22
Sun, Nov
8 New Articles

ཕྱི་ལོ་༢༠༢༦ ཟླ་༡༡ ཚེས་༡༨ ཉིན། བོད་ཀྱི་གཞོན་ནུ་ལྷན་ཚོགས་ཀྱིས་བོད་ཀྱི་རྒྱལ་གཅེས་དཔའ་བོ་དཔའ་མོ་རྣམས་དང་། ལྷག་པར་དུ་རྒྱལ་གཅེས་དཔའ་བོ་བློ་དགའ་རང་བཙན་མཆོག་ལ་རྗེས་དྲན་ཆེ་བསྟོད་ཞུ་ཆེད་ཟླ་བ་བདུན་ལྷག་རིང་གི་རྒྱལ་སྤྱིའི་“ཆིག་སྒྲིལ་གྱི་མེ་ལྕེ་སྐོར་བསྐྱོད་ལས་འགུལ”ཞེས་པ་དབུ་འཛུགས་གནང་སོང་། ལས་འགུལ་འདི་ནི་རྒྱལ་གཅེས་དཔའ་བོ་བློ་དགའ་རང་བཙན་མཆོག་གིས་ཨ་རིའི་གྲོང་ཁྱེར་ནིའུ་ཡོག་ཏུ་རྟེན་གཞི་བྱས་པའི་མཉམ་འབྲེལ་རྒྱལ་ཚོགས་ཀྱི་ལས་ཁུངས་ཨ་མའི་མདུན་དུ་རང་ལུས་མེར་སྲེག་གནང་སྐབས་ཕྱག་ཏུ་བསྣམས་པའི་བོད་ཀྱི་རྒྱལ་དར་དེ་བསྒྲེངས་ཏེ་དབུ་འཛུགས་གནང་ཡོད་ཅིང་། རྒྱལ་དར་འདི་ཉིད་ལས་འགུལ་ཡོངས་རྫོགས་ཀྱི་རིང་ལ་རྗེས་དྲན་དང་། མི་རིགས་ཀྱི་ངོ་བོ། ཆིག་སྒྲིལ། དེ་བཞིན་བོད་རང་བཙན་གྱི་འགྱུར་མེད་ཀྱི་དམ་བཅའ་བཅས་ཀྱི་མཚོན་རྟགས་སུ་འཁྱེར་རྒྱུ་ཡིན་འདུག

ཕྱི་ལོ་༢༠༢༦ ཟླ་༡༡ ཚེས་༡༡ ཉིན། བོད་ཀྱི་སྐད་ཡིག་སྲུང་སྐྱོབ་ལས་འགུལ་བ་བསྐལ་བཟང་མཐར་ཕྱིན་ལགས་ཀྱིས་རྒྱ་ནག་གཞུང་གིས་བོད་ནང་བོད་ཀྱི་རིག་གཞུང་རྩ་མེད་གཏོང་བཞིན་པར་ངོ་རྒོལ་དང་། དཔའ་བོ་བློ་དགའ་རང་བཙན་མཆོག་ལ་རྗེས་དྲན་ཞུ་ཆེད། རྡ་རམ་ས་ལ་ནས་ལ་དྭགས་བར་ཕར་འགྲོ་ཚུར་འོང་གི་གོམ་བགྲོད་བྱས་ཏེ་ལས་འགུལ་དེ་མཇུག་བསྒྲིལ་ཡོད། ཁོང་གིས་བོད་ཀྱི་རྒྱལ་དར་དང་“ཀ་ཁ་ག་ང་རྣམ་པར་རྒྱལ་གྱུར་ཅིག” ཅེས་འཁོད་པའི་འཕྲེད་དར་ཞིག་བསྣམས་ཡོད་ཅིང་། ལས་འགུལ་དེའི་དམིགས་ཡུལ་ནི་བོད་ཀྱི་སྐད་ཡིག་སྦྱོང་བརྩོན་སྤྱོད་གསུམ་བྱེད་རྒྱུ་དང་སྲུང་སྐྱོབ་བྱེད་རྒྱུར་སྐུལ་མ་དང་། རྒྱ་གཞུང་གིས་བོད་ནང་སྐད་ཡིག་རྩ་མེད་བཟོ་བཞིན་པར་ངོ་རྒོལ་བྱེད་རྒྱུ་བཅས་ཡིན།

