བོད་རྒྱལ་ཁབ་དང་མི་རིགས་ཀྱི་དོན་དག་ལ་ཕན་ཐོགས་རྒྱུ་རེད།

དེ་ཡང་ཟླ་འདིའི་ཕྱི་ཚེས་༢༣ ནས་༢༥ བར་ཉིན་གསུམ་རིང་གི་རྒྱལ་སྤྱིའི་བོད་རང་བཙན་ཚོགས་ཆེན་ཐེངས་ལྔ་པ་དབུ་འཛུགས་ཀྱི་མཛད་སྒོ་འཚོག་སོང་ཞིང་། མཛད་སྒོའི་སྐུ་མགྲོན་གཙོ་བོར་ཧིན་བོད་མཛའ་འབྲེལ་ཚོགས་པའི་ཚོགས་གཙོ་སྐུ་ཞབས་ཨཱ་ཇེས་སིན་དང་། དམིགས་བསལ་སྐུ་མགྲོན་དུ་བོད་རང་བཙན་འཐབ་རྩོད་པ་ལྷ་བཟང་ཚེ་རིང་དང་། མཁས་དབང་འཇམ་དབྱངས་ནོར་བུ། གཞན་ཡང་བོད་མི་མང་སྤྱི་འཐུས་ཁག་ཅིག་ཕེབས་འདུག་པ་མ་ཟད། ཚོགས་ཆེན་ཐོག་ཚོགས་ཞུགས་པ་༡༦༠ ཡས་མས་འདུག

དེ་བཞིན་མཛད་སྒོའི་ཐོག་མར་༧གོང་ས་མཆོག་གི་སྐུ་པར་གྱི་མདུན་དུ་སྣང་གསལ་ཞལ་ཁ་ཕྱེས་རྗེས། རིམ་བཞིན་བོད་དང་རྒྱ་གར་གྱི་རྒྱལ་གླུ་དང་། བོད་རྒྱལ་ཁབ་དང་མི་རིགས་རིག་གནས་ཀྱི་ཆེད་གཅེས་པའི་ལུས་སྲོག་ལོངས་སྤྱོད་བློས་གཏོང་གནང་མཁན་རྒྱལ་གཅེས་དཔའ་བོ་དཔའ་བོ་རྣམས་ལ་གུས་འདུད་དང་མྱ་ངན་ངག་བཅད་སྐར་མ་གཅིག་རིང་གནང་སོང་ཞིང་། དེ་རྗེས་མཛད་སྒོའི་གཙོ་སྐྱོང་བ་བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ཀྱིས་རྒྱལ་སྤྱིའི་བོད་རང་བཙན་ཚོགས་ཆེན་གྱི་བྱུང་རིམ་སོགས་ངོ་སྤྲོད་གནང་སྐབས། ཕྱི་ཟླ་༥ པའི་ཕྱི་ཚེས་༢༣ ཉིན་རྒྱལ་སྤྱིའི་བོད་རང་བཙན་ཚོགས་ཆེན་འཚོག་དགོས་དོན་ནི། ཕྱི་ལོ་༡༩༥༡ ཟླ་བ་༥ ཚེས་༢༣ ཉིན་པེ་ཅིང་དུ་ཆིངས་ཡིག་དོན་ཚན་༡༧ ཟེར་བ་ཞིག་རྒྱ་དམར་གྱི་སྡིག་རའི་འོག་འཇོག་ནས་དེ་བོད་རྒྱ་ནག་གི་ཆ་ཤས་ཡིན་པའི་བདེན་དཔང་སྟོན་བཞིན་ཡོད་ཀྱང་། དེར་བོད་པས་རྩ་བ་ཉིད་ནས་ཁས་ལེན་མེད་ཅིང་། ངོ་རྒོལ་ཤུགས་དྲག་དང་བསྟུན་ནས་ཉིན་མོ་དེར་རང་བཙན་ཚོགས་ཆེན་འདི་འདྲ་ཞིག་འཚོགས་ནས་བསྐྱར་དུ་སེམས་ཤུགས་འཕར་མ་ཞིག་བསྐྱེད་པའི་ཐོག་རང་བཙན་གྱི་ཐོག་ལས་ཀ་བྱེད་རྒྱུར་ཉིན་མོ་འགོ་འཛུག་ཐུབ་པའི་ཕྱིར་དུ་ཕྱི་ཟླ་༥ པའི་ཚེས་༢༣ ཉི་འཚོགས་པ་ཡིན་སྐོར་དང་།

