05
Sun, Feb

་ལོ་༢༠༢༣ ཟླ་༡ ཚེས་༡༨ ཉིན། གནས་མཆོག་རྡོ་རྗེ་གདན་དུ། ༸གོང་ས་མཆོག་ལ་སྔ་འགྱུར་རྙིང་མའི་ཆོས་བརྒྱུད་ནས་བརྟན་བཞུགས་བསྟར་འབུལ་ཞུས་འདུག པར། ༧རྒྱལ་བ་རིན་པོ་ཆེ།

བཙན་བྱོལ་གྱི་གསར་འགྱུར།
ཡིག་གཟུགས་སྒྲིག་ཆས།

ཕྱི་ལོ་༢༠༢༣ ཟླ་༡ ཚེས་༡༨ ཉིན། གནས་མཆོག་རྡོ་རྗེ་གདན་དུ། ༸གོང་ས་མཆོག་ལ་སྔ་འགྱུར་རྙིང་མའི་ཆོས་བརྒྱུད་ནས་བརྟན་བཞུགས་བསྟར་འབུལ་ཞུས་འདུག སྐབས་དེར་ཁོང་གིས་བོད་ཀྱི་བདེན་མཐའ་གསལ་ཡོང་བ་ཞིག་ཆགས་ཡོང་གི་འདུག བོད་ཀྱི་བདེན་མཐའ་གསལ་ཞེས་པ་ངོས་ཀྱིས་རང་བཙན་གྱི་སྐད་ཆ་བཤད་ཀྱི་ཡོད་པ་མ་རེད། གང་ལྟར་བོད་ཀྱི་ཆོས་དང་རིག་གཞུང་བོད་རང་གིས་བདག་པོ་གཙང་མ་རྒྱག་ཐུབ་པའི་རང་སྐྱོང་མིང་དོན་མཚུངས་པ་ཞིག་གི་ཐོག་ནས་རྒྱ་ཧོར་བོད་གསུམ་ཚང་མར་བསྟན་པའི་ཞབས་འདེགས་སྒྲུབ་བསམ་པའི་སེམས་ཤུགས་བསྐྱེད་བཞིན་ཡོད། ཅེས་གསུངས་འདུག

དེ་ཡང་། གོང་ཚེས་ཉིན། གནས་མཆོག་རྡོ་རྗེ་གདན་གྱི་དཔལ་ཡུལ་རྣམ་གྲོལ་གླིང་དགོན་པའི་ཚོམས་ཆེན་ནང་དུ། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ལ་སྔ་འགྱུར་རྙིང་མའི་ཆོས་བརྒྱུད་ནས་བརྟན་བཞུགས་བསྟར་འབུལ་ཞུས་འདུག

བརྟན་བཞུགས་བསྟར་འབུལ་སྐབས་སྔ་འགྱུར་རྙིང་མའི་བླ་ཆེན་༸སྐྱབས་རྗེ་ཞེ་ཆེན་རབ་འབྱམས་རིན་པོ་ཆེ་མཆོག་དང་༸སྐྱབས་རྗེ་བདུད་འཇོམས་རིན་པོ་ཆེའི་ཡང་སྲིད། ༸སྐྱབས་རྗེ་འཁྲུལ་ཞིག་རིན་པོ་ཆེའི་ཡང་སྲིད་རྣམ་གཉིས། ༸སྐྱབས་རྗེ་གྱང་ཁང་མཁན་སྤྲུལ་རིན་པོ་ཆེ། སྐྱབས་རྗེ་མཁོ་ཁྱིམ་རིན་པོ་ཆེ། སྐྱབས་རྗེ་རི་མགོ་སྤྲུལ་སྐུ་རིན་པོ་ཆེ། མཁན་ཆེན་རྣམ་གྲོལ་རིན་པོ་ཆེ། གཞན་ཡང་མཁན་སྤྲུལ་ཆེ་ཁག་མང་པོས་གཙོས་རྒྱ་བལ་འབྲུག་གསུམ་ནང་ཡོད་པའི་སྔ་འགྱུར་རྙིང་མའི་དགོན་ཁག་ ༣༠༠ ལྷག་ནས་ཁྱོན་དགེ་འདུན་པ་གཉིས་སྟོང་ལྷག་དང་། གཞན་བོད་རིགས་དང་ཧི་མ་ལ་ཡའི་ཁུལ་གྱི་ནང་པའི་དད་ལྡན་མི་མང་དང་། ཕྱི་རྒྱལ་ཡུལ་གྲུ་ཁག་ནས་ཕེབས་པ་བཅས་ཁྱོན་དད་ལྡན་པ་ ༦༠༠༠ བརྒལ་བ་ཆེད་ཕེབས་གནང་འདུག

