རྡ་སར་གཞུང་འབྲེལ་ངོས་ནས་༧གོང་ས་མཆོག་དགུང་གྲངས་༨༧་ཕེབས་པའི་༧སྐུའི་འཁྲུངས་སྐར་སྲུང་བརྩི་ཞུས་སོང་།

དེ་ཡང་། གཞུང་འབྲེལ་མཛད་སྒོར། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་དང་། ཞྭ་སེར་བསྟན་པའི་གཙུག་རྒྱན་འཇམ་མགོན་རྒྱལ་བའི་རྒྱལ་ཚབ་དགའ་ལྡན་ཁྲི་ཐོག་༡༠༤ བློ་བཟང་བསྟན་འཛིན་མཆོག ༸སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཁན་སྤྲུལ་ངག་དབང་ཆོས་ཀྱི་སྣང་བ་མཆོག བོད་ཀྱི་བླ་ཆེན་ཁག ཧི་མཱ་ཅལ་མངའ་གཞུང་གི་ཤིང་ནགས་བློན་ཆེན་སྐུ་ཞབས་རཱ་ཀེཤ་པཱ་ཋ་ནི་ཡཱ་ (Shri Rakesh Pathania) མཆོག དམིགས་བསལ་སྐུ་མགྲོན་རི་ཆ་ཌི་གྷེར་ (Richard Gere) ལགས། རྡ་རམ་ས་ལའི་ཧི་མཱ་ཅལ་མངའ་སྡེའི་གྲོས་ཚོགས་འཐུས་མི་སྐུ་ཞབས་ཝི་ཤལ་ནེ་རི་ཡ་ (Shri Vishal Nehria) ལགས་གཙོས་པའི་གནད་ཡོད་མི་སྣ་དང་མི་མང་སོགས་མཉམ་ཞུགས་གནང་སོང་། སྐུ་མགྲོན་གཙོ་བོ་ཧི་མཱ་ཅལ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ཇ་ཡཱ་རཱམ་ཋཱ་ཀུར་ (Sri Jai Ram Thakur) མཆོག་གིས་དྲ་ལམ་བརྒྱུད་གསུང་བཤད་གནང་སོང་།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་གྱ་བདུན་ལ་ཕེབས་པའི་༸སྐུའི་འཁྲུངས་སྐར་གྱི་གཞུང་འབྲེལ་མཛད་སྒོའི་ཐོག བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་བཀའ་ཤག་གི་གསུང་འཕྲིན་སྒྲོག་སྦྱང་གནང་དོན། སྤྱི་ནོར་༸གོང་ས་༸སྐྱབས་མགོན་ཆེན་པོའི་འཁྲུངས་ལྷ་དབྱར་གསོལ་གྱི་དུས་ཆེན་སྲུང་བརྩི་ཞུ་སྐབས། རང་ཅག་བཙན་བྱོལ་བ་རྣམས་ལ་༸མགོན་པོ་མཆོག་གིས་བཀའ་དྲིན་མཐའ་ཡས་པ་བསྐྱངས་པའི་རྣམ་ཐར་གྱི་ཆ་ཕྲ་མོ་ཙམ་ཤེས་དགོས་པ་གལ་ཆེན་པོ་ཡིན་ཞིང་། དྲིན་ཤེས་ན་དྲིན་དྲན་ཐུབ་པ་དང་། དྲིན་དྲན་པ་ཡིན་ན་དྲིན་ཆེན་ལ་དྲིན་ལོག་མི་བྱེད་པའི་ཡ་རབས་ཀྱི་སྤྱོད་པ་བསྟེན་ཐུབ་པའི་ཁར། དྲིན་འཇལ་བའི་ཐབས་ཚུལ་ཡག་ཤོས་ཏེ། བླ་མའི་ལུགས་ཟུང་བཀའ་སློབ་བསླབ་བྱ་ཚུལ་བཞིན་ཉམས་སུ་བླངས་པའི་སྒོ་ནས་མི་ཚེ་དོན་ལྡན་སྐྱེལ་བར་མངོན་དུ་ཕྱོགས་ཐུབ་པ་ཡིན།

