ཕྱི་ལོ་༢༠༢༤ ཟླ་༨ ཚེས་༢༢ ཉིན། ནིའུ་ཡོག་གྲོང་ཁྱེར་གྱི་ UBS རྩེད་འགྲན་རའི་ནང་དུ། བྱང་ཨ་རིར་གནས་པའི་བོད་རིགས་ཡོངས་དང་སོག་རིགས། ཧི་མ་ལ་ཡའི་རི་རྒྱུད་མི་མང་ཡོངས་ནས་༧སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུས་འདུག སྐབས་དེར། ༸གོང་ས་མཆོག་གིས་ངོས་ཀྱི་མི་ཚེ་ལོ་བརྒྱ་ལྷག་རིང་སྡོད་ཀྱི་རེད། ངོས་ཀྱིས་བོད་རྒྱ་ཆེ་མི་མང་གི་རེ་འདུན་འགྲུབ་ཐུབ་པ་བྱ་རྒྱུ་ཡིན། ངོས་ཀྱི་རྨི་ལམ་ལ་དཔལ་ལྡན་ལྷ་མོ་ངོས་ཀྱི་མཇིང་པའི་སྟེང་དུ་ཕེབས་ཏེ། ལོ་བརྒྱ་དང་སུམ་ཅུ་སོ་གྲངས་ཤིག་འཚོ་ཡི་རེད་ཅེས་ངོས་ལ་གསུངས་མྱོང་། ཞེས་སོགས་བཀའ་བསྩལ་སོང་།

ཕྱི་ལོ་༢༠༢༤ ཟླ་༨ ཚེས་༢༢ ཉིན་སྤེལ། ཁ་སང་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨ་ཛི་རཱ་ཛེ་ཡ་ (Uzra Zeya ) དང་ཨ་རི་སྲིད་འཛིན་གྱི་དམིགས་བསལ་ལས་རོགས་དང་རྒྱལ་ཡོངས་བདེ་འཇགས་ལྷན་ཚོགས་ཀྱི་དམངས་གཙོ་དང་འགྲོ་བ་མིའི་ཐོབ་ཐང་གི་འགན་འཛིན་ཁེ་ལེ་ར་ཛོ(Kelly Razzouk) བཅས་ནིའུ་ཡོག་གྲོང་ཁྱེར་དུ་ཆེད་བཅར་གྱིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་མཇལ་འཕྲད་དུ་ཕེབས་འདུག

ཕྱི་ལོ་༢༠༢༤ ཟླ་༨ ཚེས་༢༡ ཉིན་སྤེལ། སང་ཉིན་ནིའུ་ཡོག་ཏུ་བྱང་ཨ་རིའི་བོད་རིགས་ཡོངས་དང་སོག་རིགས། ཧི་མ་ལ་ཡའི་རི་རྒྱུད་མི་མང་ཡོངས་ནས་༸སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་བརྟན་བཞུགས་བསྟར་འབུལ་ཞུ་རྒྱུ་དང་། དེ་རྗེས་སུད་སིའི་གྲོང་ཁྱེར་ཛུ་རིག་ལ་ཆིབས་སྒྱུར་བསྐྱང་རྒྱུ་དང་། ཕྱི་ལོ་ ༢༠༢༤ ཟླ་ ༨ ཚེས་ ༢༨ ཉིན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་བཞུགས་སྒར་རྡ་རམ་ས་ལར་ཞབས་སོར་འཁོད་རྒྱུ་ཡིན་པ་གསལ་འདུག