༸གོང་ས་མཆོག་ལ་གཏེར་ཆེན་རཏྣ་གླིང་པའི་ཚེ་སྒྲུབ་ཀྱི་སྒོ་ནས་བརྟན་བཞུགས་བསྟར་འབུལ་སྐབས་མགོན་པོ་གང་ཉིད་མཆོག་གིས་བཀའ་སློབ་སྩལ་དོན། དེ་རིང་ས་ཆ་འདིར་དད་པ་དང་དམ་ཚིག་གཡོ་བ་མེད་པའི་བོད་གངས་ཅན་ལྗོངས་ཀྱི་ས་དགེ་བཀའ་རྙིང་རིས་སུ་མ་ཆད་པའི་ཆོས་སྤྱི་དང་། དད་པ་དང་འདུན་པ་གཅིག་སྒྲིལ་གྱི་ཐོག་ནས་བརྟན་བཞུགས་གནང་བ་རེད། རྟེན་འབྱུང་ཡིན་པས་ངོས་ནས་ད་ལྟའི་དུས་ཚོད་གཉན་འཕྲང་ཅན་འདི་འདྲ་ཞིག་ལ། བོད་ཀྱི་བསྟན་པ་དང་འགྲོ་བའི་དོན་དུ་ཁ་ཡོད་ལག་ཡོད་ཀྱི་ཕན་ཐོགས་ཕལ་ཆེར་བྱེད་ཐུབ་ཀྱི་འདུག

དེ་སྔ་སངས་རྒྱས་ཀྱི་བསྟན་པ་གོ་ཐོས་མེད་སའི་ལུང་པ་ཚོ་ལའང་སངས་རྒྱས་ཆོས་ལ་དོ་སྣང་གསར་པ་སླེབས་པ་ཞིག་དང་། མདོར་ན། ཡེ་ཤི་ཆོས་པའི་ནང་དུའང་སོ་སོའི་ལྟ་གྲུབ་མི་འདྲ་བ་ཡིན་ཡང་། བྱམས་པ་དང་བརྩེ་བ། བཟོད་པ་བཅས་ཀྱི་ཐོག་ལ་མང་པོ་ཞིག་གིས་ཧ་ཅང་དགའ་མོས་བྱེད་ཀྱི་འདུག དེར་བརྟེན། ངོས་ཀྱིས་བོད་གངས་ཅན་གྱི་བསྟན་པ་དང་འགྲོ་བའི་དོན་ཙམ་མ་ཡིན་པར། འཛམ་གླིང་འདིའི་སྟེང་གི་གཉུག་མར་གནས་ཤིང་བློ་གཟུར་བོར་གནས་པའི་ཁྲོད་ཀྱི་ཆོས་དད་མེད་མཁན་ཚོ་ཡིན་ནའང་ངོས་ལ་དགའ་བོ་བྱེད་བཞིན་ཡོད། ངོས་རང་ལ་མཚོན་ནའང་འཛམ་གླིང་འདིར་མི་མང་པོའི་སེམས་དགའ་པོ་བཟོ་བ་དང་། བསླབ་བྱ་གཙོ་བོ་སེམས་བཟང་པོ་བྱེད་དགོས་པ་བཤད་པས། མི་མང་པོར་ཕན་ཐོགས་ཡོང་གི་འདུག ཡེ་ཤི་ཆོས་པའི་ནང་ངོས་ལ་ངོ་ཤེས་པ་ཧ་ཅང་མང་པོ་ཡོད། སོ་སོའི་ཆོས་ཀྱི་ལྟ་གྲུབ་ཀྱི་གནས་ཚུལ་ཁ་ཁ་རེད། དེ་ལ་ངོས་ཀྱིས་རྩོད་པ་རྒྱག་གི་མ་རེད་ལ། རྩོད་པ་རྒྱག་དགོས་དོན་ཡོད་པ་མ་རེད། གང་ལྟར་སེམས་པ་བཟང་པོ་བྱེད་པ་དང་། ཉམ་ཐག་གི་མི་ལ་ཞབས་འདེགས་སྒྲུབ་པ་ལ་ཡེ་ཤི་ཆོས་པ་ཚོ་ཧ་ཅང་ཡག་པོ་རེད། དེ་བཞིན་ངོས་ཀྱིས་ངོ་ཤེས་པ་ཁ་ཆེ་དང་། དེ་སྔ་ལྷ་ས་ནས་དགའ་ལྡན་ཕོ་བྲང་གི་གཞུང་གི་མཛད་སྒོ་ཚང་མར་ལྷ་སར་ཡོད་པའི་ཁ་ཆེའི་སྐྱིད་སྡུག་ཚོ་འཆར་ཅན་ཡོང་གི་ཡོད་པས་ངོས་རང་ཆུང་ཆུང་སྐབས་ནས་གོམས་བསྡད་ཡོད།

