ཕྱི་ལོ་ ༢༠༢༤ ཟླ་ ༩ ཚེས་ ༡༡ ཉིན། བཞུགས་སྒར་རྡ་ས་གངས་སྐྱིད་ཀྱི་གྲོས་ཚོགས་ཀྱི་ཚོགས་ཁང་དུ། ལས་ཉིན་གྲངས་བརྒྱད་རིང་གི་སྐབས་བཅུ་བདུན་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་དུས་བརྒྱད་པ་དབུ་འཛུགས་གནང་སོང་། ཉིན་དང་པོར་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་དང་། ཆོས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་དང་། ནང་སྲིད་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་གནང་ནས་དེ་དག་ཐོག་བགྲོ་གླེང་གནང་སོང་།
དེ་ཡང་། གོང་ཚེས་ཉིན་གྱི་སྔ་དྲོ་ཆུ་ཚོད་ ༩།༣༠ ཐོག བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་། ཚོགས་གཞོན་སྒྲོལ་མ་ཚེ་རིང་མཆོག སྲིད་སྐྱོང་སྤེན་པ་ཚེ་རིང་མཆོག་གིས་གཙོས་བཀའ་བློན་རྣམ་པ། དེ་བཞིན་བོད་མི་མང་སྤྱི་འཐུས་རྣམ་པ་བཅས་ཚང་འཛོམས་ཐོག་ནས་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསལ་བསྒྲགས་གནང་རྗེས་ཚང་མས་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་གནང་སོང་།
དེ་ནས་ཚོགས་གཙོ་མཆོག་གིས་ཚོགས་འདུ་དབུ་འཛུགས་ཀྱི་གསུང་བཤད་གནང་དོན། དེ་རིང་ང་ཚོའི་གྲོས་ཚོགས་ཚོགས་དུས་བརྒྱད་པ་འདི་ཕྱི་ཟླ་དགུ་པའི་གྲོས་ཚོགས་ཆགས་བསྡད་ཡོད་རེད། ང་ཚོས་ལོ་གཅིག་ལ་གྲོས་ཚོགས་ཐེངས་གཉིས་འཚོགས་ཀྱི་ཡོད་རེད། ཕྱི་ཟླ་གསུམ་པའི་གྲོས་ཚོགས་དེ་སྔོན་རྩིས་གྲོས་ཚོགས་དང་། ཕྱི་ཟླ་དགུ་པའི་གྲོས་ཚོགས་འདི་ལས་བསྡོམས་གྲོས་ཚོགས་ཆགས་བསྡད་ཀྱི་ཡོད་རེད། དེ་ཡིན་དུས། འཛིན་སྐྱོང་གི་ཕྱི་ལོ་ ༢༠༢༣་་་༢༠༢༤ ཡི་ལས་བསྡོམས་ཐོག་ལ་ང་ཚོའི་ལས་ཉིན་མང་བ་གཏོང་དགོས་པ་ཆགས་ཀྱི་ཡོད་རེད། ལས་རིམ་གྱི་སྐོར་འོག་ལ་ཞིབ་ཕྲ་ཞུ་རྒྱུ་ཡིན།
