24
Tue, May

ཕྱི་ལོ་༢༠༢༢་ཟླ་༤ཚེས་༢༦ཉིན། ཕྱི་ལོ་༢༠༢༡ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་འཁོར་སྙན་ཐོ་འདོན་སྤེལ་བྱེད་སྐབས། པར། དབྱངས་ཅན་སྒྲོལ་མ།

བཙན་བྱོལ་གྱི་གསར་འགྱུར།
ཡིག་གཟུགས་སྒྲིག་ཆས།

ཕྱི་ལོ་༢༠༢༢་ཟླ་༤ཚེས་༢༦ཉིན། བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་འཁོར་སྙན་ཐོ་ནང་དུ། བོད་ནང་གི་སྐད་ཡིག་དང་སློབ་གསོའི་ཁ་ཕྱོགས་རྒྱ་ནག་ཅན་དུ་བསྒྱུར་བཞིན་པ་དང་། <མི་རིགས་མཐུན་སྒྲིལ་>དང་<སྤྱི་ཚོགས་རིང་ལུགས་འཛུགས་བསྐྲུན>་གྱི་མིང་ཐོག་ནས་མི་རིགས་དང་རིག་གཞུང་རྒྱ་ནག་ཅན་དུ་བསྒྱུར་བཞིན་པ། བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བཞིན་འདུག ཅེས་འགྲེལ་བརྗོད་བྱས་འདུག

དེ་ཡང་། གོང་ཚེས་ཉིན་གྱི་ཕྱི་དྲོ་ཆུ་ཚོད་༣་པའི་ཐོག རྡ་ས་གངས་སྐྱིད་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་དུ། ཚོགས་པ་དེའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་ལོ་འཁོར་སྙན་ཐོ་བཏོན་གནང་སོང་། སྐབས་དེར། ཚོགས་པ་དེའི་འགན་འཛིན་ཚེ་རིང་མཚོ་མོ་ལགས་དང་། ཉམས་ཞིབ་པ་ཉི་མ་འོད་ཟེར་ལགས། དྲིལ་བསྒྲགས་དང་ཉམས་ཞིབ་ལས་བྱེད་བསྟན་འཛིན་བཟང་མོ་ལགས་བཅས་ཉམས་ཞུགས་བྱས་འདུག

རྒྱ་ནག་གཞུང་གིས་བོད་ནང་གི་བོད་མི་ཚོའི་འགྲོ་བ་མིའི་ཐོབ་ཐང་ཁག་ལ་མུ་མཐུད་རྡོག་རོལ་ཚད་མེད་གཏོང་བཞིན་པའི་བདེན་དཔང་སྙན་ཐོ། དགུང་ལོ་དྲུག་ནས་བཟུང་རྒྱ་ནག་གཞུང་གིས་འཇུ་བཟུང་བཙན་ཁྲིད་བྱས་ཏེ་ད་ཆ་བཙན་དབང་འོག་གར་སོང་ཆ་མེད་ཀྱི་གནས་བབ་འོག་བཞུགས་ པའི་༧པན་ཆེན་ཆུང་སྲིད་སྐུ་ཕྲེང་བཅུ་གཅིག་པ་དགེ་འདུན་ཆོས་ཀྱི་ཉི་མ་མཆོག་གི་སྐུའི་འཁྲུངས་སྐར་སྲུང་བརྩི་དང་སྟབས་བསྟུན་འདི་ག་བོད་ཀྱི་འགྲོ་ བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་རྒྱ་བོད་དབྱིན་གྱི་སྐད་ཡིག་ཏུ་བཏོན་པའི་ཕྱི་ལོ་ ༢༠༢༡ ལོའི་ལོ་འཁོར་སྙན་ཐོ་འདོན་སྤེལ་ཞུ་རྒྱུ་ཡིན། ཞེས་འགན་འཛིན་ཚེ་རིང་མཚོ་མོ་ལགས་ཀྱིས་བརྗོད་སོང་།

འདི་ལོའི་སྙན་ཐོ་འདིའི་ནང་དུ་བོད་ནང་གི་བོད་མི་ཚོའི་སྨྲ་བརྗོད་རང་དབང་དང་ཆོས་དད་རང་མོས་སོགས་གཞི་རྩའི་འགྲོ་བ་མིའི་ཐོབ་ཐང་ཁག་ལ་སྔར་ལས་ལྷག་པའི་དམ་དྲག་བྱུང་ཡོད་པའི་བདེན་དཔང་གནས་ཚུལ་འཁོད་ཡོད། བོད་ཀྱི་ས་ཁུལ་དུ་མར་རྒྱ་གཞུང་ཉེན་རྟོག་པས་བོད་མི་ཚོའི་ཁང་ཁྱིམ་དང་ཁ་པར་སོགས་སུ་བསྔོག་བཤེར་རྒྱ་ཆེར་བྱས་ཏེ་བོད་ཀྱི་བླ་ན་མེད་པའི་དབུ་ཁྲིད་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་སྒྲིག་གཤོམ་དང་ཉར་ཚགས་བྱས་པའམ་བོད་ནང་གི་དངོས་ཡོད་གནས་སྟངས་སྐོར་གྱི་པར་རིས་བརྒྱུད་སྐུར་དང་གནས་ཚུལ་གླེང་སློང་བྱས་པ་སོགས་རྒྱུ་མཚན་དུ་བྱས་ནས་བོད་མི་ཧ་ཅང་མང་པོ་འཇུ་བཟུང་བཙན་ཁྲིད་ཀྱིས་ཁྲིམས་ལུགས་ཀྱི་སྲུང་སྐྱོབ་ལས་བརྒལ་བའི་ས་ཚུགས་སོགས་སུ་བཀག་ཉར་བྱས་ཡོད་པའི་ཁུངས་ལྡན་གནས་ཚུལ་འཁོད་ཡོད། ཅེས་ཉམས་ཞིབ་པ་ཉི་མ་འོད་ཟེར་འགྲེལ་བརྗོད་བྱས་སོང་།

སྙན་ཐོའི་འདིའི་ནང་དུ་རྒྱ་ནག་གཞུང་གིས་བོད་ནང་དུ་<རིག་གཞུང་བཙན་བསྒྱུར>་དང༌<མི་རིགས་རྒྱ་བསྒྱུར>་གྱི་དམིགས་ཡུལ་བཟུང་ནས་རྒྱ་ནག་རང་གི་རྩ་ཁྲིམས་དང་མི་རིགས་རང་སྐྱོང་བཅའ་ཁྲིམས་སོགས་སུ་རྒྱ་འོག་གི་གྲངས་ཉུང་མི་རིགས་ཚོར་རང་གི་ཤེས་ཡོན་ལམ་ལུགས་གཏན་འབེབས་དང་སྐད་ཡིག་དང་ཡུལ་སྲོལ་གོམས་གཤིས་རྒྱུན་འཛིན་དར་སྤེལ་གཏོང་རྒྱུའི་ཐོབ་ཐང་ཡོད་ཅེས་འཁོད་པ་ལག་ལེན་བསྟར་རྒྱུ་ཕར་ཞོག་དེ་ལས་ལྡོག་སྟེ་བསྟན་དོན་དེ་དག་ལས་བརྒལ་བའི་སྒྲིག་ཁྲིམས་དང་སྲིད་ཇུས་གསར་པ་དུ་མ་ཞིག་གཏན་འབེབས་བྱས་ནས་བོད་ཀྱི་སྐད་ཡིག་སྦྱོང་སའི་སྒེར་བཙུགས་སློབ་གྲྭ་ཁག་རིམ་པས་སྒོ་བརྒྱག་བཞིན་པ་དང་སྔོན་འགྲོ་ནས་བཟུང་སློབ་གྲྭའི་སློབ་ཁྲིད་ཆ་ཚང་རྒྱ་ཡིག་གི་ལམ་ནས་སློབ་ཁྲིད་བྱེད་བཞིན་པ། སྒྲིག་ཁྲིམས་གསར་པ་ལག་བསྟར་གྱིས་དགོན་སྡེའི་སློབ་གཉེར་དང་བླ་སྤྲུལ་ཚོའི་མཛད་པར་འགོག་རྐྱེན་སྣ་མང་ཞིག་བཟོ་བཞིན་པ་སོགས་བོད་ནང་གི་སྐད་ཡིག་དང་སློབ་གསོའི་ཁ་ཕྱོགས་རྒྱ་ནག་ཅན་དུ་བསྒྱུར་བཞིན་པ་དང་། <མི་རིགས་མཐུན་སྒྲིལ་>དང་<སྤྱི་ཚོགས་རིང་ལུགས་འཛུགས་བསྐྲུན>་གྱི་མིང་ཐོག་ནས་མི་རིགས་དང་རིག་གཞུང་རྒྱ་ནག་ཅན་དུ་བསྒྱུར་བཞིན་པ། བོད་བརྒྱུད་ནང་བསྟན་རྒྱ་ནག་ཅན་དུ་བསྒྱུར་བཞིན་པ་སོགས་ཀྱི་ཕྱོགས་ལ་ད་ལོ་རྒྱ་ནག་གཞུང་གིས་སྔར་ལས་ལྷག་པའི་ཤུགས་སྣོན་བརྒྱབས་ཡོད་པ་ཁུངས་སྐྱེལ་ཞུས་ཡོད། ཅེས་ཚེ་རིང་མཚོ་མོ་ལགས་ཀྱིས་བརྗོད་སོང་།

