18
Sun, Aug

ཆེས་མཐོའི་ཁྲིམས་ཞིབ་ཁང་གི་ཁྲིམས་དྲུང་བཀྲ་ཤིས་རྒྱ་མཚོ་ལགས་དང་སྤྱི་འཐུས་གྲོས་ཚོགས་ཚོགས་གཙོ་པདྨ་འབྱུང་ལགས།

བཙན་བྱོལ་གྱི་གསར་འགྱུར།
Typography

༢༠༡༩ལོའི་ཟླ་༤་ཚེས་༤་ཉིན། བཞུགས་སྒར་རྡ་ས་གངས་སྐྱིད་ཀྱི་ཆེས་མཐོའི་ཁྲིམས་ཞིབ་ཁང་གི་ཚོགས་ཁང་དུ་ཁྲིམས་དྲུང་བཀྲ་ཤིས་རྒྱ་མཚོ་ལགས་ཀྱིས་ཉེ་ཆར་སྤྱི་འཐུས་ལྷན་ཚོགས་ནས་བཀའ་བློན་དུ་བདམས་ཐོན་བྱུང་ཡོད་པའི་རྫོང་ཁ་སྟོབས་རྒྱལ་ཚེ་རིང་ལགས་བཀའ་བློན་གྱི་འོས་གཞིར་བཅའ་ཁྲིམས་དོན་ཚན་ ༢༢ ལྟར་གྱི་བརྒྱ་ཆ་མ་ལོན་པའི་སྐོར་ལ་ཆེས་མཐོའི་ཁྲིམས་ཞིབ་ཁང་གིས་ཐག་གཅོད་བྱས་པའི་ཡོངས་ཁྱབ་གསལ་བསྒྲགས་ཤིག་སྤེལ་སོང་།

དེའི་རྗེས་གསར་འགོད་པ་ཚོས་སྤྱི་འཐུས་གྲོས་ཚོགས་ཚོགས་གཙོ་པདྨ་འབྱུང་ལགས་ལ་བཀའ་བློན་གྱི་འོས་གཞིར་བཅའ་ཁྲིམས་དོན་ཚན་ ༢༢ ལྟར་གྱི་བརྒྱ་ཆ་མ་ལོན་པའི་སྐོར་ལ་ཆེས་མཐོའི་ཁྲིམས་ཞིབ་ཁང་གིས་ཐག་གཅོད་ཡོངས་ཁྱབ་གསལ་བསྒྲགས་གནང་ཡོད་པའི་སྐོར་ལ་བཀའ་འདྲི་སྐབས། ཁོང་གིས་གྲོས་ཚོགས་ཀྱི་ངོས་ནས་བརྒྱ་ཆ་ལོན་ནས་གསལ་བསྒྲགས་བྱས་པ་རེད། སྐར་ཆུང་རྩི་མི་དགོས་པས་བརྒྱ་ཆ་ལོན་པར་ངོས་འཛིན་བྱས་ནས་སྤྱི་འཐུས་ལྷན་ཚོགས་ཀྱི་ལས་འགན་བསྒྲུབ་དགོས་པ་དེ་བསྒྲུབས་བཞག་ཡོད་ཅེས་གསུངས་སོང་།

སྤྱིར་ཕྱི་ལོ་ ༢༠༡༩ ཟླ་ ༣ ཚེས་ ༢༢ ཉིན། སྐབས་ ༡༦ པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚོགས་དུས་ ༧ པའི་སྔ་དྲོའི་ཚོགས་ཐུན་དང་པོའི་སྟེང་། དཔལ་ལྡན་སྲིད་སྐྱོང་མཆོག་གིས་བཀའ་བློན་འོས་མི་རྫོང་ཁ་སྟོབས་རྒྱལ་ཚེ་རིང་ལགས་ཀྱི་མཚན་དང་ལོ་རྒྱུས་བཅས་སྤྱི་འཐུས་ལྷན་ཚོགས་སུ་སྒྲོགས་སྦྱང་གནང་རྗེས་ངོ་ཡོད་སྤྱི་འཐུས་གྲངས་ ༤༢ ནས་གསང་བའི་འོས་བསྡུ་གནང་སྟེ། རྫོང་ཁ་སྟོབས་རྒྱལ་ཚེ་རིང་ལགས་ལ་རྒྱབ་སྐྱོར་གནང་མཁན་འོས་གྲངས་ ༢༡ དང་། དགག་བྱ་གནང་མཁན་འོས་གྲངས་ ༡༨ སྟོང་པ་ ༢ དང་རྩིས་མེད་ ༡ བཅས་བྱུང་སྟེ་རྫོང་ཁ་སྟོབས་རྒྱལ་ཚེ་རིང་ལགས་སྐབས་ ༡༥ པའི་བཀའ་ཤག་གི་བཀའ་བློན་དུ་བདམས་ཐོན་བྱུང་ཡོད་ཅེས་བཀོད་འདུག