དེ་རིང་ལས་རིམ་དང་འབྲེལ་བའི་ཐོག་ནས་མྱ་ངན་གུས་འདུད་ཀྱི་གྲོས་ཆོད་གྲོས་འཆར་གཅིག་ཡོད། སྤྱི་ཟུར་དྭངས་ཤར་ཡོན་ཏན་རྒྱ་མཚོ་ལགས་ཉེ་ཆར་སྐུ་ཚེའི་འཕེན་པ་རྫོགས་པ་རེད། ཁོང་སྡེ་ཚན་མང་པོའི་ནང་ལ་ཕྱག་ལས་གནང་ནས་ང་རང་ཚོའི་མི་རབས་རྒན་པ་ཞིག་ཆགས་བསྡད་ཡོད་རེད། དེ་ཡིན་དུས་ཁོང་ལའང་ང་ཚོས་ནམ་རྒྱུན་འགྲོ་སྟངས་གཞིར་བཟུང་བྱས་ནས་མྱ་ངན་གུས་འདུད་ཀྱི་གྲོས་ཆོད་ཅིག་འཁུར་ཡོད། དེ་ག་ནང་བཞིན་གྱི་ང་ཚོས་གོང་དུ་ཞུས་པ་ནང་བཞིན་གྱིས་ ལས་བསྡོམས་ཀྱི་གྲོས་ཚོགས་ཀྱི་གནས་སྟངས་ཆགས་བསྡད་དུས། ལྷན་ཁང་ཁག་བདུན་གྱི་ལས་བསྡོམས་རྒྱས་པ་དེ་སྤྱི་འཐུས་རྒྱུན་ལས་ལ་ཚུར་གནང་ནས་སྤྱི་འཐུས་རྒྱུན་ལས་ཀྱི་ཐོག་ནས་སྡེ་ཚན་གསུམ་ལ་ཆ་བགོས་བྱས་ནས། ང་ཚོས་ལས་བསྡོམས་དེ་ཚོར་གཟིགས་ཞིབ་གནང་སྟེ། གཟིགས་ཞིབ་གནང་བའི་རྗེས་ལ་དོགས་འདྲི་དང་། དགོངས་ཚུལ་དེ་ཚོ་བསྐྱར་དུ་རྒྱུན་ལས་ནང་ལོགས་ལ་ཕེབས་ནས། རྒྱུན་ལས་ནང་ལ་བཀའ་བསྡུར་གཏན་འབེབས་བྱས་ནས་ལྷན་ཁང་ཁག་ལ་ཕར་བཏང་བ་དང་། དེ་རིང་དོགས་འདྲི་དང་ལན་འདེབས་དེ་གྲོས་ཚོགས་ནང་བསླེབ་ཡོང་གི་ཡོད་རེད། དེ་ག་ནང་བཞིན་འཛིན་སྐྱོང་བཀའ་ཤག་གི་ལྷན་ཁང་ཁག་བདུན་གྱི་ལས་བསྡོམས་སྙིང་བསྡུས་སྙན་སྒྲོན་དེ་འདིར་ཕེབས་ཡོང་གི་ཡོད་རེད། དེ་ཡིན་དུས་དངོས་སུ་དེ་ཚོ་ལ་བཀུར་འོས་སྤྱི་འཐུས་རྣམ་པ་ཚང་མས་གསན་ཞིབ་གནང་ནས། དོགས་འདྲི་ཡིན་ནའང་འདྲ་དགོངས་ཚུལ་ཡིན་ནའང་འདྲ། གང་ལྟར་ང་ཚོའི་འཛིན་སྐྱོང་གི་ལས་དོན་ཡར་རྒྱས་འགྲོ་ཐུབ་རྒྱུར་ཐབས་ལམ་ག་རེ་འདུག དེ་ག་ནང་བཞིན་གྱི་གནས་སྟངས་གང་འདྲ་ཆགས་ཀྱི་ཡོད་མེད་ཀྱི་ཐོག་ལའང་ང་ཚོས་ལས་འཆར་འགྲོ་བཞིན་པའི་གནས་སྟངས་གང་འདྲ་ཆགས་ཀྱི་ཡོད་མེད་དེ་ཚོ་ལ་བཀའ་འདྲི་ཞུ་ཡག་དང་གོ་བསྡུར་བྱ་རྒྱུ། འཛིན་སྐྱོང་གི་ཐོག་ནས་ཡིན་ནའང་གསལ་བཤད་ལན་འདེབས་གནང་རྒྱུའི་དུས་ཚོད་དེ་འདྲ་ཆགས་བསྡད་ཀྱི་རེད།
