྟན་སྲིད་ཆེད་དུ་མི་ལོ་བཅུ་ཕྲག་ཆ་ཤས་བསྡད་ནས་ཞབས་འདེགས་ཞུ་ཐུབ་ཀྱི་རེད། ཅེས་གསུངས་སོང་།
སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་དབུ་འཛུགས་གནང་སོང་།
ཕྱི་ལོ་༢༠༢༣ ཟླ་༣ ཚེས་༡༥ ཉིན། གངས་ཅན་སྐྱིད་གཤོངས་ཀྱི་གྲོས་ཚོགས་ཚོགས་ཁང་དུ། ཉིན་བཅུའི་རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ལྔ་པ་དབུ་འཛུགས་གནང་སོང་། སྐབས་དེར། ཚོགས་གཙོ་མཆོག་གིས་༸གོང་ས་མཆོག་གི་ཐུགས་དགོངས་གང་ཡོད་བསྒྲུབ་ཐུབ་པ་དང་སྐུ་ཚེ་ཡུན་རིང་འཚོ་བཞུགས་ཐུབ་པར་བོད་ཆོལ་ཁ་གསུམ་གྱི་བོད་མི་རྣམས་ཀྱིས་མཐུན་ལམ་རྡོག་རྩ་གཅིག་སྒྲིལ་གནང་དགོས་པ་དང་། བོད་ནང་གི་བོད་མི་ཚོས་༸སྐྱབས་མགོན་ཆེན་པོ་མཆོག་དང་། བོད་མིའི་སྒྲིག་འཛུགས། བཙན་བྱོལ་བོད་མི་རྣམས་ལ་རེ་བ་དང་ཡིད་ཆེས་གནང་གི་ཡོད་རེད། དེར་བརྟེན་ཚང་མས་དེའི་ཐོག་བསམ་བློ་བཏང་ནས་མུ་མཐུད་ནས་འགན་ཁུར་བཞེས་དགོས་རྒྱུ་གལ་ཆེན་པོ་རེད་འདུག་ཅེས་ཞུ་རྒྱུ་ཡིན། ཅེས་གསུངས་སོང་།
བོད་མི་ཚོས་ཞི་བའི་གོམ་བགྲོད་ལམ་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་༦༤ པ་སྲུང་བརྩི་ཞུས་སོང་།
ཕྱི་ལོ་༢༠༢༣་ཟླ་༣་ཚེས་༡༠་ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་ནས་རྡ་ཤོད་ཀ་ཅ་རི་བར་དུ། གཞུང་འབྲེལ་མིན་པའི་ཚོགས་པ་བཞི་ཡི་གོ་སྒྲིག་འོག བོད་མི་བརྒྱ་ཕྲག་འགའ་ཡིས་ཞི་བའི་གོམ་བགྲོད་ལམ་ནས་བོད་མིའི་རང་དབང་སྒེར་ལངས་གསུམ་བཅུའི་དུས་དྲན་ཐེངས་ ༦༤ པ་སྲུང་བརྩི་ཞུས་སོང་།
རྒྱ་ཧོར་བོད་གསུམ་ལ་རྒྱལ་བའི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་ཡག་པོ་ཡོང་ཐུབ་པར་ཕལ་ཆེར་ཡིད་ཆེས་ཡོད་ཅེས་༧གོང་ས་མཆོག་གིས་བཀའ་བསྩལ་སོང་།
ཕྱི་ལོ་༢༠༢༣ ཟླ་བ་༣ ཚེས་༧་ཉིན། བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་གིས་རྒྱ་ནག་གི་བོད་དོན་སྲིད་བྱུས་ལ་འགྱུར་བ་འགྲོ་བའི་བཟོ་ལྟ་ཧ་ཅང་གསལ་པོ་རེད། དེར་བརྟེན། ངོས་ཀྱིས་དུས་ད་ལྟ་བར་དུ། རྗེ་རིན་པོ་ཆེ་ཆོས་རྗེ་བློ་བཟང་གྲགས་པའི་ཕ་ཡུལ་གཅིག་པ་ཡིན་ལ་ཧུར་ཐག་འབད་བརྩོན་བྱས་པ་དེ་ལྟར་ཡིན། རིང་པོར་མི་ཐོགས་པར་རྒྱ་ཧོར་བོད་གསུམ་ལ་ཡོངས་སུ་རྫོགས་པའི་རྒྱལ་བའི་བསྟན་པ་ཉམས་པ་སོར་ཆུད་དང་མི་ཉམས་གོང་འཕེལ་ཡག