ཕྱི་ལོ་༢༠༢༥་ཟླ་༡༢ ཚེས་༡༦ ཉིན་སྤེལ། ཟླ་སྔོན་མའི་ནང་བོད་ཁམས་རྫ་ཆུ་ཁར་རྒྱ་མི་ཚོས་གསེར་གྱི་གཏེར་ཁ་སྔོག་འདོན་བྱེད་སྐབས། ས་གནས་མི་མང་གིས་དེར་ངོ་རྒོལ་གྱི་ལས་འགུལ་སྤེལ་ཡོད་པར་རྒྱ་གཞུང་གི་ཉེན་རྟོག་པས་བོད་མི་ཚོར་བཅར་རྡུང་དང་འཛིན་བཟུང་བྱས་ནས་རྫོང་ཐོག་ཏུ་བཙན་ཁྲིད་བྱས་ཡོད་འདུག བོད་མི་ཚོ་ད་དུང་ཡང་གློད་གྲོལ་གཏོང་མེད་པ་མ་ཟད་བོད་མི་ཁག་ཅིག་གར་སོང་ཆ་མེད་དུ་གྱུར་ཡོད་པའི་ཛ་དྲག་གི་གནས་ཚུལ་ཐོན་འདུག

ཕྱི་ལོ་༢༠༢༥ ཟླ་༧ ཚེས་༢༡ ཉིན་སྤེལ། ཉེ་ཆར་རྒྱ་དམར་གཞུང་གིས་བོད་མདོ་སྨད་རྔ་བ་ནས་ཡིན་པའི་གླུ་བ་ཨ་སངས་ལགས་འཛིན་བཟུང་བཙན་ཁྲིད་བྱས་ནས་བདུན་ཕྲག་གཉིས་ལྷག་ཕྱིན་ཡོད་ཀྱང་གར་སོང་ཆ་མེད་དུ་གྱུར་ཡོད་འདུག ཁོང་དང་ཁོང་གི་གྲོགས་པོ་གཉིས་ཀྱིས་སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་གོ་སྟོན་སྐབས་དྲ་ཐོག་ནས་ཞི་བདེའི་རྒྱལ་སྲས་ཞེས་པའི་༸གོང་ས་མཆོག་ལ་བསྟོད་གླུ་ཞིག་བླངས་རྗེས་ཁོང་འཛིན་བཟུང་བྱས་ཡོད་འདུག

ཕྱི་ལོ་༢༠༢༥ ཟླ་༤ ཚེས་༥ ཉིན། བཞུགས་སྒར་རྡ་རམ་སའི་ནོར་བུ་གསོལ་མགྲོན་ཁང་དུ། བོད་ལྗོངས་མདོ་སྨད་ཆོལ་ཁའི་དབུས་སྤྱི་ཁྱབ་རྒྱུན་ལས་ཁང་གཙོས་པའི་སྤྲུལ་སྐུ་ཧཱུྃ་ཀར་རྡོ་རྗེ་མཆོག་གི་སློབ་མ་སོགས་ཀྱིས་ཁོང་ནི་རྒྱ་གཞུང་གིས་ཉེས་མེད་ཉེས་འཛུགས་ཀྱིས་སྐུ་དཀྲོངས་པ་རེད་ཅེས་དང་། ཝི་ཏི་ནམ་(Vietnam) སྲིད་གཞུང་ནས་རིན་པོ་ཆེ་མཆོག་གི་གྲོངས་རྐྱེན་རྒྱལ་སྤྱིའི་ཁྲིམས་ལུགས་ལྟར་བརྟག་དཔྱད་ཞིབ་འཇུག་ནན་ཞིབ་ཡོང་བའི་འབོད་སྐུལ་ནན་ཏན་ཞུས་སོང་། གལ་སྲིད་དེ་ལྟར་གསལ་ཁ་མ་གནང་ན་ཁོང་ཚོས་མུ་མཐུད་ནས་ལས་འགུལ་སྤེལ་རྒྱུ་ཡིན་སྐོར་སོགས་གསུངས་སོང་།

ཕྱི་ལོ་༢༠༢༦ ཟླ་༦ ཚེས་༤ ཉིན། གངས་སྐྱིད་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་ནང་འགྲོ་བ་མིའི་ཐོབ་ཐང་གནས་སྟངས་ཀྱི་ལོ་འཁོར་སྙན་ཐོ་དང་བོད་ནང་ཆོས་ལུགས་རང་དབང་གི་སྙན་ཐོ་བཏོན་སོང་། སྐབས་དེར། ཕྱི་ལོ་༢༠༢༥ ལོའི་ནང་རྒྱ་གཞུང་གིས་བོད་མི་༩༠་ལྷག་འཛིན་བཟུང་བྱས་ཡོད་སྐོར་འགྲེལ་བརྗོད་གནང་སོང་།

ཕྱི་ལོ་༢༠༢༦ ཟླ་༦ ཚེས་༣ ཉིན། བཞུགས་སྒར་དྷ་རམ་ས་གངས་སྐྱིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གི་མདུན་ནས་འདེམས་ཐོན་བཀའ་བློན་ཆུ་སྐྱ་སྦྲ་གཉིས་ཚེ་རྒྱལ་ལགས་དང་། དཔལ་ལྡན་དོན་གྲུབ་ལགས། གྱང་གསར་ཚེ་རིང་དོན་གྲུབ་ལགས། ཨོ་རྒྱན་བསྟན་འཛིན་ལགས། ཀུན་དགའ་བཀྲ་ཤིས་ལགས། པདྨ་མཚོ་ལགས་བཅས་ནས་ལས་འཁུར་དམ་འབུལ་ཞུས་སོང་།

