ཕྱི་ལོ་༢༠༢༥ ཟླ་༩ ཚེས་༡༨ ཉིན། བཞུགས་སྒར་དྷ་ས་གངས་སྐྱིད་སྤྱི་འཐུས་ལྷན་ཚོགས་ཀྱི་ཚོགས་ཁང་དུ། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་མཇུག་བསྒྲིལ་གནང་སོང་། ལས་ཉིན་བརྒྱད་ཀྱི་ཚོགས་དུས་རིང་། ༸གོང་ས་མཆོག་ལ་བཀའ་དྲིན་རྗེས་དྲན་གྱི་གྲོས་ཆོད་དང་། བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་གྲོས་གྲོས་འཆར། གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད། བཅའ་ཁྲིམས་གཙོས་པའི་ཁྲིམས་བཟོའི་ལས་དོན་ཁག་དྲུག་ཙམ་གཏན་འབེབས། དེ་བཞིན་བོད་མིའི་སྒྲིག་འཛུགས་ཀྱི་ལྷན་ཁང་བདུན་གཙོས་པའི་ཁྱབ་ཁོངས་ལས་ཁུངས་ཁག་གི་ཕྱི་ལོ་ ༢༠༢༤ ཟླ་༤ ནས་ཕྱི་ལོ་༢༠༢༥ ཟླ་ ༣ ཚེས་ ༣༡ བར་གྱི་ལས་བསྡོམས་ཐོག་བགྲོ་གླེང་རྒྱས་པ་གནང་སོང་།
དེ་ཡང་། ཟླ་འདིའི་ཚེས་༡༣ ཉིན། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་བཞི་པའི་ཐོག བོད་ནང་གི་ཛ་དྲག་གནས་སྟངས་ལ་གདུང་སེམས་མཉམ་སྐྱེད་ཀྱི་གྲོས་གྲོས་འཆར་སྤྱི་འཐུས་བློ་བཟང་ཐུབ་བསྟན་མཆོག་གིས་སྙན་སྒྲོན་གནང་བ་དང་། དེར་སྤྱི་འཐུས་ཙ་ནེ་ཚང་དོན་འགྲུབ་བཀྲ་ཤིས་མཆོག་གིས་རྒྱབ་སྐྱོར་གནང་རྗེས། སྤྱི་འཐུས་རྣམ་པས་བགྲོ་གླེང་ལྷུགས་པོ་གནང་ཞིང་། སྐབས་དེར་སྤྱི་འཐུས་རྣམ་པས། གཞིས་ལུས་བོད་མི་རྣམས་ཀྱི་ལྷག་བསམ་སྙིང་སྟོབས་དང་བློས་གཏོང་བཅས་ལ་ཡི་རངས་གུས་འདུད་དང་། རྒྱ་གར་གཞུང་མང་གཉིས་ཀྱིས་ད་བར་བོད་དོན་ཐོག་གྱུར་བ་མེད་པར་མཐུན་འགྱུར་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ། རྒྱལ་སྤྱིའི་ནང་བོད་ནང་གི་གནས་ཚུལ་དྲིལ་བསྒྲགས་དང་བོད་དོན་ལས་འགུལ་གང་མང་སྤེལ་དགོས་པ། སྤྱི་ཚོགས་དྲྭ་རྒྱ་བེད་སྤྱོད་གཏོང་སྐབས་བོད་ནང་གི་བོད་མི་ཚོར་མི་གནོད་པའི་ཡིད་གཟབ་གནང་དགོས་པ། རང་དབང་ལུང་པའི་ནང་བོད་ཀྱི་སྐད་ཡིག་བཀོལ་སྤྱོད་ཤུགས་ཆེར་གཏོང་ཐབས་དང་། སོ་སོའི་ཆོས་དང་རིག་གཞུང་