ཕྱི་ལོ་༢༠༢༥ ཟླ་༧ ཚེས་༢ ཉིན། བོད་ཀྱི་བླ་སྤྲུལ་དང་དགོན་པ་ཁག་གི་སྐུ་ཚབ་བཅས་ཁྱོན་མི་གྲངས་བརྒྱ་ལྷག་ཕེབས་ནས་བོད་མིའི་ཆོས་ཚོགས་ཐེངས་བཅོ་ལྔ་པ་དབུ་འཛུགས་གནང་སོང་། སྐབས་དེར་༸གོང་ས་མཆོག་གིས་༸རྒྱལ་དབང་སྐུ་ཕྲེང་རྒྱུན་མཐུད་ཕེབས་ངེས་ཡིན་པའི་ཡོངས་ཁྱབ་གསལ་བསྒྲགས་གནང་བ་དང་འབྲེལ་གྲོས་ཆོད་ཅིག་བཞག་གནང་སོང་། དེའི་ནང་སྐུ་ཕྲེང་རྒྱུན་མཐུད་ཇི་ལྟར་བྱ་རྒྱུ་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་བྱེད་སྒོ་ཞིག་ཡིན་སྟབས། རྒྱ་ནག་དམར་གཞུང་གིས་ཆབ་སྲིད་དགོས་མཁོ་ཁོ་ནར་དམིགས་ནས་༸རྒྱལ་བའི་སྐུ་ཕྲེང་རིམ་བྱོན་ཕེབས་ཕྱོགས་ཐད་ཇུས་ངན་སྣ་ཚོགས་གཤོམ་སྒྲོགས་བྱས་དང་བྱེད་བཞིན་པར་དགག་པ་མཐའ་གཅིག་ཏུ་བྱ་རྒྱུ་མ་ཟད། དུས་ནམ་ཡང་ངོས་ལེན་བྱེད་ཐབས་མེད། ཅེས་བཀོད་འདུག
དེ་ཡང་། གོང་ཚེས་ཉིན་གྱི་ཆུ་ཚོད་༩།༣༠ ཐོག བཞུགས་སྒར་དྷ་རམ་ས་ལྷ་རྒྱལ་རིར་རྟེན་གཞི་བྱས་ཡོད་པའི་༸གོང་ས་ཏཱ་ལའི་བླ་མ་དཔེ་མཛོད་དང་ཡིག་ཚགས་ཁང་དུ། ༸སྐྱབས་རྗེ་དགའ་ལྡན་ཁྲིན་རིན་པོ་ཆེ་མཆོག་དང་། ༸སྐྱབས་མགོན་ས་སྐྱ་༸གོང་མ་ཁྲི་འཛིན་ཞེ་གསུམ་པ་རིན་པོ་ཆེ་མཆོག ༸སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག ༸སྔ་འགྱུར་རྙིང་མའི་སྐུ་ཚབ་༸སྐྱབས་རྗེ་སྨན་གླིང་མཁན་རིན་པོ་ཆེ་མཆོག ༸སྐྱབས་མགོན་འབྲི་གུང་ཆེ་ཚང་རིན་པོ་ཆེ་མཆོག ༸སྐྱབས་མགོན་འབྲུག་པ་རིན་པོ་ཆེའི་སྐུ་ཚབ་ངེས་དོན་བསྟན་འཛིན་རིན་པོ་ཆེ་མཆོག ༸སྐྱབས་རྗེ་སྟག་ལུང་ཞབས་དྲུང་རིན་པོ་ཆེའི་སྐུ་ཚབ་༸སྐྱབས་རྗེ་སྟག་ལུང་མ་སྤྲུལ་རིན་པོ་ཆེ་མཆོག ༸སྐྱབས་རྗེ་ཇོ་ནང་རྒྱལ་ཚབ་རིན་པོ་ཆེ་མཆོག་གཙོས་པའི་བོད་ཀྱི་བླ་སྤྲུལ་དང་དགོན་པ་ཁག་གི་སྐུ་ཚབ་དང་བཙུན་དགོན་ཁག་གི་སྐུ་ཚབ། བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་བཅས་ཁྱོན་མི་གྲངས་བརྒྱ་ལྷག་ཕེབས་ནས་བོད་མིའི་ཆོས་ཚོགས་ཐེངས་བཅོ་ལྔ་པ་དབུ་འཛུགས་གནང་སོང་།
བོད་མིའི་ཆོས་ཚོགས་ཐེངས་བཅོ་ལྔ་པ་དབུ་འབྱེད་མཛད་སྒོ་ཚར་རྗེས། བོད་མིའི་སྒྲིག་འཛུགས་ཀྱི་དཔལ་ལྡན་སྲིད་སྐྱོང་སྤེན་པ་ཚེ་རིང་མཆོག་དང་། བཀའ་བློན་ཁྲི་ཟུར་༸སྐྱབས་རྗེ་སློབ་དཔོན་ཟམ་གདོང་རིན་པོ་ཆེ་མཆོག་རྣམ་གཉིས་ནས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཡང་སྲིད་དང་འབྲེལ་བའི་ཐོག་གསར་འགོད་གསལ་བསྒྲགས་ཤིག་སྤེལ་སོང་།
སྐབས་དེར། སྲིད་སྐྱོང་མཆོག་གིས་བོད་མིའི་ཆོས་ཚོགས་ཚོགས་འདུ་ཐོག་བཞག་གནང་བའི་གྲོས་ཆོད་སྒྲོག་སྦྱོང་གནང་དོན། ཕྱི་ལོ་༢༠༡༡ ཟླ་༩ ཚེས་༢༤ ཉིན། བོད་མིའི་ཆོས་ཚོགས་ཚོགས་ཆེན་ཐེངས་བཅུ་གཅིག་པའི་ཐོག བོད་དང་བོད་མིའི་མགོན་སྐྱབས་དང་མཚོན་རྟགས། ཁམས་གསུམ་ཆོས་ཀྱི་རྒྱལ་པོ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཞལ་སྔ་ནས། “འབྱུང་འགྱུར་ཏཱ་ལའི་བླ་མའི་སྐུ་ཕྲེང་རྒྱུན་མཐུད་དགོས་མིན་དད་ལྡན་མང་ཚོགས་ནས་ཐག་གཅོད་དགོས་པའི་གསལ་བསྒྲགས་ཕྱི་ལོ་༡༩༦༩ ཙམ་ནས་བྱས་ཟིན་” ཚུལ་དང་། ཡང་ “ངོས་རང་རྗེ་དགེ་འདུན་གྲུབ་ཀྱི་དགུང་གྲངས་ཙམ་དུ་སོན་སྐབས་ཆོས་ལུགས་ཆོས་བརྒྱུད་བླ་ཆེན་ཁག་དང་། བོད་མིས་མཚོན། འབྲེལ་ཡོད་དད་ལྡན་མང་ཚོགས་ལ་གོ་བསྡུར་གྱིས་རྒྱལ་དབང་སྐུ་ཕྲེང་རྒྱུན་མཐུད་དགོས་མིན་བསྐྱར་ཞིབ་དང་ཐག་གཅོད་བྱེད་འཆར་ཡིན།” ཞེས་སྤྱི་ཕེབས་ལ་བརྟེན། བོད་མིའི་ཆོས་ཚོགས་ཐེངས་བཅུ་བཞི་པ་དང་། དམིགས་བསལ་ཚོགས་ཆེན། བོད་ཕྱི་ནང་དུ་གནས་པའི་བོད་མི་སྤྱི་དང་། ཧི་མཱ་ལ་ཡའི་ས་ཁུལ་ཁག