༢༠༡༩ལོའི་ཟླ༡ཚེས་༢༥ཉིན། ལྡི་ལི་བསམ་ཡུལ་གླིང་དུ་ཡོད་པའི་བོད་ཀྱི་བསྟན་བླངས་ཆུ་བཞི་སྒང་དྲུག་དབུས་སྤྱི་ཁྱབ་རྒྱུན་ལས་ཁང་གི་ཤེས་ཡོན་སྡེ་ཚན་གྱིས་གོ་སྒྲིག་འོག་མདོ་ཁམས་ཆུ་བཞི་སྒང་དྲུག་དང་འབྲེལ་བའི་ལོ་ངོ་༦༠་རིང་གི་བྱུང་རབས་གླེང་བ་ཞེས་པའི་བརྗོད་གཞི་ཐོག་མཁས་དབང་གདན་འདྲེན་ཞུ་ནས་མཐོ་རིམ་སློབ་མ་གཙོ་པའི་མི་མང་ལ་གསུང་བཤད་དང་བགྲོ་གླེང་གནང་སོང་།

༢༠༡༩ལོའི་ཟླ་༡ཚེས་༡༨ཉིན་སྤེལ། ཨ་རི་ནིའུ་ཡོག་གྲོང་འཁྱེར་དུ་གནས་སྡོད་བྱེད་པའི་མི་ཉག་ཕ་བསྟན་འཛིན་དབང་རྒྱལ་ལགས་ཉེ་ཆར་དཔལ་ལྡན་སྲིད་སྐྱོང་མཆོག་ཨ་རིར་ཕྱོགས་ཕེབས་མཇལ་བཅར་སྐབས། ཁོང་ནས་༸གོང་ས་མཆོག་གིས་རྒྱུན་དུ་རྒས་གཅོང་ཉམ་ཐག་རིགས་ལ་རོགས་ཕན་བྱེད་དགོས་ཞེས་བཀའ་སློབ་ཕེབས་དགོངས་བཞིན། དབུས་བོད་མིའི་སྒྲིག་འཛུགས་ཀྱི་འཕྲོད་བསྟེན་ཁྱབ་ཁོངས་བོད་རིགས་ཉམ་ཐག་རྒས་གཅོང་རིགས་ལ་སྨན་བཅོས་མཐུན་འགྱུར་ཆེད་ཨ་རི་སྐུ་ཚབ་དོན་ཁང་བརྒྱུད་ཨ་སྒོར་ ༩༠,༠༠༠།༠༠ ༼དགུ་ཁྲི་ཐམ་པ་༽ ཞལ་འདེབས་འབུལ་རྒྱུ་གནང་བ་ལྟར་ད་ཆ་དངུལ་འབོར་ཆ་ཚང་གནང་འབྱོར་བྱུང་ཡོད་འདུག

རྒྱ་ནག་གིས་ཕྱོགས་ཞེན་གྱི་གནས་ཚུལ་དང་གནས་ཚུལ་རྫུན་མ་བཤད་བསྡད་ཀྱི་ཡོད་རེད། བོད་ཀྱི་དངོས་ཡོད་གནས་ཚུལ་དེ་རྒྱལ་སྤྱིའི་སྡིངས་ཆའི་ཐོག་ཏུ་བཞག་ཐུབ་པ་བྱེད་རྒྱུ་གལ་ཆེན་པོ་རེད། གནས་ཚུལ་དེ་དག་བཞག་ཐུབ་པར་བརྟེན་ནས་བོད་དོན་ཐོག་གླེང་སློང་བྱས་པ་རེད། དེར་བརྟེན། བོད་དོན་རྒྱལ་སྤྱིའི་ཐོག་གླེང་སློག་བྱེད་རྒྱུ་གལ་ཆེན་པོ་རེད་ཅེས་དྭགས་པོ་བསོད་ནམ་ནོར་བུ་ལགས་ཀྱི་གསུངས་སོང་།

