སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་དགུ་པ་དབུ་འཛུགས་གནང་སོང་།

དེ་ཡང་། གོང་ཚེས་ཉིན་གྱི་སྔ་དྲོའི་ཆུ་ཚོད་༩།༣༠ ཐོག བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་གཙོས་པའི་བཀའ་བློན་རྣམ་པ། དེ་བཞིན་བོད་མི་མང་སྤྱི་འཐུས་རྣམ་པ་བཅས་ཚང་འཛོམས་ཀྱིས་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསལ་བསྒྲགས་དང་སྦྲགས། ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་གནང་སོང་།

དེ་ནས་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསུང་བཤད་གནང་དོན། དེ་རིང་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་དགུ་པ་དེ་སྔོན་རྩིས་ཀྱི་གྲོས་ཚོགས་ཆགས་བསྡད་ཡོད་རེད། དེ་འདྲ་ཡིན་དུས་ལས་རིམ་དང་འབྲེལ་བའི་ཐོག་ནས་ཚིག་འགའ་ཤས་ཤིག་ཞུས་ན་བསམ་སོང་། ཕྱི་ཟླ་ ༣ པ་འགོ་བཙུགས་པ་དང་བོད་ནང་ལ་དམ་བསྒྲགས་བྱ་རྒྱུ་དེ་ཤུགས་ཆེ་རུ་བཏང་བ། དེ་ག་ནང་བཞིན་ང་ཚོས་གོ་ཐོས་བྱས་པ་ཡིན་ན་བོད་ནང་དུ་མཐོ་སློབ་ཁག་གི་སློབ་ཕྲུག་དེ་ཚོ་གསུམ་བཅུའི་དུས་དྲན་གྱི་ཕྱི་ཟླ་ ༣ པའི་ནང་ཕྱི་ལོག་ཏུ་དགོངས་ཞུས་གནང་ནས་གང་བྱུང་ཕེབས་མི་ཆོག་པ། དེ་བཞིན་འདུ་འཛོམས་བྱ་རྒྱུ་དང་སོ་སོའི་བསམ་ཚུལ་བསྟན་རྒྱུའི་གོ་སྐབས་མེད་པ། དེ་ནས་ས་གནས་འགའ་ཤས་དང་དགོན་སྡེ་འགའ་ཤས་ནང་གསུམ་བཅུའི་དུས་དྲན་སྐབས་ཟླ་བ་ ༣ པ་ཆ་ཚང་སློབ་གསོ་སྤེལ་རྒྱུའི་ལས་འགུལ་སྤེལ་བསྡད་པ་དེ་འདྲའི་གནས་སྟངས་བྱུང་བསྡད་འདུག ང་ཚོའི་ངོས་ནས་ཉིན་མོ་དེ་གལ་ཆེན་པོ་ཞིག་བརྩིས་ཀྱི་ཡོད་རེད། དེ་ག་ནང་བཞིན་རྒྱ་ནག་གི་ཕྱོགས་ནས་ཡིན་ནའང་བོད་ནང་དམ་བསྒྲགས་ཤུགས་ཆེ་རུ་གཏོང་བསྡད་པ་ཞིག དེ་འདྲ་ཡིན་དུས་རྒྱ་ནག་གིས་དེ་འདྲ་བྱེད་བཞིན་པ་དེ་སོ་སོ་ལ་ངོ་གནོང་ཡོད་པའི་ཆ་ནས་དེ་འདྲ་བྱེད་ཀྱི་ཡོད་རེད་བསམ་གྱི་ཡོད།

སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་ཡང་སྲིད་ཕེབས་རྒྱུ་དེ། དུས་རྒྱུན་དུ་ང་ཚོའི་ཆོས་ཕྱོགས་ནས་ནང་པ་དང་། དེའི་ནང་ནས་བོད་ཀྱི་ནང་པའི་འགྲོ་སྟངས་ཤིག་གི་ཐོག་ནས་འགྲོ་དགོས་པའི་གནས་སྟངས་ཤིག་ཆགས་བསྡད་ཡོད་རེད། ལྷག་པར་དུ་ཡང་སྲིད་ཟེར་བ་དེ་སྐུ་གོང་མའི་མཛད་པ་འཕྲིན་ལས་མཐའ་སྐྱོང་གནང་མཁན་དེ་འདྲ་ཞིག་དགོས་རྒྱུའི་གནས་སྟངས་ཆགས་བསྡད་ཡོད་དུས། ཆབ་སྲིད་ཀྱི་དགོས་མཁོ་དང་འབྲེལ་བའི་ཐོག་ནས་དེར་ལག་པ་རྐྱོང་སྡོད་པ་ཡིན་ན་རྒྱལ་སྤྱིའི་སྤྱི་ཚོགས་རེད། བོད་ནང་རེད། ལྷག་པར་དུ་རྒྱ་ནག་མི་དམངས་ཀྱིས་དེར་ཡིད་ཆེས་བྱེད་མི་ཐུབ་པའི་གནས་སྟངས་དེ་གསལ་པོ་ཆགས་བསྡད་ཡོད་རེད། དེ་འདྲ་ཡིན་དུས་དེའི་ཐོག་ནས་ང་ཚོས་བསྒྲུབ་དགོས་པའི་གནས་ཚུལ་འགའ་ཤས་ཤིག་ཆགས་བསྡད་ཡོད་རེད། དེ་འདྲའི་ཐོག་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་ཕེབས་ཕྱོགས་ཀྱི་ཐོག་ལ་མྱུར་པོའི་ཐོག་ནས་ཁ་གསལ་པོ་དང་རྒྱལ་སྤྱིའི་སྤྱི་ཚོགས་ནང་དུའང་ངོས་འཛིན་གསལ་པོ་ཡོང་ཐུབ་རྒྱུར་ང་ཚོའི་ཐབས་ལམ་དེ་ཡང་མྱུར་པོ་བྱེད་ཐུབ་དགོས་རྒྱུ་དེ་གལ་ཆེན་པོ་རེད་འདུག་ཅེས་དེ་རིང་གོ་སྐབས་འདི་བརྒྱུད་ནས་གསོལ་འདེབས་ཞུ་རྒྱུ་ཡིན།

དེ་རིང་གྲོས་ཚོགས་ཀྱི་ལས་ཉིན་མང་ཆེ་ཤོས་དེ་དཔལ་འབྱོར་གྱི་ལས་དོན་ཐོག་ལ་འགྲོ་ཡི་ཡོད་རེད། བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༥་་་༢༦ ལས་ཁུངས་ཁག་གི་སྔོན་རྩིས་བཀའ་འཁྲོལ་གཏན་འབེབས་བྱེད་དགོས་རྒྱུའི་ལས་རིམ་ཕེབས་ཀྱི་ཡོད་རེད། དབུས་ལས་ཁུངས་ཁྱབ་ཁོངས་ཁག་གི་སོ་སོའི་ལོ་གཅིག་གི་འགྲོ་སོང་དང་འཆར་གཞི་གང་ཡོད་པ་དེ་དཔལ་འབྱོར་ལས་ཁུངས་ལ་ཡར་ཕུལ། དཔལ་འབྱོར་ལས་ཁུངས་ཀྱི་ཐོག་ནས་བཀའ་ཤག་ལྷན་ཚོགས་ལ་ཕུལ་ནས་བཀའ་ཤག་ལྷན་ཚོགས་ཀྱིས་རྒྱབ་གཉེར་གནང་གི་ཡོད་རེད། དེའི་རྗེས་ལ་བོད་མི་མང་སྤྱི་འཐུས་ལྷན་ཚོགས་ཀྱི་ཚོད་དཔག་འཆར་རྩིས་ཚོགས་ཆུང་གིས་བསྐྱར་ཞིབ་གནང་། དེ་ནས་ང་ཚོའི་སྔོན་རྩིས་གྲོས་ཚོགས་ཟེར་ནས་དེ་རིང་འདིའི་ཐོག་ནས་ལས་ཁུངས་གོ་རིམ་བཞིན་དུ་སྔོན་རྩིས་གཏན་འབེབས་གནང་རྒྱུའི་གནས་སྟངས་ཆགས་བསྡད་ཡོད་རེད། དེ་ག་ནང་བཞིན་དཔལ་ལྡན་དཔལ་འབྱོར་བཀའ་བློན་མཆོག་གི་རྩིས་ལོ་ ༢༠༢༥་་་༢༦ ལོའི་སྔོན་རྩིས་འགོད་འབུལ་གྱི་གསུང་བཤད་ཕེབས་ཀྱི་ཡོད་པ་དང་། བོད་མི་མང་སྤྱི་འཐུས་ལྷན་ཚོགས་ཀྱི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་དེ་ཕེབས་ཀྱི་ཡོད་རེད། དེའི་ཐོག་ལ་སྔོན་རྩིས་སྤྱི་ཡོངས་ཀྱི་བགྲོ་གླེང་ཕེབས་རྒྱུའི་ལས་དོན་མུ་མཐུད་ཡོང་གི་ཡོད་རེད།

