13
Thu, Jun

ཕྱི་ལོ་༢༠༢༤ ཟླ་༤ ཚེས་༢༥ ཉིན། སྐུ་མགྲོན་གཙོ་བོ་དང་དམིགས་བསལ་སྐུ་མགྲོན། དེ་བཞིན་སྲིད་སྐྱོང་མཆོག་དང་ཚོགས་གཙོ་མཆོགས་རྣམས་ཀྱིས་༸པཎ་ཆེན་རིན་པོ་ཆེ་མཆོག་གི་འཁྲུངས་སྐར་གྱི་རྟེན་འབྲེལ་མཚོན་ཆེད་སྤྲི་གོར་གཏུབ་བཞིན་པ།

བཙན་བྱོལ་གྱི་གསར་འགྱུར།
ཡིག་གཟུགས་སྒྲིག་ཆས།

ཕྱི་ལོ་༢༠༢༤ ཟླ་༤ ཚེས་༢༥ ཉིན། བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ། བོད་མིའི་སྒྲིག་འཛུགས་ཀྱི་ཕྱི་དྲིལ་ལས་ཁུངས་ཀྱིས་གོ་སྒྲིག་འོག ༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་དགུང་གྲངས་ ༣༥ ཕེབས་པའི་༧སྐུའི་འཁྲུངས་སྐར་དུས་ཆེན་སྲུང་བརྩི་ཞུ་ཆེད་གཞུང་འབྲེལ་མཛད་སྒོ་ཤིག་ཚོགས་སོང་། བོད་མིའི་སྒྲིག་འཛུགས་ཀྱི་བཀའ་ཤག་དང་བོད་མི་མང་སྤྱི་ལྷན་ཚོགས་ཀྱིས་༧ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་མགྱོགས་མྱུར་དུ་གློད་གྲོལ་གཏོང་དགོས་པའི་འབོད་སྐུལ་ཞུས་སོང་།

དེ་ཡང་། གོང་ཚེས་ཉིན་གྱི་སྔ་དྲོ་གཞུང་འབྲེལ་གྱི་མཛད་སྒོར། སྐུ་མགྲོན་གཙོ་བོར་ཨི་སི་ཏཱོ་ནི་ཡ་(Estonian)གྲོས་ཚོགས་འཐུས་མི་སྐུ་ཚབ་ཚོགས་ཆུང་དང་། དམིགས་བསལ་སྐུ་མགྲོན་བཀྲ་ཤིས་ལྷུན་པོའི་མཁན་པོ་སྐྱབས་རྗེ་གཟིག་རྒྱབ་རིན་པོ་ཆེ་མཆོག་དང་། སྐྱབས་རྗེ་ཚེ་མཆོག་གླིང་རིན་པོ་ཆེ་མཆོག ལ་དྭགས་ནང་པའི་ཚོགས་འདུའི་ཚོགས་གཙོའི་སྐུ་ཚབ་སྐུ་ཞབས་རིག་འཛིན་རྡོ་རྗེ་ལགས། དེ་བཞིན་བོད་མིའི་སྒྲིག་འཛུགས་ཀྱི་སྲིད་སྐྱོང་དང་བཀའ་བློན་རྣམ་པ། བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་གཙོ་དང་སྤྱི་འཐུས་རྣམ་པ། དྲུང་ཆེ་དང་ལས་བྱེད། དེ་བཞིན་སློབ་ཕྲུག་དང་རྡ་ས་ཁུལ་གྱི་སེར་སྐྱ་མི་མང་རྣམས་མཉམ་ཞུགས་བྱས་འདུག

