སྐབས་དེར་བཀའ་བློན་མཆོག་གིས་འཕྲོད་བསྟེན་བཀའ་བློན་གསར་པ་མཆོག་གིས་བོད་ཕྲུག་ཚོའི་སློབ་ཡོན་གནང་རྒྱུའི་ཐད་བཟང་ཕྱོགས་ཀྱི་རྣམ་པ་བཏོན་གནང་བ་དེས་བོད་མིའི་སྤྱི་ཚོགས་སྤྱི་དང་། ལྷག་པར་སློབ་ཕྲུག་གཞོན་སྐྱེས་ཚོར་བློ་སྟོབས་སྐྱེ་གཞི་ཞིག་གྱུར་ཡོད་སྐོར་ཞུས་གནང་འདུག
དེ་ཡང་ཟླ་འདིའི་ཕྱི་ཚེས་༡༨ཧི་མཱ་ཅལ་མངའ་སྡེའི་གཞུང་ནས་ཕྱི་ལོ་༢༠༡༨་ལོའི་ཤེས་ཡོན་སློབ་དུས་སྐབས་བོད་ཕྲུག་ཆེད་མངའ་སྡེའི་མཐོ་སློབ་ནང་དུ་སྨན་པའི་ཟུར་བཅད་ས་མིག་གཅིག་(MBBS)་འཕར་མ་གནང་བར་བོད་མིའི་སྒྲིག་འཛུགས་ཤེས་རིག་ལས་ཁུངས་ནས་དགའ་བསུ་དང་སྦྲགས་གསལ་བསྒྲགས་སྤེལ་འདུག སྤྱིར་ཧི་མཱ་ཅལ་མངའ་སྡེའི་གཞུང་ནས་སྔ་ལོ་ནས་བཟུང་བོད་མི་བཙན་བྱོལ་བའི་སློབ་ཕྲུག་རྣམས་ཀྱི་ཤེས་ཡོན་མདུན་ལམ་ལ་དགོངས་བཞེས་ཀྱིས་སྨན་པའི་ཟུར་བཅད་ས་མིག་གྲངས་བཞི་གནང་ཟིན་ཡང་། འདི་ལོར་སླར་ཡང་ཞབས་སྟེགས་འཕར་མ་གཅིག་ཁ་སྣོན་བརྒྱབ་པར་བརྟེན་ད་ཆ་ཁྱོན་སྨན་པའི་ཞབས་སྟེགས་ལྔ་གནང་ཟིན་འདུག
དེ་བཞིན་སྨན་པའི་ཟུར་བཅད་ས་མིག་གནང་ཡུལ་མཐོ་སློབ་ཁག་ནི་། སིམ་ལར་རྟེན་གཞི་བྱས་པའི་ཨིན་དྷི་ར་གྷན་དྷི་སྨན་པའི་མཐོ་སློབ་(Indra Gandhi Medical College (IGMC) Shimla)དང་། དེ་བཞིན་ཏན་ཌར་(Tanda)རྟེན་གཞི་བྱས་པའི་ཌོག་ཌར་རཱཇེནྡྲ་པྲཱ་སཱད་གཞུང་གི་སྨན་པའི་མཐོ་སློབ། (Dr. Rajendra Prasad Govt. Medical College)ཕྱོགས་མཚུངས་ན་ཧན་(Nahan)དུ་རྟེན་གཞི་བྱས་པའི་ཡཤཝནྟ་སིངྒ་པར་མར་སྨན་གྱི་མཐོ་སློབ་(Dr. Yashwant Singh Parmar Govt Medical College་)དང་། དེ་བཞིན་ཅམ་བྷར་(Chamba)རྟེན་གཞི་བྱས་པའི་པཎྜི་ཏ་ནེ་རུ་སྨན་གྱི་མཐོ་སློབ་ (Pandit Jawaharlal Nehru Govt Medical College)གཞན་ཡང་ཧ་མིར་པུར་ Hamirpur དུ་རྟེན་གཞི་བྱས་པའི་རཱ་དཱ་ཀྲིཤཎ་སྨན་གྱི་མཐོ་སློབ་(Dr. Radha Krishna Govt Medical College)བཅས་ཡིན་འདུག
སྤྱིར་ཤེས་རིག་བཀའ་བློན་པདྨ་དབྱངས་ཅན་མཆོག་གིས་ཕྱི་ལོ་ ༢༠༡༨ ཟླ་ ༥ ཚེས་ ༡༩ ཉིན་ཧི་མཱ་ཅལ་མངའ་སྡེའི་གཞུང་གི་འཕྲོད་བསྟེན་དང་ཁྱིམ་ཚང་བདེ་དོན་བློན་ཆེན་སྐུ་ཞབས་ཝི་པིན་སིངྒ་པར་མཱར་(Shri Vipin Singh Parmar)མཆོག་དང་མཇལ་འཕྲད་གནང་སྐབས་མངའ་སྡེའི་གཞུང་གིས་བོད་ཕྲུག་རྣམས་ལ་དགོངས་པ་ཆེ་བཞེས་གནང་བར་ཐུགས་རྗེ་ཆེ་ཞུས་པ་མ་ཟད། བོད་ཕྲུག་སློབ་མ་རྣམས་མ་འོངས་པར་སྨན་གྱི་སློབ་སྦྱོར་མཐར་ཕྱིན་རྗེས་བོད་པའི་སྤྱི་ཚོགས་ནང་ཞབས་འདེགས་ཞུ་རྒྱུ་ཡིན་སྐོར་ཞུས། ཕྱོགས་མཚུངས་སྐབས་དེར་བཀའ་བློན་མཆོག་གིས་འཕྲོད་བསྟེན་བཀའ་བློན་གསར་པ་མཆོག་གིས་བོད་ཕྲུག་ཚོའི་སློབ་ཡོན་གནང་རྒྱུའི་ཐད་བཟང་ཕྱོགས་ཀྱི་རྣམ་པ་བཏོན་གནང་བ་དེས་བོད་མིའི་སྤྱི་ཚོགས་སྤྱི་དང་། ལྷག་པར་སློབ་ཕྲུག་གཞོན་སྐྱེས་ཚོར་བློ་སྟོབས་སྐྱེ་གཞི་ཞིག་གྱུར་ཡོད་སྐོར་ཞུས་འདུག དེ་བཞིན་ཐེངས་འདིར་སྨན་པའི་ཟུར་བཅད་ས་མིག་འཕར་མ་གནང་བ་ལ་བརྟེན་ནས་འབྱུང་འགྱུར་བཙན་བྱོལ་བོད་མིའི་སྤྱི་ཚོགས་ཁྲོད་སྨན་པ་མ་འདང་བའི་དཀའ་ངལ་སེལ་ཐུབ་རྒྱུའི་རེ་བ་གནང་བཞིན་ཡོད་འདུག
