༄༅།།ཨོཾ་མ་ཎི་པདྨེ་ཧཱུཾ། ཐུགས་རྗེ་ཆེན་པོའི་སྤྲུལ་པ་ཆོས་སྐྱོང་བའི་རྒྱལ་པོ་བསྲོང་བཙན་རྒམ（སྒམ）པོས།བོད་འབངས་སྤྱི་འཐུན（མཐུན）ལ་གསུངས་པ། བོད་ཀྱི་མི་རྣམས་ཉོན་ཅིགབོད་ཁ་བ་ཅན་གྱི་མི་རྣམས་སྤྲེའུ་དང་བྲག་སྲིན་མོའི་བུར་སོང་བས།
ཁོང་ཙོལ（ཅོལ）ཆུང་ལ་ཁ་སྦྲིན། ཁྲེལ་འཛེམ་དང་ངོ་ཚ་ཆུང་ལ་གསར་འགྲོགས་ལ་དགའ། དད་པ་ཆུང་ལ་སྡིག་ལ་མི་འཛེམ། འགྲན་སེམས་ཆེ་ལ་ཕྲག་དོག་ཆེ། འདོད་ཐག་ཉེ་ལ་ཚིག་མི་བཙན་པས། དུས་ཕྱི་མའི་མི་རྣམས་ཆོས་དང་གང་ཟག་གཉིས་ཀ་ལ་གསར་འགྲོགས་ཆེ་བས།ཆོས་བྱེད་པ་ལ་སྒྲོ་སྐུར་འདོགས། ཆོས་ལ་ནི་གསར་སྔས་ཆེ་བས་དར་སྐྱེན་ལ་ནུབ་སྐྱེན།སྒྲུབ་མི་ནུས་པར་བཤད་འདོད།བསོད་ནམས་དང་འདུ་འཛི་ལ་དགའ། ཆོས་བརྒྱད་ཀྱི་གྲུ་ཚུགས་ས་པ་འདོད་པ་ཤེས་ཐག་འབྱུང་བས།དེའི་དུས་སུ་ཐུགས་རྗེ་ཆེན་པོའི་བསྟན་པ་དར་བས་ལྷ་དཀར་པོ་སྒོམ་པ་མང༌།དེའི་ཚེ་ཐུགས་རྗེ་ཆེན་པོའི་ཆོས་བྱེད་པར་འདོད་ན་འཁོར་བའི་མཚན་ཉིད་མི་རྟག་པ་ཡིན།རང་རྟག་ཏུ་རེ་སྟེ་ཚེའི་འགྲིབ་ལུགས་བུད་མེད་ཀྱི་གྲུའུ་འཐུལ་བ་བཞིན་འཛད་པ་ཡིན།ཉི་མ་ནུབ་ཁའི་གྲིབ་སོ་བཞིན་འདེད་དེ།བྲོས་པས་མི་ཐར།ཐོ་ཡོར་ལ་བྱ་སྒྲོ་བཙུགས་པ་རླུང་གིས་གཡོ་བ་ལྟར་ནམ་འཆི་ཆ་མེད་པ་ཡིན།
བཙོན་གསོད་སར་ཁྲིད་པ་ལྟར་འཆི་བ་ལ་ཇེ་ཉེར་སོང་ནས་འཆི་ངེས་པ་ཡིན།མི་ཤ་འོ་དང་མི་དོང་བ་ཕྲད་པ་ལྟར་འཆི་བ་ལ་བླུ་ཐབས་མེད་པ་ཡིན། དེ་ལ་ཚེ་འདི་བས་ཕྱི་མ་མི་དྲན་པ་ཡིན།དེ་ལྟར་དུག་ལྔ་རང་ཁར་སྤྱད་ན། ཞེ་སྡང་གི་མེ་འབར་བས་དགྲ་མ་ཐུལ་གྱིས་དོགས་ནས་རང་གི་སྲོག་ལ་མི་ལྟ། འདོད་ཆགས་ཀྱི་ཆུ་གྲུགས་པས་གཉེན་མ་སྐྱོངས་ཀྱིས་དོགས་ནས།ནོར་རྫས་ལ་གདུང་སེམས་ཀྱི་ཟས་འདོད་པ་དང་འདྲ།གཏི་མུག་གི་མུན་པར་ཚུད་པས་རང་ངོ་རང་གིས་མ་ཤེས་མུན་ཁུང་དུ་རྫས་ཚོལ（འཚོལ）བ་དང་འདྲ། ང་རྒྱལ་གྱི་རི་བོ་ལ་འཛེགས་པས་ང་བདག་གི་འགོང་བོ་དང་མ་བྲལ་བ་ཅུ་རྩལ་ཅན་ཆུས་ཁྱེར་བ་དང་འདྲ།ཕྲག་དོག་གི་ཚུབ་མར་ཚུད་པས་གཉིས་པ་ཕུང་བ་སྟོབས་ཅན་གཡང་སར་འཛིངས་པ་དང་འདྲ།ཉོན་མོངས་དུག་ལྔ་རང་ཁར་སོང་བ་རྩྭ་ལ་མེ་འཆེད（མཆེད）པ་དང་འདྲ།དུག་ལྔ་རང་ཁར་སྤྱད་པས་ཞེ་སྡང་གིས་དམྱལ་བར་སྐྱེ།ཚ་གྲང་གི་སྡུག་བསྔལ་མྱོང༌།སེར་སྣས་ཡི་དྭགས་སུ་སྐྱེ།བཀྲེས་སྐོམ་གྱི་སྡུག་བསྔལ་མྱོང༌།གཏི་མུག་གིས་བྱོལ་སོང་དུ་སྐྱེ།བཀོལ་སྤྱོད་ཀྱི་སྡུག་བསྔལ་མྱོང༌།
འདོད་ཆགས་ཀྱིས་མིར་སྐྱེ།འགྱུར་བའི་སྡུག་བསྔལ་མྱོང༌།ཕྲག་དོག་གིས་ལྷ་མ་ཡིན་དུ་སྐྱེ།འཐབ་རྩོད་ཀྱི་སྡུག་བསྔལ་མྱོང༌།ང་རྒྱལ་གྱིས་ལྷར་སྐྱེ།འཕོ་ལྟུང་གི་སྡུག་བསྔལ་མྱོང༌།འགྲོ་དྲུག་སྡུག་བསྔལ་གྱིས་གཅིག་ནས་གཅིག་ཏུ་འཁོར་བས་སྡུག་བསྔལ་གྱི་མཐའ་མི་ཆོད་པ་ཡིན་ནོ།།སྡུག་བསྔལ་དེ་ལས་བཟློག་པའི་ཐབས་བཀའ་རྒྱ་ཆེ་ལུང་གྲངས་མང་ཡང༌།འགྲོ་དྲུག་གི་སྡུག་བསྔལ་ལས་ཐར་པར་བྱེད་པ་ལ་ཐུགས་རྗེ་ཆེན་པོ་ལས་ལྷག་པ་མེད།སྙིང་པོ་ཡི་གེ་དྲུག་པས་རིགས་དྲུག་གི་སྐྱེ་སྒོ་གཅོད་པ་ཡིན།ཨོཾ་མ་ཎི་པདྨེ་ཧཱུཾ།ཨོཾ་ཡེ་ཤེས་ལྔ་ལྡན་ལྷ་ཡི་སྐྱབས།།འཕོ་ལྟུང་ཞི་ནས་སྐྱེ་སྒོ་གཅོད།།མ་སྙིང་རྗེ་ཆེན་པོ་ལྷ་མིན་སྐྱབས།།འཐབ་རྩོད་ཞི་ནས་སྐྱེ་སྒོ་གཅོད།།ཎི་བྱསམ་པ་ཆེན་པོ་མི་ཡི་སྐྱབས།།འགྱུར་བ་ཞི་ནས་སྐྱེ་སྒོ་གཅོད།།པད་དགའ་བ་ཆེན་པོ་བྱོལ་སོང་སྐྱབས།།གླེན་ལྐུགས་ཞི་ནས་སྐྱེ་སྒོ་གཅོད།།
