རྒྱ་བོད་ས་མཚམས་ཀྱི་རྙོག་དྲ་རིམ་པས་འཇགས་ནས་ཞི་བདེ་ལྷིང་འཇགས་ཡག་པོ་ཡོང་ཐུབ་པར་རེ་བ་རྒྱག་གི་ཡོད་ཅེས་༸གོང་ས་མཆོག་གིས་གསུངས་འདུག

དེ་ཡང་། ཟླ་འདིའི་ཚེས་༡༦ ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་ཇི་ལྟར་གསོལ་བ་བཏབ་པ་ལྟར་ལ་དྭགས་ཞི་བའི་ཚལ་དུས་འཁོར་དབང་ཆེན་གསུང་ཆོས་ར་བར་དགེ་བཤེས་གླང་རི་ཐང་པས་མཛད་པའི་བློ་སྦྱོང་ཚིགས་བརྒྱད་མ་དང་། ༸རྒྱལ་མཆོག་བདུན་པ་ཆེན་པོས་མཛད་པའི་ལྟ་ཁྲིད་དྲན་པ་བཞི་ལྡན་གྱི་ཆོས་འབྲེལ་བཀའ་དྲིན་བསྐྱངས་གནང་མཛད་འདུག སྐབས་དེར། ལ་དྭགས་ཁུལ་གྱི་དད་ལྡན་མི་མང་དང་ཕྱི་རྒྱལ་བ། བོད་པ་བཅས་ཁྱོན་མི་གྲངས་༥༠༠༠༠ ཙམ་༸རྒྱལ་བ་རིན་པོ་ཆེའི་བཀའ་ཆོས་ཉན་པར་ཕེབས་ཡོད་འདུག 

ཐོག་མར། ༸གོང་ས་མཆོག་གིས་བཀའ་སྩོལ་དོན། ངོས་རང་བོད་དུ་གཞིས་སྡོད་བྱེད་པའི་གོ་སྐབས་མ་བྱུང་བར་ནོར་གླིང་ནས་ཐོན་ཏེ་བཙན་བྱོལ་དུ་འབྱོར་བ་དང་། ཧི་མ་ལ་ཡའི་རི་རྒྱུད་ཀྱི་མི་རྣམས་སེམས་ཐག་ཉེ་བོ་ཡོད་པས་ཧི་མ་ལ་ཡའི་རི་རྒྱུད་ནས་ཡོང་སྟེ་གཞིས་ལྟ་བུ་ཆགས་པ་རེད། ངོས་ཀྱིས་ཞུ་རྒྱུའི་དོན་ཚན་གཙོ་བོ་ནི། ང་ཚོ་བོད་པ་འཕགས་པ་སྤྱན་རས་གཟིགས་ཀྱི་གདུལ་ཞིང་གི་མི་རེད་ལ། ཚང་མར་རང་བཞིན་གྱིས་སེམས་པ་བཟང་པོ་བྱེད་པ་དང་། མ་ཎི་བགྲང་བའི་གོམས་གཤིས་ཡོད། ང་ཚོ་བཙན་བྱོལ་བ་ཆགས་ནས་ཀྱང་གོམས་གཤིས་དེ་ནམ་ཡང་བརྗེད་ཐབས་མེད་པར་རྐྱེན་གློ་བུར་བ་ལ་འཕྲད་དུས་གོམས་གཤིས་དེ་ཟབ་ཏུ་དང་། བརྟན་པོ་ཆགས་ཡོང་གི་འདུག

བོད་ལ་གློ་བུར་གྱི་རྐྱེན་ངན་བྱུང་སྟེ་རྒྱ་མི་གུང་ཁྲན་གྱིས་དམ་དྲག་ཤུགས་ཆེ་རུ་ཕྱིན་པ་དང་། ངོས་རང་བཙན་བྱོལ་དུ་འབྱོར་བ་ནས་ཧི་མ་ལ་ཡའི་རི་རྒྱུད་ཀྱི་བོད་ཀྱི་གྲོགས་པོ་ཚོར་ཐུག་པའི་གོ་སྐབས་ལས་སླ་བོ་བྱུང་བ་རེད། ཡང་སྙིང་ང་ཚོར་འཕགས་པ་སྤྱན་རས་གཟིགས་ཀྱི་བྱིན་རླབས་ཡོད་པའི་དལ་འབྱོར་གྱི་ལུས་རྟེན་འདི་ཐོབ་ཡོད་ཕྱིན་ཆད། བསམ་པ་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