༢༠༡༨ལོའི་ཕྱི་ཟླ་ ༡༡ ཚེས་ ༦ ཉིན། མཉམ་སྦྲེལ་རྒྱལ་ཚོགས་སུ་རྒྱལ་ཚོགས་ཀྱི་དུས་བཀག་བསྐྱར་ཞིབ་ཐེངས་༣༡ པ་དེ་འཚོགས་ཀྱི་ཡོད་པའི་སྐབས་དང་བསྟུན། ཡུ་གུར་བ་སྟོང་ཚོ་བརྒལ་བ་ཞིག་གིས་མཉམ་སྦྲེལ་རྒྱལ་ཚོགས་ཀྱི་མདུན་དུ་རྒྱ་གཞུང་གིས་ཡུ་གུར་ནང་དུ་འགྲོ་བ་མིའི་ཐོབ་ཐང་ལ་རྡོལ་རོལ་གཏོང་གི་ཡོད་པའི་ཐད་ལ་གཞི་རྒྱ་ཆེ་བའི་ངོ་རྒོལ་བྱས་འདུག སྐབས་དེར། བོད་པ་དང་། ལྷོ་སོག་པོ། དེ་བཞིན་ཐེ་ཝན་དང་། ཝིཡེཏ་ནམ་མི་རིགས་བཅས་ཀྱང་འདུ་འཛོམས་ཀྱིས་རྒྱ་གཞུང་ལ་ངོ་རྒོལ་ལས་འགུལ་སྤེལ་འདུག

༢༠༡༨ལོའི་ཟླ་༡༡་ཚེས་༦ཉིན། རྒྱལ་སྤྱིའི་མཉམ་འབྲེལ་རྒྱལ་ཚོགས་ནང་རྒྱ་ནག་གི་འགྲོ་བ་མིའི་ཐོབ་ཐང་གནས་སྟངས་ཐོག་དུས་བཀག་བསྐྱར་ཞིབ་ཐེངས་གསུམ་པ་དེ་ཚོགས་ཡོད་པ་དང་། ཁྱོན་རྒྱལ་ཁབ་༡༢་ཀྱིས་རྒྱ་ནག་ནང་འགྲོ་བ་མིའི་ཐོབ་ཐང་ལ་བརྩི་མེད་རྡོག་རོལ་གཏོང་བཞིན་པ་དང་། ལྷག་པར་དུ་བོད་ནང་ཆོས་དད་རང་དབང་མེད་པ། སྨྲ་བརྗོད་རང་དབང་མེད་པ། འདུ་འཛོམས་རང་དབང་མེད་པ་དང་། སྐད་ཡིག་གི་ཐོབ་ཐང་རྩོད་མཁན་བཀྲ་ཤིས་དབང་ཕྱུག་ལགས་བཙོན་འཇུག་བྱས་པ། རྒྱལ་ཁབ་ཁག་གི་སྐུ་ཚབ་དང་རྒྱལ་ཚོགས་ཀྱི་སྐུ་ཚབ་བོད་ནང་ལྟ་སྐོར་གཏོང་གི་མེད་པ་སོགས་ལ་སྐྱོན་བརྗོད་བྱས་འདུག

ཡུ་རོབ་རྒྱལ་ཁབ་ཁག་གི་ནང་ནས་བོད་མི་གནས་སྡོད་བྱེད་མཁན་མང་ཤོས་སུད་སི་རྒྱལ་ཁབ་ཆགས་ཡོད་ཀྱང་། སུད་སི་གཞུང་གིས་འགྲོ་བ་མིའི་ཐོབ་ཐང་གི་སྐོར་ཚིག་གཅིག་ཀྱང་མ་བཤད་པར་རྒྱ་ནག་དང་ལྷན་དུ་ཚོང་འབྲེལ་ཆིངས་ཡིག་བཞག་པ་རེད། སུད་སི་གཞུང་གིས་ཕྱི་ལོ་ ༢༠༠༥ ལོ་ནས་བཟུང་། བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་སུད་སི་ལ་མགྲོན་འབོད་ཞུས་མེད་པར་མ་ཟད། ད་ལྟའི་ཆར་སུད་སི་གཞུང་གིས་རྒྱ་ནག་གཞུང་དང་ལྷན་འབྲེལ་ལམ་ཟབ་ཏུ་གཏོང་བཞིན་ཡོད། ང་ལ་མཚོན་ན་འདི་ནི་བློ་ཡུལ་དུ་ཤོང་དཀའ་བ་ཞིག་རེད། ཅེས་སུད་སི་གྲོས་ཚོགས་འཐུས་མི་ལྕམ་ལི་ས་མ་ཛོ་ནེ་(Lisa Mazzone)མཆོག་གིས་གསུང་འདུག

