ཕྱི་ལོ་༢༠༢༡་ཟླ་༨་ཚེས་༤ཉིན། བཞུགས་སྒར་རྡ་ས་ནོར་བུ་མགྲོན་ཁང་གི་ཞི་བདེ་ཚོགས་ཁང་དུ། བོད་ཀྱི་གཞུང་འབྲེལ་མ་ཡིན་པའི་ཚོགས་པ་ཆེ་ཁག་བཞི་ནས། ད་ལྟའི་ཆར་སྐབས་༡༧ པའི་སྤྱི་འཐུས་གྲོས་ཚོགས་ཀྱི་ཚོགས་གཙོ་ཚོགས་གཞོན་འོས་འདེམས་དང་། འཛིན་སྐྱོང་བཀའ་ཤག་གིས་བཀའ་བློན་བསྐོ་བཞག་གནང་མ་ཐུབ་པ་སོགས་ཀྱི་གནས་སྟངས་སྐོར་ལ་གསར་འགོད་ལྷན་ཚོགས་ཤིག་སྐོང་ཚོགས་གནང་སོང་།
དེ་ཡང་། གོང་ཚེས་ཉིན་གྱི་ཞོགས་པ་ཆུ་ཚོད་༡༡་ཐོག བོད་ཀྱི་གཞོན་ནུ་ལྷན་ཚོགས། བོད་ཀྱི་བུད་མེད་ལྷུན་ཚོགས། བོད་ཀྱི་རྒྱལ་ཡོངས་མང་གཙོ་ཚོགས་པ། བོད་རང་བཙན་སློབ་ཕྲུག་ཚོགས་པ(རྒྱ་གར)། བཅས་ཀྱིས་གསར་འགོད་གསལ་བསྒྲགས་ཞིག་སྤེལ་སོང་བ་དང་། དེའི་སྐབས། བོད་མིའི་རྩ་དོན་འཐབ་རྩོད་ཀྱི་གཞི་རྩ་བོད་མིའི་མང་གཙོའི་གཞུང་འདི་བཞིན་བསྐྱར་གསོ་དང་། རྒྱུན་གནས་ཡོང་ཆེད་ཐོག་མར་སྤྱི་འཐུས་རྣམས་བཞུགས་མོལ་ཚོགས་འདུ་ཚོགས་ཏེ་མང་མོས་གང་བྱུང་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་འོས་འདེམས་དང་། འཛིན་སྐྱོང་བཀའ་ཤག་གི་བཀའ་བློན་འོས་འདེམས་སོགས་གྲོས་ཚོགས་ཀྱི་ལས་རིམ་སྔར་རྒྱུན་བཞིན་འགྲོ་ཐུབ་པ་གང་མགྱོགས་འགོ་འཛུགས་གནང་རྒྱུར་དབུས་འོས་བསྡུ་ལས་ཁང་གི་གཙོས་འབྲེལ་ཡོད་ཕྱོགས་ཚང་མས་དགོངས་བཞེས་གནང་རོགས་ཞེས་རེ་སྐུལ་ཞུ་རྒྱུ་ཡིན་ཞེས་གསུངས་སོང་།
ཁོང་ཚོའི་ཐུན་མོང་གི་གསལ་བསྒྲགས་ནང་དུ་དོན་ཚན་གསུམ་ཅན་གྱི་འབོད་སྐུལ་ཞུས་འདུག དེ་དག་ནི། ༡༽ ཕྱི་ལོ་༢༠༢༡ ཟླ་༦ ཚེས་༨ ཉིན་བདམས་ཐོན་སྤྱི་འཐུས་༤༤ ནས་དམ་འབུལ་ཞུ་ཡུལ་ཁག་གཉིས་བྱས་ནས་ཕུལ་ཟིན་པ་དེ་དག