ཕྱི་ལོ་༢༠༢༣ ཟླ་༧ ཚེས་༢༤ ཉིན། ལ་དྭགས་ཞི་བའི་ཚལ་གྱི་གསུང་ཆོས་ར་བའི་གནས་སུ། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་ལ་དྭགས་ནང་ཚོགས་དང་དགོན་ཚོགས་ཐུན་མོང་ནས་བརྟན་བཞུགས་བསྟར་འབུལ་ཞུས་སོང་། ལ་དྭགས་ཁུལ་གྱི་དད་ལྡན་སེར་སྐྱ་མི་མང་གཙོས་པའི་ཕྱི་རྒྱལ་ཡུལ་གྲུ་ཁག་ནས་ཕེབས་པའི་ཆོས་ཞུ་བ་ཁྲི་བཞི་ལྷག་འཛོམས་འདུག་ཅིང་། མགོན་པོ་གང་ཉིད་ནས་ད་དུང་ཡང་མི་ལོ་བཅུ་ཕྲག་ལྷག་བཞུགས་རྒྱུ་ཡིན་སྐོར་གྱི་ཞལ་བཞེས་བཟང་པོ་ཐོབ་སོང་།

ཕྱི་ལོ་༢༠༢༣ ཟླ་༧ ཚེས་༡༢ ཉིན། བཞུགས་སྒར་རྡ་ས་མེག་གྷན་ནོར་བུ་གསོལ་མགྲོན་ཁང་གི་ཚོགས་ཁང་དུ། བོད་ཀྱི་བུད་མེད་ལྷན་ཚོགས། བོད་རང་བཙན་སློབ་ཕྲུག་ཚོགས་པ། བོད་རྒྱལ་ཡོངས་མང་གཙོ་ཚོགས་པ། རྒྱལ་སྤྱིའི་བོད་དོན་འབྲེལ་མཐུད་ཁང་གི་གོ་སྒྲིག་འོག སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེ་མཆོག་རྒྱ་གཞུང་གི་བཙོན་ཁང་དུ་འདས་གྲོངས་ཕྱིན་ནས་མི་ལོ་བརྒྱད་འཁོར་བའི་དུས་དྲན་སྲུང་བརྩི་དང་འབྲེལ། འདི་ལོའི་“སྤྲུལ་སྐུ་བསྟན་འཛིན་བདེ་ལེགས་རིན་པོ་ཆེའི་སྙིང་སྟོབས་གཟེངས་རྟགས་”དེ། བོད་ནང་གི་ཚོང་པ་གྲགས་ཅན་དང་སྤྱི་ཚོགས་ཞབས་ཞུ་པ་རྡོ་རྗེ་བཀྲ་ཤིས་ལགས་དང་ཁོང་གི་གཅེན་མོ་མགོན་པོ་སྐྱིད་གཉིས་ལ་ཕུལ་ཡོད་འདུག

ཕྱི་ལོ་༢༠༢༣ཟླ་༧ཚེས་༥ཉིན། བཞུགས་སྒར་རྡ་ས་གཙུག་ལག་ཁང་ཉེ་འགྲམ་གྱི་བོད་ཀྱི་འགྲེམས་སྟོན་ཁང་རྙིང་པའི་ནང་དུ། སྐལ་བཟང་བོད་ཀྱི་སྲོལ་རྒྱུན་ཐང་བྲིས་སྒྱུ་རྩལ་དར་སྤེལ་གླིང༌གིས་༧གོང་ས་མཆོག་གི་འཁྲུངས་སྐར་༨༨ དང་བསྟུན། རྗེ་མི་ལ་བཞད་པའི་རྡོ་རྗེའི་ངོ་མཚར་མཛད་པ་བོད་ཀྱི་ཐང་གའི་ལམ་ནས་འབྲི་བཞེངས་ལེགས་གྲུབ་འགྲེམས་སྟོན་མཛད་སྒོ་ཞིག་ཚོགས་བཞིན་འདུག

ཕྱི་ལོ་༢༠༢༣ ལོའི་ཟླ་༧ ཚེས་༢༡ ཉིན། སྤྱི་ནོར་༧གོང་ས་རྒྱལ་བ་རིན་པོ་ཆེ་མཆོག་གིས་ལ་དྭགས་ནང་པའི་ཚོགས་འདུ་དང་ལ་དྭགས་དགོན་པའི་ཚོགས་འདུ་ཐུན་མོང་ནས་ཇི་ལྟར་གསོལ་འདེབས་ཞུས་པ་ལྟར། ལ་དྭགས་ཁུལ་གྱི་དད་ལྡན་སེར་སྐྱ་མི་མང་གཙོས་པའི་ཕྱི་རྒྱལ་ཡུལ་གྲུ་ཁག་ནས་ཕེབས་པའི་ཆོས་ཞུ་བ་ཁྲི་གསུམ་ལྷག་ལ་ཞི་བའི་ཚལ་གསུང་ཆོས་ར་བ་རུ་རྒྱལ་སྲས་ཐོགས་མེད་བཟང་པོས་མཛད་པའི་རྒྱལ་སྲས་ལག་ལེན་སོ་བདུན་མའི་བཤད་ལུང་གནང་སྐྱོང་མཛད་སོང་།

ཕྱི་ལོ་༢༠༢༣ ཟླ་༧ ཚེས་༦ ཉིན། བོད་མིའི་སྒྲིག་འཛུགས་ཀྱི་གོ་སྒྲིག་འོག བཞུགས་སྒར་རྡ་ས་ཐེག་ཆེན་ཆོས་གླིང་གཙུག་ལག་ཁང་དུ་༸གོས་ས་མཆོག་དབུ་བཞུགས་ཀྱི་ཐོག་ནས། རྡ་སའི་སེར་སྐྱ་མི་མང་རྣམས་ལྷན་འཛོམས་ཀྱིས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་༸རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་ཕྱི་ལུགས་ལྟར་དགུང་གྲངས་༨༨ ལ་ཕེབས་པའི་སྐུའི་འཁྲུངས་སྐར་དུས་ཆེན་དགའ་དད་སྤྲོ་གསུམ་གྱི་ངང་ནས་སྲུང་བརྩི་ཞུས་སོང་།

ཕྱི་ལོ་༢༠༢༣་ཟླ་༦་ཚེས་༢༦ཉིན་སྤེལ། ཉེ་ཆར་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་ཨོ་གླིང་དང་ནིའུ་ཛི་ལེནྜ་ཁུལ་ས་གནས་ཁག་ཏུ་ཕེབས་ནས། རྒྱ་ནག་གཞུང་གིས་བོད་ཀྱི་མི་རིགས་རྩ་བརླག་ཏུ་གཏོང་ཆེད་སྲིད་བྱུས་འདྲ་མིན་ལག་བསྟར་བྱེད་བཞིན་པའི་ཛ་དྲག་གི་གནས་སྟངས་དང་། བོད་ཀྱི་ཆབ་སྲིད་དང་ཁོར་ཡུག་གནས་སྟངས། བོད་ཀྱི་ཆོས་དང་རིག་གཞུང་གི་གལ་གནད་སོགས་ཀྱི་སྐོར་གསུང་བཤད་གནང་ཡོད་པ་མ་ཟད། ཨོ་གླིང་གཙོས་རྒྱལ་ཁབ་ཁག་གིས་བོད་དོན་ཐོག་རྒྱབ་སྐྱོར་ཡོང་བའི་རེ་བ་དང་བོད་རྒྱ་འབྲེལ་མོས་ཡོང་བོར་རྒྱབ་སྐྱོར་ཡོང་བའི་རེ་སྐུལ་ཞུས་འདུག