༢༠༡༩ལོའི་ཟླ་༡ཚེས་༢༢ཉིན། བོད་ཀྱི་སྲིད་བྱུས་ཉམས་ཞིབ་ཁང་གིས་གོ་སྒྲིག་འོག་རྒྱ་གར་གཞོན་སྐྱེས་བོད་དོན་ཉམས་ཞིབ་པའི་ལྷན་ཚོགས་ཐེངས་དང་པོ་དེ་ས་རྭ་མཐོ་སློབ་དུ་དབུ་འཛུགས་གནང་སོང་བ་དང་། ལྷན་ཚོགས་ཀྱི་དགོས་དམིགས་གཙོ་བོ་ནི་རྒྱ་གར་གྱི་གཞོན་སྐྱེས་ཁྲོད་དུ་བོད་ཀྱི་གནད་དོན་ངོ་མ་གསལ་བཤད་གནང་རྒྱུ་དང་། བོད་པ་དང་རྒྱ་གར་བ་ཉམས་ཞིབ་པའི་བར་དགོངས་ཚུལ་བརྗེ་རེས་ཐུབ་རྒྱུ། དེ་བཞིན་རྒྱ་གཞུང་ནས་ཆབ་སྲིད་ཀྱི་དགོས་དམིགས་ཐོག་ནས་བོད་ཀྱི་གནད་དོན་ལ་འཁྱོག་བཤད་བྱེད་བཞིན་པའི་དུས་སྐབས་འདིར། བོད་པའི་ངོས་ནས་རྒྱ་གར་གྱི་ན་གཞོན་ཉམས་ཞིབ་པ་བརྒྱུད་ནས་རྒྱལ་སྤྱིའི་ཐོག་བོད་ནང་གི་དངོས་ཡོད་གནས་སྟངས་ཁྱབ་སྤེལ་རྒྱ་གང་ཆེ་གནང་རྒྱུ་ཡིན་པ་རེད།

༢༠༡༩ལོའི་ཟླ་༡ཚེས་༡༦ཉིན། ལུ་ཛམ་བྷོ་(Luxembourg)རྒྱལ་ཁབ་ནི་འཛམ་གླིང་ནང་མི་མང་ལ་འགྲུལ་སྐྱོད་རིན་མེད་སྤྲོད་མཁན་གྱི་རྒྱལ་ཁབ་ཐོག་མ་དེ་ཆགས་ཡོད་འདུག སླར་ཡང་གསར་ཏུ་འོས་འདེམས་བྱས་པའི་སྲིད་བློན་ས་ཝིེར་བྷེ་ཁྲིལ(Xavier Bettle)་དང་ཟླ་སྒྲིལ་གྱི་སྲིད་གཞུང་གིས་གསལ་བསྒྲགས་བྱས་པའི་ནང་དུ། ཁོང་ཚོས་ལོ་འདིའི་དབྱར་ཁ་ནས་སྣུམ་འཁོར་སོགས་འགྲུལ་སྐྱོད་བྱེད་པའི་སྐབས་སྤྲོད་པའི་གླ་ཆར་རོགས་རམ་བྱ་རྒྱུ་ཡིན་པ་དང་། དེའི་དམིགས་ཡུལ་ནི་རྒྱལ་ཁབ་དེའི་བཟོས་པའི་སྦགས་བཙོག་ཁ་སྒྱུར་གཏོང་བ་དང་། འཛམ་གླིང་ནང་མིག་དཔེ་གསར་བ་ཞིག་བསྟན་ནས་གུ་དོག་གི་འགྲིམ་འགྲུལ་ཉུང་དུ་གཏོང་བའི་རེ་བ་ཡིན་པར་བརྗོད་འདུག

༢༠༡༩ལོའི་ཟླ་༡ཚེས་༡༥ཉིན། བཞུགས་སྒར་རྡ་ས་གངས་སྐྱིད་གཉའ་ཁྲི་ཚོགས་ཁང་དུ་བྷན་རྡར་ར་ནོར་རྒྱལ་གླིང་བོད་མིའི་གཞིས་ཆགས་སུ་རྟེན་གཞི་བྱས་པའི་གངས་ལྗོངས་ནོར་འབྲས་བཟོ་གྲྭའི་ཆེས་ཐོག་མའི་ཐོན་སྐྱེད་གངས་ལྗོངས་ནོར་འབྲས་དངོས་སུ་ཐོན་པ་དང་འགྲེམས་ཚོང་མྱུར་དུ་བྱེད་རྒྱུའི་གསལ་བསྒྲགས་སྤེལ་སོང་། གངས་ལྗོངས་ནོར་འབྲས་ནི་བོད་རིགས་ཚོགས་པ་སྐྱིད་སྡུག་ཁག་དང་། དེ་བཞིན་ཁྲོམ་རྭ་ཁྲོད་ཨང་རིམ་གཉིས་པའི་ནང་འགྲེམས་སྤེལ་ཞུ་ཐུབ་པའི་འབྲས་སྤུས་ཚད་ལེགས་པོ་ཡོད་པ་བརྗོད་སོང་།