ཕྱི་ལོ་༢༠༢༦ ཟླ་༡ ཚེས་༢༨ ཉིན། བཞུགས་སྒར་དྷ་རམ་སའི་ས་གནས་འགོ་འཛིན་ཚོགས་ཁང་དུ། དབུས་བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་རྒྱ་གཞུང་གིས་སྐུ་དཀྲོངས་པའི་ཉིན་མོར། ཁོང་ལ་བཀའ་དྲིན་རྗེས་དྲན་ཞུ་ཆེད་བོད་ཀྱི་སྐད་ཡིག་ཉིན་མོ་ཞེས་སྲུང་བརྩི་ཞུས་སོང་། སྐབས་དེར། ༸ཀུན་གཟིགས་པཎ་ཆེན་སྐུ་ཕྲེང་བཅུ་པ་ཆེན་པོ་མཆོག་གིས་བོད་ཀྱི་ཆོས་དང་སྐད་ཡིག སློབ་གསོ། དེ་བཞིན་ཆབ་སྲིད་བཅས་ཀྱི་སྐོར་ཕྱག་ལས་གང་དང་གང་གནང་ཡོད་མེད་སྐོར་ལ་འབུམ་རམས་པ་དགེ་བཤེས་རོང་པོ་བློ་བཟང་སྙན་གྲགས་ལགས་དང་། ལོ་རྒྱུས་སློབ་དཔོན་གཙང་ཕྲུག་སྟོབས་ལགས། འབུམ་རམས་པ་རྒྱལ་ལོ་ལགས། ཆབ་སྲིད་བཙོན་ཟུར་ངག་དབང་འོད་འབར་ལགས་བཅས་ནས་གཏམ་བཤད་གནང་སོང་། བོད་ཀྱི་གཞོན་ནུ་ལྷན་ཚོགས་དྲུང་ཆེ་བསྟན་འཛིན་བློ་བཟང་ལགས་ནས་གཙོ་སྐྱོང་གནང་སོང་།

དབུས་འོས་བསྡུ་ལས་ཁང་གིས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་༡༨ པའི་འོས་བསྡུ་ཆེན་མོའི་ལས་རིམ་དང་འབྲེལ་བའི་གསར་འགོད་ལྷན་ཚོགས་ཤིག་ཚོགས་སོང་། སྐབས་དེར། དབུས་འོས་བསྡུ་ལས་ཁང་ནས་སྐུ་ཞོགས་རྡོ་རྗེ་ལགས་ཀྱིས་གཞུང་བསྟེན་དགྲ་ལྷའི་བཀའ་ལུང་ཇི་བཞིན་འགྲེལ་བརྗོད་གནང་སྐབས་ཁོང་ནས་འཕྲོས་བཤད་ཀྱིས་ཆབ་སྲིད་དང་འབྲེལ་བའི་བཀའ་མོལ་མང་དག་གནང་ཐལ་གྱི་རྐྱེན་པས་སྤྱི་ཚོགས་འཁྲུག་གཞི་དང་། འོས་བསྡུའི་ལས་རིམ་ལ་དོ་ཕོག་འགྲོ་ཉེན་ཡོད་པར་སོང་། བཙན་བྱོལ་བོད་མིའི་འོས་བསྡུའི་སྒྲིག་གཞི་དང་། རྩ་འཛིན་ལམ་སྟོན་བཅས་འགལ་འཛོལ་བྱུང་བའི་ཁོང་ལ་ཉེན་བརྡ་བཏང་ཡོད་འདུག དེ་བཞིན་ངག་དབང་བློ་གྲོས་ (ཨེམ་རྗེ་རྟ་ར་) ནས་སྤྱི་འཐུས་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་ལ་སྒྲོ་བཏགས་དང་གཞི་མེད་སྐྱོན་འཛུགས་བྱེད་པར་འོས་བསྡུ་སྒྲིག་གཞི་དང་འགལ་ནས་ཁོང་ལ་ལོ་བརྒྱད་རིང་གཞུང་འབྲེལ་གདམ་བྱ་འདེམས་བྱེད་ཀྱི་ཐོབ་ཐང་འཕྲོག་རྒྱུའི་ཐག་གཅོད་ཞུས་པའི་བཅད་ཁྲ་བཏང་ཡིན་ཞེས་གསུངས་སོང་།

ཕྱི་ལོ་༢༠༢༦ ཟླ་ ༡ ཚེས་ ༢༡ ཉིན་། རྒྱ་གར་ལྷོ་ཕྱོགས་མོན་གྷོ་འདོད་རྒུ་གླིང་དགའ་ལྡན་བླ་སྤྱིའི་འདུ་ཁང་དུ། དགའ་ལྡན་དགོན་གྱི་འདུས་སྤྱི་ཡོངས་དང་འདོད་རྒུ་གླིང་བོད་མི་ཡོངས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་སོང་། སྐབས་དེར། འདོད་རྒུ་གླིང་བོད་མི་ཡོངས་ནས་༸གོང་ས་༸སྐྱབས་མགོན་ཆེན་པོ་མཆོག་ལ་བཀའ་དྲིན་རྗེས་དྲན་གྱི་གཟེངས་རྟགས་འབུལ་བཞེས་མཛད་སོང་།