ཆེན་པོ་ཧོར། རྒྱ་ཡི་ཆོས་གྲོགས། རྒྱལ་སྤྱིའི་ཕྱི་ནང་དད་ལྡན་སོགས་ཁུངས་སོ་སོ་ནས་༸རྒྱལ་བའི་སྐུ་ཕྲེང་རྒྱུན་མཐུད་ངེས་ཕེབས་ཡོང་བ་ཞེས་གཅིག་མཇུག་གཉིས་མཐུད་དུ་གསོལ་བ་ཕུར་ཚུགས་སུ་བཏབ་པ་ལྟར། མགོན་པོ་མཆོག་ནས་ཀྱང་༸སྐུའི་གོ་སྟོན་གྱི་དུས་ཚིགས་ཁྱད་པར་ཅན་དང་བསྟུན་འཇིག་རྟེན་ཞི་བདེ་དང་། འགྲོ་བའི་བདེ་སྐྱིད་སྒྲུབ་པའི་ཐུགས་བསྐྱེད་དམ་བཅའ་གཡེལ་མེད་ངང་ “རྒྱལ་དབང་སྐུ་ཕྲེང་རྒྱུན་མཐུད་དགོས་པ་འབྲེལ་ཡོད་མང་ཚོགས་ཀྱི་མངོན་འདོད་བཅོས་མིན་གྱི་ལམ་ནས་ཐག་གཅོད་བྱེད་པར་ངོས་འཛིན་གྱིས་དེ་དོན་ཡོང་བའི་མོས་མཐུན་བྱེད།” ཅེས་ཞལ་བཞེས་བཟང་པོ་བཀའ་དྲིན་སྨིན་སྩོལ་བྱུང་བར། བོད་མིའི་ཆོས་ཚོགས་ཐེངས་བཅོ་ལྔ་པར་ཚོགས་ཞུགས་ཆོས་ལུགས་ཆོས་བརྒྱུད་རིས་མེད་ཀྱི་དབུ་ཁྲིད་བླ་ཆེན་རྣམ་པ་དང་། སྐུ་ཚབ། ཚོགས་བཅར་བ་བཅས་སྤྱི་མགྲིན་ནས་ཐུགས་རྗེ་བཀའ་དྲིན་བླ་ལྷག་ཏུ་ཆེ་ཞུ་བ་དང་སྦྲགས། ཆོས་ཚོགས་སུ་གཤམ་གསལ་དོན་གནད་ཁག་ལ་སྤྱི་མོས་བྱུང་བ་སྟེ།
༡༽ སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་བསྩལ་བའི་གསུང་འཕྲིན་རིན་པོ་ཆེའི་དགོངས་དོན་ཆ་ཚང་ལ་ཚོགས་བཅར་བ་ཡོངས་ནས་སྤྱི་མོས་ཀྱིས་རྒྱབ་སྐྱོར་ཞུ་རྒྱུ་དང་། གསུང་འཕྲིན་འདི་ཉིད་གསལ་བསྒྲགས་རྒྱ་གང་ཆེ་ཁྱབ་འགྲེམས་ཞུ་རྒྱུ།
༢༽ སྐུ་ཕྲེང་རྒྱུན་མཐུད་ཇི་ལྟར་བྱ་རྒྱུ་བོད་བརྒྱུད་ནང་བསྟན་གྱི་ཆོས་ཕྱོགས་ཀྱི་བྱེད་སྒོ་ཞིག་ཡིན་སྟབས། རྒྱ་ནག་དམར་གཞུང་གིས་ཆབ་སྲིད་དགོས་མཁོ་ཁོ་ནར་དམིགས་ནས་༸རྒྱལ་བའི་སྐུ་ཕྲེང་རིམ་བྱོན་ཕེབས་ཕྱོགས་ཐད་ཇུས་ངན་སྣ་ཚོགས་གཤོམ་སྒྲོགས་བྱས་དང་བྱེད་བཞིན་པར་དགག་པ་མཐའ་གཅིག་ཏུ་བྱ་རྒྱུ་མ་ཟད། དུས་ནམ་ཡང་ངོས་ལེན་བྱེད་ཐབས་མེད།