སྲུང་སྐྱོབ་དགོས་པ། ༧རྒྱལ་བའི་བཀའ་དགོངས་བསྒྲུབ་རྒྱུ་དང་། ཚང་མ་རྡོག་རྩ་གཅིག་བསྒྲིལ་བྱེད་དགོས་རྒྱུ། བོད་རྒྱ་འབྲེལ་མོལ་མཐུད་ཐབས་གནང་དགོས་པ་སོགས་གསུངས་རྗེས། དོན་ཚན་བདུན་ཅན་གྱི་གཞུང་འབྲེལ་གདུང་སེམས་མཉམ་སྐྱེད་ཀྱི་གྲོས་ཆོད་སྤྱི་མོས་ཀྱིས་གཏན་འབེབས་གནང་སོང་།
གཞན་ཡང་། ཟླ་འདིའི་ཚེས་༡༨ ཉིན། སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པའི་ལས་ཉིན་བརྒྱད་པའི་ཐོག དབུས་འོས་བསྡུ་ལས་ཁང་གི་འོས་བསྡུའི་འགན་འཛིན་ལས་འཕར་གཉིས་འོས་འདེམས་ཀྱི་ལས་རིམ་ཐོག སྤྱི་ཟུར་ཚེ་རིང་གཡུ་སྒྲོན་ལགས་དང་། བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་སྣང་ས་ཆོས་སྒྲོན་ལགས་རྣམ་གཉིས་དབུས་འོས་བསྡུ་ལས་ཁང་གི་འོས་བསྡུའི་འགན་འཛིན་ལས་འཕར་དུ་མང་མོས་ཀྱིས་བདམས་ཐོན་བྱུང་ཞིང་། དེ་ཡང་བཙན་བྱོལ་བོད་མིའི་བཅའ་ཁྲིམས་ལེའུ་བརྒྱད་པ། དོན་ཚན་༩༧ པའི་ནང་གསེས་༢ པའི་ “ཀ” པའི་དགོངས་དོན་ལྟར། འདེམས་སྒྲུག་ཚོགས་ཆུང་ནས་སྤྱི་ཟུར་ཚེ་རིང་གཡུ་སྒྲོན་ལགས་དང་། བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཤེལ་ལེ་ཀརྨ་ལེགས་བཤད་ལགས་རྣམ་གཉིས་འཆར་འབུལ་བྱུང་བར། སྤྱི་འཐུས་རྣམ་པས་གསང་བའི་འོས་ཤོག་འཕངས་ཏེ། སྤྱི་ཟུར་ཚེ་རིང་གཡུ་སྒྲོན་ལགས་ལ་འོས་གྲངས་༣༠ དང་། བོད་ཀྱི་རྩོད་རྙོག་འདུམ་སྒྲིག་ལྟེ་གནས་ཁང་གི་འགན་འཛིན་ཤེལ་ལེ་ཀརྨ་ལེགས་བཤད་ལགས་ལ་འོས་གྲངས་༡༡། རྩིས་མེད་༣ བཅས་བྱུང་རྗེས། དཔལ་ལྡན་ཚོགས་གཙོ་མཆོག་གིས་སྤྱི་ཟུར་ཚེ་རིང་གཡུ་སྒྲོན་ལགས་འོས་བསྡུའི་འགན་འཛིན་ལས་འཕར་དུ་མང་མོས་ཀྱིས་བདམས་ཐོན་བྱུང་བའི་གསལ་བསྒྲགས་དང་།
