ཕྱི་ལོ་༢༠༢༥ ཟླ་༨ ཚེས་༡༨ ཉིན་སྤེལ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དད་ལྡན་མི་མང་ཁྲི་ལྔ་ཙམ་ལ་ལ་བློ་སྦྱོང་ཚིགས་བརྒྱད་མ་དང་། ལྟ་ཁྲིད་དྲན་པ་བཞི་ལྡན་གྱི་ཆོས་འབྲེལ་བཀའ་དྲིན་བསྐྱངས་གནང་མཛད་འདུག སྐབས་དེར་ཁོང་གིས་འཛམ་གླིང་སྤྱི་དང་ལྷག་པར་དུ་རྒྱ་ནག་ཏུ་སངས་རྒྱས་ཀྱི་ཟབ་རྒྱས་ཀྱི་ཆོས་འདི་ཡག་པོ་ཞིག་དར་ནས་སྤྱི་ཡོངས་ཀྱི་ཆ་ནས་ཞི་བདེ་ལྷིང་འཇགས་ཡག་པོ་ཞིག་ཡོང་ཐབས་དང་། བྱེ་བྲག་ཏུ་ང་ཚོའི་ཧི་མ་ལ་ཡའི་རི་རྒྱུད་ཀྱི་ས་ཁུལ་འདི་དག་གི་མི་མང་ཚང་མ་སྡོད་བཟོད་བདེ་བོ་ཞིག་དང་། རྒྱ་བོད་ས་མཚམས་ཀྱི་རྙོག་དྲ་རིམ་པས་འཇགས་ནས་ཞི་བདེ་ལྷིང་འཇགས་ཡག་པོ་ཡོང་ཐུབ་པར་རེ་བ་རྒྱག་གི་ཡོད་ལ། ཕལ་ཆེར་དེ་འགྲུབ་པའི་ཟོལ་འདུག ཅེས་བཀའ་བསྩལ་འདུག

ཕྱི་ལོ་༢༠༢༥ ཟླ་༧ ཚེས་༡༢ ཉིན། བཞུགས་སྒར་དྷ་སའི་ས་གནས་འགོ་འཛིན་ཚོགས་ཁང་དུ། སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་ཞབས་ཞུ་ཚོགས་པའི་གོ་སྒྲིག་འོག རྒྱལ་གཅེས་དཔའ་བོ་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གི་རྒྱ་དམར་གཞུང་གི་བཙོན་འོག་ནས་སྐུ་གྲོངས་ནས་མི་ལོ་༡༠ འཁོར་བའི་རྗེས་དྲན་གྱི་གཏམ་བཤད་ཞིག་ཚོགས་གནང་སོང་། སྐབས་དེར། བོད་མིའི་སྒྲིག་འཛུགས་ཀྱི་སྐུ་ཚབ་དང་། གཞུང་འབྲེལ་མིན་པའི་ཚོགས་པ་ཁག་གི་ཚོགས་གཙོ་དང་སྐུ་ཚབ་རྣམས་ཀྱིས་སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་གིས་བོད་ཀྱི་ཆོས་དང་རིག་གཞུང་། ཤེས་ཡོན་དང་འཕྲོད་བསྟེན། ཁོར་ཡུག་དང་རི་དྭགས་སྲུང་སྐྱོབ་སོགས་ཀྱི་སྐོར་གཏམ་བཤད་གནང་སོང་།

ཕྱི་ལོ་༢༠༢༥ ཟླ་༧ ཚེས་༥ ཉིན་གྱི་ཕྱི་དྲོར། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་འཁྲུངས་སྐར་དང་བསྟུན་ནས་ཆུ་བཞི་སྒང་དྲུག་གི་གློག་བརྙན་བཞུགས་སྒར་དྷ་སའི་བོད་ཁྱིམ་སློབ་གྲྭའི་ཚོགས་ཁང་དུ་བསྟན་གནང་སོང་། སྐབས་དེར། ཨ་རིའི་གློག་བརྙན་འཁྲབ་སྟོན་པ་སྐད་གྲགས་ཅན་དང་བོད་དོན་རྒྱབ་སྐྱོང་བ་རི་ཆར་གྷེར་ལགས་དང་། ཨ་རུ་ན་ཅལ་སྤྱི་ཁྱབ་བློན་ཆེན་པདྨ་མཁའ་འགྲོ་མཆོག སྲིད་སྐྱོང་སྤེན་པ་ཚེ་རིང་མཆོག ཁྲིམས་ཞིབ་པ་ཆེ་བ་ཡེ་ཤེས་སྒྲོལ་མ་མཆོག ཚོགས་གཞོན་སྒྲོལ་མ་ཚེ་རིང་ལགས། རྒྱ་གར་གྲོས་ཚོགས་འཐུས་མི་དང་བོད་དོན་རྒྱབ་སྐྱོར་བ་ཏ་པིར-གྷོ་(Tapir Gao)་ལགས། རྒྱལ་སྤྱིའི་བོད་དོན་ལས་འགུལ་ཁང་གི་འགན་འཛིན་བསྟན་ཆོས་རྒྱ་མཚོ་ལགས། བོད་མི་མང་སྤྱི་འཐུས་གཙོས་པའི་མི་མང་ཧ་ཅང་མང་པོ་ཕེབས་གནང་འདུག