དེ་ཡང་༢༠༡༨ལོའི་ཟླ་༡༡་ཚེས་༥ཉིན། ཨ་ཧྥི་རི་ཁའི་རྒྱལ་ཁབ་ཁེམ་མེ་རོན་གྱི་ནུབ་ཕྱོགས་བྷ་མེན་གྷ་ལ་ཡོད་པའི་ཡེ་ཤུའི་གཏན་སྡོད་སློབ་གྲྭ་ཞིག་གི་ནང་དུ་གོ་མཚོན་ཐོགས་པའི་མི་ཁ་ཤས་འཛུལ་ནས། སྒོ་སྲུང་བར་བཙན་ཚུགས་དང་འཇིགས་སྣང་སྐུལ་ཏེ། ཕྲུག་གུ་ཕོ་མོ་༧༩་ཕྱིར་ཁྲིད་ཡོད་པ་དང་། དེ་ནས་སློབ་གྲྭའི་སྣུམ་འཁོར་ཆུང་ཆུང་ཞིག་གི་ནང་དུ་བཞག་སྟེ་འགྲོ་ཐབས་བྱས་ཀྱང་། ཁ་ལོ་བས་སྣུམ་འཁོར་སྐྱོན་ཤོར་ཡོད་མདོག་བྱས་པས། བཙན་ཁྲིད་པས་ཕྲུག་གུ་རྣམས་རྐང་ཐང་དུ་ཁྲིད་ཡོད་འདུག

༢༠༡༨ལོའི་ཟླ་༡༡་ཚེས་༣ཉིན། བཞུགས་སྒར་རྒྱལ་བའི་ཕོ་བྲང་དུ་ཉིན་གསུམ་རིང་༸གོང་ས་མཆོག་དང་རྒྱ་མི་ཚན་རིག་པ་ཁག་ཅིག་གི་བར་ཚད་རྡུལ་དངོས་ཁམས་དང་འབྲེལ་བའི་བགྲོ་གླེང་མཇུག་རྫོགས་པ་དང་། ཟླ་འདིའི་ཚེས་༡་ནས་ཚེས་༣་བར་ཉིན་གསུམ་རིང་གི་བགྲོ་གླེང་སྐབས་སུ། རྒྱ་རིགས་ཚན་རིག་པ་རྣམས་ཀྱིས་༸གོང་ས་མཆོག་དང་ལྷན་དུ་ཚད་རྡུལ་དངོས་ཁམས་དང་འབྲེལ་བའི་བརྗོད་གཞི་ཐོག་གྲོས་སྡུར་ལྷུག་པོར་གནང་འདུག

༢༠༡༨ལོའི་༡༠པའི་༢༦ཉིན། ཉི་ཧོང་གི་སྲིད་བློན་ཤིང་ཟོ་ཨ་བྷེ་རྒྱ་ནག་ཏུ་ཕེབས་ཡོད་པ་དང་། ཁོ་རང་རྒྱ་ནག་མི་དམངས་ཚོགས་ཁང་ཆེན་མོར་འབྱོར་སྐབས། རྒྱ་ནག་གི་དམག་མི་རོལ་དབྱངས་ཚོགས་པས་ཉི་ཧོང་གི་རྒྱལ་གླུ་དབྱངས་སུ་གྱེར་ཞིང་། རྒྱལ་ཁབ་གཉིས་ཀྱི་རྒྱལ་དར་མཁའ་དབྱིངས་སུ་བསྒྲེངས། ཚེས་༢༧ཉིན། ཉི་ཧོང་གི་ཞོགས་པའི་གསར་འགྱུར་གྱི་འགོ་བརྗོད་དུ། རྒྱ་ནག་དང་ཉི་ཧོང་གི་འབྲེལ་བ་ཡང་དག་པའི་ལམ་དུ་བསྐྱོད། ཅེས་བཀོད་འདུག