ངོས་ཀྱི་མི་ཚེ་འདིར་ཆོས་པ་འདྲ་མིན་མང་པོ་ཞིག་གིས་དགའ་བོ་བྱེད་ཀྱི་ཡོད། ཆོས་དད་མེད་མཁན་ཚོ་ལ་ཡིན་ནའང་། སེམས་པ་བཟང་པོ་བྱེད་དགོས་པ་དང་། འཛམ་གླིང་འདིའི་མི་ཚང་མ་བདེ་བ་འདོད་པ་དང་སྡུག་བསྔལ་མི་འདོད་པ་གཅིག་གྱུར་ཡིན་པས་འཛམ་གླིང་ཞི་བདེ་ནི་ཆོས་དད་ཡོད་མེད་ལ་མ་བལྟོས་པར་མི་གྲངས་ཐེར་འབུམ་བརྒྱད་མ་ཟིན་ཙམ་ཡོད་པ་ཚང་མར་བྱམས་བརྩེ་དགོས་ཀྱི་ཡོད་པའི་བསམ་ཚུལ་ཚང་མར་ཡོད་པ་རེད། ངོས་ཀྱིས་དེའི་ཐོག་ལ་ཕན་ཐོགས་ཞབས་འདེགས་གང་འཚམ་སྒྲུབ་ཀྱི་ཡོད། མདོར་ན། ཚན་རིག་པའི་ནང་དུ་ཆོས་ལ་དོ་སྣང་མེད་པའམ་ཆོས་ལ་སྐྱོན་བརྗོད་བྱེད་མཁན་དེ་ལྟ་བུས་ཀྱང་ངོས་ལ་ཧ་ཅང་དགའ་བོ་བྱེད་ཀྱི་ཡོད། གང་ལྟར་ཆོས་དད་ཡོད་མེད་ལ་མ་ལྟོས་པར་མི་མང་པོ་ཞིག་གིས་ངོས་ལ་དགའ་མོས་བྱེད་ཀྱི་ཡོད་པས་ངོས་ཀྱིས་ཕན་ཐོགས་གང་འཚམ་བྱེད་ཐུབ་ཀྱི་འདུག

སྐབས་སུ་བབ་པ་བོད་གངས་ཅན་ལྗོངས་རེད། བོད་གངས་ཅན་ལྗོངས་ལ་སོ་སོའི་ལས་དང་སྨོན་ལམ་གྱིས་ཐུན་མོང་མ་ཡིན་པའི་འབྲེལ་བ་ཡོད་པ་ཞིག་གིས། བོད་གངས་ཅན་ལྗོངས་ཀྱི་བསྟན་པ་དང་འགྲོ་བའི་དོན་དུ་ངོས་ཀྱིས་དངོས་དང་བརྒྱུད་པའི་ཐོག་ནས་ཕན་ཐོགས། ཞབས་འདེགས་ངེས་ཅན་ཞིག་སྒྲུབ་ཐུབ་ཀྱི་ཡོད་པ་རེད། ད་ལྟ་ཕན་ཆད་དུ་ཡིན་ནའང་། གངས་རི་ར་བའི་བསྐོར་བའི་ཞིང་ཁམས་སུ།། ཕན་དང་བདེ་བ་མ་ལུས་འབྱུང་བའི་གནས།། ཞེས་ནམ་རྒྱུན་ཚིགས་བཅད་ཅིག་འདོན་བཞིན་པ་ལྟར། ཕལ་ཆེར་དངོས་ཡོད་གནས་ཚུལ་ལྟ་བུ་ཞིག་འདུག བོད་གངས་ཅན་པ་ཚོས་དད་པ་དང་ཞེན་ཁོག་གི་ཐོག་ནས་ངོས་ལ་ཧ་ཅང་དགའ་མོས་བྱེད་ཀྱི་ཡོད།

