༧གོང་ས་མཆོག་གིས་སྟོབས་ཆེན་རྒྱལ་ཁབ་བདུན་གྱི་རྡུལ་ཕྲན་མཚོན་ཆ་མེད་པའི་འཛམ་གླིང་བསྐྲུན་རྒྱུའི་འབོད་སྐུལ་ལ་དགའ་བསུའི་གསུང་འཕྲིན་བསྩལ་འདུག

དེ་ཡང་། ཨ་རི་དང་ཁེ་ཎ་ཌ། ཧྥ་རན་སུ། དབྱིན་ཡུལ། ཇར་མན། ཨི་ཊ་ལི། ཉི་ཧོང་བཅས་ལས་གྲུབ་པའི་སྟོབས་ཆེན་རྒྱལ་ཁབ་བདུན་གྱི་འགོ་ཁྲིད་རྣམས་ཉི་ཧོང་གི་གྲོང་ཁྱེར་ཧི་རོ་ཤི་མར་མཉམ་འཛོམས་བྱས་ནས་ཁོང་ཚོའི་ལོ་འཁོར་གྱི་ཚོགས་འདུ་ཚོགས་དེ་ཕྱི་ལོ་༢༠༢༣་ཟླ་༥་ཚེས་༡༩་ནས་༢༡་བར་ཚོགས་ཡོད་འདུག

 ༧གོང་ས་མཆོག་གིས་གསུང་དོན། ངོས་ལ་མཚོན་ན་འཛམ་གླིང་ཁྱོན་ཡོངས་སུ་དམག་འཁྲུག་དང་རྡུལ་ཕྲན་མཚོན་ཆ་མེད་པ་བཟོ་རྒྱུའི་ལས་འགུལ་སྤེལ་མཁན་ཞིག་ཡིན་པའི་ཆ་ནས་ལས་གཞི་འདི་ནི་བཟང་ཕྱོགས་ཀྱི་འགྱུར་བ་ཞིག་ཡིན་པའི་ཡིད་ཆེས་བརྟན་པོ་ཡོད། ཕྱི་ལོ་༢༠༢༢ ཟླ་ ༡ ནང་རྡུལ་ཕྲན་མཚོན་ཆ་ཡོད་མཁན་རྒྱལ་ཁབ་ལྔ་ཡིས་རྡུལ་ཕྲན་མཚོན་ཆའི་དམག་ལ་རྒྱལ་ཁ་སུལའང་མེད་པས་དམག་ནམ་ཡང་བཀྱེ་རྒྱུ་མིན་པའི་ཐུན་མོང་གི་དམ་བཅའ་བཞག་པར་ངོས་ཀྱིས་བསྔགས་བརྗོད་ཞུ་རྒྱུ་བྱུང་།

ད་ལྟའི་ཆར་འཛམ་གླིང་ས་གནས་གང་སར་གསར་བརྗེ་གཡོ་འགུལ་ལངས་ཤིང་ངེས་བརྟན་མེད་པའི་དུས་སྐབས་འདིར་ང་ཚོས་གྲོས་མོལ་དང་ཐབས་བྱུས་ལྡན་པའི་ཐོག་དཀའ་རྙོག་ཞི་འགྲིག་ཡོང་བར་ལྷག་བསམ་རྣམ་གིས་འབད་རྩོལ་ཧུར་སྐྱེད་གནང་དགོས། དེ་ལྟ་བས་ན། སྟོབས་ཆེན་རྒྱལ་ཁབ་བདུན་གྱི་དམ་བཅའ་འདི་ལྟ་བུས་ནུས་པ་ལྡན་པའི་བརྡ་ལན་སྤྲད་ཡོད་པ་མ་ཟད། འགྲོ་བ་མིའི་འཚོ་གནས་ལ་ཉེན་ཚབས་ཆེ་བའི་མཚོན་ཆ་དེ་རིགས་བཀག་སྡོམ་དགོས་པའི་ཛ་དྲག་གནས་སྟངས་ལ་ངོས་འཛིན་གནང་བ་མཚོན།

རྡུལ་ཕྲན་མཚོན་ཆ་མེད་པའི་འཛམ་གླིང་ཞིག་བསྐྲུན་རྒྱུ་ནི་དུས་ཀྱི་དགོས་མཁོ་ཡིན་པ་མ་ཟད་དེ་ཉིད་སྒྲུབ་ནུས་པ་ཞིག་ཀྱང་ཡིན། ང་ཚོ་ཕན་ཚུན་རྟེན་འབྲེལ་གྱི་འཛམ་གླིང་ནང་འཚེ་བ་ལ་བརྟེན་ནས་དམག་འཁྲུག་རྒྱག་ཡུལ་ལས་རྒྱང་ཐག་རིང་པོར་གནས་མཁན་ཚོའང་སྡུག་བསྔལ་མྱོང་དགོས་ཐུག་ཀྱི་ཡོད། ངོས་ཀྱི་རེ་བ་ལ་འགྲོ་བ་མི་ཚང་མས་འགྲོ་བ་མི་རིགས་གཅིག་གྱུར་གྱི་འདུ་ཤེས་ཡིད་ལ་བཅངས་ཏེ་གཞན་སུ་རུང་ལ་རྡུལ་ཕྲན་མཚོན་ཆ་ཐེ་བའི་དྲག་པོའི་གནོད་འཚེ་སྐྱེལ་ན། དེ་ཡིས་ང་ཚོ་ཚང་མར་གནོད་ངེས་པ་བསམ་ཤེས་ཐུབ་པའི་རེ་བ་ཡོད། ཅེས་གསུང་འཕྲིན་ནང་དུ་བཀོད་འདུག

མཐར་མགོན་པོ་མཆོག་གིས་དུས་རབས་ཉི་ཤུ་རྩ་གཅིག་པ་དེ་བཞིན་བྱམས་བརྩེ་དང་ཞི་བདེ། འཆམ་མཐུན་ལྡན་པའི་འཛམ་གླིང་དུ་འགྱུར་བའི་ཐུགས་སྨོན་མཛད་ཡོད་འདུག