མེ་བཏང་སྙོམས་ཆེན་པོ་ཡི་དྭགས་སྐྱབས།།བཀྲེས་སྐོམ་ཞི་ནས་སྐྱེ་སྒོ་གཅོད།།ཧཱུཾ་ཐུགས་རྗེ་ཆེན་པོ་དམྱལ་བའི་སྐྱབས།།ཚ་གྲང་ཞི་ནས་སྐྱེ་སྒོ་གཅོད།།ཐུགས་རྗེ་ཆེན་པོའི་བལྟ（ལྟ）བ་དགོངས་པ་ཕྱོགས་མེད་མཐའ་བྲལ།སྒོམ་པ་རང་གསལ་འཛིན་མེད།སྤྱོད་པ་མཉམ་པ་རིས་མེད།འབྲས་བུ་ཆོས་སྐུ་འགྱུར་མེད།དམ་ཚིག་དྲི་མེད་རྣམ་དགའཕྲིན་ལས་འགྲོ་དོན་ཕྱོགས་མེད།ཐུགས་རྗེ་ཆེན་པོའི་བལྟ（ལྟ）དགོངས་ཡིན་ནོ།།རང་གི་གྲོགས་སུ་དམ་པའི་ཆོས་བཟང་བས་ཐུགས་རྗེ་ཆེན་པོའི་ཆོས་ལ་ཆོད（མཆོད）ཅིགསྐྱེལ་མར་དཀོན་མཆོག་གསུམ་བཟང་བས་དཀོན་མཆོག་གུསམ་ལ་སྐྱབས་འགྲོ་རྒྱུན་མ་བཅད（གཅོད）ཅིགསུན་མར་བླ་མ་ཡི་དམ་མཁའ་འགྲོ་གསུམ་བཟང་བས་གསོལ་བ་རྒྱུན་མ་ཆད་པར་ཐོབ་ཅིགརྒྱབ་སྐྱོར་དུ་ལྟ་སྒོམ་སྤྱོད་པ་གསུམ་བཟང་བས་ཉམས་སུ་ལོངས་ཤིགསྡིག་པ་ཕྲ་མོ་ནས་སྤྱོངས་ཤིག་ཐིགས་པ་བསགས་པས་རྒྱ་མཚོ་ཙམ་དུ་འགྲོའོ།།དགེ་བ་ཕྲ་མོ་ནས་གྱིས་ཤིག་རི་རབ་ཆེན་པོ་ཡང་རྡུལ་ཕྲ་རབ་ནས་གྲུབ་བོ།།ཅི་བྱས་དགེ་བའི་རྩ་བ་བླ་མེད་བྱང་ཆུབ་ཏུ་བསྔོ་ཤིགཕྱིའི་རྒྱ་མཚོ་ལ་མཆིལ་མ་གཅིག་བོར་བ་མི་འཛད་པ་ལྟར་ཡིན་ནོ།།ཆེས་ཐུགས་རྗེ་ཆེན་པོའི་ཡང་སྙིང༌།ཨོཾ་མ་ཎི་པདྨེ་ཧཱུཾ།ཞེས་པ་འདི་བས་ལྷག་པ་མེད་དོ།།བླ་ན་མེད་པའི་བྱང་ཆུང་ཐོབ་པའི་སྙིང་པོ་མ་ནོར་བ་ཡིན་ནོ།།ཞེས་སྤྲུལ་པའི་རྒྱལ་པོས་བོད་ཁམས་སྤྱི་ལ་རྒྱུད་མང་ས་པའོ།།
ཡོངས་ཁུངས། ལྷ་ས་རྩོམ་རིག་མེ་ལོང༌།
