ཕྱི་ལོ་༢༠༢༢ ཟླ་༡༠ ཚེས་༢༦། བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། བོད་ཁྱིམ་ལས་སློབ་ངོ་ཟུར་ཡོངས་དང་བྱང་ཨ་རི་བོད་རིགས་སྤྱི་མཐུན་ཚོགས་པ་གཉིས་ཀྱིས་ཇི་ལྟར་གསོལ་འདེབས་ཞུས་དོན་ལྟར། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་སྐུ་ཚེ་ཡུན་དུ་བརྟན་ཕྱིར་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་ཐོག་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུས་སོང་ལ། མགོན་པོ་གང་ཉིད་ཀྱིས་ད་དུང་ཡང་དགུང་གྲངས་བཅུ་ཕྲག་གཉིས་ལྷག་ལ་བཞུགས་རྒྱུའི་ཐུགས་སྐྱེད་ཡོད་སྐོར་གྱི་བཀའ་བཞེས་བཟང་པོ་སྩལ་གནང་མཛད་སོང་།

ཕྱི་ལོ་༢༠༢༢ཟླ་༡༠་ཚེས་༡༢ཉིན། བཞུགས་སྒར་རྡ་ས་མེག་གྷན་སྤྱི་ཐང་དུ། བོད་རྒྱལ་ཡོངས་མང་གཙོ་ཚོགས་པ་དང་རྒྱལ་སྤྱིའི་བོད་དོན་ལས་འགུལ་ཁང་གཉིས་ཀྱིས་གོ་སྒྲིག་འོག འཚོགས་ལ་ཉེ་བའི་སྟོབས་ཆེན་རྒྱལ་ཁབ་བདུན་གྱི་འགོ་ཁྲིད་རྣམས་ལ་རྒྱ་གཞུང་ནས་བོད་ཁུལ་ལ་འཛུགས་བསྐྲུན་བྱས་དང་བྱེད་བཞིན་པའི་བཅའ་སྡོད་དང་སྔོན་འགྲོ་སློབ་གྲྭ་རྣམས་མཚམས་འཇོག་བྱ་རྒྱུ་དང་། བོད་ཡིག་གཙོར་འགྱུར་བའི་སློབ་གྲྭ་རྣམས་སྒོ་རྒྱག་རྒྱུའི་བྱ་འགུལ་འདི་མཚམས་འཇོག་དགོས་པའི་དགོས་འདུན་རྒྱ་གཞུང་ལ་བཏོན་རྒྱུའི་འབོད་སྐུལ་ཞུ་དགོས་པའི་མཚན་རྟགས་བསྡུ་རུབ་ཀྱི་ལས་འགུལ་ཞིག་སྤེལ་སོང་།

ཕྱི་ལོ་༢༠༢༢ ཟླ་༩ ཚེས་༢ ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱིས་བོད་མིའི་མང་གཙོའི་དུས་ཆེན་ཐེངས་ ༦༢ སྲུང་བརྩི་ཞུས་སོང་། སྐབས་དེར། བཙན་བྱོལ་བོད་མི་རྣམས་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་དབུ་འཁྲིད་ལམ་སྟོན་འོག་རང་དབང་མང་གཙོའི་སྐལ་བཟང་ལ་ལོངས་སུ་སྤྱོད་བཞིན་ཡོད་ནའང་། གཞིས་བཞུགས་སྤུན་ཟླ་རྣམས་ནི་ད་དུང་ཡང་རྒྱ་ནག་དམར་པོའི་སྲིད་གཞུང་འོག་འགྲོ་བ་མིའི་ཐོབ་ཐང་གི་གཞི་རྩའི་རང་དབང་དང་། མང་གཙོ་སོགས་གང་ཡང་མེད་པར་ཉེས་མེད་འཛིན་བཟུང་དང་། བཀག་ཉར། བཙོན་འཇུག་ཁྲིམས་གཅོད། དྲག་གནོན་མནར་གཅོད་སོགས་ཀྱི་འོག་མུ་མཐུད་གནས་བཞིན་ཡོད། ཅེས་གསུངས་སོང་།

ཕྱི་ལོ་༢༠༢༢ ལོའི་ཟླ་༡༠ ཚེས་༡༧ཉིན། བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག དེ་རིང་རྒྱ་ནག་དམར་ཤོག་སྲིད་གཞུང་གི་ཚོགས་ཆེན་ཐེངས་༢༠ པ་ཚོགས་བཞིན་ཡོད་པ་དང་བསྟུན་ནས། རྡ་སའི་ཁུལ་གྱི་སློབ་ཕྲུག་དང་། བཙུན་མ། གྲྭ་པ། མི་སྐྱ་སོགས་ཀྱིས་བཞུགས་སྒར་མེག་གྷན་ནས་རྡ་ཤོད་ཀཱ་ཅ་རི་བར་རྒྱ་ནག་དམར་ཤོག་སྲིད་གཞུང་ལ་ངོ་རྒོལ་སྐད་འབོད་ཀྱི་གོམ་བགྲོད་ལས་འགུལ་ཞིག་སྤེལ་སོང་།

ཕྱི་ལོ་༢༠༢༢ ཟླ་༩ ཚེས་༧ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། མོན་ཡུལ་བསྟན་དོན་རིག་གཞུང་གཅེས་སྐྱོང་ལྷན་ཚོགས་དང་། གཞིས་བྱེས་རྒྱལ་བ་ཇོ་ནང་པ། མདོ་སྨད་མང་འབའ་བྱ་གསུམ། བལ་ཡུལ་རྣམ་རྒྱལ་མཐོ་འབྲིང་དགེ་ལས་སློབ་ཟུར། དེ་བཞིན་སིཌ་ནི་བོད་རིགས་མཐུན་ཚོགས་བཅས་ཚོགས་པ་ལྔ་ཡིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་བསྐལ་བརྒྱར་བརྟན་ཕྱིར་སྒྲོལ་དཀར་ཡིད་བཞིན་འཁོར་ལོའི་ཆོ་གའི་ཐོག་ནས་བརྟན་བཞུགས་རྒྱས་པ་ཞིག་བསྟར་འབུལ་ཞུས་སོང་།

ཕྱི་ལོ་༢༠༢༢་ཟླ་༨་ཚེས་༢༥ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་དབུས་བོད་ཀྱི་གཞོན་ནུ་ལྷན་ཚོགས་ཀྱིས་གོ་སྒྲིག་འོག རྡ་སའི་སེར་སྐྱ་བོད་མི་རྣམས་ཀྱིས་གཞིས་བཞུགས་བོད་མི་ཚོ་ནད་ཡམས་ལས་མྱུར་དུ་གྲོལ་ཆེད་དང་། འབྱུང་གཞིའི་གནོད་སྐྱོན་ཕོག་པ་རྣམས་ལ་གདུང་སེམས་མཉམ་སྐྱེད་ཀྱི་མཆོད་འབུལ་སྨོན་ལམ་ཞིག་ཚོགས་སོང་།