་པོ་ཡོང་ཐུབ་པར་ཕལ་ཆེར་ཡིད་ཆེས་ཡོད། དེ་ལུགས་ཀྱིས་ཁྱོད་ཚོ་ཚང་མས་མི་ལ་ཆོས་བཤད་ནས་རྒྱུད་དུལ་བ་དགོས་ཞེས་མ་ལབ་སྔོན་དུ་སོ་སོས་སློབ་སྦྱོང་བྱས་ཏེ། སློབ་སྦྱོང་གི་དོན་ལ་ཉམས་ལེན་གྱིས་ག་ཚོད་ཐུབ་ཐུབ་ཀྱིས་མྱོང་བ་བསྐྱེད་ཐུབ་པ་ཞིག་བྱུང་ན་གོ་རིག་ཟུང་འཇུག་གི་ཐོག་ནས་མི་ལ་ཆོས་བཤད་ཐུབ་པ་ཞིག་རེད། ཅེས་བཀའ་བསྩལ་སོང་།
བོད་ནང་མནར་གཅོད་མཚམས་འཇོག་དགོས་ཞེས་གོམ་བགྲོད་ལམ་ནས་བོད་ཀྱི་བུད་མེད་སྒེར་ལངས་སྲུང་བརྩི་ཞུས་སོང་།
ཕྱི་ལོ་༢༠༢༣་ཟླ་༣་ཚེས་༡༢ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་དཔའ་བོའི་རྡོ་རིང་མདུན་ནས་རྡ་ཤོད་ཀ་ཅ་རི་བར་དུ། དབུས་དང་ས་གནས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག བོད་ཀྱི་བུད་མེད་གཙོས་བོད་མི་རྒན་གཞོན་དར་གསུམ་ནས་ཞི་བའི་གོམ་བགྲོད་ལམ་ནས་བོད་ཀྱི་བུད་མེད་སྒེར་ལངས་ཐེངས་ ༦༤ པ་སྲུང་བརྩི་ཞུས་སོང་།
རྡ་སར་གསུམ་བཅུ་དུས་དྲན་ཐེངས་༦༤པ་གཞུང་འབྲེལ་ཐོག་ནས་སྲུང་བརྩི་ཞུས་སོང་།
ཕྱི་ལོ་༢༠༢༣ ལོའི་ཟླ་༠༣ ཚེས་༡༠ ཉིན། བཞུགས་སྒར་རྡ་ས་ཐེག་ཆེན་གཙུག་ལག་ཁང་དུ་བོད་མིའི་སྒྲིག་འཛུགས་ཀྱི་མང་གཙོ་ཀ་བ་གསུམ་གྱི་མཛད་གཙོ་རྣམ་པ་དང་ཕྱི་རྒྱལ་ཡུལ་གྲུ་ཁག་ནས་ཕེབས་པའི་དམིགས་བསལ་སྐུ་མགྲོན་པ་རྣམ་པ་བཅས་གཙོས་པའི་རྡ་སར་འདུས་སྡོད་ཀྱི་བོད་མི་སེར་སྐྱ་མི་མང་ལྷན་འཛོམས་ཀྱི་ཐོག་ནས། བོད་མིའི་རང་དབང་སྒེར་ལངས་གསུམ་བཅུ་དུས་དྲན་ཐེངས་༦༤ པ་གཞུང་འབྲེལ་གྱི་ཐོག་ནས་སྲུང་བརྩི་ཞུས་སོང་།
བོད་ཀྱི་མཐོ་རིམ་སློབ་མའི་ཚོགས་ཆེན་ཐེངས་བཅུ་དྲུག་པ་འགོ་འཛུགས་གནང་འདུག
ཕྱི་ལོ་༢༠༢༣་ཟླ་༣་ཚེས་༡་ཉིན་སྤེལ། རྒྱ་གར་ལྷོ་ཕྱོགས་ཏཱ་ལའི་བླ་མ་མཐོ་རིམ་སློབ་གཉེར་ཁང་དུ། བོད་ཀྱི་མཐོ་རིམ་སློབ་མའི་ཚོགས་ཆེན་ཐེངས་བཅུ་དྲུག་པ་འགོ་འཛུགས་གནང་ཡོད་པ་དང་། འདི་ལོར་སློབ་མ་རྣམས་ཀྱིས་བོད་ཀྱི་ལོ་རྒྱུས་དང་རིག་གཞུང་། ཆོས་དང་ཚན་རིག ༧གོང་ས་མཆོག་གི་མཛད་པ་བཞི། བོད་རང་བཙན་སྐོར་སོགས་ཀྱི་བརྗོད་གཞི་ཉི་ཤུ་ཡི་སྟེང་ནས་གཏམ་བཤད་གནང་རྒྱུ་ཡིན་འདུག ཚོགས་ཆེན་འདིར་དགོན་སྡེ་དང་མཐོ་སློབ་ཁག་མི་འདྲ་བ་ལྔ་བཅུ་ང་བརྒྱད་ཀྱི་སློབ་མ་ཁྱོན་བསྡོམས་གྲངས་བརྒྱ་དང་བརྒྱད་ཅུ་མ་ཟིན་ཙམ་མཉམ་ཞུགས་ཡོད་སྐོར་བརྗོད་འདུག