དེ་བཞིན་འོས་བསྡུའི་འགན་འཛིན་ལས་འཕར་གཉིས་པའི་ཐོག འདེམས་སྒྲུག་ཚོགས་ཆུང་ནས་བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་སྣང་ས་ཆོས་སྒྲོན་ལགས་དང་། བོད་མིའི་སྒྲིག་འཛུགས་ཀྱི་སྤྱི་ཁྱབ་འཆར་འགོད་པ་ཟུར་པ་འབུམ་རམས་པ་དཀོན་མཆོག་བརྩོན་འགྲུས་ལགས་རྣམ་གཉིས་འཆར་འབུལ་བྱུང་བར། སྤྱི་འཐུས་རྣམ་པས་གསང་བའི་འོས་ཤོག་འཕངས་ཏེ། བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་སྣང་ས་ཆོས་སྒྲོན་ལགས་ལ་འོས་གྲངས་༣༢ དང་། བོད་མིའི་སྒྲིག་འཛུགས་ཀྱི་སྤྱི་ཁྱབ་འཆར་འགོད་པ་ཟུར་པ་འབུམ་རམས་པ་དཀོན་མཆོག་བརྩོན་འགྲུས་ལགས་ལ་འོས་གྲངས་༡༡། རྩིས་མེད་༡ བཅས་བྱུང་རྗེས། དཔལ་ལྡན་ཚོགས་གཙོ་མཆོག་གིས་བོད་མིའི་སྒྲིག་འཛུགས་ཀྱི་དྲུང་ཆེ་ཟུར་པ་སྣང་ས་ཆོས་སྒྲོན་ལགས་འོས་བསྡུའི་འགན་འཛིན་ལས་འཕར་དུ་མང་མོས་ཀྱིས་བདམས་ཐོན་བྱུང་བའི་གསལ་བསྒྲགས་གནང་སོང་།
མཐའ་མར། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་གྲོས་ཚོགས་ཚོགས་དུས་བཅུ་པའི་མཇུག་བསྡོམས་གསུང་བཤད་གནང་སྐབས་གསུང་དོན། དེ་རིང་ང་ཚོ་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བཅུ་པ་དེ་ཕྱི་ལོ་༢༠༢༥ ཟླ་༩ ཚེས་༡༠ ནས་ཚེས་༡༨ བར་དུ་ལས་ཉིན་བརྒྱད་བསྐྱངས་ཡོད་རེད། ལས་ཉིན་བརྒྱད་བསྐྱངས་པ་དེ་ཚོ་ཐོག་མར་ཚོགས་གཙོ་གཉིས་ཀྱིས་ལས་རིམ་བསྒྲིགས་པ་གཞིར་བཟུང་རེད། ཚོགས་གཙོའི་དབུ་འཛུགས་ཀྱི་གཏམ་བཤད་ནང་ལ་ཞུས་པ་གཞིར་བཟུང་དེ་རིང་ང་ཚོའི་ལས་དོན་ཆ་ཚང་ཡོངས་སུ་ལེགས་གྲུབ་ཐུབ་པ་བྱུང་སོང་ཞེས་སྙན་སེང་ཞུ་རྒྱུ་ཡིན། དེ་ག་ནང་བཞིན་ང་ཚོའི་ལས་རིམ་ནང་ནས་གལ་ཆེ་བ་ཁག་ཅིག་སྙན་སེང་ཞུས་པ་ཡིན་ན། ༸གོང་ས་༸སྐྱབས་མགོན་ཆེན་པོ་མཆོག་གི་༸སྐུའི་གོ་སྟོན་དང་འབྲེལ་བའི་༸གོང་ས་མཆོག་གི་བཀའ་དྲིན་རྗེས་དྲན་གྱི་དམིགས་བསལ་གྲོས་ཆོད་དོན་ཚན་༥ ཅན་ཞིག་བཞག་ཡོད་རེད། དེ་བཞིན་བོད་ནང་གི་ཛ་དྲག་གནས་སྟངས་ཐོག་ལ་གདུང་སེམས་མཉམ་སྐྱེད་ཀྱི་གྲོས་ཆོད་དོན་ཚན་༧ དང་། དེ་ནང་བཞིན་ང་རང་ཚོའི་མཛད་གཙོ་ཟུར་པ་བཀའ་ཟུར་རྣམ་པ་གཉིས། སྤྱི་འཐུས་ཟུར་པ་གཅིག་བཅས་ལ་ང་ཚོས་གཞུང་འབྲེལ་མྱ་ངན་གུས་འདུད་ཀྱི་གྲོས་ཆོད་གསུམ་གཏན་འབེབས་བྱས་པ་རེད། དེ་ག་ནང་བཞིན་ཁྲིམས་བཟོའི་ལས་དོན་ལྟར་བྱས་པ་ཡིན་ན། བཅའ་ཁྲིམས་གཙོས་པའི་ཁྲིམས་བཟོའི་ལས་དོན་ཁག་དྲུག་ཙམ་གཏན་འབེབས་བྱུང་ཐུབ་སོང་། དེ་ནས་སྐར་རྟགས་ཅན་གྱི་དྲི་བ་བཞི་རེད།