བཅའ་ཁྲིམས་ནང་གསལ་ཆ་མེད་ཀྱང་དེ་སྔ་ཚོགས་གཙོ་རེས་མོས་བྱེད་པའི་ལམ་ལུགས་ཡོད་པ་བཞིན་ད་ཆ་ནང་ཁུལ་ཁྲིམས་སྒྲིག་གི་འགྲེལ་བཤད་ལས་གལ་ཆེ་བ། བོད་མིའི་རྩ་དོན་འཐབ་རྩོད་ཀྱི་གཞི་རྩ་བོད་མིའི་མང་གཙོའི་གཞུང་འདི་བཞིན་བསྐྱར་གསོ་དང་། རྒྱུན་གནས་ཡོང་ཆེད་ཐོག་མར་སྤྱི་འཐུས་རྣམས་བཞུགས་མོལ་ཚོགས་འདུ་ཚོགས་ཏེ་མང་མོས་གང་བྱུང་ཐོག་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་ཚོགས་གཞོན་འོས་འདེམས་དང་། འཛིན་སྐྱོང་བཀའ་ཤག་གི་བཀའ་བློན་འོས་འདེམས་སོགས་གྲོས་ཚོགས་ཀྱི་ལས་རིམ་སྔར་རྒྱུན་བཞིན་འགྲོ་ཐུབ་པ་གང་མགྱོགས་འགོ་འཛུགས་གནང་རྒྱུར་དབུས་འོས་བསྡུ་ལས་ཁང་གི་གཙོས་འབྲེལ་ཡོད་ཕྱོགས་ཚང་མས་དགོངས་བཞེས་གནང་རོགས་ཞེས་རེ་སྐུལ་ཞུ་རྒྱུ།
༢༽ སྐབས་༡༧ པའི་བོད་མི་མང་སྤྱི་འཐུས་ལྷན་ཚོགས་ཀྱི་ལས་རིམ་ཚུགས་ཟིན་པའི་རྗེས་བོད་མི་མང་སྤྱི་འཐུས་ལྷན་ཚོགས་ཀྱི་ལས་འགན་གཙོ་བོ་བོད་མི་མང་ཚོགས་ནས་འོས་འདེམས་བྱས་པའི་དབུ་ཁྲིད་ནས་མང་ཚོགས་ཀྱི་མངོན་འདོད་བཞིན་མང་ཚོགས་ཀྱི་ངོ་ཚབ་ཆ་ཚང་མཚོན་པའི་ཐོག་ནས། སྤྱི་ནོར་ྋགོང་ས་ྋསྐྱབས་མགོན་རིན་པོ་ཆེའི་གསོལ་རས་གནང་བའི་ཡང་དག་པའི་མང་གཙོའི་སྒྲིག་འཛུགས་འདི་བཞིན་རྒྱུན་སྐྱོང་དང་མདུན་བསྐྱོད་ཡོང་བ། བོད་མིའི་རྩ་དོན་འཐབ་རྩོད་རྒྱུན་སྐྱོང་དང་། ཆོལ་གསུམ་ཆིག་སྒྲིལ་གྱི་ནུས་བ་སྔར་ལྷག་ཡོང་ཐབས་བཅས་ལ་འབད་བརྩོན་གནང་དགོས་པ་ལས། དེ་སྔ་སྐབས་༡༦ པའི་སྤྱི་འཐུས་ལྷན་ཚོགས་དང་། ཆེས་མཐོའི་ཁྲིམས་ཞིབ་ཁང་དབར་བྱུང་པའི་རྙོག་གླེང་དང་། ད་རེས་སྐབས་༡༧ པའི་སྤྱི་འཐུས་དང་། སྲིད་སྐྱོང་བཅས་ཀྱི་དམ་འབུལ་ཞུ་ཕྱོགས་དང་འབྲེལ་ནས་ཁྲིམས་སྒྲིག་མཐུན་མིན་གྱིས་གླེང་རྙོག་རིགས་ཕྱོགས་ཚང་མས་གཞུང་བསྟེན་སྲུང་མ་དམར་ནག་གཉིས་དཔང་པོར་བཞག་ནས་སླད་གནད་དོན་འདི་རིགས་རྩ་བ་ནས་གླེང་སློང་མི་གནང་རྒྱུའི་རེ་སྐུལ་ཞུ་རྒྱུ།
