ཕྱི་ལོ་༢༠༢༦ ལོའི་ཟླ་༡ པའི་ཚེས་༥ ཉིན་སྤེལ། ནང་པའི་དགེ་འདུན་པ་ཁག་ཅིག་ནས་ཨ་རི་ནང་“ཞི་བདེའི་ཆེད་དུ་སྐྱོད་པའི་གོམ་བགྲོད”ཅེས་པའི་བརྗོད་གཞིའི་འོག་ནས། ཞི་བདེ་དང་། བྱམས་པ། བརྩེ་བ་ཁྱབ་སྤེལ་གནང་བཞིན་པར་ས་གནས་གཞུང་མང་གཉིས་ནས་རྒྱབ་སྐྱོར་དང་དགའ་བསུ་ཆེན་པོ་ཐོབ་བཞིན་ཡོད་པར་མ་ཟད། སེམས་འགུལ་ཐེབས་ནས་མིག་ཆུ་བཞུར་མཁན་དང་། པུས་མོ་བཙུགས་ནས་མེ་ཏོག་ཕུལ་མཁན། སྐད་གསང་མཐོན་པོས་བསྔགས་བརྗོད་བྱེད་མཁན་ཡང་མང་དུ་བྱུང་འདུག དེར་བརྟེན། ཁོང་ཚོས་ས་གནས་ཀྱི་སྤྱི་ཚོགས་གཙོས་པའི་སྤྱི་ཚོགས་གང་སར་མིག་དཔེ་བཟང་པོ་དང་ཤུགས་རྐྱེན་བཟང་པོ་སྐྲུན་བཞིན་འདུག

ཕྱི་ལོ་༢༠༢༥ ཟླ་༡༡ ཚེས་༢༧ ཉིན་སྤེལ། ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ཏུ་ཚོགས་པའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ནས་བསྒྲགས་གཏམ་ཞིག་སྤེལ་ཡོད་པའི་ནང་དུ། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གྱི་ཐོབ་ཐང་ནི་བོད་མི་ཁོ་ནར་ཡོད་པ་མ་གཏོགས་རྒྱ་དམར་སྲིད་གཞུང་ལ་མེད་ཅེས་ནན་བརྗོད་བྱས་འདུག ལྷན་ཚོགས་དེའི་ཐོག་ཨ་རི་གཙོས་པའི་རྒྱལ་ཁབ་ཁག་གི་ཆོས་དད་རང་དབང་དང་འབྲེལ་བའི་མི་སྣ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ཡང་ཕེབས་ནས་གསུང་བཤད་གནང་ཡོད་འདུག

ཕྱི་ལོ་༢༠༢༥ ཟླ་༡༡ ཚེས་༤ ཉིན། ཨ་རིའི་རྒྱལ་ཡོངས་དམངས་གཙོ་ཁྱབ་སྤེལ་བསྟི་གནས་ཁང་གིས་ཕྱི་ལོ་༢༠༢༤ ལོའི་དམངས་གཙོ་ཞབས་ཞུའི་གཟེངས་རྟགས་དེ་ད་ལྟར་གར་སོང་ཆ་མེད་དུ་གྱུར་ཡོད་པའི་ཀུན་གཟིགས་པཎ་ཆེན་ཆུང་སྲས་རིན་པོ་ཆེ་མཆོག་ལ་ཕུལ་གནང་འདུག གཟེངས་རྟགས་འདི་ཡིས་རྒྱ་ནག་གི་ཐེ་བྱུས་མེད་པའི་ཐོག་ནས་བོད་མི་ཚོས་རང་ཉིད་ཆོས་ལུགས་དབུ་ཁྲིད་ཡང་སྲིད་ངོས་འཛིན་བྱས་པའི་ཐོབ་ཐང་ཡོད་དགོས་པ་དང་། ལྷག་པར་དུ་རྒྱ་གཞུང་གིས་༸གོང་ས་རྒྱལ་བ་རིན་པོ་ཆེའི་ཡང་སྲིད་ལ་ཐེ་བྱུས་བྱེད་ཐབས་བྱེད་བཞིན་པར་གསལ་སྟོན་གནང་ཆེད་ཡིན་སྐོར་བརྗོད་འདུག