དེ་ནས་ང་ཚོའི་ལས་ཉིན་མང་ཆེ་བ་དེ་དབུས་ལས་ཁུངས་ཁྱབ་ཁོངས་དང་བཅས་པའི་ཕྱི་ལོ་ ༢༠༢༤ ཟླ་ ༤ ནས་ཕྱི་ལོ་ ༢༠༢༥ ཟླ་ ༣ ཚེས་ ༣༡ བར་གྱི་ལས་བསྡོམས་རྒྱས་པ་དེར་སྤྱི་འཐུས་རྒྱུན་ལས་ཀྱིས་གཟིགས་ཞིབ་གནང་ནས་དྲི་བ་ཕེབས་པ་དང་། ལས་བསྡོམས་བསྡུས་པ་དེ་ལྷན་ཁང་སོ་སོ་ནས་གྲོས་ཚོགས་ནང་ལ་ཐད་ཀར་སྙན་སྒྲོན་ཞུས་ནས་དེའི་ཐོག་ལ་བཀུར་འོས་སྤྱི་འཐུས་རྣམ་པས་དགོངས་ཚུལ་དང་དོགས་འདྲི་ཕེབས་རྒྱུ་རེད། དེ་ག་ནང་བཞིན་གྱི་འཛིན་སྐྱོང་བཀའ་ཤག་གི་བཀའ་བློན་རྣམ་པ་ཚོས་སོ་སོའི་ལས་བསྡོམས་ཐོག་ལ་གསལ་བཤད་གནང་བ་དང་། དེ་ག་ནང་བཞིན་ལས་འཆར་ཐོག་ལ་དམིགས་བསལ་གྱི་ཕུགས་དམིགས་ག་རེ་ཡོད་མེད་དེ་ཚོའི་ཐོག་ལ་དམིགས་བསལ་འགྲེལ་བཤད་གནང་རྒྱུ། དེའི་ཐོག་ནས་སྤྱི་ཡོངས་ཀྱི་ཚོགས་གཙོས་བལྟས་པ་ཡིན་ན་དེ་རིང་ང་ཚོའི་ལས་རིམ། དེའི་ནང་ནས་ལས་བསྡོམས་དང་འབྲེལ་བའི་ཐོག་ལ་བཀུར་འོས་སྤྱི་འཐུས་རྣམ་པས་དགོངས་ཚུལ་མང་པོ་ཞིག་ཕེབས་སོང་། དེ་བཞིན་ང་ཚོའི་ལྷན་ཁང་ཁག་བདུན་རེད། གཙོ་བོ་བཀའ་བློན་རྣམ་པས་དབུ་འཁྲིད་ནས་གནང་གི་ཡོད་རེད་དེ། འོག་ལ་ཡོད་པའི་དབུས་སའི་གཞུང་ཞབས་ཚང་མས་འགན་འཁུར་བཞེས་པའི་ཐོག་ནས་ཕྱག་ལས་ཡག་པོ་ཞེ་པོ་ཞིག་གནང་ཡོད་པའི་ཚོར་སྣང་བྱུང་། དེར་བརྟེན་མ་འོངས་པར་ང་ཚོས་ཕྱག་ལས་གནང་རྒྱུ་དེ་ཚོར་དེ་རིང་གྲོས་ཚོགས་བརྒྱུད་ནས་བགྲོ་གླེང་བྱུང་པ་རེད། དེ་བཞིན་བཀའ་བློན་སོ་སོ་ནས་ལན་འདེབས་གསལ་བཤད་དེ་ཚོའི་ཐོག་ནས་མ་འོངས་པའི་ལས་དོན་དེ་ཚོ་ཚགས་ཚུད་པོ་ཡོང་བར་ཏན་ཏན་ང་ཚོར་ཐུགས་ཕན་གསོས་སོང་བསམ་པའི་ཚོར་སྣང་དེ་བྱུང་།