ཕྱི་ལོ་༢༠༢༤ ཟླ་༧ ཚེས་༡༢ ཉིན། ཨ་རིའི་སྲིད་འཛིན་ཇོ་བྷ་ཌན་མཆོག་གིས་བོད་དོན་རྒྱབ་སྐྱོར་ཁྲིམས་འཆར་ཡང་ན་བོད་རྒྱའི་དཀའ་རྙོག་སེལ་བར་སྐུལ་འདེད་གཏོང་བའི་ཁྲིམས་འཆར་ལ་མཚན་རྟགས་བཀོད་ནས་ད་ལྟར་དངོས་སུ་ཁྲིམས་ལ་གཏན་འབེབས་གནང་འདུག ཁྲིམས་འཆར་འདི་ཡིས་རྒྱ་ནག་མི་དམངས་སྤྱི་མཐུན་རྒྱལ་ཁབ་དང༌། རྒྱ་ནག་དམར་ཤོག་ཚོགས་པའི་དཔོན་རིགས་ཚོས་བོད་དེ་གནའ་སྔ་མོ་ནས་རྒྱ་ནག་གི་ཆ་ཤས་ཡིན་ལུགས་སྒྲོགས་བཞིན་པ་དེ་ནི། ལོ་རྒྱུས་ཀྱི་ཐོག་ནས་དངོས་བདེན་མ་རེད། ཅེས་དང་བོད་རྒྱ་དཀའ་རྙོག་སེལ་ཐབས་སུ་མྱུར་དུ་བོད་རྒྱའི་སྐུ་ཚབ་དབར་གྲོས་མོལ་བྱེད་དགོས་པའི་དགོས་འདུན་བཏོན་ཡོད།

ཕྱི་ལོ་༢༠༢༤ ཟླ་༧ ཚེས་༦ ཉིན། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་༨༩ ལ་ཕེབས་པའི་སྐུའི་འཁྲུངས་སྐར་ནི་ཨ་རི་དང་ཁེ་ན་ཌ། ཡུ་རོབ་རྒྱལ་ཁབ་ཁག་གི་ནང་། ཨོ་སི་ཊི་ལི་ཡ། ཐེ་ཝན། ཉི་ཧོང་། རྒྱ་གར་དང་བོད་ནང་སོགས་སུ་དངོས་ཤུགས་བརྒྱུད་གསུམ་ནས་སྲུང་བརྩི་ཞུས་སོང་། དེ་བཞིན་འཛམ་གླིང་གང་སའི་དབུ་ཁྲིད་གཙོས་པའི་གནད་ཡོད་མི་སྣ་ཚོས་༧གོང་ས་༧རྒྱལ་བ་རིན་པོ་ཆེ་མཆོག་གི་སྐུའི་འཁྲུངས་སྐར་ལ་འཚམས་འདྲི་དང་སྦྲགས་སྐུ་གཟུགས་མྱུར་དུ་བདེ་ཐང་ཡོང་བའི་སྨོན་འདུན་ཞུས་སོང་།

ཕྱི་ལོ་༢༠༢༤ཟླ་༡ཚེས་༢༢ཉིན། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་འབྲས་ལྗོངས་དང་ནུབ་བྷང་གྷལ། དེ་བཞིན་གནས་མཆོག་རྡོ་རྗེ་གདན་བཅས་ནས་ཟླ་གཉིས་ཙམ་གྱི་མཛད་འཕྲིན་ལེགས་པར་གྲུབ་ནས། དེ་རིང་ལྡི་ལི་མཁའ་དབྱིངས་བརྒྱུད་བཞུགས་སྒར་རྡ་སར་ཞབས་སོར་བདེ་བར་འཁོད་སོང་། བཞུགས་སྒར་རྡ་ས་གཡས་གཡོན་གྱི་བོད་མི་གཙོས་པའི་སེར་སྐྱ་མི་མང་རྒན་གཞོན་ཀུན་གྱིས་ལག་ཏུ་ཁ་བཏགས་དང་། བདུག་སྤོས། མེ་ཏོག་བཅས་བཟུང་ནས། དགའ་དད་སྤྲོ་གསུམ་གྱིས་དགའ་བའི་འཛུམ་དང་བཅས་ལམ་འགྲམ་ནས་ཕྲེང་བསྒྲིགས་ཏེ་བསུ་མ་བྱས་སོང་།