༣༽ གཞིས་བྱེས་གཉིས་སུ་གནས་པའི་བོད་རིགས་དང་ནང་པའི་རྗེས་འཇུག་པ་ཡོངས་ནས་༸མགོན་པོ་མཆོག་གི་བཞེད་དགོངས་འགྲུབ་ཐབས་ལ་ཕྱར་གྲུ་མཉམ་འདེགས་ཞུ་སླད། དམ་ཚིག་རྡོག་རྩ་ཆིག་སྒྲིལ་གྱི་སྒོ་ནས་འབད་འབུངས་ཞུ་རྒྱུའི་དམ་བཅའ་བརྟན་པོ་ཞུ་རྒྱུ་སྤྱི་མོས་གྲོས་ཆོད་དུ་བོད་ཀྱི་ཆོས་ཚོགས་ཐེངས་བཅོ་ལྔ་པར་ཚོགས་ཞུགས་པ་སྤྱི་མགྲིན་ནས་ཕྱི་ལོ་ ༢༠༢༥ ཟླ་བ་ ༧ ཚེས་ ༢ ཉིན། བཅས་བསྒྲགས་གཏམ་སྤེལ་ཡོད། དེ་རྗེས་དཔལ་ལྡན་སྲིད་སྐྱོང་མཆོག་དང་། ༸སྐྱབས་རྗེ་ཟམ་གདོང་རིན་པོ་ཆེ་རྣམ་གཉིས་ནས་གསར་འགོད་པ་ཁག་གི་དྲི་བར་ལན་འདེབས་གསལ་བཤད་གནང་ཡོད་པ་བཅས།།
ཐེངས་འདིར་ཆོས་ཚོགས་སུ་མགྲོན་འབོད་ཞུས་པའི་ཁྲོད་སྔ་འགྱུར་རྙིང་མའི་བླ་སྤྲུལ་དང་དགོན་པའི་སྐུ་ཚབ་གྲངས་ ༡༧ དང་། བཀའ་བརྒྱུད་པའི་བླ་སྤྲུལ་དང་དགོན་པའི་སྐུ་ཚབ་གྲངས་ ༡༧། ས་སྐྱའི་བླ་སྤྲུལ་དང་དགོན་པའི་སྐུ་ཚབ་གྲངས་ ༡༡། དགེ་ལུགས་པའི་བླ་སྤྲུལ་དང་དགོན་པའི་སྐུ་ཚབ་གྲངས་ ༣༧། གཡུང་དྲུང་བོན་གྱི་བླ་སྤྲུལ་དང་དགོན་པའི་སྐུ་ཚབ་གྲངས་ ༧། རྒྱལ་བ་ཇོ་ནང་པའི་བླ་སྤྲུལ་དང་དགོན་པའི་སྐུ་ཚབ་གྲངས་ ༣། བོ་དོང་དང་བུ་ལུགས། ཞི་བྱེད་པ་བླ་སྤྲུལ་དང་དགོན་པའི་སྐུ་ཚབ་རེ་རེ་བརྩིས་གྲངས་ ༣། རིས་མེད་དགོན་སྡེའི་སྐུ་ཚབ་གྲངས་ ༢། ཧི་མཱ་ལ་ཡ་རི་རྒྱུད་ནས་བླ་སྤྲུལ་དང་སྐུ་ཚབ་གྲངས་ ༥། དེ་བཞིན་དམིགས་བསལ་ཚོགས་བཅར་བ་ ༡༣། བཅས་ཁྱོན་བསྡོམས་བླ་སྤྲུལ་སྐུ་ཚབ་ཚོགས་མི་ ༡༡༥ མགྲོན་འབོད་ཞུས་ཡོད་འདུག
