ཕྱི་ལོ་༢༠༢༣་ཟླ་༦་ཚེས་༡༩ཉིན་སྤེལ། ཨ་རིའི་ཕྱི་སྲིད་ལས་ཁུངས་ཀྱི་དྲུང་ཆེ་ཨན་ཊོན་ཎི-བྷི་ལིན་ཁེན་ལགས་རྒྱ་ནག་པེ་ཅིང་ལ་ཕེབས་ནས། རྒྱ་ནག་གི་སྲིད་འཛིན་དང་ཕྱི་སྲིད་བློན་ཆེན་ལ་ཐུག་འཕྲད་བྱས་ཏེ། བོད་དང་ཤར་ཏུར་ཀི་སི་ཐན། ཧོང་ཀོང་བཅས་ཀྱི་འགྲོ་བ་མིའི་ཐོབ་ཐང་རྡོག་རོལ་བཏང་དང་གཏོང་བཞིན་ཡོད་པར་སེམས་འཚབ་ཡོད་སྐོར་བརྗོད་ཡོད་འདུག

ཕྱི་ལོ་༢༠༢༣་ཟླ་༦་ཚེས་༡༠ཉིན་སྤེལ། ཉེ་ཆར་རྒྱ་གཞུང་གིས་ཕྱི་རྒྱལ་གྱི་གཉེན་ཆས་དང་གསར་ཁང་ཁག་༣༢་ལྷག་བཀག་སྡོམ་བྱས་ཡོད་པར་གསལ་བསྒྲགས་སྤེལ་འདུག དེའི་ནང་ནས་ཅཱ་ཁྲི་ཇི་སྦི་ཊི(ChatGPT)་དང་རྒྱལ་སྤྱིའི་གསར་ཁང་ཚང་མ་བཀག་ཡོད་འདུག ཕྱི་རྒྱལ་གྱི་ཡུལ་སྐོར་སྤྲོ་འཁྱམ་པ་རྣམས་ཀྱིས་རྒྱ་ནག་ནང་རྒྱ་ནག་གི་གཉེན་ཆས་ཕབས་ལེན་བྱེད་དགོས་པའི་དགོས་འདུན་ཡང་བཏོན་འདུག

ཕྱི་ལོ་༢༠༢༣་ཟླ་༥་ཚེས་༣ཉིན་སྤེལ། ཉེ་ཆར་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱིས་རྒྱལ་ཁབ་ཁག་གི་ནང་གི་ཆོས་དད་རང་དབང་གི་གནས་སྟངས་ཐད་ཀྱི་ལོ་འཁོར་སྙན་ཐོ་ཞིག་བཏོན་ཡོད་ཅིང་། དེའི་ནང་དུ་རྒྱ་གཞུང་གིས་བོད་ནང་གི་བོད་མི་ཚོའི་ཆོས་དད་རང་དབང་ལ་རྡོག་རོལ་མུ་མཐུད་ནས་གཏོང་བཞིན་ཡོད་པ་མ་ཟད་ད་དུང་ཤུགས་ཆེ་རུ་བཏང་ཡོད་སྐོར་དང་། བོད་མི་རྣམས་ཆོས་ཞུ་བ་དང་གནས་སྐོར་འགྲོ་བར་བཀག་དམ་དང་དགོན་པ་དང་སྐུ་བརྙན་གཏོར་བཤིག་བཏང་ཡོད་སྐོར་འགྲེལ་བརྗོད་བྱས་འདུག

ཕྱི་ལོ་༢༠༢༣་ཟླ་༦་ཚེས་༡༦ཉིན་སྤེལ། ཨ་རིའི་ཕྱི་སྲིད་ལས་ཁུངས་ཀྱི་དྲུང་ཆེ་ཨན་ཊོན་ཎི-བྷི་ལིན་ཁེན(Antony Blinken)་ལགས་རྒྱ་ནག་པེ་ཅིང་ལ་འཚམས་གཟིགས་མ་ཕེབས་གོང་། གཞུང་འབྲེལ་མིན་པའི་རྒྱལ་སྤྱིའི་ཚོགས་སྡེ་ཁག་བཞི་བཅུ་ལྷག་གིས་དྲུང་ཆེ་མཆོག་ལ་འཕྲིན་ཡིག་བཏང་ནས་ཁོང་གིས་རྒྱ་གཞུང་གི་ཆེས་མཐོ་མི་སྣ་མཉམ་དུ་ཐུག་འཕྲད་བྱེད་སྐབས་བོད་དང་ཤར་ཏུར་ཀི་སི་ཐན། ཧོང་ཀོང་། རྒྱ་ནག་བཅས་ཀྱི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་གླེང་སློང་བྱེད་དགོས་པའི་འབོད་སྐུལ་ཞུས་འདུག

ཕྱི་ལོ་༢༠༢༣་ཟླ་༥་ཚེས་༢༢་ཉིན་སྤེལ། ཉེ་ཆར་ཉི་ཧོང་ལ་སྟོབས་ཆེན་རྒྱལ་ཁབ་བདུན་གྱི་འགོ་ཁྲིད་འཛོམས་ནས་རྒྱལ་སྤྱིའི་ཐོག་འཕྲད་བཞིན་པའི་ར་ཤི་ཡ་དང་ཡུག་ཁི་རིན་གྱི་དམག་འཁྲུག་དང་། འགྲོ་བ་མིའི་ཐོབ་ཐང་སྐོར་སོགས་ཀྱི་སྐོར་ལ་གླེང་སློང་བྱས་ཡོད་འདུག དེ་བཞིན་ཁོང་ཚོས་བོད་དང་ཤར་ཏུར་ཀི་སི་ཐན་ཀྱི་ནང་དུ་འགྲོ་བ་མིའི་ཐོབ་ཐང་གི་གནས་སྟངས་ཐད་ལ་སེམས་འཚབ་ཡོད་སྐོར་བརྗོད་འདུག

ཕྱི་ལོ་༢༠༢༣་ཟླ་༤་ཚེས་༢༥་ཉིན། ༸ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་དགུང་གྲངས་༣༤ ཕེབས་པའི་འཁྲུངས་སྐར་ཉིན་དང་བསྟུན། ཡུ་རོབ་རྒྱལ་ཁབ་སི་པན་གྱི་གྲོས་ཚོགས་འཐུས་མི་༣༠་ཡིས་རྒྱ་གཞུང་ལ་རྒྱལ་སྤྱིའི་ཁྲིམས་སྒྲིག་གཞིར་བཟུང་པཎ་ཆེན་རིན་པོ་ཆེ་མཆོག་ལ་གཞི་རྩའི་རང་དབང་ལོངས་སུ་སྤྱོད་འཇུག་དགོས་པ་མ་ཟད། ཁོང་དང་ནང་མི། གཞན་བོད་པའི་ཆབ་སྲིད་བཙོན་པ་རྣམས་འཕྲལ་དུ་བཙོན་གྲོལ་གཏོང་དགོས་པའི་དགོས་འདུན་བཏོན་འདུག