དེ་ནས་ང་ཚོའི་ཁྲིམས་བཟོའི་ལས་དོན་ཐོག་ལ་བོད་མིའི་སྒྲིག་འཛུགས་ཀྱི་མཛད་གཙོ་རྣམ་པ་འཕོ་འགྱུར་དང་འབྲེལ་བའི་སྒྲིག་གཞི་བསྐྱར་བཅོས་ཁྲིམས་ཆར་ཐོག་ལ་གྲོས་ཚོགས་ཀྱི་ཆེད་འཛུགས་ཚོགས་ཆུང་གི་སྙན་ཐོ་དང་སྒྲིག་གཞི་བསྐྱར་བཅོས་འཆར་ཟིན་བསླེབ་ཡོང་གི་ཡོད་རེད། དེ་ག་ནང་བཞིན་སྤྱི་འཐུས་རྒྱུན་ལས་ཀྱིས་ཆེད་འཛུགས་གནང་བའི་བོད་ཀྱི་གསོ་བ་རིག་པའི་གནས་བབ་དང་འབྲེལ་བའི་ཁྲིམས་ཡིག་གསོ་རིག་གི་ཁྲིམས་ཡིག་བསྐྱར་བཅོས་དང་འབྲེལ་བའི་ཐོག་ནས་ཁྲིམས་འཆར་དང་སྙན་ཐོ་རིགས་གཅིག་ཕེབས་ཡོང་གི་ཡོད་རེད། དེ་ག་ནང་བཞིན་འཛིན་སྐྱོང་བཀའ་ཤག་གི་ཐོག་ནས་ཁྲིམས་སྒྲིག་བསྐྱར་བཅོས་རིགས་གཅིག་ཕེབས་ཡོང་གི་འདུག དེ་ག་ནང་བཞིན་ང་ཚོའི་གྲོས་ཆོད་གྲོས་འཆར་དེའི་ཐོག་ནས་གཞུང་འབྲེལ་གདུང་སེམས་མཉམ་བསྐྱེད་ཀྱི་གྲོས་ཆོད་གྲོས་འཆར་ཕེབས་ཀྱི་ཡོད་རེད། དེ་འདྲ་པོ་ཡིན་ན་ཕྱི་ལོ་ ༢༠༠༨ ནས་ང་ཚོས་འགོ་བཙུགས་ནས་ད་ལྟ་བར་དུ་གྲོས་ཚོགས་ནང་ལ་བསྣམས་ཕེབས་ཀྱི་ཡོད་རེད། དེ་གཙོ་བོ་བོད་ནང་གི་ཆབ་སྲིད་ཀྱི་གནས་སྟངས་རེད། རྒྱལ་སྤྱིའི་ཆབ་སྲིད་ཀྱི་གནས་སྟངས་རེད། ང་རང་ཚོས་ག་རེ་བྱེད་དགོས་རྒྱུའི་གནས་སྟངས་ཀྱི་ཐོག་ནས་གྲོས་ཆོད་བཞག་ནས་ང་ཚོས་དེ་རིང་འདིར་གཏན་འབེབས་བྱེད་ཀྱི་ཡོད་རེད། དེ་ཚོའི་ཐོག་ལའང་རྣམ་པ་ཚོས་བགྲོ་གླེང་གི་ཆ་ཤས་བཞེས་རྒྱུ། དེ་ཡང་གདུང་སེམས་མཉམ་བསྐྱེད་ཀྱི་གྲོས་ཆོད་རང་གི་ངོ་གདོང་དང་མཐུན་པའི་ཐོག་ནས་ཆ་ཤས་བཞེས་ཐུབ་དགོས་རྒྱུ་དེ་གལ་ཆེན་པོ་ཞིག་འདུག དེ་གཅིག་ཞུ་རྒྱུ་ཡིན།
