ཕྱི་ལོ་༢༠༢༥ ཟླ་༥ ཚེས་༢༥ ཉིན། བོད་ཀྱི་ལས་འགུལ་བ་འཇམ་དབྱངས་བསྟན་འཛིན་ལགས་ཀྱིས་བོད་དོན་དང་༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་དགེ་འདུན་ཆོས་ཉི་མ་མཆོག་གི་སྐོར་གོ་རྟོགས་སྤེལ་ཆེད་རྒྱ་གར་གྲོང་ཁྱེར་ཁག་ནས་རྐང་འཁོར་སྐོར་བསྐྱོད་ཀྱི་ལས་འགུལ་སྤེལ་ནས་དེ་རིང་དྷ་རམ་སར་བདེ་འབྱོར་གནང་སོང་། ཁོང་གིས་རྒྱལ་སྤྱིའི་སྤྱི་ཚོགས་ནས་རྒྱ་དམར་གཞུང་ལ་གནོན་ཤུགས་སྤྲད་ནས་༸ཀུན་གཟིགས་པཎ་ཆེན་རིན་པོ་ཆེ་མཆོག་གློད་གྲོལ་ཡོང་ཐབས་གནང་དགོས་པའི་འབོད་སྐུལ་ཞུས་སོང་།

ཕྱི་ལོ་༢༠༢༥ ཟླ་༥ ཚེས་༡༧ ཉིན། ༸པན་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་བཙན་ཁྲིད་བྱས་ནས་གར་སོང་ཆ་མེད་དུ་འགྱུར་ནས་མི་ལོ་༣༠་འཁོར་བའི་དུས་དྲན་ཉིན་མོར་རྒྱ་གར་དང་། ཨ་རི། ཁེ་ན་ཌ། ཧྥ་རན་སི། ཇར་མན། སྦེལ་ཇམ། སུད་སུ། ཨེ་ཊ་ལི། ཨོ་གླིང་སོགས་སུ་བོད་མི་དང་བོད་དོན་རྒྱབ་སྐྱོར་བ་ཚོས་རྒྱལ་ཁབ་དེ་དག་གི་རྒྱ་མིའི་གཞུང་ཚབ་མདུན་དུ་རྒྱ་དམར་གཞུང་ལ་ངོ་རྒོལ་གྱི་ལས་འགུལ་སྤེལ་ཡོད་པ་མ་ཟད། ༸པཎ་ཆེན་རིན་པོ་ཆེ་དགེ་འདུན་ཆོས་ཀྱི་ཉི་མ་མཆོག་གཙོས་པའི་ཁོང་གི་ནང་མི་སྐུ་འཁོར་དང་བཅས་པ་མྱུར་དུ་གློད་གྲོལ་གཏོང་དགོས་པའི་དགོས་འདུན་བཏོན་འདུག དེ་བཞིན་རྒྱལ་ཁབ་དེ་དག་གི་གྲོས་ཚོགས་འཐུས་མི་རྣམས་ཀྱིས་ཀྱང་རྒྱ་གཞུང་ལ་༸པཎ་ཆེན་རིན་པོ་ཆེ་མྱུར་དུ་གློད་གྲོལ་དགོས་པའི་འབོད་སྐུལ་ཞུས་སོང་།

ཕྱི་ལོ་༢༠༢༥ ཟླ་༥ ཚེས་༩ ཉིན། བཞུགས་སྒར་དྷ་རམ་སའི་གངས་སྐྱིད་བོད་ཀྱི་དཔེ་མཛོད་ཁང་དུ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་བཀའ་ཟུར་"༧ སྐྱབས་རྗེ་ཀིརྟི་རིན་པོ་ཆེའི་"སྲིད་དོན་མཛད་རྣམ་༼ཤར་སྟག་མོའི་བུ༽ ཡི་འཕྲུལ་དེབ་དབུ་གནང་སོང་། སྐབས་དེར་ཚོགས་གཙོ་མཆོག་གིས་སྐྱབས་རྗེ་ཀིརྟི་རིན་པོ་ཆེ་མཆོག་ནི་བོད་རང་དབང་སླར་གསོ་དང་། ཆོས་དང་རིག་གཞུང་མི་ཉམས་གོང་འཕེལ་དང་ཉམས་པ་སླར་གསོ་གནང་མཁན་ཞིག་རེད། ང་ཚོས་མིག་དཔེ་ལྟ་འོས་པ་ཞིག་རེད། ཅེས་གསུངས་སོང་།