བོད་ཆོལ་ཁ་གསུམ་གྱི་བོད་རིགས་གཙོ་བོར་གྱུར་པའི་ཧི་མ་ལ་ཡའི་རི་རྒྱུད་ཀྱི་བོད་རིགས་བཅས་ཚང་མས་ངོས་ལ་གུས་པ་དང་བརྩེ་བ་ཤུགས་ཆེན་པོ་ཡོད་པ་ཞིག་རེད། ངོས་ཀྱིས་དེ་དག་མཐོང་སྐབས། རྨི་ལམ་དུ་ལོ་བརྒྱ་ཕྲག་ལྷག་སྡོད་པའི་མཚན་མ་ཞིག་ཡོང་གི་འདུག་ལ་ཡུན་རིང་པོར་འཚོ་བསམ་པའི་སེམས་ཤུགས་བསྐྱེད་བཞིན་ཡོད། ད་ལྟའི་དུས་སུ་གཟུགས་པོ་ཧ་ཅང་ཡག་པོ་ཡོད། ཨེམ་ཆི་ཚོས་ཀྱང་གཟུགས་པོ་ཧ་ཅང་ཡག་པོ་འདུག་ཟེར་གྱི་འདུག གོམ་པ་སྤོས་ནས་ཕར་ཚུར་འགྲོ་བའི་སྐབས་སུ་པུས་མོར་ཏོག་ཙམ་དཀའ་ངལ་འདུག་མ་གཏོགས་གཞན་གང་ཡང་མེད། ད་ལྟའི་བར་དུ་ངོས་ཀྱིས་བོད་ཀྱི་བསྟན་སྲིད་དོན་དུ་ཞབས་འདེགས་གང་འཚམ་སྒྲུབ་པ་རེད་ལ། ད་དུང་ཡིན་ནའང་ལོ་བཅུ་ཕྲག་གཅིག་གཉིས་ལ་ཏན་ཏན་ཞབས་འདེགས་སྒྲུབ་ཐུབ་ཀྱི་རེད། དེར་བརྟེན། ཁྱོད་ཚོ་ཚང་མ་ཐུགས་བློ་བདེ་བར་བཞུགས་རོགས་གནང་།

དེ་རིང་ས་ཆ་འདིར་དངོས་སུ་ས་དགེ་བཀའ་རྙིང་རིས་སུ་མ་ཆད་པ་མང་པོ་ཞིག་གིས་བརྟན་བཞུགས་གནང་བ་རེད། མིས་འདི་ཙམ་ཚུར་རེ་བ་བརྒྱབ་པའི་སྐབས་སུ་ངོས་རང་གི་ངོས་ནས་ཀྱང་། ཇི་སྲིད་ནམ་མཁའ་གནས་པ་དང་།། འགྲོ་བ་ཇི་སྲིད་གནས་གྱུར་པ།། དེ་སྲིད་བདག་ནི་གནས་གྱུར་ནས།། འགྲོ་བའི་སྡུག་བསྔལ་སེལ་བར་ཤོག། ཅེས་རྒྱུན་དུ་སྨོན་ལམ་འདི་རྒྱག་གིན་ཡོད། ཚིག་ཙམ་མ་ཡིན་པར་ཁ་ཡོད་ལག་ཡོད་ཀྱིས་ནམ་མཁའ་ཇི་སྲིད་ཀྱི་བར་དུ་འམ། གང་ལྟར་ལོ་བརྒྱ་ཕྲག་ཁ་ཤས་ཀྱི་རིང་དུ་ངོས་ཀྱིས་འཛམ་གླིང་གི་རིས་སུ་མ་ཆད་པའི་བསྟན་པ་སྤྱི་དང་། ལྷག་པར་དུ་བོད་གངས་ཅན་ལྗོངས་ཀྱི་ས་དགེ་བཀའ་རྙིང་རིས་སུ་མ་ཆད་པའི་ཆོས་བརྒྱུད་རྣམས་ཉམས་པ་སོར་ཆུད་དང་། མི་ཉམས་གོང་འཕེལ་ཡག་པོ་ཞིག་ཡོང་ཐུབ་པ་ཞིག་དང་། དེང་སང་འཛམ་གླིང་འགྱུར་བ་ཆེན་པོ་འགྲོ་བཞིན་པར་བརྟེན། ངོས་ཀྱི་མི་ཚེ་འདིའི་ནང་དུ་དཀའ་ངལ་ཆེན་པོ་མྱོང་བའི་ལེའུ་དེ་རྫོགས་ཟིན་པ་ལྟ་བུ་འདུག