བ་ག་དུས་ཡིན་ཡང་ནུས་པ་ཐོན་པའི་ཉམས་ལེན་བྱེད་ཐུབ་པ་རེད། ཚང་མས་བྱང་ཆུབ་ཀྱི་སེམས་དང་། སྟོང་ཉིད་ཀྱི་ལྟ་བར་རིག་པ་སྒྲིམ་ནས་བསམ་བློ་གཏོང་རྒྱུ་གལ་ཆེན་པོ་རེད། དེ་རིང་འདིར་མི་མང་ཚོར་ཐུག་ནས་ངོས་ཀྱིས་བསླབ་བྱ་བྱེད་པའི་སྙིང་པོ་ནི། ཐབས་བྱང་ཆུབ་ཀྱི་སེམས་དང་། ཤེས་རབ་སྟོང་ཉིད་རྟོགས་པའི་ལྟ་བ་ཉིན་རེ་བཞིན་དུ་དྲན་གསོ་བཏང་ནས་སེམས་ལ་སོས་པ་བྱས་ཏེ་སྡོད་པ་ཞིག་དགོས། ངོས་རང་ལ་ཆ་གཞག་ན་ཞོགས་པ་གཉིད་སད་པ་དང་བྱང་ཆུབ་ཀྱི་སེམས་དྲན་གྱི་ཡོད། བྱང་ཆུབ་ཅེས་སྐྱོན་གྱི་རིགས་སྦྱངས་པ་དང་། ཡོན་ཏན་གྱི་རིགས་མཐའ་དག་ཐུགས་སུ་ཆུབ་པའི་ཐབས་ཤེས་གཙོ་བོ་ནི་སྟོང་ཉིད་ཀྱི་ལྟ་བ་སྒོམ་རྒྱུ་ཆགས་ཡོད། ངོས་རང་ལ་མཚོན་ན་ཞོགས་པ་གཉིད་སད་པ་དང་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་འབད་མེད་ལྷུན་གྲུབ་ཀྱིས་དྲན་ཡོང་གི་ཡོད་པ་དང་། དྲན་པ་བཞིན་དེའི་ཐོག་ལ་སེམས་མཉམ་པར་འཇོག་གི་ཡོད།

འཛམ་གླིང་འདིར་ཆོས་ལུགས་ཡོད་མེད་ལ་མ་བལྟས་པར་ས་ཆ་གང་སར་སྡུག་བསྔལ་མི་འདོད་པ་དང་། བདེ་བ་འདོད་པ་ཤ་སྟག་རེད། སྡུག་བསྔལ་གྱི་རྐྱེན་རྩ་ནི་རང་གཅེས་འཛིན་གྱིས་བྱེད་ཀྱི་ཡོད། ཆོས་ཐམས་ཅད་དོན་དམ་ནས་ཡོད་པར་སྣང་ཞིང་། སྣང་བ་ལྟར་དུ་དོན་སྟེང་ནས་ཡོད་པར་ཞེན་པའི་བློ་དེ་ཡིས་ང་ཚོ་ཕུང་གི་ཡོད། དེ་རིང་འདིར་ཧི་མ་ལ་ཡའི་རི་རྒྱུད་ཀྱི་ཁྱོད་ཚོ་ཆོས་དད་ཆེན་པོ་དང་། ངོས་རང་དོན་དངོས་པོའི་གནས་ཚུལ་ལ་ག་རེ་ཡིན་ནའང་འཕགས་པ་སྤྱན་རས་གཟིགས་ཞེས་གསོལ་བ་བཏབ་ནས་དད་པ་ཆེན་པོ་བྱེད་ཀྱི་ཡོད། ཧི་མ་ལ་ཡའི་རི་རྒྱུད་ཀྱི་མི་རྣམས་འཕགས་པ་སྤྱན་རས་གཟིགས་ཀྱི་དམིགས་བསལ་གྱི་བྱིན་རླབས་ཕོག་ཡོད་པ་ཞིག་ཆགས་ཡོད་པས། ང་ཚོ་ཚང་མས་བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ཉམས་ལེན་གྱི་མཐིལ་དུ་བཟུང་ནས་ཉིན་རེ་ཉིན་རེར་བསམ་བློ་བཏང་ནས་འགྲོ་རྒྱུ་བྱུང་ན་ཡག་པོ་ཡོང་གི་རེད། བྱང་ཆུབ་ཀྱི་སེམས་དང་སྟོང་ཉིད་ཀྱི་ལྟ་བ་ནི་སངས་རྒྱས་བཅོམ་ལྡན་འདས་ཀྱི་བསླབ་བྱ་གཙོ་བོ་རེད། སོགས་བཀའ་བསྩལ་རྗེས་བློ་སྦྱོང་ཚིགས་བརྒྱད་མ་དང་། ལྟ་ཁྲིད་དྲན་པ་བཞི་ལྡན་གྱི་བཤད་ལུང་གི་ཆོས་འབྲེལ་བསྩལ་གནང་མཛད་ཡོད་འདུག