བཙན་བྱོལ་གྱི་མི་ལོ་ ༦༣ ལ་ཕྱིར་མིག་ལྟ་སྐབས། བཙན་བྱོལ་བོད་གཞུང་གསར་འཛུགས་བསྐྱངས་ཏེ། བོད་རྗེ་ཐོག་མ་གཉའ་ཁྲི་བཙན་པོ་ནས་གཞུང་ས་དགའ་ལྡན་ཕོ་བྲང་ལ་ཐུག་པའི་བར་གྱི་བོད་རྒྱལ་ཁབ་ཆེན་པོའི་ཁྲིམས་མཐུན་མངའ་དབང་རྒྱུན་སྐྱོང་ཐོག།།བོད་དོན་འཐབ་རྩོད་དང་། བོད་མིའི་བདེ་དོན་ལ་ལྟ་སྐྱོང་བྱེད་པོ་དབང་ལྡན་འཛིན་སྐྱོང་གི་བྱེད་སྒོ་ཁག་དུས་ཀྱི་འགྱུར་འགྲོས་དང་བོད་མིའི་གོ་རྟོགས་འདུན་མོས་ལ་བསྟུན་ཏེ་ཚགས་ཚུད་ཡར་རྒྱས་སུ་གཏོང་གནང་མཛད་པ་དང་། ཆོལ་གསུམ་བོད་རིགས་ཡོངས་སུ་རྫོགས་པ་མི་རིགས་ཀྱི་འདུ་ཤེས་གོང་བུ་གཅིག་ཏུ་བསྒྲིལ་བའི་རྨང་གཞིའི་སྟེང་། རང་རིགས་བཙན་བྱོལ་བ་རྣམས་གནས་ཡུལ་རྒྱལ་ཁབ་ཁག་ཏུ་སིམ་ཡལ་མི་འགྲོ་བའི་ཆེད་དུ་བོད་མིའི་འདུ་གནས་གཞིས་སྒར་འཛུགས་སྐྲུན་གནང་སྟེ། སོ་ནམ་དང་། ལག་ཤེས་བཟོ་ལས། ཚོང་ལས་སོགས་ཀྱི་འཚོ་ཐབས་སྦྱོར་འཇགས་དང་། དེ་བཞིན་བོད་མི་རང་གིས་འཛིན་སྐྱོང་བྱེད་པའི་སྔོན་འགྲོ་ནས་གཙུག་ལག་སློབ་ཁང་བར་གྱི་སློབ་གྲྭ་དང་། རིས་སུ་མ་ཆད་པའི་ཆོས་རྒྱུད་ཁག་གི་བཤད་སྒྲུབ་ཀྱི་སྡེ། བོད་ལུགས་གསོ་རིག་དང་ཕྱི་ལུགས་ཀྱི་སྨན་ཁང་གིས་མཚོན་པའི་མཐུན་རྐྱེན་འདི་ལྟ་བུ་ཞིག་འཛམ་གླིང་འདིར་བཙན་བྱོལ་བའི་ཚོ་ཁག་གཞན་དུ་མཐོང་རྒྱུ་མེད་ཅིང་། འདི་ནི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་རྗེ་བཀའ་དྲིན་ཉག་ཅིག་ལ་བརྟེན་ནས་བྱུང་བ་ཡིན་ལ། དེ་ཡང་ཉིན་ཞག་ལོ་ཟླ་དེ་དག་རིང་ཐབས་ལ་མཁས་ཤིང་ཐུགས་སྟོབས་བཙན་པར་བགོས་ཏེ་སྐུ་ངལ་སྣ་ཚོགས་བདག་གིར་ལྷུར་བཞེས་ཀྱིས་ཕྱི་ནང་འགལ་རྐྱེན་གེགས་བར་མཐའ་དག་རིམ་བསལ་མཛད་པའི་འབྲས་བུ་ཡིན་པས། ༸མགོན་པོ་མཆོག་ལ་དབུ་འོག་དཔུང་འདེགས་ཀྱི་ཞབས་འདེགས་སྒྲུབ་མཁན་མི་རབས་རྒན་པ་རྣམས་ལའང་དུས་ཆེན་འདིའི་སྟེང་ནས་ལེགས་སོའི་བསྔགས་བརྗོད་དང་བཀའ་དྲིན་ཆེ་ཞུ་རྒྱུ་ཡིན།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་ ༡༡༣ ལྷག་འཚོ་བཞུགས་གནང་རྒྱུ་ཚད་མའི་ལུང་གིས་ཟིན་པ་མ་ཟད། ༸མགོན་པོ་མཆོག་ཉིད་ཀྱིས་ཀྱང་སྔ་རྗེས་སུ་ཡང་ཡང་ཞལ་གྱིས་བཞེས་ཡོད་པས། རང་ཅག་ལས་ཀྱི་སྣེ་མོ་བ་རྣམས་དང་། མང་ཚོགས་ཐུན་མོང་ནས་སྤྱི་མཐུན་བསོད་ནམས་གསོག་པ་དང་། ༸རྒྱལ་བ་དགྱེས་པའི་མཆོད་སྤྲིན་དུ་༸གོང་ས་མཆོག་ཐུགས་འཚབ་དང་ཐུགས་བསུན་འབྱུང་གཞིའི་གཏམ་སྤྱོད་མཐའ་དག་རྒྱང་དུ་དོར་ཏེ། ཐུགས་སྐྱེད་དམ་བཅའ་བཞི་གཙོ་འགྱུར་གྱིས་བཀའ་དགོངས་བཞིན་རྣམ་དཀར་དགེ་བའི་ལས་ལ་གཞོལ་ཞིང་། སྤྱི་དོན་ཐོག་ནུས་པ་མཉམ་སྤུངས་ཡོང་བའི་འབོད་སྐུལ་ཞུ་རྒྱུ་དང་། སྐབས་ ༡༦ པའི་བཀའ་ཤག་གི་ངོས་ནས་ལས་དོན་བྱེད་སྒོ་མཐའ་དག་༸གོང་ས་༸སྐྱབས་མགོན་ཆེན་པོ་མཆོག་གི་བཀའ་སློབ་ལམ་སྟོན་གཞིར་བཟུང་འབད་སྒྲུབ་ཞུ་མུས་ཡིན་ཞིང་། མ་འོངས་པར་ཡང་༸མགོན་པོ་མཆོག་གི་དགོངས་གཞི་བསྒྲུབ་རྒྱུའི་དམ་བཅའ་བརྟན་བཟུང་ཡིན་ཞུ་རྒྱུ། ཞེས་སོགས་གསུངས་སོང་།

དེ་བཞིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་གྲངས་༨༧་ལ་ཕེབས་པའི་༸སྐུའི་འཁྲུངས་སྐར་གྱི་གཞུང་འབྲེལ་མཛད་སྒོའི་ཐོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཆོག་གིས་སྤྱི་འཐུས་ཀྱི་གསུང་འཕྲིན་སྒྲོག་སྦྱང་གནང་དོན། མགོན་པོ་གང་གི་འདས་པའི་ལོ་ངོ་བཅུ་ཕྲག་དུ་མའི་རིང་བླ་ན་མེད་པའི་ཆོས་སྲིད་གཉིས་ཀྱི་མཛད་བཟང་ཕྱོགས་ཐམས་ཅད་ནས་ཀློང་དུ་བརྡོལ་བས། ངེས་པ་དོན་གྱིས་འཇིག་རྟེན་གྱི་ཕན་བདེ་འབྱུང་བའི་སྒོ་གཅིག་པུར་གྱུར་བ་དེས་འཛམ་གླིང་ནང་གཟུར་གནས་སྐྱེ་བོ་མང་པོའི་ཡིད་དབང་འཕྲོག་སྟེ་བསྔགས་བརྗོད་ཀྱི་མེ་ཏོག་འཐོར་བཞིན་པ་མ་ཟད། ཨ་རི་དང་ཡུ་རོབ་གཉིས་ཀྱིས་གཙོས་འཛམ་གླིང་ཤར་ནུབ་རྒྱལ་ཁབ་མང་པོའི་གཞུང་སྒེར་ཚོགས་པ་ཁག་ནས་༸གོང་ས་༸སྐྱབས་མགོན་ཆེན་པོ་མཆོག་ལ་ཕྱི་ལོ་ ༡༩༨༩ ལོར་ནོ་སྦེལ་ཞི་བདེའི་གཟེངས་རྟགས་ (Nobel Peace Prize) དང་། ཕྱི་ལོ་ ༢༠༠༧ ལོར་ཨ་རིའི་གྲོས་ཚོགས་ཀྱི་གསེར་གྱི་གཟེངས་རྟགས། (Congressional Gold Medal) ཕྱི་ལོ་ ༢༠༡༢ ལོར་ཨིན་ཡུལ་གྱི་ཇོན་ཊེམ་པེལ་ཊོན་གཟེངས་རྟགས་ (John Templeton Prize) སོགས་ཀྱིས་མཚོན་ཆེ་བསྟོད་གཟེངས་རྟགས་མང་པོ་འབུལ་བཞེས་མཛད་ཡོད།