ཕྱི་ལོ་༢༠༢༦ ཟླ་༡༡ ཚེས་༦ ཉིན་སྤེལ། དཔལ་རྒྱལ་དབང་ཀརྨ་པ་ཨོ་རྒྱན་འཕྲིན་ལས་རྡོ་རྗེ་མཆོག་གིས་འབྲུག་ཡུལ་དུ་ཕེབས་ནས་རྒྱལ་པོ་དང་རྒྱལ་མོ། སྲིད་བློན། ཐེ་ལེན་གྱི་སྲིད་བློན། བོད་ཀྱི་བླ་ཆེན་ཁག་སོགས་ལ་ཐུག་འཕྲད་གནང་འདུག དེ་ནས་རྒྱལ་དབང་ཀརྨ་པ་མཆོག་གིས་འབྲུག་ཡུལ་གྱི་རྒྱལ་ས་ཐིམ་ཕུའི་ལྕང་གླིང་མི་ཐང་ (GPPF Ground) རྩེད་ཐང་ཆེན་མོའི་ནང་། འབྲུག་རྒྱལ་ཁབ་ཀྱི་རྒྱལ་པོ་དང་རྒྱལ་མོ་གཙོས་པའི་དད་ལྡན་ཆོས་ཞུ་བ་ཁྲི་ཚོ་མང་པོར་ཚེ་དབང་རྒྱས་པ་བཀའ་དྲིན་སྩལ་ཡོད་པ་མ་ཟད། བཀའ་སློབ་བཀའ་ཆོས་ཀྱང་གནང་ཡོད་འདུག

ཕྱི་ལོ་༢༠༢༦ ཟླ་༡༠ ཚེས་༢༦ ཉིན། བཞུགས་སྒར་དྷ་རམ་སའི་ལྷ་རྒྱལ་རིར་རྒྱལ་གཅེས་དཔའ་བོ་བློ་དགའ་རང་བཙན་མཆོག་གི་རྗེས་དྲན་སྐུ་འདྲ་ཞིག་བོད་མི་མང་སྤྱི་འཐུས་རྒྱུན་ལས་སྐུ་ཚབ་སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་ལགས་ཀྱིས་དབུ་འབྱེད་གནང་སོང་། རྒྱལ་གཅེས་དཔའ་བོ་རང་བཙན་བློ་དགའ་ལགས་ཀྱིས་བོད་བསྟན་སྲིད་མི་རིགས་ཀྱི་དོན་དུ་རང་གི་གཅེས་པའི་ལུས་སྲོག་ལོངས་སྤྱོད་དང་བཅས་པ་བློས་གཏོང་གནང་བར་བཀའ་དྲིན་རྗེས་དྲན་མཚོན་སླད། དྷ་རམ་ས་ས་གནས་བོད་ཀྱི་བུད་མེད་ལྷན་ཚོགས་ཀྱི་སྐབས་བཅོ་ལྔ་པའི་རྒྱུན་ལས་རྣམས་ཀྱིས་རྒྱལ་གཅེས་དཔའ་བོ་ཁོང་གི་རྗེས་དྲན་འདྲ་སྐུ་བཞེངས་བསྐྲུན་གནང་འདུག