༣༽ ད་ཡོད་བཙན་བྱོལ་བོད་མིའི་བཅའ་ཁྲིམས་ནང་ཁ་གསལ་མེད་པ་དང་། འགྲེལ་བཤད་གནང་ཕྱོགས་མི་འདྲ་བའི་སྐྱོན་ཆ་དང་དོགས་གནས་གང་ཡོད་སྐབས་༡༧ པའི་བོད་མི་མང་སྤྱི་འཐུས་ལྷན་ཚོགས་ཚུགས་རྗེས་བཅའ་ཁྲིམས་བསྐྱར་བཅོས་ཟིན་ བྲིས་ཚོགས་ཆུང་ཆེད་འཛུགས་ཀྱིས་ཁྲིམས་སྒྲིག་ཁ་གསལ་མེད་རིགས་ཁ་གསལ་དང༌། བསྐྱར་བཅོས་གནང་འོས་ཁག་གཏན་འབེབས་གནང་སྐྱོང་ཡོང་བ་མཐའ་དོན་རྒྱ་ཆེའི་མང་ཚོགས་ལ་འབོད་སྐུལ་ཞུ་རྒྱུར་གཞི་རྩའི་མང་གཙོའི་སྤྱི་ཚོགས་ནང་ཕན་ཚུན་བསམ་ཚུལ་དང་། ལྟ་བ་ལངས་ཕྱོགས་སོགས་མཐུན་མིན་གྱི་རྩོད་གླེང་ནི་མང་གཙོ་གོང་འཕེལ་ཡོང་བའི་རྨང་གཞི་དང་། མང་གཙོའི་ཁྱད་ཆོས་ཀྱང་དེ་རང་ཡིན་པར་བརྟེན་ངེས་པར་དུ་ཐུགས་སྣང་དགོས་ངེས་ཀྱང་། ང་ཚོའི་མང་གཙོའི་སྒྲིག་འཛུགས་དེ་བཞིན་རང་ས་དགྲ་ལག་ཏུ་ཤོར་བའི་བཙན་བྱོལ་བའི་གནས་བབ་ཅིག་དང་། མང་གཙོ་ལས་ཀྱང་གལ་ཆེ་བ་བོད་དོན་བདེན་མཐའ་གསལ་རྒྱུའི་ཆེད་རྩ་དོན་འཐབ་རྩོད་ཀྱི་ལས་འགུལ་ཅི་རིགས་ལ་ཆོལ་གསུམ་རྡོག་རྩ་གཅིག་སྒྲིལ་གྱིས་ཚང་མས་མཉམ་ཞུགས་གནང་དགོས་པ་དང༌། གང་ཟག་སོ་སོའི་འདོད་མོས་ཡོད་མིན་ལ་མ་ལྟོས་པར་མི་མང་གི་འོས་འདེམས་བྱས་ནས་མང་མོས་ཐོན་པའི་དབུ་ཁྲིད་སུ་བསླེབས་ཀྱང་དེ་ལ་གུས་བརྩི་ཞུ་དགོས་པ་དེ་ཡང་མང་གཙོའི་ཁྱད་ཆོས་དང་། འགན་འཁུར་ཡང་ཡིན་པར་བརྟེན་རྒྱ་ཆེའི་མང་ཚོགས་ནས་ཀྱང་ཚོར་སྣང་དང་། གཡམ་རྒྱུག ཆོལ་ཁ་དང་། ཆོས་ལུགས། ལུང་མཚན་བཅས་ཀྱི་ཕྱོགས་ཞེན་གྱི་དབང་དུ་མ་སོང་བར་ཚང་མས་ཡིད་གཟབ་དང་བབས་ལྷིང་བརྟན་གསུམ་ཐོག་བོད་མིའི་རྩ་དོན་འཐབ་རྩོད་ཀྱི་ལས་འགུལ་ལ་སྔར་ལྷག་མཉམ་ཞུགས་དང་མདུན་བསྐྱོད་གནང་སྐྱོང་ཡོང་བའི་འབོད་སྐུལ་ནན་ཞུ་དང་བཅས། ཞེས་བཀོད་འདུག