གཞན་ཡང་། ཟླ་འདིའི་ཚེས་༡༧ ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་གླེ་ཡི་ཞི་བའི་ཚལ་དུས་དབང་གསུང་ཆོས་ར་བར་མདོ་ལུགས་བརྟན་བཞུགས་བསྟར་འབུལ་ཞུས་ཡོད་འདུག དེ་ཡང་གོང་ཚེས་ཉིན་གྱི་སྔ་དྲོ་ཆུ་ཚོད་༨།༣༠ ཙམ་ལ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ཕོ་བྲང་དགེ་འཕེལ་གླིང་ནས་སྤོས་སྣེས་མདུན་བསུ་དང་བཅས་ཞི་བའི་ཚལ་གྱི་དུས་འཁོར་ལྷ་ཁང་དུ་གདན་ཞུས་ཀྱིས་བཞུགས་ཁྲི་རིན་པོ་ཆེར་༸ཞབས་སོར་འཁོད་མཚམས་ཞྭ་སེར་བསྟན་པའི་མཛེས་རྒྱན་ཁྲིག་རྩེ་རིན་པོ་ཆེ་མཆོག་གིས་མཇལ་དར་རྐྱང་འབུལ་དང་འབྲེལ་རྒྱུན་ཆགས་གསུམ་པ་སོགས་ཞལ་འདོན་གསུང་མུར་གསོལ་ཇ་འབྲས་སིལ་འདེགས་འབུལ་ཞུས་ཤིང་། སྤྱན་འདྲེན་ཁྲུས་གསོལ་སོགས་མདོ་ལུགས་ཀྱི་བརྟན་བཞུགས་ཀྱི་ཆོ་ག་རིམ་པར་ཕེབས། གསོལ་འདེབས་མནྜལ་སྐབས་ལ་དྭགས་ནང་པའི་ཚོགས་འདུའི་ཚོགས་གཙོ་དང་དགོན་པ་ཚོགས་པའི་ཚོགས་གཙོ་གཉིས་ནས་མནྜལ་ཚོམ་བུ་ཟུར་འདེགས་དང་། བརྟན་བཞུགས་ཀྱི་དབུ་བཞུགས་ཁྲིག་རྩེ་རིན་པོ་ཆེ་མཆོག་སྐུ་བཞེངས་ཀྱིས་མཎྜལ། སྐུ་རྟེན། གསུང་རྟེན། ཐུགས་རྟེན། ན་བཟའ་སྣམ་སྦྱར། བླ་གོས། ཐང་གོས། དབུ་ཞྭ། གདིང་བ། ལྷུང་བཟེད། མཁར་བསིལ། རྒྱལ་སྲིད་སྣ་བདུན། བཀྲ་ཤིས་རྟགས་བརྒྱད། བཀྲ་ཤིས་རྫས་བརྒྱད་བཅས་རིམ་འབུལ་གྱིས་མཐར་མཇལ་ཁ་ཞུས་ཤིང་། ༸རྒྱལ་བའི་ཞབས་བརྟན་གསོལ་འདེབས་གསུང་མུར་འབུལ་དངོས་སྤྱན་འབུལ་ཞུས་ཡོད་འདུག