འོན་ཀྱང་། ཆེས་མཐོའི་ཁྲིམས་ཞིབ་ཁང་གིས་བཀའ་བློན་གྱི་འོས་གཞིར་བཅའ་ཁྲིམས་དོན་ཚན་ ༢༢ ལྟར་གྱི་བརྒྱ་ཆ་མ་ལོན་པའི་སྐོར་ལ་ཐག་གཅོད་བྱས་པའི་གསལ་བསྒྲགས་ཤིག་སྤེལ་སོང་བར་གཤམ་གསལ་དུ་གཟིགས་རོགས །

༄༅། །བཀའ་བློན་གྱི་འོས་གཞིར་བཅའ་ཁྲིམས་དོན་ཚན་ ༢༢ ལྟར་གྱི་བརྒྱ་ཆ་མ་ལོན་པའི་སྐོར་ལ་ཆེས་མཐོའི་ཁྲིམས་ཞིབ་ཁང་གི་ཐག་གཅོད་ཡོངས་ཁྱབ་གསལ་བསྒྲགས།

ཀ་༤་༢། བཅའ་ཁྲིམས་དོན་ཚན་ ༢༢ པའི་རྩིས་གཞི་བརྒྱ་ཆ་ (༥༠) ཡིན་པ་དང་། དོན་ཚན་ ༤༩(༡) ཡི་རྩིས་གཞི་ནི་གྲངས་ཆ་(གསུམ་ཆ་གཉིས་)ཡིན་ལ། དམའ་མཐའ་འམ་ཉུང་མཐའི་གྲངས་ཚད་རྩིས་བསྐོར་གྱི་ཆ་རྐྱེན་དུ་བཞག་པའི་གྲངས་ཆ་དང་། བརྒྱ་ཆ་གཉིས་ཨང་རྩིས་ཀྱི་འགྲོ་ལུགས་དང་། སྐབས་བབ་ལས་དོན་གང་གི་ཆ་ནས་ཀྱང་ཐ་དད་ཡིན། གལ་སྲིད་དོན་ཚན་འདི་གཉིས་ཕན་ཚུན་རིགས་བསྒྲེས་ཏེ། ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་ཉུང་བ་ཐོབ་ནའང་འགྲིག་པའི་ཐག་གཅོད་གནང་ཚེ། བཅའ་ཁྲིམས་དོན་ཚན་ ༢༢ པའི་དགོངས་དོན་ལ་རྡོག་རོལ་ཚབས་ཆེན་འགྲོ་ངེས་པ་མ་ཟད། འདེམས་ཐོན་གང་ཟག་དེར་གྲོས་ཚོགས་ནས་མང་མོས་ཙམ་ཡང་ཐོབ་དགོས་དོན་མེད་པའི་ཁྲིམས་ཀྱི་ཆ་རྐྱེན་བསྐྲུན་པ་ལྟ་བུར་འགྱུར་རྒྱུ།

གྲངས་ཆ་རྩིས་བསྐོར་གྱི་གནས་སྐབས་སུའང་། འཕྲོས་ལྷག་སྐར་ཆ་བརྩི་མ་དགོས་པའི་དོན་ཚན་ ༤༩(༡) ཡི་ཆ་རྐྱེན་དང་། བཅའ་ཁྲིམས་ཀྱི་དོན་ཚན་གཞན་དག་ཏུ། གསུམ་ཆ་གཉིས་ཡན་ཞེས་བཞག་ཡོད་པའི་ཆ་རྐྱེན་གཉིས་མཉམ་བསྲེ་དང་རིགས་བསྒྲེ་བྱེད་ཐབས་མེད།