སྲིད་སྐྱོང་སྤེན་པ་ཚེ་རིང་མཆོག་གིས་བཀའ་ཤག་གི་གསུང་བཤད་གནང་དོན། སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ཡང་སྲིད་འཁྲུལ་བྲལ་དུ་ངོས་འཛིན་མཛད་ནས་ཉིན་གྲངས་གསུམ་གྱི་རྗེས་ཏེ་ཕྱི་ལོ་༡༩༩༥ ཟླ་ ༥ ཚེས་ ༡༧ ཉིན་གྱི་མཚན་མོར། རྒྱ་ནག་གཞུང་གིས་༸ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་མཆོག་དང་། ཡབ་དཀོན་མཆོག་ཕུན་ཚོགས་དང་། ཡུམ་བདེ་ཆེན་ཆོས་སྒྲོན། རྒྱ་གཞུང་གིས་ཡང་སྲིད་རྩད་འཚོལ་ཚོགས་ཆུང་གི་ཚོགས་གཙོར་བསྐོ་གཞག་བྱས་པའི་བྱ་བྲལ་བྱམས་པ་འཕྲིན་ལས་རིན་པོ་ཆེ་སྐུ་འཁོར་དང་བཅས་པ་འཛིན་བཟུང་བཙན་ཁྲིད་བྱས་ཏེ། ད་བར་གར་སོང་ཆ་མེད་དུ་གྱུར་ཡོད། ཅེས་དང་།

རྒྱལ་སྤྱིའི་ཁྲིམས་ལུགས་དང༌། འགྲོ་བ་མིའི་ལྷན་སྐྱེས་ཀྱི་ཐོབ་ཐང་བརྩི་མེད་རྡོག་རོལ་གཏོང་རྒྱུར་སྡིག་པ་མིག་བཙུམ་བྱེད་མཁན་གྱི་སྲིད་དབང་འདི་རིགས་ངན་པ་རྒྱ་ངན་དུ་ཤོར་ཚེ། འཛམ་གླིང་ཁྱོན་འདིར་དྲང་བདེན་དང་། ཞི་བདེ་ཡོང་བའི་རྨང་ གཞི་སྣང་མེད་དུ་བསྐྱུར་བ་དང་གཅིག་མཚུངས་ཡིན་སྟབས། རང་དབང་མང་གཙོའི་སྲིད་གཞུང་ཁག་གིས་༧ཀུན་གཟིགས་པཎ་ཆེན་བསྟན་འཛིན་དགེ་འདུན་རིན་པོ་ཆེ་མཆོག་མགྱོགས་མྱུར་རང་དབང་ཐོབ་རྒྱུར་ནུས་ལྡན་གྱི་བྱེད་ཐབས་རྩོམ་གནང་ཡོང་བ་ཞུ་རྒྱུ་དང་། འགྲོ་བ་མིའི་ཐོབ་ཐང་ཚོགས་པ་ཁག་དང་། བོད་དོན་རྒྱབ་སྐྱོར་བ་རྣམ་པས་དེ་ལུགས་སོ་སོའི་སྲིད་གཞུང་ལ་སྙན་སྐུལ་གྱི་ཐབས་ཤེས་གང་ཡོང་འཐེན་རྒྱུར་འབོད་སྐུལ་ཞུ་བ་ཡིན།

དེ་རིང་གི་གོ་སྐབས་འདི་བརྒྱུད་ཤོད་འདོད་པ་གཞན་ཞིག་ནི། རྒྱ་གཞུང་གིས་བསྐོ་འཛུགས་བྱས་པའི་རྒྱལ་མཚན་ནོར་བུར་མཚོན་ནའང་གདོང་དམར་བོད་རིགས་བཀྲུས་ནས་མ་དག་པ་ཞིག་དང་། བོད་བརྒྱུད་ནང་བསྟན་ལ་ཐོས་བསམ་གྱི་གོ་སྐབས་ཐོབ་མྱོང་མཁན་ཞིག་ཡིན་སྟབས། རྒྱ་གཞུང་གིས་ཆབ་སྲིད་ཀྱི་ལག་ཆར་བཀོལ་སྤྱོད་བྱེད་རྩིས་ཀྱི་མ་རུང་ཁོག་བཅུག་གི་ངན་གཡོའི་འོག་ཏུ་མ་ཚུད་པར། དེང་སང་བོད་མི་རིགས་དང་། བོད་བརྒྱུད་ནང་བསྟན་ཡུན་གནས་ལ་ལོ་རྒྱུས་སུ་བྱུང་མ་མྱོང་བའི་ཛ་དྲག་དཀའ་ཉེན་ཇི་འཕྲད་ངོས་འཛིན་གསལ་པོར་གནང་བའི་ཐོག་ནས། རང་ཉིད་ཀྱི་འགན་འཁྲིའི་བགྱི་སྒོ་ཁག་འཇིགས་ཞུམ་མེད་པར་ཁུར་ལེན་གནང་རྒྱུ་ལས། བོད་བསྟན་སྲིད་མི་རིགས་དང་བཅས་པར་རྨ་འབྱིན་གྱི་ལས་གཞར་ཡང་མི་རྩོམ་པའི་གཞེན་སྐུལ་ཞུ་འདོད་བྱུང་། ཅེས་འབོད་སྐུལ་ཞུས་སོང་།

བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་བོད་མི་མང་སྤྱི་འཐུས་ལྷན་ཚོགས་ཀྱི་གསུང་བཤད་གནང་དོན། དེ་རིང་ཀུན་གཟིགས་༸པཎ་ཆེན་རིན་པོ་ཆེ་སྐུ་ཕྲེང་བཅུ་གཅིག་པ་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་༼དགེ་འདུན་ཆོས་ཀྱི་ཉི་མ།༽ མཆོག་དགུང་གྲངས་ ༣༥ ལ་ཕེབས་པའི་༸སྐུའི་འཁྲུངས་སྐར་གྱི་དུས་ཚིགས་ཁྱད་པར་ཅན་གྱི་ཉིན་མོ་འདི་བོད་གཞིས་བྱེས་གཉིས་སུ་གནས་པའི་བོད་རིགས་སྤུན་ཟླ་ཡོངས་ལ་དགའ་བསུའི་ཉིན་མོ་གལ་ཆེ་ཞིག་ཆགས་ཡོད། ཡིན་ནའང་ཡང་སྲིད་རིན་པོ་ཆེའི་ཞལ་མཇལ་གསུང་ཐོས་ཙམ་ཡང་མེད་པར་ལོ་ངོ་བཅུ་ཕྲག་འགའ་ཤས་ཕྱིན་པ་ནི་བོད་ཁ་བ་རི་པ་རྣམས་ལ་སྐྱོ་གདུང་གི་ཚོར་བ་སྦྱིན་པའི་དུས་ཚོད་གཅིག་ཀྱང་ཆགས་ཡོད། ཅེས་དང་།

ཡང་སྲིད་མཆོག་སྤྲུལ་རིན་པོ་ཆེ་ ༼དགེ་འདུན་ཆོས་ཀྱི་ཉི་མ་༽ མཆོག་ཕྱི་ལོ་ ༡༩༨༩ ཟླ་ ༤ ཚེས་ ༢༥ ས་སྦྲུལ་བོད་ཟླ་ ༣ ཚེས་ ༡༩ ཉིན་བོད་ནག་ཆུ་ཁུལ་ལྷ་རི་རྫོང་ཁོངས་ཡབ་དཀོན་མཆོག་ཕུན་ཚོགས་དང་། ཡུམ་བདེ་ཆེན་ཆོས་སྒྲོན་གཉིས་ཀྱི་སྲས་སུ་༸སྐུ་འཁྲུངས། ༸རྒྱལ་མཆོག་སྐུ་ཕྲེང་རིམ་བྱོན་དང་། ༸པཎ་ཆེན་སྐུ་ཕྲེང་རིམ་བྱོན་རྣམས་བླ་སློབ་དང་། ཕན་ཚུན་ཡང་སྲིད་ངོས་འཛིན་གནང་རེས་བཅས་ཐུན་མོང་མ་ཡིན་པའི་འབྲེལ་བ་ཡོད་པ་བཞིན། ༸གོང་ས་མཆོག་ནས་ཐུགས་འཁུར་ཆེ་བཞེས་ཀྱིས་བོད་ཀྱི་སྲོལ་རྒྱུན་དང་ཆོས་ཕྱོགས་ཀྱི་གནང་སྒོ་ཁག་ལྟར་ལོ་ནས་ལོ་སྦྲེལ་བརྟག་དཔྱད་ནན་ཏན་རིམ་པར་གནང་མཐར། བོད་ཤིང་ཕག་ཟླ་ ༣ ཚེས་ ༡༥ ཕྱི་ལོ་ ༡༩༩༥ ཟླ་ ༥ ཚེས་ ༡༤ ཉིན་༸པཎ་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་བྲལ་དུ་ངོས་འཛིན་གནང་ཐོག་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་ཞེས་མཚན་གསོལ་ཞིང་། ༸ཞབས་བརྟན་གསོལ་འདེབས་བཞེད་དོན་ལྷུན་འགྲུབ་ཅེས་པ་ལྗགས་རྩོམ་མཛད་ཡོད། དེ་བསྟུན་ཡང་སྲིད་གཏན་འཁེལ་གྱི་གསལ་བསྒྲགས་བསྐྱངས། ༸གོང་ས་མཆོག་གིས་ཡང་སྲིད་ངོས་འཛིན་གནང་བའི་གསལ་བསྒྲགས་དེར་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་དམར་གཞུང་གིས་ཁྲིམས་འགལ་ནུས་མེད་ཡིན་ལུགས་སོགས་རང་སྣང་གང་དྲན་གྱི་ལོག་བཤད་བྱས་པ་ཙམ་དུ་མ་ཟད། སྐབས་དེར་དགུང་གྲངས་དྲུག་ལ་སོན་པའི་ཡང་སྲིད་མཆོག་སྤྲུལ་རིན་པོ་ཆེ་ ༼དགེ་འདུན་ཆོས་ཀྱི་ཉི་མ་༽ མཆོག་དང་། ཁོང་གི་ཡབ་ཡུམ་སྐུ་འཁོར། ༸པཎ་ཆེན་རིན་པོ་ཆེའི་ཡང་སྲིད་རྩད་ཞིབ་ཚོགས་ཆུང་གི་ཚོགས་གཙོ་བྱ་བྲལ་རིན་པོ་ཆེ་བཅས་རྒྱ་ནག་དམར་གཞུང་གིས་བཙན་ཁྲིད་ཀྱིས་གར་སོང་ཆ་མེད་དུ་གྱུར་ཏེ་ད་ཆ་ལོ་ངོ་ ༢༩ འཁོར་བཞིན་ཡོད། ཅེས་ཚོགས་གཙོ་མཆོག་གིས་འགྲེལ་བརྗོད་གནང་སོང་།