དེ་ག་ནང་བཞིན་ང་ཚོར་གལ་ཆེ་བ་གཅིག་དེ་གཙོ་བོ་ང་ཚོའི་བོད་ཀྱི་སྐད་ཡིག་རེད། དེ་བཞིན་རིག་གཞུང་རེད། སྤྱི་ཚོགས་ཀྱི་འཕྲོད་བསྟེན་རེད། དེ་བཞིན་ཆབ་སྲིད་ཀྱི་དྲིལ་བསྒྲགས་རེད། དེ་ག་ནང་བཞིན་ང་ཚོའི་དཔལ་འབྱོར་འདུ་འགོད་བྱ་རྒྱུས་མཚོན་པའི་ལྷན་ཁང་ཁག་དེ་དག་ང་ཚོར་གལ་ཆེ་ཤོས་འདྲ་པོ་ཞིག་ཆགས་བསྡད་ཡོད་རེད། དེ་ནང་བཞིན་ང་ཚོའི་འདས་པའི་ལོ་གཅིག་གི་ལས་དོན་དེ་དག་དེ་རིང་ང་ཚོ་འདིར་སྙན་སེང་བྱུང་བ་རེད། མ་འོངས་པའི་ལོ་གཅིག་དེ་ད་ལྟ་ང་ཚོ་འགྲོ་བཞིན་པའི་གནས་སྟངས་ཆགས་བསྡད་ཡོད་རེད། དེ་ཚོའི་ཐོག་ལ་བལྟས་པ་ཡིན་ནའང་ལས་འཆར་དེ་དག་གང་ཡག་ཡག་ཡོང་ཐུབ་པའི་རེ་བ་བྱེད་ཀྱི་ཡོད། གཙོ་བོ་ང་ཚོར་བཙན་བྱོལ་བོད་མིའི་བཅའ་ཁྲིམས་ཀྱིས་འགན་དབང་བསྐུར་བ་གཞིར་བཟུང་རེད། ང་ཚོ་སྐྱབས་བཅོལ་བའི་ཆབ་སྲིད་ཀྱི་གནས་སྟངས་ཐོག་བསྡད་ཡོད་རེད། གཙོ་བོ་བོད་དོན་བདེན་མཐའ་གསལ་རྒྱུ་དང་། དེ་བཞིན་བཙན་བྱོལ་སྤྱི་ཚོགས་ཀྱི་བདེ་དོན་ཐོག་ལ་ཕྱག་ལས་གནང་རྒྱུ། གནས་སྐབས་སུ་གཞིས་ལུས་བོད་མི་དེ་དག་གི་དཀའ་ངལ་སེལ་ཐུབ་རྒྱུར་ང་ཚོས་དུས་རྒྱུན་དུ་ནས་དགོངས་པ་བཞེས་དགོས་རྒྱུ་གལ་ཆེན་པོ་ཞེ་པོ་ཞིག་ཆགས་བསྡད་ཡོད་རེད། དེ་ཡིན་དུས་རྩ་བའི་དེ་ཚོའི་ཐོག་ལ་བཤད་ཡོང་དུས་རྒྱལ་སྤྱིའི་ཆབ་སྲིད་ཀྱི་གནས་སྟངས་ལ་ཡང་འབྲེལ་བ་ཆགས་ཀྱི་ཡོད་རེད། ལྷག་པར་དུ་རྒྱ་ནག་གི་ཆབ་སྲིད་གནས་སྟངས་ལ་ཡང་འབྲེལ་བ་ཆགས་ཀྱི་ཡོད་རེད། དེ་བཞིན་བོད་ཀྱི་གནས་སྟངས་ལ་ཡང་འབྲེལ་བ་ཆགས་ཀྱི་ཡོད་རེད། དེ་ཚོ་ཚང་མར་ང་ཚོས་ཐུགས་ཞིབ་གནང་བའི་ཐོག་ནས་མ་འོངས་པར་གཙོ་བོ་བོད་དོན་བདེན་མཐའ་གསལ་ཐུབ་རྒྱུར་ང་ཚོར་ཐབས་ལམ་ག་རེ་འདུག དེའི་ཐོག་ལ་ནུས་པ་གང་འདྲ་འདོན་དགོས་ཀྱི་འདུག དེ་ཚོའི་ཐོག་ལ་ང་ཚོས་དགོངས་པ་བཞེས་ནས་གོམ་པ་མདུན་སྤོས་བྱེད་ཐུབ་དགོས་པ་དེ་གལ་ཆེན་པོ་ཞེ་པོ་ཞིག་ཆགས་བསྡད་ཀྱི་ཡོད་རེད། ང་ཚོའི་སྤྱི་ཚོགས་བདེ་དོན་འཕྲོད་བསྟེན་དེ་ཚོའི་གྲས་གལ་ཆེན་པོ་རེད་དེ། དེ་ཚོ་ལ་ང་ཚོས་གུན་གསབ་སྤྲོད་རྒྱུ་དང་གནས་སྟངས་མང་