ཕྱི་༢༠༢༦་ལོ་ཟླ་བ་༡ ཚེས་༡༦ ཉིན་སྤེལ། ཕྱི་ལོ་༢༠༢༦་ལོའི་སྲིད་སྐྱོང་འོས་བསྡུའི་ནང་ཞུགས་མཁན་ཁྱོན་སྲིད་སྐྱོང་འོས་མི་ལྔ་བྱུང་ཡོད་ཅིང༌། དེ་དག་ནི་ལས་ཐོག་སྲིད་སྐྱོང་སྤེན་པ་ཚེ་རིང་མཆོག་དང༌། དབུ་དཀར་ཚང་སྐལ་བཟང་རྡོ་རྗེ་ལགས། ཚེ་རིང་ཕུན་ཚོགས་ལགས། བཀྲ་ཤིས་སྟོབས་རྒྱལ་ལགས། རྒྱལ་ཐང་ངག་དབང་དགའ་ལྡན་ལགས་བཅས་ཡིན། འདི་ག་གསར་ཁང་ངོས་ནས་ཕྱི་ལོ་༢༠༢༦ འོས་བསྡུ་ཆེན་མོ་ནང་སྲིད་སྐྱོང་འོས་མི་ཚང་མའི་ལོ་རྒྱུས་མདོ་བསྡུས་དང་སྲིད་སྐྱོང་ལངས་དགོས་པའི་དམིགས་ཡུལ་ངོ་སྤྲོད་བྱ་རྒྱུ་ཡིན། འོན་ཀྱང་བཀྲ་ཤིས་སྟོབས་རྒྱལ་ལགས་འོས་བསྡུའི་ཁྲིམས་སྒྲིག་འགལ་ལུགས་ཀྱིས་དབུས་འོས་བསྡུ་ལྷན་ཁང་གིས་སྲིད་སྐྱོང་འོས་མི་ནས་ཕྱིར་འཕུད་གནང་ཚར་ཡོད།

ཕྱི་ལོ་༢༠༢༥ ཟླ་༡༢ ཚེས་༢༤ ཉིན། རྒྱ་གར་ལྷོ་ཕྱོགས་དཔལ་ལྡན་འབྲས་སྤུངས་དགོན་པའི་བླ་སྤྱི་ཚོགས་ཆེན་འདུ་ཁང་དུ། དཔལ་ལྡན་འབྲས་སྤུངས་དགོན་པའི་ལྷ་མི་ཡོངས་ནས་སྤྱི་ནོར་༸གོང་ས་༧རྒྱལ་བ་རིན་པོ་ཆེ་མཆོག་ལ་བརྟན་བཞུགས་བསྟར་འབུལ་ཞུས་པ་དང་སྦྲགས། མགོན་པོ་གང་ཉིད་དཔལ་ལྡན་འབྲས་སྤུངས་དགོན་པའི་ཁྲི་པར་བཞུགས་གནང་མཛད་པའི་མཛད་སྒོའང་ཚོགས་གནང་སོང་།

ཕྱི་ལོ་༢༠༢༥ ཟླ་༡༢ ཚེས་༢༣ ཉིན། ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། དབུས་འོས་བསྡུ་ལས་ཁང་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བོད་མི་མང་སྤྱི་འཐུས་སྐབས་༡༨ པའི་འོས་བསྡུ་ཆེན་མོའི་ལས་རིམ་དང་འབྲེལ་བའི་གསར་འགོད་ལྷན་ཚོགས་ཤིག་ཚོགས་སོང་། སྐབས་དེར། རྒྱ་བལ་འབྲུག་གསུམ་ནང་ཁྱོན་འོས་འཕེན་པའི་དེབ་སྐྱེལ་གྲངས་༥༦,༧༤༩ དང་། ཕྱི་རྒྱལ་ཡུལ་གྲུ་ཁག་ནས་འོས་འཕེན་པའི་དེབ་སྐྱེལ་གྲངས་༣༤,༢༩༣ བཅས་ཁྱོན་བསྡོམས་དེབ་འགོད་བྱེད་མཁན་འོས་འཕེན་གྲངས་༩༡,༠༤༢ བྱུང་ཡོད་པར་གསལ་བསྒྲགས་གནང་སོང་། དེའི་རྗེས་སྲིད་སྐྱོང་འོས་མི་བཀྲ་ཤིས་སྟོབས་རྒྱལ་(ལུག་རྫི)་གྱིས་ཕྱི་ལོ་༢༠༢༥ ཟླ་༡༡ ཚེས་༢༩ ཉིན་སྲིད་སྐྱོང་འོས་མི་ལང་རྒྱུའི་གསལ་བསྒྲགས་སྤེལ་སྐབས་བོད་ཀྱི་རྒྱལ་དར་དང་༧གོང་ས་མཆོག་གི་སྐུ་པར་བེད་སྤྱོད་བཏང་རྐྱེན་འོས་བསྡུའི་སྒྲིག་གཞི་འགལ་ཡོད་པས་གདམ་བྱ་དང་འདེམས་བྱེད་པའི་ཐོབ་ཐང་མེད་པའི་ཉེས་ཆད་བཅད་པའི་གསལ་བསྒྲགས་སྤེལ་སོང་།