ཕྱི་ལོ་༢༠༢༥ ཟླ་༡༡ ཚེས་༣ ཉིན་སྤེལ། ཉེ་ཆར་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ཤྲཱི་ལངྐ་(Sri lanka) ཆིབས་བསྒྱུར་བསྐྱངས་ནས་ཆོས་ཕྱོགས་ཀྱི་མཛད་པ་བསྐྱངས་ཡོད་འདུག སྐབས་དེར། ཤྲཱི་ལངྐའི་ནང་དུ་ཆོས་བརྒྱུད་ཆེན་པོ་༼སི་ཡམ་ནི་ཀ་ཡ། ཨ་མར་པུ་ར་ནི་ཀ་ཡ། རཱམནྱ་ནི་ཀ་ཡ་བཅས་༽གསུམ་ཡོད་པ་ལས། ཨ་མར་པུ་ར་ནི་ཀ་ཡའི་ཆོས་བརྒྱུད་ཀྱི་ཐོག་ནས་༼འཇིག་རྟེན་དོན་དུ་སློབ་དཔོན་ཆོས་ཀྱི་རྣམ་རྒྱན།༽LOKARTHACHARYA DHARMA VIBHUSHANA གཟེངས་བསྟོད་ཅེས་པ་༸སྐྱབས་རྗེ་ཡོངས་འཛིན་གླིང་མཆོག་སྤྲུལ་རིན་པོ་ཆེ་མཆོག་ལ་འབུལ་བཞེས་མཛད་ཡོད་འདུག གཟེངས་བསྟོད་འདི་ནི་ཆོས་བརྒྱུད་དེའི་ཐོག་ནས་དེ་སྔ་འབར་མའི་བླ་ཆེན་ཞིག་དང་། ཐ་ལཎ་ཌིའི་བླ་ཆེན་ཞིག་ལ་འབུལ་གནང་མཛད་འདུག། །ཐེག་པ་ཆེན་པོ་དང་། དེའི་ནང་ནས་བོད་བརྒྱུད་ནང་བསྟན་གྱི་བླ་ཆེན་ཞིག་ལ་འབུལ་བ་ཐོག་མ་དེ་ཆགས་ཡོད་འདུག

ཕྱི་ལོ་༢༠༢༥ ཟླ་ ༡༠ ཚེས་ ༢༦། ཨ་རི་གྲོང་ཁྱེར་ནིའུ་ཡོག་ཏུ་བོད་རང་བཙན་འཐབ་རྩོད་པས་གོ་སྒྲིག་འོག ཀུན་གཟིགས་པན་ཆེན་རིན་པོ་ཆེ་སྐུ་ཕྲེང་བཅུ་པ་ཆོས་ཀྱི་རྒྱལ་མཚན་མཆོག་ནས་བོད་རྒྱལ་ཁབ་དང་མི་རིགས་ཀྱི་ཆེད་དུ་སྙིང་སྟོབས་ཞུམས་པ་མེད་པའི་ཐོག་རྒྱ་ནག་གཞུང་གིས་བོད་ལ་འཛིན་པའི་སྲིད་བྱུས་ངན་ལ་གདོང་ལེན་གྱིས་ཡིག་འབྲུ་ཁྲི་བདུན་གྱི་སྙན་ཞུ་ཕུལ་བ་སོགས་ལ་བཀའ་དྲིན་རྗེས་དྲན་དང་། ཀུན་གཟིགས་པཎ་ཆེན་སྐུ་ཕྲེང་བཅིུག་པ་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་བཙན་ཁྲིད་བྱས་ནས་ད་བར་ལོ་ངོ་༣༠ ལྷག་གར་སོང་ཆ་མེད་དུ་འགྱུར་ཡོད་པར་བརྟེན་མྱུར་དུ་གློད་གྲོལ་དགོས་པའི་དགོས་འདུན་བཏོན་འདུག

ཕྱི་ལོ་༢༠༢༥ ཟླ་༡༠་ཚེས་༨ ཉིན། བཞུགས་སྒར་དྷ་རམ་སའི་ཐེག་ཆེན་ཆོས་གླིང་གཙུག་ལག་ཁང་དུ། ཨོ་སི་ཊི་ལི་ཡ་རྒྱལ་ཡོངས་བོད་རིགས་སྤྱི་མཐུན་ཚོགས་པ་དང་། ཡུ་རོབ་བོད་རིགས་ཚོགས་པ། བོད་ཀྱི་གཞོན་ནུ་ལྷན་ཚོགས་བཅས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཚེ་དཔག་མེད་དྭངས་མ་བཅུད་འདྲེན་གྱི་ཆོ་གའི་སྒོ་ནས་བརྟན་བཞུགས་བསྟར་འབུལ་ཞུས་སོང་།