དེ་ག་ནང་བཞིན་ང་ཚོའི་གྲོས་ཚོགས་ལས་རིམ་གཅིག་ལ་ཁྲིམས་བཟོའི་ལས་དོན་ཁག་ཕེབས་ཡོང་གི་ཡོད་རེད། ཁྲིམས་བཟོའི་ལས་དོན་ཁག་ནང་ལོགས་ལ། ཆེས་མཐོའི་ཁྲིམས་ཞིབ་ཁང་གི་ཁྲིམས་ཡིག་ཁག་གསུམ་བཀའ་འཁྲོལ་གཏན་འབེབས་གནང་དགོས་རྒྱུའི་གནས་སྟངས་ཆགས་བསྡད་ཡོད་རེད། དེ་ག་ནང་བཞིན་བཀའ་ཤག་ནས་ལས་བྱེད་འདེམས་ལྷན་གྱི་སྒྲིག་གཞི། བཙན་བྱོལ་བོད་མིའི་གཞུང་དངུལ་འདུ་འགོད་དང་། ལོ་འཁོར་སྔོན་རྩིས། དངུལ་རྩིས་སྟངས་འཛིན་བཅས་ཀྱི་སྒྲིག་གཞི། བཙན་བྱོལ་བོད་མིའི་གཞིས་ཆགས་ས་ཁང་གི་སྒྲིག་གཞི་ཁག་ལ་བསྐྱར་བཅོས་བསྣམ་ཕེབས་ཀྱི་འདུག དེ་ག་ནང་བཞིན་གྱི་སྤྱི་འཐུས་རྒྱུན་ལས་ནས་མཛད་གཙོ་རྣམ་པའི་ཐོབ་ཐང་གི་སྒྲིག་གཞི་ཐོག་ལའང་བསྐྱར་བཅོས་རིགས་གཅིག་འཁུར་དགོས་པ་ཆགས་ཀྱི་འདུག དེ་བཞིན་གྲོས་ཚོགས་ཀྱི་ཆེད་འཛུགས་ཚོགས་ཆུང་ནས་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་འཆར་ཟིན་དང་སྙན་ཐོ་འདིར་ཕེབས་ཀྱི་ཡོད་རེད་ཅེས་ཞུ་རྒྱུ་ཡིན།

ང་ཚོའི་རྩིས་དང་འབྲེལ་བའི་ཐོག་ནས་བོད་མིའི་སྒྲིག་འཛུགས་ཀྱི་དབུས་སའི་ལས་ཁུངས་ཡོངས་དང་འབྲེལ་བའི་མང་ཚོགས་རྩིས་ཁྲ་ཚོགས་ཆུང་སྐབས་༡༢ པའི་སྙན་ཐོ་དང་རྒྱབ་གཉེར་དེ་འདིར་ཕེབས་ཀྱི་ཡོད་རེད། དེ་ག་ནང་བཞིན་གྱི་གྲོས་ཆོད་གྲོས་འཆར་ཁག་གཅིག་ཕེབས་ཀྱི་ཡོད་རེད། གྲོས་ཆོད་གྲོས་འཆར་གལ་ཆེ་བ་གཅིག་དེ། བོད་ནང་གི་ཛ་དྲག་གནས་སྟངས་ཐོག་ལ་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་དེ་རེད། ང་ཚོའི་ལས་རིམ་འཁུར་སྟངས་དེ་གྲོས་ཚོགས་ཀྱི་གནས་སྟངས་ལ་བརྟེན་ནས་ན་ནིང་ནས་གྲོས་ཚོགས་ཚོགས་དུས་བརྒྱད་པའི་སྐབས་སུ་ང་ཚོས་འགྱུར་བ་བཏང་བ་རེད། དེ་རིང་འདིར་ཡང་འགྱུར་བ་བཏང་ནས་ལས་རིམ་དེ་ང་ཚོས་ཉི་མ་ཁ་ཤས་ཀྱི་རྗེས་ལ་ལས་རིམ་ནང་འཇུག་རྒྱུ་བྱས་ཡོད། དེ་ག་ནང་བཞིན་གྱི་སྤྱི་འཐུས་རྒྱུན་ལས་ཀྱི་ཐོག་ནས་གྲོས་ཆོད་ཁག་ཅིག་ཕེབས་ཀྱི་ཡོད། དེ་ནས་བཀའ་ཤག་གི་ཐོག་ནས་གྲོས་ཆོད་ཁག་ཅིག་ཕེབས་ཀྱི་འདུག གཞན་ཡང་གྲོས་ཚོགས་ཀྱི་ལས་རིམ་འདིའི་ནང་ལོགས་ལ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་རྣམ་པ་དང་། རྩིས་ཞིབ་སྤྱི་ཁྱབ་ཀྱི་འོས་བསྡུའི་ལས་རིམ་དེ་སླེབས་ཀྱི་ཡོད་རེད་ཅེས་སྙན་སེང་ཞུ་རྒྱུ་ཡིན། ཞེས་སོགས་གསུངས་སོང་།