རིམ་བཞིན་འཛམ་གླིང་མི་མང་གི་གོ་རྟོགས་དངོས་གནས་དྲང་གནས་ཆེ་རུ་ཕྱིན་ནས་དངོས་ཡོད་གནས་ཚུལ་ཇེ་གསལ་ཇེ་གསལ་དུ་ཕྱིན་པའི་སྐབས་སུ། བོད་ཀྱི་བདེན་མཐའ་གསལ་ཡོང་བ་ཞིག་ཆགས་ཡོང་གི་འདུག བོད་ཀྱི་བདེན་མཐའ་གསལ་ཞེས་པ་ངོས་ཀྱིས་རང་བཙན་གྱི་སྐད་ཆ་བཤད་ཀྱི་ཡོད་པ་མ་རེད། གང་ལྟར་བོད་ཀྱི་ཆོས་དང་རིག་གཞུང་བོད་རང་གིས་བདག་པོ་གཙང་མ་རྒྱག་ཐུབ་པའི་རང་སྐྱོང་མིང་དོན་མཚུངས་པ་ཞིག་གི་ཐོག་ནས་རྒྱ་ཧོར་བོད་གསུམ་ཚང་མར་བསྟན་པའི་ཞབས་འདེགས་སྒྲུབ་བསམ་པའི་སེམས་ཤུགས་བསྐྱེད་བཞིན་ཡོད། ཏན་ཏན་ངོས་ཀྱིས་སྦུག་སུབ་དོག་པོའི་བསམ་བློ་གཏོང་གི་ཡོད་པ་མ་རེད། རྒྱ་ཆེ་ས་ནས་བསམ་བློ་བཏང་ནས་འགྲོ་དུས་ཕལ་ཆེར་མི་ཚེ་རིང་པོར་བསྡད་ནས་བོད་གངས་ཅན་པ་གཙོ་བོར་གྱུར་པའི་ཧི་མ་ལ་ཡའི་རི་རྒྱུད་སྤྱི་དང་། འཛམ་གླིང་གི་མི་ཚང་མའམ་སྤྱི་བོ་གནམ་བསྟན་ཡོངས་ཀྱིས་དགའ་བོ་བྱེད་སའི་མི་ཞིག་ཆགས་ཡོད། དེའི་ཐོག་ནས་ང་ཚོར་སེམས་ཀྱི་ཞི་བདེ་ཡོང་བ་ཞིག་ལ་ངོས་ཀྱིས་འབད་བརྩོན་བྱེད་བཞིན་ཡོད།

འཛམ་གླིང་ལ་མིང་དོན་མཚུངས་པའི་ཞི་བདེ་དང་། གོ་མཚོན་མེད་པའི་འཛམ་གླིང་། མཐའ་གཅིག་ཏུ་སེམས་རྒྱུད་བྱམས་བརྩེའི་ཐོག་ནས་ཞི་བདེ་ཡོད་པ་ཞིག་དང་། ལག་ལེན་གྱི་ཐོག་ནས་གོ་མཚོན་དང་དམག་སོགས་གང་ཡང་མེད་པར་འཛམ་བུ་གླིང་ཞི་བདེ་ཅན་ཞིག་ཡོང་བར་ངོས་ཀྱིས་སྨོན་ལམ་རྒྱག་གི་ཡོད་ལ་ཕལ་ཆེར་འགྲུབ་པའི་བཟོ་འདུག དེར་བརྟེན། ངོས་རང་ལ་མི་ལུས་ཤིག་ཐོབ་ནས་འཚོ་བ་ནི་འཚོ་གོ་ཆོད་པའི་སྤོབས་པ་རྙེད་ཀྱི་འདུག ཁྱོད་ཚོ་ཚང་མས་དེ་རིང་འདིར་ཚེ་སྒྲུབ་དང་འབྲེལ་བའི་ཐོག་ནས་བརྟན་བཞུགས་གནང་བ་རེད། འདི་ཡིས་ཚེ་ཡི་བར་ཆད་ཞི་ནས་ཚེ་རིང་དུ་གནས་པ་ལ་ཏན་ཏན་ཕན་ཐོགས་ཡོད་པ་རེད། ཁྱོད་རང་ཚོ་ཚང་མ་གཙོ་བོ་དད་པ་དང་དམ་ཚིག་གཡོ་བ་མེད་པར་གནང་གི་ཡོད་པས་ཐུགས་རྗེ་ཆེ་ཞུ་རྒྱུ་ཡིན།