ཀ་༡༡། ཕྱི་ལོ་ ༢༠༡༩ ཟླ་ ༣ ཚེས་ ༢༨ ཉིན་གྱི་ཕྱི་དྲོར། ཆེས་མཐོའི་ཁྲིམས་ཞིབ་ཁང་ནས། བཀའ་བློན་དུ་འདེམས་ཐོན་གསལ་བསྒྲགས་གནང་བའི་སྐྱེ་བོ་དེར་བཅའ་ཁྲིམས་ནང་གསལ་གྱི་ཆ་རྐྱེན་ཚང་གི་མེད་པས། དེའི་ཐོག་བཅའ་ཁྲིམས་དང་མཐུན་པའི་གནང་ཕྱོགས་ཤིག་མ་བྱུང་བར་དུ། བཅའ་ཁྲིམས་དོན་ཚན་ ༢༥ ནང་གསལ་ལས་འཁུར་དང་གསང་རྒྱའི་དམ་བཅའ་འབུལ་བཞེས་ཀྱི་ལས་རིམ་ཐོག་བསྐྱོད་ཐབས་མེད་ངེས་ཡིན་པ་ནན་བརྗོད་བྱ་རྒྱུ་ཞེས་དང་། ཁ༽ ཆེས་མཐོའི་ཁྲིམས་ཞིབ་ཁང་གི་ཐག་གཅོད་དང་དེའི་རྒྱུ་མཚན།

ཁ་༡། ཐེངས་འདིའི་བཀའ་བློན་གྱི་འོས་བསྡུ་དེ། ངོ་ཡོད་སྤྱི་འཐུས་གྲངས་ ༤༣ ཡོད་ཁོངས་ཀྱི་འོས་ཐོབ་གྲངས་ ༢༡ དེ་བརྒྱ་ཆ་རྩིས་བསྐོར་བྱས་ན་བརྒྱ་ཆ་ ༤༨་༨༤ (21x100÷43=48.84%) ལས་ལོན་མེད་པས། བཅའ་ཁྲིམས་ལེའུ་བཞི་པ་སྒྲིག་འཛུགས་ཀྱི་འགན་འཛིན་ཞེས་པའི་དོན་ཚན་ ༢༢ བཀའ་བློན་གྱི་འོས་འདེམས་ནང་། འདེམས་ཐོན་ཐོག་དམ་འབུལ་ཟིན་པའི་སྲིད་སྐྱོང་དེས་རང་གི་བཀའ་ཤག་ལྷན་ཚོགས་སུ་བཀའ་བློན་ཇི་དགོས་མང་མཐའ་བདུན་ལས་མ་བརྒལ་བའི་མི་འགྲོའི་མིང་དང་ལོ་རྒྱུས་བཅའ་ཁྲིམས་དོན་ཚན་ ༢༡ པར་གསལ་བའི་འོས་ཆོས་ཚང་ལུགས་བཅས་སྤྱི་འཐུས་ལྷན་ཚོགས་སུ་གསལ་བཤད་དང་སྦྲགས་འབུལ་རྒྱུ་དང༌། དེའི་ཐོག་སྤྱི་མོས་བྱུང་ན་སྨོས་མེད། མ་བྱུང་ཚེ་སྤྱི་མོས་མ་བྱུང་བའི་འོས་གཞི་སོ་སོའི་ཐོག་ངོ་ཡོད་སྤྱི་འཐུས་ཡོངས་རྫོགས་ཀྱིས་གསང་བའི་འོས་ཤོག་འཕངས་ཏེ་འོས་འདེམས་བྱེད་དགོས། ངོ་ཡོད་སྤྱི་འཐུས་ཀྱི་བརྒྱ་ཆ་ལྔ་བཅུ་ལས་མ་ཉུང་བའི་འོས་ཤོག་ཐོབ་ན་བཀའ་བློན་དུ་འོས་ཐོན་གསལ་བསྒྲགས་བྱ་རྒྱུ། གྲོས་ཚོགས་སུ་སྤྱི་མོས་སམ་མང་མོས་ཐོན་པའི་རིགས་ལ་སྲིད་སྐྱོང་གིས་བཀའ་བློན་དུ་བསྐོ་གཞག་བྱ་རྒྱུ། སྲིད་སྐྱོང་གིས་བཏོན་པའི་འོས་གཞི་ཡོངས་རྫོགས་སམ་གང་རུང་ལ་མང་མོས་མ་ཐོབ་ཚེ་འོས་གཞི་གསར་པ་སྲིད་སྐྱོང་གིས་གོང་བཞིན་སྤྱི་འཐུས་ལྷན་ཚོགས་སུ་འབུལ་རྒྱུ་ཞེས་གསལ་ཡོད་པའི་དགོངས་དོན་ལ་མངོན་གསལ་གྱི་གནོད་འགལ་བྱས་ཡོད་པ་སྟེ།