དེ་ག་ནང་བཞིན་གྱི་ཨོ་སི་ཊོ་ལི་ཡའི་གྲོས་ཚོགས་གོང་མའི་འཐུས་མི་ཟུར་པ་ལྕམ་སྐུ་ཇེ་ནཌ་ ར་ཡེ་སི་ (Senator Janet Rice) ཡུན་རིང་པོ་ཞིག་ནས་ཁོ་རང་གིས་ལྷག་བསམ་རྣམ་དག་གི་ཐོག་ནས་བོད་དོན་ལ་རྒྱབ་སྐྱོར་གནང་བསྡད་ཀྱི་ཡོད་རེད། ད་ལྟ་འཐུས་མིའི་འགན་མ་བཞེས་ནས་ཟུར་པའི་ངོ་བོའི་ཐོག་ནས་བཞུགས་བསྡད་ཡོད་རེད་དེ། ང་ཚོའི་གྲོས་ཚོགས་སྐུ་ཚབ་ཚོགས་ཆུང་ཐུག་རྒྱུ། ཉེ་ཆར་རང་ཨོ་སི་ཊོ་ལི་ཡ་བོད་ཀྱི་ཉིན་མོ་ཞུ་གཏུག་གི་ཉིན་མོ་དེ་ལ་ཁོ་རང་མཉམ་དུ་བཅར་ནས་གྲོས་ཚོགས་ནང་ལོགས་ལ་ཕེབས་བསྡད་འདུག དེ་ཡིན་དུས་ཁོང་རང་ལ་ང་ཚོས་ཐུགས་རྗེ་ཆེ་ཞུའི་གྲོས་ཆོད་གྲོས་འཆར་ཞིག་འཁུར་གྱི་ཡོད། དེ་ག་ནང་བཞིན་གྱིས་འཛིན་སྐྱོང་བཀའ་ཤག་ནས་ཨ་རིའི་གྲོས་ཚོགས་ནས་བོད་རྒྱའི་རྩོད་རྙོག་སེལ་ཐབས་ཀྱི་སྐུལ་འདེད་ཁྲིམས་ཡིག་གཏན་འབེབས་གནང་བར་ཐུགས་རྗེ་ཆེ་ཞུའི་གྲོས་ཆོད་ཅིག་བསྣམས་ཀྱི་འདུག དེ་ཚོའི་ཐོག་ལ་རྣམ་པ་ཚོས་དགོངས་ཚུལ་སྤུང་ཐུབ་རྒྱུར་རེ་བ་ཞུ་ཡི་ཡོད། དེ་བཞིན་བཀའ་ཤག་གིས་གསལ་བཤད་ཅིག་ཕེབས་ཀྱི་ཡོད་རེད། དེ་ནང་བཞིན་གྱི་ད་ལྟ་ང་ཚོའི་ཕོགས་རིམ་བསྐྱར་ཞིབ་ཚོགས་ཆུང་བདུན་པས་སྲི་ཞུ་བའི་ལས་བྱེད་རྣམ་པ་ལ་ཕོགས་སྤར་དང་ཟུར་ཕོགས་དེ་ཚོ་སྤར་ཡོད་རེད། དེ་གཅིག་མཚུངས་ཀྱིས་མཛད་གཙོ་རྣམ་པ་ལའང་སྤྱི་འཐུས་རྒྱུན་ལས་ཀྱི་ཐོག་ནས་སྤར་ཆ་གནང་ཡོད་རེད་དེ། ཡིན་ན་ཡང་མཐའ་མ་དེ་གྲོས་ཚོགས་ལའང་སྙན་སེང་བཀའ་ཁྲོལ་ཞུ་དགོས་ཀྱི་ཡོད་རེད། དེ་འདྲའི་ཐོག་ནས་ང་ཚོར་ཡིག་ཆ་གཅིག་ཕེབས་ཡོང་གི་ཡོད་རེད། ད་ལྟ་གྲོས་ཚོགས་ཚོགས་དུས་བརྒྱད་པ་དེ་རིང་ནས་འགོ་བཙུགས་ཏེ་ཕྱི་ཚེས་ ༡༩ བར་དུ་ལས་ཉིན་བརྒྱད་ཀྱི་རིང་ལ་ང་ཚོས་ལས་རིམ་གྱི་སྐྱོང་སྟངས་ལས་རིམ་ག་རེ་ཡོད་མེད་ཀྱི་གནས་སྟངས་འདུག་སེ་ཡིན་ཞུ་རྒྱུ་ཡིན།