དེའི་རྗེས། སྤྱི་འཐུས་བསྟན་པ་ཡར་འཕེལ་མཆོག་གིས་རྒྱ་གར་གྱི་སྲིད་བློན་ཟུར་པ་སྐུ་ཞབས་མན་མོ་ཧན་སིངྒ་ (Dr Manmohan Singh) མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་དང་། སྤྱི་འཐུས་སློབ་དཔོན་ཐུབ་བསྟན་རྒྱལ་མཚན་མཆོག་གིས་ཨ་རིའི་སྲིད་འཛིན་ཟུར་པ་སྐུ་ཞབས་ཇི་མིའི་ཀཊར་ (Jimmy Carter alias James Earl Carter, Jr) མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར། སྤྱི་འཐུས་དགེ་བཤེས་ལྷ་རམས་པ་ཨ་ཀྲུག་ཚེ་བརྟན་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཞོན་ཟུར་པ་བྱ་དུར་བསོད་ནམས་བཟང་པོ་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར། སྤྱི་འཐུས་འཇུ་ཆེན་དཀོན་མཆོག་ཆོས་སྒྲོན་མཆོག་གིས་༧སྐུའི་གཅེན་པོ་བཀའ་བློན་ཁྲི་ཟུར་རྒྱ་ལོ་དོན་གྲུབ་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར། སྤྱི་འཐུས་ཙ་ནེ་ཚང་དོན་འགྲུབ་བཀྲ་ཤིས་མཆོག་གིས་བཀའ་ཟུར་ཞེ་བོ་བློ་བཟང་དར་རྒྱས་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར། སྤྱི་འཐུས་བློ་བཟང་ཐུབ་བསྟན་མཆོག་གིས་སྤྱི་ཟུར་ཆོས་རྗེ་སྒ་ཨཿདབྱངས་སྤྲུལ་སྐུ་རིན་པོ་ཆེ་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར། སྤྱི་འཐུས་ཚེ་རིང་དབྱངས་ཅན་མཆོག་གིས་སྤྱི་ཟུར་འཁོར་ཚ་བསོད་ནམས་དགྲ་འདུལ་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར། སྤྱི་འཐུས་བསྟན་འཛིན་འཇིགས་བྲལ་མཆོག་གིས་སྤྱི་ཟུར་སྨན་པ་ཁྱུང་ལུང་ཐོགས་མེད་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་བཅས་བཏོན་རྗེས། ཚང་མ་སྐུ་བཞེངས་ཐོག་ངག་བཅད་མྱ་ངན་སྐར་མ་གཅིག་རིང་ཞུས་གནང་སོང་།

དེ་ནས་སྲིད་སྐྱོང་དང་། དཔལ་འབྱོར་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་བོད་མིའི་སྒྲིག་འཛུགས་ཀྱི་རྩིས་ལོ་༢༠༢༥་་༢༦ ལོའི་སྔོན་རྩིས་འགོད་འབུལ་གྱི་གསུང་བཤད་གནང་རྗེས། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ཨ་ཀྲུག་ཚེ་བརྟན་མཆོག་གིས་རྩིས་ལོ་ ༢༠༢༥་་་༢༦ ལོའི་སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོ་སྙན་སྒྲོན་གནང་སོང་། དེ་རྗེས་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་མཆོག་གིས་དཔལ་ལྡན་དཔལ་འབྱོར་བཀའ་བློན་མཆོག་གི་སྔོན་རྩིས་གསུང་བཤད་དང་། སྔོན་རྩིས་ཚོད་དཔག་འཆར་རྩིས་ཚོགས་ཆུང་གི་སྙན་ཐོར་སྤྱི་ཡོངས་ཀྱི་བགྲོ་གླེང་དགོས་པའི་གྲོས་འཆར་བཏོན་གནང་བར། སྤྱི་འཐུས་བསྟན་འཛིན་འཇིགས་བྲལ་མཆོག་གིས་རྒྱབ་སྐྱོར་གནང་རྗེས། བགྲོ་གླེང་གནང་འགོ་འཛུགས་སོང་།

ཉིན་རྒྱབ་མང་ཚོགས་རྩིས་ཁྲའི་ཚོགས་ཆུང་གི་ཚོགས་གཙོ་སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་མཆོག་གིས་མང་ཚོགས་རྩིས་ཁྲའི་ཚོགས་ཆུང་སྐབས་ ༡༢ པའི་སྙན་ཐོ་སྙན་སྒྲོན་གནང་འགོ་འཛུགས་སོང་། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་དགུ་པ་ནི་ཟླ་འདིའི་ཚེས་༡༧་ནས་༣༡་བར་ལས་ཉིན་གྲངས་བཅུ་གསུམ་རིང་འཚོགས་འཆར་ཡོད་འདུག