ཁ་༡་༡། བཀའ་བློན་དུ་འོས་ཐོན་འབྱུང་བའི་དགོས་ངེས་གྲངས་ཚད་ཀྱི་ཆ་རྐྱེན་ནི་ངོ་ཡོད་སྤྱི་འཐུས་ཀྱི་བརྒྱ་ཆ་ལྔ་བཅུ་ལས་མ་ཉུང་བའི་འོས་ཤོག་ཐོབ་དགོས་པ་ཡིན། དེར་འཕྲོས་ལྷག་སྐར་ཆ་བརྩི་མ་དགོས་པའི་ཆ་རྐྱེན་བཞག་མེད། ཁ་༡་༢། སྐབས་འདིའི་འོས་འཕེན་པ་ནི་ངོ་ཡོད་སྤྱི་འཐུས་ཡོངས་རྫོགས་ཡིན། ཁ་༡་༣། འོས་ཤོག་འཕེན་སྟངས་ནི་གསང་བའི་འོས་ཤོག་སྡུད་དགོས།

ཁ་༡་༤། དཔལ་ལྡན་སྲིད་སྐྱོང་མཆོག་གིས་བཅའ་ཁྲིམས་དོན་ཚན་ ༢༢ གཞིར་བཟུང་སྤྱི་འཐུས་ལྷན་ཚོགས་སུ་བཀའ་བློན་འོས་གཞི་མིང་འདོན་གནང་བ་གང་ཞིག བཅའ་ཁྲིམས་ནང་གསལ་དགོས་ངེས་ཀྱི་བརྒྱ་ཆའི་གྲངས་ཚད་ལོན་མེད་པ་མངོན་སུམ་དུ་གྲུབ་ཡོད་པས། མང་མོས་མ་ཐོབ་པ་ཞིག་ལ་འོས་ཐོན་བྱུང་བའི་གསལ་བསྒྲགས་བྱས་པ་དེ་བཅའ་ཁྲིམས་དོན་ཚན་འདིའི་དགོངས་དོན་དང་འགལ་ཡོད།

ཁ་༢་༣། བཀའ་བློན་གྱི་འོས་འདེམས་མཚམས་འཛིན་བརྒྱ་ཆ་ ༥༠ ལས་མ་ཉུང་བ་ཡིན་པ་དང་། སྤྱི་འཐུས་ལྷན་ཚོགས་སུ་སྤྱི་འཐུས་ཀྱི་ཉུང་ཚད་མཚམས་འཛིན་ནི་འཕྲོས་ལྷག་སྐར་ཆ་བརྩི་མ་དགོས་པའི་གསུམ་ཆ་གཉིས་ཡིན་པས། དོན་ཚན་གཅིག་གིས་ཅིག་ཤོས་དེར་དཔེ་འགེབས་དང་རིགས་བསྒྲེ་བྱེད་ས་མི་འགྲོ།

ཁ་༤་༤། ཆེས་མཐོའི་ཁྲིམས་ཞིབ་ཁང་གི་ཐག་གཅོད་འདིས། ཐེངས་འདིར་གྲོས་ཚོགས་སུ་བཀའ་བློན་གྱི་འོས་གཞི་དེར་དགོས་ངེས་བརྒྱ་ཆའི་གྲངས་ཚད་ལོན་མེད་པའི་བཅའ་ཁྲིམས་ཀྱི་དངོས་བསྟན་ལ་ཐད་ཀར་རྡོག་རོལ་བཏང་བའི་ཆ་དེ་བཀག་པ་ཞིག་ཡིན་པ་ལས། བཅའ་ཁྲིམས་དོན་ཚན་ ༤༦ ནང་གསལ་སྤྱི་འཐུས་ཀྱི་དམིགས་བསལ་ཐོབ་ཐང་ལ་དོ་ཕོག་དང་། དོན་ཚན་ ༥༨ ནང་གསལ་སྤྱི་འཐུས་ལྷན་ཚོགས་ཀྱི་ལས་དོན་ལ་ཁྲིམས་ཞིབ་རྩད་གཅོད་མི་ཆོག་པའི་ལས་དོན་དེ་དག་ཐོག་ཐེ་བྱུས་བྱས་པ་ཞིག་གཏན་ནས་མིན་པ་རྒྱུ་མཚན་གོང་བརྗོད་ལྟར་ཡིན།

 

གསལ་བསྒྲགས་ཀྱི་ས་མིག