ཕྱི་ལོ་༢༠༢༦ ཟླ་༡༠ ཚེས་༢༣ ཉིན། བོད་ཀྱི་གཞོན་ནུ་ལྷན་ཚོགས་ཀྱི་གོ་སྒྲིག་འོག དྷ་རམ་སའི་བོད་མི་ཚོས་བོད་ཁམས་སྦྲ་ཆེན་རྫོང་དུ་ས་ཡོམ་གོ་ཆགས་ཁྲོད་འདས་གྲོངས་ཕྱིན་པ་དང་ཤུལ་ལུས་ནང་མི་རྣམས་ལ་གདུང་སེམས་མཉམ་བསྐྱེད་ཀྱི་མར་མེ་ཁྲོམ་སྐོར་ཞིག་བཞུགས་སྒར་དྷ་རམ་སའི་སྤྱི་ཐང་ནས་གཙུག་ལག་ཁང་གི་དཔའ་བོ་རྡོ་རིང་བར་གནང་སོང་། སྐབས་དེར་གཞོན་ནུ་ཡིས་བོད་ཀྱི་ཁོར་ཡུག་ནི་ཨེ་ཤེ་ཡའི་རྒྱལ་ཁབ་མང་པོའི་བདེ་འཇགས་དང༌། མི་མང་ས་ཡ་མང་པོའི་འཚོ་གནས་དང་ཚེ་སྲོག་ལའང་འབྲེལ་བ་ཆགས་ཡོད་པས་རྒྱ་དམར་སྲིད་གཞུང་ནས་ངེས་པར་འགན་འཁུར་དགོས་པ་མ་ཟད། བོད་མཐོ་སྒང་གི་རང་བྱུང་ཁོར་ཡུག་ལ་ངེས་པར་གཅེས་སྲུང་དགོས་པའི་ནན་བརྗོད་བྱ་རྒྱུ་ཡིན། ཞེས་བརྗོད་སོང་།

ཕྱི་ལོ་༢༠༢༦་ཟླ་༡༠ ཚེས་༢༣ ཉིན་སྤེལ། ཁང་སང་བོད་ནག་ཆུའི་སྦྲ་ཆེན་རྫོང་དུ་ས་ཡོམ་གོ་ཆགས་ཁྲོད་འདས་གྲོངས་སུ་ཕྱིན་པའི་བོད་མི་དང་རྨས་སྐྱོན་ཕོག་པ། ཤུལ་ལུས་ནང་མི་རྣམས་ལ་དེ་རིང་གཞུང་འབྲེལ་གྱིས་གདུང་སེམས་མཉམ་བསྐྱེད་ཀྱི་མཆོད་འབུལ་སྨོན་ལམ་ཞིག་ཚོགས་སོང་། ས་ཡོམ་གོ་ཆགས་ཁྲོད་བོད་མི་༡༦་འདས་གྲོངས་སུ་ཕྱིན་ཡོད་ཅིང་། མི་༦༥་རྨས་སྐྱོན་ཕོག་ཡོད་འདུག ཁང་པ་༣༩༩་ལྷག་གཏོར་སྐྱོན་དང་སྐྱོན་བྱུང་ཡོད་འདུག

ཕྱི་ལོ་༢༠༢༦ ཟླ་༡༠ ཚེས་༢༡ ཉིན་གྱི་སྔ་དྲོར། བཞུགས་སྒར་དྷ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། བོད་ཀྱི་ཟློས་གར་ཚོགས་པ་དང་ནོར་གླིང་བོད་ཀྱི་རིག་གཞུང་གཅེས་སྐྱོང་ཁང་། བལ་ཡུལ་བོད་ཀྱི་ལྷ་མོའི་ཚོགས་པ་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་སྒོ་ནས་བརྟན་བཞུགས་བསྟར་འབུལ་ཞུས་སོང་། སྐབས་དེར། བོད་མི་གཙོས་འཛམ་གླིང་གང་ས་ནས་ཕེབས་པའི་དད་ལྡན་མི་མང་༥༠༠་ཡས་མས་བརྟན་བཞུགས་མཛད་སྒོར་མཉམ་ཞུགས་གནང་སོང་།

More Articles …