ཕྱི་ལོ་༢༠༢༤ ཟླ་༥ ཚེས་༡༨ ཉིན། བཞུགས་སྒར་རྡ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཀར་ལུ་རིན་པོ་ཆེ་མཆོག་གིས་ཇི་ལྟར་གསོལ་བ་བཏབ་པ་ལྟར་མགོན་པོའི་རྗེས་གནང་བསྩལ་གནང་མཛད་སོང་། སྐབས་དེར། ༸གོང་ས་མཆོག་ལ་བརྟན་བཞུགས་བསྟར་འབུལ་ཞུས་སོང་།

ཕྱི་ལོ་༢༠༢༤ ཟླ་༥ ཚེས་༡༧ ཉིན་ནི། ྋཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་དང་། ཁོང་གི་སྐུ་འཁོར་ནང་མི་རྣམས་རྒྱ་དམར་གཞུང་གིས་བཙན་འཁྲིད་བྱས་ནས་མི་ལོ་ཉེར་དགུ་ཧྲིལ་པོ་འཁོར་བའི་ཉིན་ཡིན་སྟབས། དབུས་དང་ས་གནས་བོད་ཀྱི་བུད་མེད་ལྷན་ཚོགས་ཀྱིས་གོ་སྒྲིག་འོག བཞུགས་སྒར་རྡ་རམ་སའི་མོག་གྷན་ཁྲོམ་གཞུང་ནས་རྡ་ཤོད་ཀ་ཅ་རིའི་བར་དུ། བོད་ཀྱི་བུད་མེད་ལྷན་ཚོགས་ཀྱི་ཚོགས་མི་དང་གཞུང་འབྲེལ་མིན་པའི་ཚོགས་པ་ཁག་གི་སྐུ་ཚབ་རྣམས་ཀྱིས་ྋཀུན་གཟིགས་༸པཎ་ཆེན་རིན་པོ་ཆེ་མཆོག་མྱུར་དུ་གློད་གྲོལ་དགོས་པའི་དགོས་འདུན་བཏོན་ནས་ཞི་བའི་གོམ་བགྲོད་གནང་སོང་།