ཕྱི་ལོ་༢༠༢༥ ཟླ་༡༠ ཚེས་༡༠ ཉིན། ནོར་ཝེ་ནོ་སྦེལ་གཟེངས་རྟགས་ཚོགས་པ་ནས་འདི་ལོའི་ནོ་སྦེལ་ཞི་བདེའི་གཟེངས་རྟགས་ལྷོ་ཨ་མེ་རི་ཁའི་རྒྱལ་ཁབ་ཝེ་ནི་ཙེ་ལའི་(Venezuela)་བུད་མེད་མཱ་རི་ཡ-ཀོ་རི་ན-མཱ་ཤ་སྒྲོ་(Maria Corina Machado) ལ་གནང་རྒྱུའི་གསལ་བསྒྲགས་སྤེལ་སོང་། དེ་ཡང་ཁོང་མོས་ཞི་བའི་སྒོ་ནས་དམངས་གཙོའི་ཐོབ་ཐང་དང་རང་དབང་རྩོད་ལེན་བྱས་པར་བརྟེན་ནས་གཟེངས་རྟགས་འདི་ཐོབ་ཚུལ་བརྗོད། ཁོ་མོས་ཝེ་ནི་ཙེ་ལ་ནང་དུ་དམངས་གཙོའི་ཐོབ་ཐང་དང་རང་དབང་རྩོད་ལེན་བྱས་ཤིང་། ཞི་བའི་ཐོག་ནས་རྒྱལ་ཁབ་དེའི་སྲིད་དབང་སྒེར་འཛིན་པའི་གཞུང་དམངས་གཙོའི་གཞུང་དུ་སྒྱུར་ཐབས་ཀྱི་འབད་བརྩོན་ལྷོད་མེད་གནང་ཡོད་འདུག

ཕྱི་ལོ་༢༠༢༥ ཟླ་༨ ཚེས་༡༡ ཉིན་སྤེལ། རྒྱལ་སྤྱིའི་ཁྲིམས་ལུགས་ཚོགས་པ་ནས་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་སྐུ་ཚེ་གང་བོ་འཚེ་མེད་ཞི་བ་དང་འཛམ་གླིང་ཞི་བདེ། གོ་ལའི་བྱམས་བརྩེ་ཐོག་སྐུ་ལས་སྐྱོན་པར་ངོ་འཛིན་དང་ཆེ་མཐོང་གནང་ཆེད་རྒྱལ་སྤྱིའི་ཞི་བདེ་གཟེངས་རྟགས་ཞེས་པ་དེ་ཕུལ་ཡོད་འདུག

ཕྱི་ལོ་༢༠༢༥་ཟླ་༧ ཚེས་༢༣ ཉིན། རྟ་དབང་རྫོང་གི་སློབ་ཕྲུག་མཐུན་ཚོགས་ཀྱི་གོ་སྒྲིག་འོག དགོན་པ་ཁག་གི་བླ་མ་དང་གྲྭ་བཙུན། སློབ་གྲྭ་ཁག་གི་སློབ་མ། ཚོགས་པ་ཁག་གི་ཚོགས་གཙོ་དང་སྐུ་ཚབ། ས་གནས་མི་མང་བཅས་ཁྱོན་མི་གྲངས་བརྒྱ་ཕྲག་འགའ་མཉམ་འཛོམས་གནང་ནས་རྟ་དབང་དགོན་པ་ནས་སངས་རྒྱས་སྐྱེད་ཚལ་བར་དུ་ཞི་བའི་གོམ་བགྲོད་གནང་ཡོད་འདུག ཁོང་རྣམས་ཀྱིས་རྒྱ་གར་གཞུང་ལ་རྒྱ་གར་གྱི་ཆེས་མཐོའི་གཟེངས་རྟགས་བྷ་ར་ཏི་ར་ཏི་ཎ་(Bharat Ratna) སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་ལ་འབུལ་དགོས་པའི་འབོད་སྐུལ་ཞུས་འདུག