ཕྱི་ལོ་༢༠༢༥ ཟླ་༦ ཚེས་༤ ཉིན། རྒྱ་གར་དང༌། བལ་ཡུལ། འབྲུག་བཅས་ཀྱི་ནང་པའི་རྗེས་འཇུག་ཡོངས་ཀྱི་སྐུ་ཚབ་བླ་སྤྲུལ་མཁན་གྱིས་༸གོང་ས་༸མཆོག་གི་སྐུ་ཕྲེང་རྒྱུན་མཐུད་ཇི་ལྟར་ཕེབས་རྒྱུ་ནི། བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་བྱེད་སྒོ་ཞིག་ཡིན་ཡང་། སྐྱེ་བ་སྔ་ཕྱི་གཏན་ནས་ཁས་མི་ལེན་ཞིང༌། ཆོས་དུག་ཡིན་པར་ལྟ་མཁན་གྱི་རྒྱ་ནག་དམར་གཞུང་གིས་རང་ཉིད་ཀྱི་ཆབ་སྲིད་ཀྱི་དགོས་མཁོ་ཁོ་ནར་དམིགས་ནས་འབྱུང་འགྱུར་༸རྒྱལ་བའི་སྐུ་ཕྲེང་རིམ་བྱོན་ཕེབས་ཕྱོགས་ཐད་ཇུས་ངན་སྣ་ཚོགས་གཤོམ་སྒྲོག་བྱས་དང་བྱེད་བཞིན་པ་དེའི་རིགས་ལ་མཐའ་གཅིག་ཏུ་དགག་རྒྱག་དང་ངོ་རྒོལ་བྱ་རྒྱུ་མ་ཟད། བྱ་ངན་དེའི་རིགས་དུས་ནམ་ཡང་ངོས་ལེན་བྱ་ཐབས་མེད་ངེས་ཡིན། ཞེས་གསུངས་སོང་།

ཕྱི་ལོ་༢༠༢༥ ཟླ་༧ ཚེས་༦ ཉིན། བཞུགས་སྒར་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱིས་བོད་མི་ཡོངས་ཀྱི་ཚབ་གནང་ནས་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་དགུང་གྲངས་༩༠ ཕེབས་པའི་སྐུའི་འཁྲུངས་སྒར་སྲུང་བརྩི་ཞུ་བའི་མཛད་སྒོ་ཤིག་ཚོགས་སོང་། སྐབས་དེར་རྒྱ་གར་གཙོས་པའི་རྒྱལ་ཁབ་ཁག་གི་སྐུ་མགྲོན་དང་བོད་ཀྱི་བླ་ཆེན་ཁག སློབ་ཕྲུག་དང་བོད་མི་བཅས་ནས་དགའ་དད་སྤྲོ་ཐོག་ནས་སྐུའི་འཁྲུངས་སྐར་སྲུང་བརྩི་ཞུས་སོང་།

ཕྱི་ལོ་༢༠༢༥ ཟླ་༧ ཚེས་༢ ཉིན། བོད་ཀྱི་བླ་སྤྲུལ་དང་དགོན་པ་ཁག་གི་སྐུ་ཚབ་བཅས་ཁྱོན་མི་གྲངས་བརྒྱ་ལྷག་ཕེབས་ནས་བོད་མིའི་ཆོས་ཚོགས་ཐེངས་བཅོ་ལྔ་པ་དབུ་འཛུགས་གནང་སོང་། སྐབས་དེར་༸གོང་ས་མཆོག་གིས་༸རྒྱལ་དབང་སྐུ་ཕྲེང་རྒྱུན་མཐུད་ཕེབས་ངེས་ཡིན་པའི་ཡོངས་ཁྱབ་གསལ་བསྒྲགས་གནང་བ་དང་འབྲེལ་གྲོས་ཆོད་ཅིག་བཞག་གནང་སོང་། དེའི་ནང་སྐུ་ཕྲེང་རྒྱུན་མཐུད་ཇི་ལྟར་བྱ་རྒྱུ་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་བྱེད་སྒོ་ཞིག་ཡིན་སྟབས། རྒྱ་ནག་དམར་གཞུང་གིས་ཆབ་སྲིད་དགོས་མཁོ་ཁོ་ནར་དམིགས་ནས་༸རྒྱལ་བའི་སྐུ་ཕྲེང་རིམ་བྱོན་ཕེབས་ཕྱོགས་ཐད་ཇུས་ངན་སྣ་ཚོགས་གཤོམ་སྒྲོགས་བྱས་དང་བྱེད་བཞིན་པར་དགག་པ་མཐའ་གཅིག་ཏུ་བྱ་རྒྱུ་མ་ཟད། དུས་ནམ་ཡང་ངོས་ལེན་བྱེད་ཐབས་མེད། ཅེས་བཀོད་འདུག