དེ་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བཀའ་སློབ་སྩོལ་དོན། ཆོས་གྲོགས་རྣམ་པ་ལྷན་རྒྱས་ལ་ཞུ་རྒྱུར། ས་ཁུལ་འདིའི་མི་མང་སྤྱི་དང་བྱེ་བྲག་ཏུ་ཕྱོགས་མཐའ་ནས་འདུས་པའི་སེར་སྐྱ་མི་མང་རྣམས་དད་པ་དང་དམ་ཚིག་གཡོ་བ་མེད་པར་འདིར་བརྟན་བཞུགས་གནང་བཞིན་པ་རེད། ཧི་མ་ལ་ཡའི་རི་རྒྱུད་དུ་ཡོད་པའི་གངས་ཅན་ལྗོངས་ཀྱི་ཆོས་བརྒྱུད་དང་གཅིག་པ་ཚང་མ་དེ་རིང་འདིར་ཆེད་མངགས་འདུས་ཏེ་ཐུན་མོང་གི་ཐོག་ནས་བརྟན་བཞུགས་ཕུལ་བཞིན་པ་རེད། ངོས་ལ་ཆ་གཞག་ན་མདོ་སྨད་ནས་སྐྱེས་ཤིང་། དབུས་གཙང་དུ་སླེབས་ནས་གངས་ལྗོངས་ཀྱི་ལྷ་མི་ཀུན་གྱིས་གཅིག་ཏུ་ཡིད་ཆེས་དང་། དད་པའི་ཐོག་ནས་བོད་ཀྱི་ལྷ་མི་ཡོངས་རྫོགས་ཀྱི་རེ་འདུན་སྒྲུབ་པའི་ལས་འགན་འཁུར་བ་རེད། ད་ལྟའི་བར་དུ་རྐྱེན་ངན་ཇི་འདྲ་ཞིག་བྱུང་ནའང་། གང་ལྟར་རྐྱེན་ངན་རུ་འཛིང་བའི་འོག་ནས་ངོས་ཀྱིས་མི་ཚེ་བསྐྱལ་བ་རེད། གངས་ལྗོངས་ཀྱི་དྲེགས་པའི་དེད་དཔོན་གནས་ཆུང་ཆོས་རྒྱལ་ཆེན་པོས་མཚོན་དམ་ཚིག་ཅན་གྱི་སྲུང་མ་ཚོ་དངོས་སུ་ལྷ་ཞུགས་པ་དང་། གང་ལྟར་ངོས་ཀྱིས་བོད་གངས་ཅན་གྱི་དོན་དག་བསྒྲུབ་པ་དེ་ལྷ་མི་ཟུང་འབྲེལ་ལྟ་བུ་བྱུང་ཡོད། ལོ་ཡུན་མང་པོའི་རིང་ངོས་རང་གཙོ་བོ་ལྷ་སར་བསྡད་པ་དང་། རྩེ་ཕོ་བྲང་དང་ནོར་བུ་གླིང་གར་བསྡད་ནས་བོད་གངས་ཅན་གྱི་དོན་དག་སྒྲུབ་པ་ལ་ཁུར་གཙོ་བོ་བླངས་པ་རེད། ད་ལྟའི་བར་དུ་ངོས་ཀྱིས་ལྷག་བསམ་རྣམ་དག་གིས་བོད་ཀྱི་བསྟན་སྲིད་ཀྱི་དོན་ལ་འཇིག་རྟེན་ལས་འདས་པའི་ལྷ་སྲུང་ཚོར་སྐུལ་བ་དང་། དེ་བཞིན་འཇིག་རྟེན་པའི་དྲེགས་པ་ཚོར་ཡང་སྐུལ་མ་བྱེད་པ་སོགས་དངོས་ཡོད་གནས་ཚུལ་ལ་རན་པ་ཞིག་དཀར་ཕྱོགས་སྐྱོང་བའི་བོད་གངས་ཅན་ལྗོངས་ཀྱི་ལྷ་སྲུང་ཚོར་ལྷག་བསམ་རྣམ་དག་གིས་འཕྲིན་ལས་གཉེར་གཏད་བྱས་པ་དང་། དེ་དག་གིས་ཀྱང་ཧུར་ཐག་འབད་ཐག་བྱས་སོང་།

དེ་རིང་འདིར་འདུས་ཚོགས་རྒྱ་ཆེན་པོ་བྱས་ཏེ་འཛོམས་འདུག ཁྱོད་ཚོ་ཚང་མས་ངོས་ཀྱི་ཆོས་སྲིད་ཀྱི་ལས་དོན་གང་བསྒྲུབས་པ་ལ་སེམས་ནས་ཡིད་མོས་དང་། དགའ་སྤྲོ་བྱས་ཏེ་༸རྒྱལ་དབང་ལ་བརྟན་བཞུགས་ཕུལ་བར་རྒྱ་ཆེན་པོ་འཛོམས་ནས་སྨོན་ལམ་བརྒྱབ་པ་རེད། ངོས་ལ་ཆ་གཞག་ནའང་ཇི་ལྟར་ཁྱོད་རང་ཚོས་སྨོན་ལམ་བརྒྱབ་པ་བཞིན་མི་ཚེ་འདིར