༸གོང་ས་༸སྐྱབས་མགོན་ཆེན་པོ་མཆོག་ནས་ཐུགས་བརྩེ་བ་ཆེན་པོས་ཀུན་གཟིགས་པཎ་ཆེན་རིན་པོ་ཆེའི་ཡང་སྲིད་འཁྲུལ་བྲལ་ངོས་འཛིན་མཛད་གནང་བའི་བཀའ་དྲིན་ཡིད་ལ་དྲན་བཞིན་དུ། ཡང་སྲིད་རིན་པོ་ཆེ་མཆོག་གི་གནས་སྟངས་གསལ་རྟོགས་ཐུབ་སླད་འབྲེལ་ཡོད་ཚང་མས་སྔར་ལྷག་སེམས་ཤུགས་ཆེ་བསྐྱེད་ཀྱིས་འབད་འབུངས་ཡོང་བའི་སྐུལ་མ་ཞུ་རྒྱུ་དང་། རྒྱ་ནག་དམར་གཞུང་ནས་ཀྱང་ཀུན་གཟིགས་པཎ་ཆེན་རིན་པོ་ཆེ་མཆོག་དང་སྐུ་འཁོར་བཅས་པའི་གནས་བབ་ངེས་པར་དུ་ཕྱི་གསལ་ནང་གསལ་བཟོ་དགོས་པ་ནན་སྐུལ་བྱ་རྒྱུ་ཡིན།

༸ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་རྗེ་བརྩུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་མཆོག་སྐུ་ཁམས་གསལ་བཞུགས་ཐོག་རྒྱ་ནག་དམར་གཞུང་གི་བཙན་གནོན་འོག་ནས་མགྱོགས་ནས་མྱུར་དུ་གློད་བཀྲོལ་ཡོང་བ་དང་། བོད་མི་དང་ནང་པ་ཡོངས་ནས་རིན་པོ་ཆེ་མཆོག་གི་གསེར་ཞལ་མྱུར་དུ་མཇལ་ཞིང་༸སྐུ་གོང་མའི་མཛད་པ་བདག་གིར་སྐྱོང་བཞེས་ཡོང་བའི་སྨོན་ལམ་གསོལ་འདེབས་ཤུགས་དྲག་ཞུ་བཞིན་ཡོད། ཅེས་གསུངས་སོང་།