ཕྱི་ལོ་ ༢༠༢༥ ཟླ་བ་ ༠༥ ཚེས་ ༠༧ ཉིན། བཞུགས་སྒར་དྷ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། ཚོགས་པ་གསུམ་གྱི་མི་མང་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་སོང་། སྐབས་དེར། ༸གོང་ས་མཆོག་གིས་སྐྱེས་བོ་ཁྲི་ཕྲག་མང་པོས་ངོས་ལ་དགའ་བོ་བྱས་ནས་ཐུག་འཕྲད་བྱེད་དུ་ཡོང་གི་འདུག ཏཱ་ལའི་བླ་མ་ཞེས་ངོས་ལ་དགའ་བོ་ཞེ་དྲག་བྱེད་ཀྱི་འདུག ངོས་ཚེ་ཇི་ཙམ་རིང་བ་བསྡད་ན་དེ་ཙམ་ཕན་ཐོགས་ཡོང་གི་ཡོད་པའི་སེམས་ལ་སྤོབས་པ་དང་གདེང་ཚོད་སྐྱེད་ཀྱི་འདུག དེར་བརྟེན། ངོས་རང་ད་དུང་ཡང་ལོ་བཅུ་གྲངས་ཁ་ཤས་ལ་བསྟན་པའི་ཞབས་འདེགས་སྒྲུབ་ཐུབ་རྒྱུར་ཚོད་ཐིག་གི་འདུག ཅེས་བཀའ་སྩལ་སོང་།

ཕྱི་ལོ་༢༠༢༥ ཟླ་༥ ཚེས་༣ ཉིན། བཞུགས་སྒར་རྡ་རམ་ས་ལའི་ས་གནས་འགོ་འཛིན་ལས་ཁུངས་ཀྱི་ཚོགས་ཁང་དུ། བོད་ཀྱི་གསར་འགོད་མཐུན་ཚོགས་ནས་འཛམ་གླིང་གསར་འགོད་རང་དབང་ཉིན་མོ་སྲུང་བརྩི་གནང་སོང་། སྐབས་དེར། བོད་ཀྱི་གསར་འགོད་མཐུན་ཚོགས་ཀྱི་ཚོགས་གཙོ་ལགས་ཀྱིས་རྒྱ་ནག་གཞུང་གིས་ང་ཚོའི་སྤྱི་ཚོགས་འདི་གང་ཐུབ་ཀྱིས་གཏོར་བཤིག་གཏོང་བའི་བྱ་སྤྱོད་སྤེལ་དང་སྤེལ་མུས་ཡིན་པས། བོད་ཀྱི་མང་གཙོ་སྤྱི་ཚོགས་འདི་ཚགས་ཚུད་དང་སྲ་བརྟན། མདུན་སྐྱོད་ཡོང་སླད། འདི་ལོར་གསར་འགོད་པ་དག་གིས་འགན་འཕར་མ་ཞིག་འཁྱེར་དགོས་པའི་དུས་སུའང་བསླེབས་ཡོད། ཅེས་བརྗོད་སོང་།

ཕྱི་ལོ་༢༠༢༥ ཟླ་༥ ཚེས་༢ ཉིན། བོད་མིའི་སྒྲིག་འཛུགས་ངོས་ནས་བཀའ་ཟུར་བཀྲ་ཤིས་དབང་འདུས་མཆོག་སྐུ་གྲོངས་པའི་ཡིད་སྐྱོའི་གནས་ཚུལ་ཐོན་པར་མྱ་ངན་དང་ཁོང་གིས་བོད་རང་དབང་འཐབ་རྩོད་དང་རང་གཞུང་ལ་སྲི་ཞུ་ལོ་མང་བསྒྲུབས་ཡོད་པར་བཀའ་དྲིན་རྗེས་དྲན་དང་། དམ་པ་ཁོང་གི་ཞལ་ཆེམས་ནང་བོད་མིའི་སྒྲིག་འཛུགས་ཀྱི་སྲི་ཞུ་བ་རྣམས་ལས་མཚམས་བཞག་ནས་མཆོད་འབུལ་གནང་མི་དགོས་པར་གསུངས་ཡོད་པ་ལྟར་གནང་རྒྱུ་ཡིན་པའི་གསལ་བསྒྲགས་སྤེལ་སོང་།