དེ་ག་ནང་བཞིན་གྱི་ལས་རིམ་འཁུར་ཕྱོགས་ཀྱི་ཐོག་ལ་ང་ཚོས་ཏོག་ཙམ་འགྱུར་བ་བཏང་ཡོད། དེ་ཡིན་དུས་ནམ་རྒྱུན་ཡིན་ན་ང་ཚོས་གདུང་སེམས་མཉམ་བསྐྱེད་གྲོས་ཆོད་དེ་འགོ་ལ་འཁུར་གྱི་ཡོད་རེད། ཡིན་ནའང་ད་ལྟ་ང་ཚོ་ལས་བསྡོམས་དེ་ཚར་བ་བྱས། དེའི་རྗེས་ལ་ཁྲིམས་བཟོའི་ལས་དོན་བྱས། དེའི་རྗེས་ལ་གདུང་སེམས་མཉམ་བསྐྱེད་དང་གྲོས་ཆོད་གྲོས་འཆར་དེ་ཚོ་འཁུར་རྒྱུ་འདུག་སེ་ཆགས་བསྡད་ཡོད། དེ་ཡིན་དུས་ཚོགས་གཙོ་གཉིས་ཀྱིས་གོ་བསྡུར་བྱས་ནས་ཐག་གཅོད་བྱས་པ་དང་། དེ་ག་ནང་བཞིན་གྱི་འཛིན་སྐྱོང་ལའང་མཁྱེན་བྱས་ཡོད། བཀུར་འོས་སྤྱི་འཐུས་རྣམ་པ་ལ་ལས་རིམ་རགས་ཟིན་དེ་ཕལ་ཆེར་བདུན་ཕྲག་གཅིག་སྔོན་ནས་ཕུལ་ཡོད་རེད། དེ་ཚོའི་ནང་ལོགས་ལ་ང་ཚོས་བཀོད་ཡོད་ཅེས་ཞུ་རྒྱུ་ཡིན། དེ་རིང་གི་གྲོས་ཚོགས་ཚོགས་དུས་བརྒྱད་པའི་ཐོག་ལ་སྤྱི་འཐུས་བརྒྱད་ཀྱིས་ད་ལྟ་དགོངས་ཤོག་འབྱོར་སོང་། དེའི་ནང་ནས་སྤྱི་འཐུས་གཅིག་གྲོས་ཚོགས་ཚོགས་དུས་བརྒྱད་པ་ཆ་ཚང་དགོངས་པ་ཞུས་ཀྱི་འདུག གཞན་སྤྱི་འཐུས་བདུན་གྱིས་ཉིན་མ་གཅིག་ཞུ་མཁན་འདུག ཉིན་མ་གཉིས་ཞུ་མཁན་འདུག ཉིན་མ་བཞི་ཡང་ཞུ་མཁན་དེ་འདྲ་བྱུང་སོང་ཟེར་ནས་འདི་སྙན་སེང་ཞུ་རྒྱུ་ཡིན། ཞེས་འགྲེལ་བརྗོད་གནང་སོང་།
དེའི་རྗེས། སྤྱི་འཐུས་བསྟན་པ་ཡར་འཕེལ་མཆོག་གིས་བོད་མི་མང་སྤྱི་འཐུས་ཟུར་པ་དྭངས་ཤར་ཡོན་ཏན་རྒྱ་མཚོ་མཆོག་དམ་པའི་ཆེད་གཞུང་འབྲེལ་མྱ་ངན་གུས་འདུད་ཀྱི་རྗེས་དྲན་གྲོས་ཆོད་གྲོས་འཆར་བཏོན་གནང་རྗེས། ཚང་མ་སྐུ་བཞེངས་ཐོག་ངག་བཅད་མྱ་ངན་སྐར་མ་གཅིག་རིང་ཞུས་གནང་སོང་། དེ་ནས་སྲིད་སྐྱོང་དང་ཆོས་རིག་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ཆོས་རིག