་རེ་འདུན་རྣམས་འགྲུབ་ཐུབ་པ་ཞིག་ལ་སྨོན་ལམ་རྒྱག་གི་ཡིན། ཁྱོད་ཚོ་ཚང་མས་དེ་རིང་འདིར་བརྟན་བཞུགས་གནང་བ་ལ་ཐུགས་རྗེ་ཆེ་ཞུ་རྒྱུ་དང་། བརྟན་བཞུགས་ཀྱི་སྨོན་ལམ་ཇི་ལྟར་བརྒྱབ་པ་དེ་དེ་བཞིན་དུ་བདེ་ལེགས་སུ་འགྲུབ་ཐུབ་པ་ལ་ངོས་ནས་ཀྱང་སྨོན་ལམ་རྒྱག་གི་ཡིན། ཚང་མ་བློ་བདེ་བོར་བཞུགས།

གནས་ཚུལ་ངོ་མཚར་ཆེ་བ་ཞིག་ལ། དེང་སང་རྒྱ་ནག་ཏུ་ནང་ཆོས་ལ་དོ་སྣང་ཤུགས་ཆེན་པོ་སླེབས་ཡོང་གི་འདུག རྒྱ་ནག་མི་འབོར་ཆེ་ཤོས་ཡོད་པའི་རྒྱལ་ཁབ་ཅིག་རེད། དེ་སྔ་ཡིན་ན་ཏཱ་ལའི་ལོག་སྤྱོད་པ་ཞེས་དགའ་རབ་ངན་དམོད་བརྗོད་པ་ཞིག་རེད་དེ། དེང་སང་ག་ལེར་འགྱུར་བ་འགྲོ་བཞིན་འདུག ངོས་རང་གིས་མི་སུ་གཅིག་ལ་སྡང་སེམས་དང་། གནོད་སེམས་བཅིངས་པ་ཁྱོན་ནས་མེད། ལོ་རྒྱུས་ཀྱི་ཐོག་ནས་ཆོས་རྒྱལ་སྲོང་བཙན་སྒམ་པོའི་སྐབས་ནས་རྒྱ་བོད་དབར་འབྲེལ་བ་ཤུགས་ཆེན་པོ་ཡོད་པ་རེད། རྒྱ་ནག་མི་མང་རྣམས་ནང་ཆོས་ལ་དོ་སྣང་ཡོད་པ་དེ་ཇི་ལྟར་དོ་སྣང་བྱས་པ་བཞིན་རིམ་བཞིན་སངས་རྒྱས་པའི་ཆོས་ཤུགས་ཆེན་པོ་དར་ཐུབ་པ་ཞིག་རེད། དེའི་ཐོག་ལ་ངོས་ནས་བསྟན་པའི་ཞབས་འདེགས་སྒྲུབ་རྒྱུ་ག་ཚོད་ཡོད་པ་དེ་དགའ་བཞིན་སྤྲོ་བཞིན་སྒྲུབ་ཀྱི་རེད། ངོས་རང་ཞོགས་པ་ཡར་ལངས་པ་དང་བྱང་ཆུབ་ཀྱི་སེམས་ལ་བསམ་བློ་གཏོང་གི་ཡོད། དེ་ནས་བྱང་ཆུབ་ཀྱི་སེམས་ཀྱིས་ཁ་ཡོད་ལག་ཡོད་ཀྱི་ནུས་པ་འདོན་པ་ལ་སྟོང་ཉིད་ཀྱི་ལྟ་བ་སྒོམ་བཞིན་ཡོད། རིམ་བཞིན་འཛམ་གླིང་སྤྱི་དང་ལྷག་པར་དུ་རྒྱ་ནག་ཏུ་སངས་རྒྱས་ཀྱི་ཟབ་རྒྱས་ཀྱི་ཆོས་འདི་ཡག་པོ་ཞིག་དར་ནས་སྤྱི་ཡོངས་ཀྱི་ཆ་ནས་ཞི་བདེ་ལྷིང་འཇགས་ཡག་པོ་ཞིག་ཡོང་ཐབས་དང་། བྱེ་བྲག་ཏུ་ང་ཚོའི་ཧི་མ་ལ་ཡའི་རི་རྒྱུད་ཀྱི་ས་ཁུལ་འདི་དག་གི་མི་མང་ཚང་མ་སྡོད་བཟོད་བདེ་བོ་ཞིག་དང་། རྒྱ་བོད་ས་མཚམས་ཀྱི་རྙོག་དྲ་རིམ་པས་འཇགས་ནས་ཞི་བདེ་ལྷིང་འཇགས་ཡག་པོ་ཡོང་ཐུབ་པར་རེ་བ་རྒྱག་གི་ཡོད་ལ། ཕལ་ཆེར་དེ་འགྲུབ་པའི་ཟོལ་འདུག ཅེས་སོགས་བཀའ་སློབ་བསྩལ་གནང་མཛད་འདུག