དེའི་རྗེས། སྐུ་མགྲོན་གཙོ་བོ་དང་དམིགས་བསལ་སྐུ་མགྲོན། སྲིད་སྐྱོང་མཆོག་དང་ཚོགས་གཙོ་རྣམས་ཀྱིས་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ནས་༸པཎ་ཆེན་སྐུ་ཕྲེང་བཅུ་གཅིག་པ་མཆོག་གི་སྐུའི་འཁྲུངས་སྐར་ཉིན་མོའི་ཐོག་ཆེད་དུ་འདོན་སྤེལ་ཞུས་པའི་ཀུན་གཟིགས་པཎ་ཆེན་རིན་པོ་ཆེ་མཆོག་དང་འབྲེལ་བའི་རིས་བསྒྲིགས་རྩེད་ཆས་ (jigsaw puzzle) དབུ་འབྱེད་གནང་རྗེས་༸སྐུའི་འཁྲུངས་སྐར་གྱི་རྟེན་འབྲེལ་མཚོན་ཆེད་སྤྲི་གོར་བཏབས་གནང་སོང་།

དེ་ནས་དམིགས་བསལ་སྐུ་མགྲོན་བྱེས་ཀྱི་གདན་ས་ཆེན་པོ་བཀྲ་ཤིས་ལྷུན་པོའི་སྐྱབས་རྗེ་མཁན་རིན་པོ་ཆེ་གཟིག་རྒྱབ་སྐུ་ཕྲེང་ལྔ་པ་༸རྗེ་བཙུན་བསྟན་འཛིན་ཐུབ་བསྟན་རབ་རྒྱས་མཆོག་གིས་གསུང་བཤད་གནང་དོན། སྤྱི་ནོར་༸གོང་ས་ྋསྐྱབས་མགོན་ཆེན་པོ་མཆོག་གིས་ཀུན་གཟིགས་༧པཎ་ཆེན་སྐུ་ཕྲེང་བཅུ་པའི་ཡང་སྲིད་འཁྲུལ་མེད་ངོས་འཛིན་གནང་བ་ནི། ལོ་རྒྱུས་ཀྱིས་ང་ཚོར་སྤྲད་པའི་འགན་དབང་ཆེན་པོ་ཞིག་ཡིན། འོན་ཀྱང་། ད་ལྟ་ཆུང་སྲིད་རིན་པོ་ཆེའི་གནས་སྟངས་ཧ་ཅང་ཡིད་སྐྱོ་བའི་གནས་སུ་ལྷུང་ཡོད། ང་ཚོ་གཞུང་སྒེར་ཚང་མས་ྋརྒྱལ་མཆོག་ཡབ་སྲས་ཟུང་གི་མཛད་འཕྲིན་ལ་དུས་གཅིག་ཏུ་དབུ་འོག་དཔུང་འདེགས་ཞུ་མ་ཐུབ་པ་ནི་ཤིན་ཏུ་བློ་ཕམ་གྱི་གནས་སུ་གྱུར་ཡོད། ་ཀུན་གཟིགས་༸པཎ་ཆེན་སྐུ་ཕྲེང་བཅུ་གཅིག་པ་མཆོག་དང་ཁོང་གི་དགེ་རྒན་བྱ་བྲལ་རིན་པོ་ཆེ་བཅས་གར་ཡོད་ཤེས་རྟོགས་དང་མྱུར་དུ་གློད་བཀྲོལ་ཡོང་ཐབས་སུ་གཞིས་བྱེས་གདན་ས་བཀྲ་ཤིས་ལྷུན་པོའི་ངོས་ནས་ད་བར་འཛམ་གླིང་ནང་ཐབས་ཤེས་གང་ཡོད་ཞུས་ཤིང་། ལྷག་པར་ང་ཚོ་བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་བླ་འདུས་མང་ཡོངས་ནས་མཉམ་འབྲེལ་རྒྱལ་ཚོགས་ཀྱི་གཙོས། འཛམ་གླིང་ཤར་ནུབ་རྒྱལ་ཁབ་མང་པོའི་གནད་ཡོད་གཞུང་འབྲེལ་མི་སྣ་དང་། གྲོས་ཚོགས་ཁག་གི་འཐུས་མི། དེ་བཞིན་གཟུར་གནས་མི་མང་ཁྲི་སྟོང་མང་པོར་གནད་དོན་འགྲེལ་བརྗོད་དང་འབྲེལ་རྒྱབ་སྐྱོར་ཡོང་བའི་རེ་འབོད་ཞུས་དང་ཞུ་བཞིན་ཡོད་ཀྱང༌། ད་བར་རྒྱ་ནག་གཞུང་གིས་ཀུན་གཟིགས་༸པཎ་ཆེན་རིན་པོ་ཆེ་མཆོག་དང༌། བྱ་བྲལ་རིན་པོ་ཆེའི་སྐུ་ཕྱྭའི་གནས་སྟངས་དང་གར་ཡོད་སོགས་ཀྱི་གནས་ཚུལ་ཁ་གསལ་ཞིག་རྩ་བ་ནས་བརྗོད་མྱོང་མེད་པ་རེད། ཅེས་སོགས་གསུངས་སོང་།