་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་གནང་སོང་། དེ་བཞིན་སྤྱི་འཐུས་རྒྱུན་ལས་ཀྱིས་ཆོས་རིག་ལས་ཁུངས་ཁྱབ་ཁོངས་དང་བཅས་པའི་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྤྱི་འཐུས་རྒྱལ་ལྡོང་ཕུར་པ་རྡོ་རྗེ་མཆོག་གིས་སྙན་སྒྲོན་བཅས་གནང་རྗེས། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་མཆོག་གིས་གོང་གསལ་ལས་བསྡོམས་དང་། ཞིབ་འཇུག་སྙན་ཐོ་སྙན་སྒྲོན་ཟིན་པ་རྣམས་ལ་བགྲོ་གླེང་དགོས་པའི་གྲོས་འཆར་བཏོན་གནང་བ་དང་། དེར་སྤྱི་འཐུས་བསྟན་འཛིན་འཇིགས་བྲལ་མཆོག་གིས་རྒྱབ་སྐྱོར་གནང་སྟེ། ཆོས་རིག་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་ཡོངས་ནས་བགྲོ་གླེང་གནང་འགོ་འཛུགས་གནང་སོང་།
ཉིན་རྒྱབ། སྲིད་སྐྱོང་དང་ནང་སྲིད་བཀའ་བློན་གཅིག་ལྕོགས་སྤེན་པ་ཚེ་རིང་མཆོག་གིས་ནང་སྲིད་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་སྙིང་བསྡུས་སྙན་སྒྲོན་གནང་ནས་དེ་དག་ཐོག་བགྲོ་གླེང་གནང་སོང་། སྤྱི་འཐུས་རྒྱུན་ལས་ཀྱིས་ནང་སྲིད་ལས་ཁུངས་མ་ལག་དང་བཅས་པའི་ཕྱི་ལོ་ ༢༠༢༣་་་༢༤ ལོའི་ལོ་འཁོར་ལས་བསྡོམས་རྒྱས་པར་ཞིབ་འཇུག་གནང་བའི་སྙན་ཐོ་སྤྱི་འཐུས་དགེ་བཤེས་རྔ་བ་གངས་རི་མཆོག་གིས་སྙན་སྒྲོན་གནང་རྗེས། སྤྱི་འཐུས་ཚེ་རིང་དབྱངས་ཅན་མཆོག་གིས་གོང་གསལ་ལས་བསྡོམས་དང་། ཞིབ་འཇུག་གནང་བའི་སྙན་ཐོ་སྙན་སྒྲོན་ཟིན་པ་རྣམས་ལ་བགྲོ་གླེང་དགོས་པའི་གྲོས་འཆར་བཏོན་གནང་བར། སྤྱི་འཐུས་དགེ་བཤེས་ཨ་ཀྲོང་རིན་ཆེན་རྒྱལ་མཚན་མཆོག་གིས་རྒྱབ་སྐྱོར་གནང་བ་དང་སྦྲགས། ནང་སྲིད་ལས་ཁུངས་མ་ལག་དང་བཅས་པའི་ལས་བསྡོམས་ཐོག་སྤྱི་ཡོངས་ནས་བགྲོ་གླེང་གནང་འགོ་འཛུགས་གནང་སོང་།