ད་ཐེངས་ཀྱི་ཚོགས་ཆེན་ཐོག་ཁྱོན་ཚོགས་བཅར་བ་༡༦༠ ཡས་མས་ཡོད་པའི་ཁྲོད་ནས་མང་ཆེ་བ་མཐོ་རིམ་སློབ་མ་དང་། གཞོན་སྐྱེས་ཡིན་ཁར་སློབ་མ་ཁག་ཅིག་ཕུད་པའི་གཞན་ཚོགས་ཞུགས་པ་ཚང་མས་ལམ་གྲོན་སོགས་རང་ཉིད་ཀྱི་ངོས་ནས་གཏོང་སྟེ་བཅར་བ་ཤ་སྟག་ཡིན་སྐོར། ཚོགས་ཆེན་གྱི་འགྲོ་གྲོན་ནི་གོ་སྒྲིག་པ་སོ་སོས་གང་ཐུབ་ཞལ་འདེབས་ཕུལ་བའི་ཐོག འཛམ་གླིང་གི་ཡུལ་གྲུ་གང་སར་གནས་པའི་རང་བཙན་འཐབ་རྩོད་པ་དང་། དེ་དག་གི་གྲོགས་པོ་གྲོགས་མོ་སོགས་རྒྱབ་སྐྱོར་བ་རྣམས་ཀྱིས་གནང་བ་ལས་བྱུང་བ་ཞིག་ཡིན་སྐོར་སོགས་གསུངས་སོང་བ་མ་ཟད། དབུ་མའི་ལམ་བརྒྱུད་ནས་རང་སྲིད་རང་སྐྱོང་རྩོད་མཁན་རྣམས་དང་“ལངས་ཕྱོགས་ཀྱི་ཐོག་ནས་མ་མཐུན་པ་ཏན་ཏན་ཡོད་ཀྱང་། འགལ་ཟླ་རྩ་བ་ཉིད་ནས་མེད། དེ་ངས་གསལ་པོ་བྱས་ནས་ཞུ་འདོད་བྱུང་། གང་ཡིན་ཟེར་ན། བར་སྐབས་ཤིག་ནས་མི་ཁ་ཤས་ཀྱིས་འགྲེལ་བརྗོད་ལོག་པ་བྱས་ནས། བར་ཐག་དང་དབྱེ་འབྱེད་བཟོ་མཁན་དེ་འདྲ་ཡོང་གི་འདུག དེ་ཆབ་སྲིད་པ་དང་མི་གཞན་སུ་འདྲ་ཞིག་ཡིན་ན་དེ་རྩ་བ་ཉིད་ནས་མ་གནང་རོགས་གནང་། ང་རང་ཚོ་རང་བཙན་རྩོད་མཁན་ཡིན་ན་རེད། དབུ་མའི་ལམ་རྩོད་མཁན་ཡིན་ན་རེད། གཅིག་གིས་གཅིག་ལ་གུས་བརྩི་དང་ཆེ་མཐོང་ཡོད། གང་ཡིན་ཟེར་ན། མཐའ་མ་དེར་ཕན་ཐོགས་ཡ་བོད་རྒྱ་ཆེའི་མི་མང་དང་། བོད་རྒྱལ་ཁབ་དང་མི་རིགས་ཀྱི་དོན་དག་ལ་ཕན་ཐོགས་རྒྱུ་རེད། དམིགས་ཡུལ་གཅིག་གི་དོན་དུ་རེད། དབུ་ཁྲིད་གཅིག་གི་འོག་ལ་ཡོད་རེད། དེར་བརྟེན་དེའི་དབར་ན་བར་ཐག་ཡོང་དགོས་པ་ཡོད་མ་རེད། ཡོང་དོན་རྩ་བ་ཉིད་ནས་མེད་ཟེར་གསལ་པོ་བྱས་ནས་ཞུ་འདོད་བྱུང་།”ཞེས་སོགས་གསུངས་སོང་།