བོད་པ་གཙོ་བོར་གྱུར་པའི་ངོས་ལ་དགའ་མོས་བྱེད་མཁན་ཚོས་དགའ་མོས་ཅི་ཙམ་ཡོད་པ་དེའི་ཚོད་ཀྱིས་སོ་སོའི་མི་ཚེ་འདི་བཟང་པོ་ཞིག་བསྐྱལ་བ་ལས་ཕྲག་དོག་དང་ང་རྒྱལ། འགྲན་སེམས་ཀྱི་ཐོག་ནས་བསྐྱལ་བ་ཡིན་ན། ངོས་ལ་དགའ་མོས་བྱས་པའི་དོན་དག་ཚང་གི་ཡོད་པ་མ་རེད། དངོས་གནས་བྱམས་པ་དང་བརྩེ་བའི་ཐོག་ནས་མི་ཚེ་བསྐྱལ་བ་ཡིན་ན། ངོས་ལ་དགའ་མོས་བྱས་པ་མིང་དོན་མཚུངས་པ་ཞིག་ཆགས་ཀྱི་ཡོད། ཚང་མས་ད་ལྟའི་བར་དུ་ཧུར་ཐག་བྱས་པ་རེད། ང་ཚོ་ཧ་ཅང་དུས་ཚོད་གཉན་འཕྲང་ཅན་ཞིག་ལ་ཕྱིན་པ་རེད་དེ། ངོས་ཀྱིས་དེ་ལ་གང་འཚམ་གྱིས་མི་གོ་ཆོད་ཡོད། སླད་ཀྱང་ལོ་ཉི་ཤུ་སུམ་ཅུའི་རིང་ལ་ངོས་ཀྱིས་སངས་རྒྱས་ཀྱི་བསྟན་པ་དང་། འཛམ་གླིང་ཞི་བདེ། བྱེ་བྲག་ཏུ་བོད་རང་གི་ཆོས་དང་རིག་གཞུང་། སྐད་ཡིག་དང་བཅས་པ་རྣམས་ཉམས་པ་སོར་ཆུད་དང་མི་ཉམས་གོང་འཕེལ་ཡག་པོ་ཡོང་ཐུབ་པ་ཞིག་དང་། དེ་རིང་འདིར་ང་ཚོ་རྒྱ་གར་གྱི་ས་ཁུག་ཅིག་ལ་འཚོགས་པ་ནང་བཞིན། རིམ་པས་བོད་གངས་ཅན་གྱི་ལྷ་ལྡན་གཙུག་ལག་ཁང་གི་ཉེ་འདབས་རྩེ་ཕོ་བྲང་གི་མདུན་གྱི་བཞུགས་ཁྲི་གླིང་ག་རྒྱ་ཆེན་པོར་ང་ཚོ་རུག་རུག་བྱེད་པ་དང་། ཁྱོད་རང་ཚོས་ཀྱང་བརྟན་བཞུགས་ཚེ་སྒྲུབ་དེ་འདྲ་གསུངས། ངོས་ཀྱིས་སྨོན་ལམ་ཡག་པོ་ཞིག་རྒྱག་རྒྱུ་དེ་ལྟར་ཕལ་ཆེར་ཡོང་བའི་རེ་བ་ཞིག་འདུག ངོས་རང་ལའང་སེམས་ཤུགས་སྐྱེ་བཞིན་ཡོད། ཁྱོད་ཚོ་ཚང་མས་སྙིང་སྟོབས་བསྐྱེད་དེ་ཧུར་ཐག་གནང་རོགས། བཀྲ་ཤིས་བདེ་ལེགས། ཐུགས་རྗེ་ཆེ། ཞེས་བཀའ་སློབ་སྩལ་ཡོད་འདུག

ཡོངས་ཁུངས། ༧རྒྱལ་བ་རིན་པོ་ཆེའི་དྲ་རྒྱ།

བོད་ཀྱི་ལོ་རྒྱུས་ཡིག་ཆ།