དེ་རིང་གི་ཉིན་མོར། གཞིས་བཞུགས་རང་རིགས་སྤུན་ཟླ་རྣམ་པ་དང་། འཛམ་གླིང་ཡུལ་གྲུ་གང་སར་གནས་པའི་བོད་མིས་གཙོས་ཞི་བདེ་ལ་དགའ་བའི་འཛམ་གླིང་མི་མང་ཡོངས་ཀྱིས། དགའ་དད་སྤྲོ་གསུམ་ངང་༸སྐུའི་འཁྲུངས་སྐར་སྲུང་བརྩི་ཞུ་བའི་ལམ་ནས་མགོན་པོ་གང་གི་ཡོངས་གྲགས་ཐུགས་བསྐྱེད་མཛད་འགན་བཞི་དང་། དུས་རྟག་ཏུ་འཛམ་གླིང་ཀུན་ཁྱབ་མཛད་འཕྲིན་རྣམས་ཀྱི་བཀའ་དྲིན་རྗེས་སུ་དྲན་ཞིང་། ཡ་རབས་བཟང་སྤྱོད་དང་བྱམས་བརྩེ་ལྡན་པའི་བོད་མི་ཞིག་ཡོང་ཐབས་ཆེད་ཉམས་ལེན་ཞུ་རྒྱུའི་དམ་བཅའ་བསྐྱར་ནན་ཞུ་རྒྱུ་ནི་༸སྐུའི་འཁྲུངས་སྐར་སྲུང་བརྩི་ཞུ་རྒྱུའི་དགོས་དོན་སྙིང་པོ་དེ་ཆགས་ཡོད་པས་བོད་མི་ཡོངས་ཀྱི་ཉིན་རེའི་འཚོ་བའི་ནང་ལག་བསྟར་ཉམས་ལེན་དགོས་པའི་འབོད་སྐུལ་ནན་པོ་ཞུ་རྒྱུ་ཡིན།

བོད་ནང་རྒྱ་ནག་དམར་གཞུང་གིས་བོད་མི་རིགས་ཀྱི་ངོ་བོ་མཚོན་བྱེད་བོད་མིའི་ཆོས་དང་། རིག་གཞུང་། སྐད་ཡིག་སོགས་རྩ་མེད་གཏོང་རྒྱུའི་དམིགས་ཡུལ་བཟུང་སྟེ། བོད་མི་ཚོར་སོ་སོའི་ལུང་པའི་ནང་འགྲོ་འདུག་སྤྱོད་གསུམ་དང་། ཐ་ན་འགྲོ་བ་མིའི་གཞི་རྩའི་རང་དབང་གི་ཐོབ་ཐང་ཡང་མེད་པར་སྡུག་སྦྱོང་དང་མནར་གཅོད་ཚད་མེད་བཏང་དང་གཏོང་བཞིན་པའི་གནས་སྟངས་ཧ་ཅང་ཛ་དྲག་དུ་འགྲོ་བཞིན་ཡོད། ལྷག་པར་དུ་དེང་གི་ཆར་རྒྱ་ནག་གཞུང་གིས་བོད་ཀྱི་རྩོམ་པ་པོ་དང་ཤེས་ཡོན་ཅན་སོགས་ནས་རང་མི་རིགས་ཀྱི་ངོ་བོ་སྲུང་སྐྱོབ་དང་གཞི་རྩའི་འགྲོ་བ་མིའི་ཐོབ་ཐང་ལོངས་སུ་སྤྱད་དེ་བོད་ཀྱི་ཆོས་དང་རིག་གཞུང་སྦྱོང་སྤྱོད་སྤེལ་གསུམ་བྱས་པར་ཁ་བྲལ་གྱི་བྱ་བར་སྒྲོ་བཏགས་ཏེ་མུ་མཐུད་འཛིན་བཟུང་བཀག་སྐྱིལ་དང་བཙོན་འཇུག་ཁྲིམས་ཐག་གཅོད་བཞིན་ཡོད། རྒྱ་ནག་དམར་གཞུང་གི་བཙན་དབང་འོག་གི་སྲིད་བྱུས་ལག་བསྟར་བྱས་པ་རྣམས་བཟོད་ཐབས་བྲལ་རྐྱེན་ཕྱི་ལོ་ ༢༠༠༩ ནས་བཟུང་ད་བར་ཤེས་རྟོགས་ར་འཕྲོད་གསལ་པོ་བྱུང་བའི་བོད་མི་རྒན་གཞོན་སྐྱ་སེར་དབྱེར་མེད་གྲངས་བརྒྱ་དང་ལྔ་བཅུ་ལྷག་གིས་རང་ལུས་མེར་བསྲེགས་གཏོང་དགོས་བྱུང་ཡོད། ཞི་བདེ་དང་དྲང་བདེན་ལ་དགའ་མོས་དང་ཉམས་ལེན་བྱེད་མཁན་འཛམ་གླིང་རྒྱལ་ཁབ་ཁག་གི་གནང་བབ་དང་། དུས་རབས་ཉེར་གཅིག་པའི་གནས་བབ་བཅས་ལ་བསམ་ཞིབ་ཀྱིས་རྒྱ་ནག་གི་དཔོན་རིགས་ཚོས་བོད་ཐོག་འཛིན་པའི་མཁྲེགས་བཟུང་ཅན་གྱི་སྲིད་བྱུས་ལ་བཟང་ཕྱོགས་ཀྱི་འགྱུར་བ་ཞིག་ངེས་པར་དུ་གཏོང་དགོས་པ་དུས་ལ་བབ་ཡོད་པའི་སྐུལ་མ་ཞུ་རྒྱུ་ཡིན། ཞེས་སོགས་གསུངས་སོང་།