རྒྱ་ནག་གཞུང་གིས་བོད་མིའི་སྤྱི་ཚོགས་དང་ན་གཞོན་ཚོའི་ཁྲོད་དུ་ཤུགས་རྐྱེན་ངེས་ཅན་ཡོད་པའི་བོད་ཀྱི་བསམ་བློ་བ་དང་རྩོམ་པ་པོ། སློབ་གསོ་བ་ཚོ་ནི་རིག་གཞུང་བཙན་བསྒྱུར་དང་མི་རིགས་རྒྱ་བསྒྱུར་གྱི་ལས་འགུལ་ལ་འགོག་རྐྱེན་ཆེ་ཤོས་སྤྲོད་མཁན་ཡིན་པར་ངོས་འཛིན་ཐོག་ཁོང་ཅག་འབུར་འཇོམས་གཏང་རྒྱུ་དམིགས་འབེན་དུ་བཟུང་ནས་འདས་པའི་ལོ་གཅིག་ཙམ་གྱི་རིང་བོད་ཀྱི་ཤེས་ལྡན་མི་སྣ་མང་པོ་འཇུ་བཟུང་བཀག་ཉར་དང་དྲང་བདེན་དང་འོས་འཚམ་གཏན་ནས་མིན་པའི་ཁྲིམས་ཆད་ལྕི་ལོ་གཅོད་བཞིན་པའི་དངོས་བདེན་གྱི་གནས་ཚུལ་འཁོད་ཡོད། ཅེས་ཉི་མ་འོད་ཟེར་ལགས་ཀྱིས་བརྗོད་སོང་།

སྙན་ཐོ་འདི་བརྒྱུད་ནས་ང་ཚོས་རྒྱ་ནག་གཞུང་ལ་འགྲོ་བ་མིའི་ཐོབ་ཐང་དང་རྡོག་རོལ་གཏོང་བྱེད་དང་ཆབ་སྲིད་གྱི་བཙན་གནོན་གཏོང་བྱེད་ཀྱི་སྒྲིག་ཁྲིམས་ཁག་ལ་ངེས་པར་དུ་བསྐྱར་བཅོས་དགོས་པ་མ་ཟད། རང་གི་རྩ་ཁྲིམས་དང་བཅའ་ཁྲིམས་སོགས་སུ་དབང་འོག་གི་གྲངས་ཉུང་མི་རིགས་ཁག་ལ་སྐད་ཡིག་དང་རིག་གཞུང་སྲུང་སྐྱོབ་ཀྱི་ཐོབ་ཐང་ཡོད་ཚུལ་འཁོད་པ་རྣམས་ངེས་པར་དུ་ལག་བསྟར་དོན་འཁྱོལ་དགོས་པ་མ་ཟད་རྒྱལ་སྤྱིའི་འགྲོ་བ་མིའི་ཐོབ་ཐང་སྐོར་གྱི་སྤྱི་ཆིངས་ཁག་ལག་ལེན་དོན་འཁྱོལ་དགོས་པའི་འབོད་སྐུལ་ནན་པོ་ཞུ་རྒྱུ་ཡིན། ཞེས་བརྗོད་སོང་།

བོད་ཀྱི་ལོ་རྒྱུས་ཡིག་ཆ།