པོ་ཞིག་གི་ཐོག་ནས་རོགས་ཕན་བྱ་རྒྱུ་ཡོང་གི་ཡོད་རེད། ཆབ་སྲིད་ཀྱི་དཀའ་ངལ་སེལ་རྒྱུ་དེ་ཕྱོགས་གཅིག་ནས་ང་ཚོས་གོ་སྐབས་འཛིན་དགོས་པ་རེད་དེ། ཕྱོགས་གཞན་ཞིག་ནས་གོ་སྐབས་ཡོང་རྒྱུར་ང་རང་ཚོའི་ནུས་པ་བཏོན་ནས་འབད་བརྩོན་བྱེད་ཐུབ་དགོས་རྒྱུ་དེ་གལ་ཆེན་པོ་ཞེ་པོ་ཞིག་ཆགས་བསྡད་ཀྱི་ཡོད་རེད། དེ་ཡིན་དུས་དེ་ཚོའི་ཐོག་ལ་གཙོ་བོ་འཛིན་སྐྱོང་བཀའ་ཤག་གིས་འགན་འཁུར་གྱི་ཡོད་རེད།
དེ་དང་མཉམ་དུ་སྤྱི་འཐུས་ལྷན་ཚོགས་ནས་ཡང་འགན་ཁུར་བཞེས་པའི་ཐོག་ནས་མ་འོངས་པར་ང་ཚོའི་བོད་དོན་བདེན་མཐའ་གསལ་ཐུབ་རྒྱུ་རེད། དེ་ཚོའི་ཐོག་ལ་གཙོ་བོ་འགན་ཁུར་ཆེན་པོ་བཞེས་དགོས་པ་དེ་གལ་ཆེན་པོ་གཅིག་རེད་འདུག་ཅེས་དེ་གཅིག་ཞུ་རྒྱུ་ཡིན། དེ་ག་ནང་བཞིན་ལོ་འདི་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་དགུང་ལོ་ ༩༠ ལ་ཕེབས་པའི་༸སྐུ་ཡི་གོ་སྟོན། དམིགས་བསལ་གྱི་ལོ་ཚིགས་ཤིག་ཆགས་བསྡད་ཀྱི་ཡོད་རེད། དེ་ལ་ང་ཚོ་བོད་མིའི་སྒྲིག་འཛུགས་ཀྱི་ཐོག་ནས་བྱམས་བརྩེའི་ལོ་ཞེས་དམིགས་བསལ་གྱིས་ལོ་ཧྲིལ་པོ་སྲུང་བརྩི་བྱེད་པའི་ལས་འཆར་ཞིག་བཏིང་ཡོད་རེད། དེ་ཡིན་དུས། སྤྱི་ཡོངས་ཀྱི་ང་ཚོའི་སྤྱི་ཚོགས་ལ་མཚོན་པ་ཡིན་ན་ནང་པ་ཆགས་བསྡད་ཀྱི་ཡོད་རེད། རིག་གཞུང་གི་ཐོག་ནས་བསམ་བློ་བཏང་ན་བྱམས་བརྩེ་ཡོད་པའི་སྤྱི་ཚོགས་ཤིག་ཆགས་བསྡད་ཀྱི་ཡོད་རེད། ཡིན་ནའང་ང་ཚོས་དེ་ཡར་གོང་འཕེལ་ཡོང་བ་དང་སྤྱི་ཚོགས་གཞན་ལ་ཡང་ཕན་ཐོགས་པ། དེ་ནས་ང་རང་ཚོའི་བཟང་སྤྱོད་རེད། དེ་ག་ནང་བཞིན་དེ་དང་འབྲེལ་བའི་རིག་གཞུང་ཁག་རེད། དེ་ག་ནང་བཞིན་ང་རང་ཚོའི་སྐད་ཡིག་རེད། དེ་ཚོ་ཉམས་ཆག་མ་འགྲོ་བ་ཞིག་དང་། ཉམས་པ་སླར་གསོ་མི་ཉམས་གོང་འཕེལ་ཡོང་ཐབས་སུ་དམིགས་བསལ་གྱིས་ལས་ཀ་ག་རེ་བྱེད་རྒྱུ་འདུག དེ་ཚོའི་ཐོག་ལ་དགོངས་པ་བཞེས་དགོས་པ་དེ་གལ་ཆེན་པོ་གཅིག་མཐོང་གི་ཡོད། ཅེས་སོགས་གསུངས་སོང་།
ཡོངས་ཁུངས། བོད་མི་མང་སྤྱི་འཐུས་ལྷན་ཚོགས།
