༢༠༡༨ ཟླ་ ༡༠ ཚེས་ ༡༥ཉིན། བོད་མིའི་སྒྲིག་འཛུགས་ནས་འདི་ལོ ༢༠༡༨ ལོ་ནི། རྒྱ་གར་གཞུང་མང་གཙོ་གྱུར་བོད་རིགས་གནས་ཡུལ་གྱི་ས་གནས་གཞུང་མང་གཉིས་ལ་ཐུགས་རྗེ་ཆེ་ཞུའི་ལོར་སྲུང་བརྩི་ཞུ་བཞིན་ཡོད་པ་ལྟར། བོད་མིའི་སྒྲིག་འཛུགས་ཀྱིས་རྒྱ་གར་ཧི་མ་ཅལ་མངའ་སྡེའི་རྒྱལ་ས་སིམ་ལའི(Ridge)ཞེས་པའི་ཐང་ཆེན་དུ་ཧི་མ་ཅལ་གཞུང་མང་གཉིས་ལ་ཐུགས་རྗེ་ཆེ་ཞུའི་མཛད་སྒོ་ཚོགས་ཡོད་པ་དང་། མཛད་སྒོའི་སྐུ་མགྲོན་གཙོ་བོར་ཧི་མ་ཅལ་མངའ་སྡེའི་སྤྱི་ཁྱབ་བློན་ཆེན་ཟུར་ཝར་བྷ་དྷཱ་རཱ་སིང(Virbhadra Singh )མཆོག་དང་།

གྲོས་ཚོགས་ནས་ཁྲིམས་འཆར་གཏན་འབེབས་གནང་བ་དེས་བཟང་ཕྱོགས་སུ་འགྲོ་ཡི་ཡོད་དུས་ཏན་ཏན་ང་ཚོའི་སྤྱི་ཚོགས་ནང་དང་འོས་བསྡུ་ཐོག་ལ་ལྷིང་འཇགས་ཡོང་བར་ཕན་ཐོགས་འབྱུང་གི་རེད་བསམ་པའི་ཡིད་ཆེས་ཡོད། ཅེས་དཔལ་ལྡན་སྲིད་སྐྱོང་མཆོག་གིས་གསར་འགོད་གསལ་བསྒྲགས་སྐབས་སུ་གསུང་སོང་།

བོད་དོན་ནི་བོད་མིའི་འགྲོ་བ་མིའི་ཐོབ་ཐང་དང་བོད་པའི་གནས་དོན་གཅིག་པོ་མིན་པ། དེ་ནི་འཛམ་གླིང་གི་གནད་དོན་ཞིག་ཡིན། གང་ཡིན་ཟེར་ན་བོད་ཀྱི་འཁོར་ཡུག་ནི་འཛམ་གླིང་ཐོག་ཧ་ཅང་གལ་ཆེན་པོ་ཆགས་ཡོད། ལྷག་པར་དུ་བོད་ཀྱི་ཆུ་ཆེན་ཁག་ནི་འཛམ་གླིང་མི་མང་མང་པོ་དེར་བརྟེན་ནས་ཡོད། རྒྱ་ནག་གིས་བོད་ནང་འཁོར་ཡུག་ལ་གཏོར་བཤིག་གཏོང་བ་ནི་བོད་ཀྱི་འཁོར་ཡུག་ཁོ་ན་གཏོར་བཤིག་གཏོང་བ་ཞིག་མིན་པ། གོ་ལ་ཡོངས་ལ་གནོད་སྐྱོན་བྱེད་པ་ཞིག་རེད། དེར་བརྟེན་མི་ཚང་མ་ལ་འགན་ཡོད་པ་ཞིག་རེད། ཅེས་དབྱིན་ཡུལ་ནས་ཕེབས་པའི་གྲོས་ཚོགས་འཐུས་མི་སྐུ་ཞབས་ཊིམ་ལུབ་ཊོན་མཆོག་གིས་རྡ་སར་འཚམས་གཟིགས་སྐབས་སུ་གསུང་སོང་།

༢༠༡༨ལོའི་ཟླ་༡༠པའི་ཚེས་༦ཉིན། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཐེངས་འདིའི་དབུ་མ་འཇུག་པའི་བཀའ་ཁྲིད་ལེགས་པར་མཇུག་གྲུབ། དེ་ཡང་ཚེས་གསུམ་ནས་ལྔའི་བར་དུ་སྤྱི་ནང་ཆོས་ངོ་སྤྲོད་དང་བྱེ་བྲག་ཏུ་དབུ་མ་འཇུག་པའི་བཀའ་ཁྲིད་གནང་ཞིང་། ཉིན་མཐའ་མ་ཚེས་དྲུག་ཉིན་ལ། རྗེ་རིན་པོ་ཆེས་མཛད་པའི་ལམ་གཙོ་རྣམ་གསུམ་དང་། དེ་བཞིན་དགེ་བསྙེན་དང་བྱང་ཆུབ་སེམས་དཔའི་སྡོམ་པ་གནང་ཞིང་། སྤྱན་རས་གཟིགས་ངན་སོང་ཀུན་གྲོལ་གྱི་རྗེས་གནང་བསྩལ།

༢༠༡༨ལོའི་ཟླ་༡༠ཚེས་༢ཉིན། སྐྱེས་ཆེན་དམ་པ་གཱན་དྷི་མཆོག་གི་སྐུའི་འཁྲུངས་སྐར་ལ་བཙན་བྱོལ་བོད་གཞུང་མང་གཉིས་ནས་རྒྱ་གར་གཞུང་གིས་གཙང་བཟོ་ལས་འགུལ་སྤེལ་བཞིན་པའི་ནང་དུ་ཞུགས་ཤིང་། བོད་མིའི་སྒྲིག་འཛུགས་ཀྱི་ལས་བྱེད་རྣམས་ཀྱིས་གངས་སྐྱིད་ནས་རྡ་སྟེང་བོད་ཁྱིམ་སློབ་གྲྭ་བར་དུ་གཙང་བཟོ་ལས་འགུལ་གྱི་ཆ་ཤས་བླངས་ཡོད་པ་དང་། དེ་བཞིན་བོད་མི་གནས་སྡོད་བྱེད་སའི་རྒྱ་གར་ས་ཕྱོགས་མང་པོ་ཞིག་ནའང་གཙང་བཟོའི་ལས་འགུལ་ནང་མཉམ་ཞུགས་བྱེད་བཞིན་པ་རེད་འདུག

༢༠༡༨ལོའི་ཟླ་༩ཚེས་༢༨ཉིན་གྱི་ཆུ་ཚོད་༩ ཙམ་དུ་ནོར་བུ་གསུམ་གྱི་ཡ་གྱལ་མཁས་དབང་ནམ་མཁའི་ནོར་བུ་རིན་པོ་ཆེ་ཨེ་ཊ་ལི་ཡི་གདན་ས་མེ་རི་སྒར་དུ་སྐུ་གཤེགས་ཡོད་འདུག་པ་དང་། ཟླ་༩ཚེས་༢༩ཉིན་བཙན་བྱོལ་བོད་གཞུང་གི་ཆོས་རིག་ལས་ཁུངས་ནས་ཐུགས་གསོ་ཕྱག་འཕྲིན་སྤེལ་གནང་འདུག