དེ་ནས་སྐུ་མགྲོན་གཙོ་བོ་དང་དམིགས་བསལ་སྐུ་མགྲོན་རྣམས་ཀྱིས་གསུང་བཤད་རིམ་པ་བྱས་ནས་གནང་སོང་། ཁོང་རྣམས་ཀྱིས་བོད་དོན་ལ་རྒྱབ་སྐྱོར་དང་ཀུན་གཟིགས་༸པཎ་ཆེན་རིན་པོ་ཆེ་མཆོག་མགྱོགས་མྱུར་དུ་གློད་གྲོལ་ཡོང་ཐབས་སུ་འབད་བརྩོན་གནང་རྒྱུ་ཡིན་སྐོར་བརྗོད་སོང་།

སྲིད་སྐྱོང་མཆོག་གིས་གཙུག་ལག་རབ་འབྱམས་པ་དང་གཞུང་ཆེན་ཉམས་ཞིབ་པ་འཕྲིན་ལས་དབང་ཕྱུག་ལགས་ཀྱིས་རྩོམ་བྲིས་གནང་བའི་ཕྱག་དེབ་གདན་ས་བཀྲ་ཤིས་ལྷུན་པོའི་མཁས་པའི་སྒྱུ་རྩོམ་ཞིབ་འཇུག་དང་། གདན་ས་བཀྲ་ཤིས་ལྷུན་པོའི་མཁས་པའི་གསུང་འབུམ་དཀར་ཆག རིག་གཞུང་དཔྱད་རྩོམ་འབྲི་ཐབས་དང། དཔྱད་རྩོམ་ཕྱོགས་སྒྲིག་སུམ་རྟགས་ཀྱི་དྲིས་ལན། དེ་བཞིན་གདན་ས་བཀྲ་ཤིས་ལྷུན་པོའི་སློབ་གཉེར་བ་རྣམ་པས་རྩོམ་སྒྲིག་བྱས་པའི་སོ་ལྔའི་བསྟོད་ཚིག་དྲི་ཟའི་དབྱངས་སྙན་དང་། གདན་ས་བཀྲ་ཤིས་ལྷུན་པོའི་སློབ་གྲའི་དུས་དེབ་ལྷུན་པོའི་མཛད་འགན་བཅས་ཕྱག་དེབ་ཁག་ལྔ་དབུ་འབྱེད་གནང་སོང་།

དེའི་རྗེས། བོད་ཀྱི་གཞས་པ་ཚེ་རིང་འགྱུར་མེད་ལགས་ཀྱིས་ཆེད་མངགས་རྩོམ་སྒྲིག་ཞུས་པའི་༧ཀུན་གཟིགས་པཎ་ཆེན་རིན་པོ་ཆེའི་སྟོད་གླུ་ཞིག་གཟིགས་འབུལ་ཞུས། མཐར་ཕྱི་དྲིལ་དྲུང་ཆེ་ཀརྨ་ཆོས་དབྱིངས་ལགས་ནས་ཐུགས་རྗེ་ཆེ་ཞུའི་གསུང་བཤད་གནང་གྲུབ་བསྟུན་ཚང་མ་སྐུ་བཞེངས་ཐོག་བོད་ཀྱི་ཟློས་གར་ཚོགས་པ་ནས་བདེན་ཚིག་སྨོན་ལམ་གསུང་འདོན་དང་སྦྲགས་གཞུང་འབྲེལ་མཛད་སྒོ་གྲོལ་སོང་།

བོད་ཀྱི་ལོ་རྒྱུས་ཡིག་ཆ།