ཕྱི་ལོ་༢༠༢༥ ཟླ་༡༠ ཚེས་༧ ཉིན། དབུས་འོས་བསྡུ་ལྷན་ཁང་ནས་ཕྱི་ལོ་༢༠༢༥་དང་༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། སྐབས་༡༨ པའི་བོད་མི་མང་སྤྱི་འཐུས་ཀྱི་འོས་བསྡུ་ཆེན་པོ་དང་འབྲེལ་བའི་གསར་འགོད་གསལ་བསྒྲགས་ཤིག་གནང་སོང་། སྐབས་དེར། ཕྱི་ལོ་༢༠༢༥་དང་༢༠༢༦ ལོའི་བོད་མིའི་སྒྲིག་འཛུགས་ཀྱི་སྲིད་སྐྱོང་དང་། བོད་མི་མང་སྤྱི་འཐུས་སྐབས་༡༨ པའི་སྔོན་འགྲོའི་འོས་བསྡུ་ནི་ཕྱི་ལོ་༢༠༢༦ ཟླ་༢ ཚེས་༡་རེས་གཟའ་ཉི་མ་དང་དངོས་གཞིའི་འོས་བསྡུ་ཕྱི་ལོ་༢༠༢༦ ཟླ་༤ ཚེས་༢༦ རེས་གཟའ་ཉི་མ་བཅས་སོ་སོར་བོད་མིའི་འདུ་སྡོད་ཡོངས་སུ་ས་གནས་སོ་སོའི་དུས་ཚོད་ལ་བྱ་རྒྱུའི་དུས་ཚེས་གཏན་འཁེལ་གནང་སོང་། ཕྱི་ལོ་༢༠༢༦ ལོའི་སྲིད་སྤྱི་གཉིས་ཀྱི་འོས་བསྡུ་ཆེན་མོའི་འབོད་སྒྲ་ནི་” ང་བོད་ཡིན། ངས་བོད་ལ་འོས་འཕེན།” ཞེས་པ་དེ་ཡིན་པར་གསལ་བསྒྲགས་གནང་སོང་།

ཕྱི་ལོ་༢༠༢༥ ཟླ་ ༡༠ ཚེས་ ༤ ཉིན། བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐའེ་ཝན་གྱི་དད་ལྡན་མང་པོས་ཇི་ལྟར་གསོལ་བ་བཏབ་པ་ལྟར་དགའ་ལྡན་ལྷ་བརྒྱ་མ་དང་སེམས་བསྐྱེད། བྱང་སྡོམ་བཅས་ཀྱི་ཆོས་འབྲེལ་བསྐྱངས་གནང་མཛད་སོང་། སྐབས་དེར། ཐེ་ཝན་དང་མ་ལེ་ཞིས་ཡ། སིངྒ་པོར། ཨ་རི། ཁ་ན་ཊ། ཡུ་རོབ་རྒྱལ་ཁབ་ཁག་དང་བོད་མི་བཅས་ཁྱོན་མི་གྲངས་༥༨༠༠ ཙམ་བཀའ་ཆོས་ཞུ་ཆེད་ཕེབས་གནང་འདུག

ཕྱི་ལོ་༢༠༢༥ ཟླ་༩ ཚེས་ ༢༩ ཉིན། བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་ཐེངས་ ༡༩ པ་དབུ་འཛུགས་གནང་སྐབས། སྐུ་མགྲོན་གཙོ་བོ་༸སྐྱབས་རྗེ་ཀུན་བདེ་གླིང་རྟ་ཚག་རྗེ་དྲུང་རིན་པོ་ཆེ་མཆོག་གིས་གསུང་དོན། ང་ཚོ་ཚང་མས་ང་བོད་པ་ཡིན་བསམ་པའི་བསམ་བློ་དང་། བོད་ཀྱི་གཞོན་སྐྱེས་ཤིག་ཡིན་བསམ་པའི་བསམ་བློ། མ་འོངས་པ་འགན་འཁྱེར་མཁན་ཞིག་ཡིན་བསམ་པའི་བསམ་བློ་དགོས། ང་ཆོལ་ཁ་འདིའི་ཁོངས་སུ་གཏོགས་པ་དང་ལུང་ཚན་འདིའི་ཁོངས་སུ་གཏོགས་པ་དེ་གཙོ་བོ་མི་ཡིན་པ། བོད་པ་ཞིག་ཡིན་པའི་འདུ་ཤེས་བཞག་པའི་ཐོག་ནས་མ་འོངས་པར་ཕྱག་ལས་གནང་བའི་སྐབས་སུ་ནུས་པ་གཅིག་ཏུ་སྒྲིལ་བའི་ཐོག་ཐུགས་འཁུར་བཞེས་དགོས། མཐུན་སྒྲིལ་རྡོག་རྩ་ཧ་ཅང་གལ་ཆེན་པོ་རེད། དེ་ནི་ང་ཚོ་མ་འོངས་པའི་འཐབ་རྩོད་དང་། བོད་གཞིས་བྱེས་མཉམ་འཛོམས་ཡོང་བའི་ནུས་པ་གཙོ་བོ་ཞིག་ཆགས་བསྡད་ཡོད་རེད། ཅེས་བཀའ་སློབ་ལམ་སྟོན་གནང་སོང་།