ཕྱི་ལོ་༢༠༢༦ ཟླ་༦ ཚེས་༡ ཉིན། བཞུགས་སྒར་དྷ་རམ་ས་གངས་སྐྱིད་བོད་མིའི་སྒྲིག་འཛུགས་ཀྱི་སྲིད་སྐྱོང་ཚོགས་ཁང་དུ། ཁྲིམས་ཞིབ་པ་ཆེ་བ་ཡེ་ཤེས་དབང་མོ་མཆོག་གི་མདུན་ནས་སྐབས་༡༨ པའི་བོད་མི་མང་སྤྱི་འཐུས་ལྷན་ཚོགས་ཀྱི་འདེམས་ཐོན་ཚོགས་གཙོ་སྒྲོལ་མ་ཚེ་རིང་དང་ཚོགས་གཞོན་མཁན་པོ་བསོད་ནམས་བསྟན་འཕེལ་རྣམ་གཉིས་ཀྱིས་ལས་འཁུར་དམ་འབུལ་ཞུས་སོང་།

ཕྱི་ལོ་༢༠༢༦ ཟླ་༣ ཚེས་༡༡ ཉིན། བཞུགས་སྒར་དྷ་རམ་ས་ལའི་ཐེག་ཆེན་ཆོས་གླིང་གཙུག་ལག་ཁང་དུ། རྒྱ་གར་བོད་དོན་རྒྱབ་སྐྱོར་ཚོགས་པ་༢༤་ཡིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་སྐུ་ཚེ་མི་བཤིག་རྡོ་རྗེའི་ཁམས་སུ་བརྟན་ཕྱིར་བརྟན་བཞུགས་བསྟར་འབུལ་ཞུས་སོང་། སྐབས་དེར། རྒྱ་གར་རྒྱལ་ཡོངས་བོད་དོན་རྒྱབ་སྐྱོར་ཚོགས་པ་རྣམས་ཀྱིས་༸གོང་ས་མཆོག་ལ་ཀརུཎ་རཏྣ་(Karuna Ratna)ཞེས་པའི་འབུལ་ལམ་ཞུས་སོང་།

ཕྱི་ལོ་༢༠༢༦ ལོའི་ཟླ་༡ པའི་ཚེས་༥ ཉིན་སྤེལ། ནང་པའི་དགེ་འདུན་པ་ཁག་ཅིག་ནས་ཨ་རི་ནང་“ཞི་བདེའི་ཆེད་དུ་སྐྱོད་པའི་གོམ་བགྲོད”ཅེས་པའི་བརྗོད་གཞིའི་འོག་ནས། ཞི་བདེ་དང་། བྱམས་པ། བརྩེ་བ་ཁྱབ་སྤེལ་གནང་བཞིན་པར་ས་གནས་གཞུང་མང་གཉིས་ནས་རྒྱབ་སྐྱོར་དང་དགའ་བསུ་ཆེན་པོ་ཐོབ་བཞིན་ཡོད་པར་མ་ཟད། སེམས་འགུལ་ཐེབས་ནས་མིག་ཆུ་བཞུར་མཁན་དང་། པུས་མོ་བཙུགས་ནས་མེ་ཏོག་ཕུལ་མཁན། སྐད་གསང་མཐོན་པོས་བསྔགས་བརྗོད་བྱེད་མཁན་ཡང་མང་དུ་བྱུང་འདུག དེར་བརྟེན། ཁོང་ཚོས་ས་གནས་ཀྱི་སྤྱི་ཚོགས་གཙོས་པའི་སྤྱི་ཚོགས་གང་སར་མིག་དཔེ་བཟང་པོ་དང་ཤུགས་རྐྱེན་བཟང་པོ་སྐྲུན་བཞིན་འདུག

ཕྱི་ལོ་༢༠༢༥ ཟླ་༡༡ ཚེས་༢༧ ཉིན་སྤེལ། ཅེཀ་སྤྱི་མཐུན་རྒྱལ་ཁབ་ཀྱི་རྒྱལ་ས་པ་རག་ཏུ་ཚོགས་པའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ནས་བསྒྲགས་གཏམ་ཞིག་སྤེལ་ཡོད་པའི་ནང་དུ། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གི་ཡང་སྲིད་ངོས་འཛིན་གྱི་ཐོབ་ཐང་ནི་བོད་མི་ཁོ་ནར་ཡོད་པ་མ་གཏོགས་རྒྱ་དམར་སྲིད་གཞུང་ལ་མེད་ཅེས་ནན་བརྗོད་བྱས་འདུག ལྷན་ཚོགས་དེའི་ཐོག་ཨ་རི་གཙོས་པའི་རྒྱལ་ཁབ་ཁག་གི་ཆོས་དད་རང་དབང་དང་འབྲེལ་བའི་མི་སྣ་དང་། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་ཡང་ཕེབས་ནས་གསུང་བཤད་གནང་ཡོད་འདུག

ཕྱི་ལོ་ ༢༠༢༥ ཟླ་ ༦ ཚེས་ ༡༨ ཉིན། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ཕྱི་ལུགས་ལྟར་དགུང་གྲངས་ ༩༠ བཞེས་པའི་གཞུང་འབྲེལ་གོ་སྟོན་སྲུང་བརྩིའི་བོད་ཡིག་དྲ་ཚིགས(www.ghoton.net) དང་དབྱིན་ཇིའི་དྲ་ཚིགས་(www.hhthedalailama90.net) བཅས་དྲ་ཚིགས་གཉིས་དབུ་འབྱེད་གནང་རྗེས། ༸གོང་ས་མཆོག་གི་གོ་སྟོན་དང་འབྲེལ་བའི་གཞུང་འབྲེལ་གསར་འགོད་གསལ་བསྒྲགས་ཤིག་སྤེལ་གནང་སོང་།