མདོ་ཁམས་ཆུ་བཞི་སྒང་དྲུག་དབུ་བརྙེས་ནས་ལོ་༦༣་འཁོར་བའི་ཉིན་མོ་སྲུང་བརྩི་གནང་འདུག

དེ་ཡང་། བཞུགས་སྒར་རྡ་ས་ལྷ་རྒྱལ་རི་ལ་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་པའི་དུས་དྲན་མཛད་སྒོ་ཞིག་ཚོགས་ཡོད་པ་དང་། དེའི་ཐོག་བོད་མི་མང་སྤྱི་འཐུས་དང་། ས་གནས་ཆུ་སྒང་གི་རྒྱུན་ལས་རྣམ་པ། སེར་སྐྱ་མི་མང་སོགས་ཁྱོན་མི་གྲངས་༢༠་ལྷག་འདུ་འཛོམས་འདུག

མདོ་ཁམས་ཆུ་བཞི་སྒང་དྲུག་དབུ་བརྙེས་ནས་མི་ལོ་ཧྲིལ་བོ་༦༣་འཁོར་བའི་དུས་དྲན་ཉིན་མོར་འཛམ་གླིང་གང་སར་ཡོད་པའི་བོད་མི་ཚོས་དུས་དྲན་སྲུང་བརྩི་བྱས་ཡོད་འདུག དེ་ཡང་བཞུགས་སྒར་རྡ་ས་དང་། སྦིར་ནང་ཆེན། མན་སྤར། སུད་སི། ར་ཇི་པུར་། བདེ་སྐྱིད་གླིང་། ཌལ་ཧོར། ཧོན་སུར། མཚོ་པདྨ། མོན་གྷོ། འབྲས་ལྗོངས། བོན་གཞིས། ཀ་སྦུག། སྦིར་སྡེ་དགེ བྷེལ་ཇམ། དོན་གྲུབ་གླིང་། ཨ་རི་ནིའུ་ཡོག་ནིའུ་ཇ་སི་སོགས་ལ་ས་གནས་ཆུ་སྒང་རྒྱུན་ལས་ཀྱིས་དུས་དྲན་ཉིན་མོ་འདི་རྣམ་པ་འདྲ་མིན་ཐོག་ནས་སྲུང་བརྩི་ཞུས་འདུག

མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་༦༣ འཁོར་བའི་ཡོངས་ཁྱབ་གསུང་འཕྲིན་ནང་དུ་འཁོད་དོན། བོད་རྒྱལ་ལོ་ ༢༡༤༨ རབ་གནས་ལྕགས་གླང་ལོའི་ཟླ་ ༥ ཚེས་ ༦ དང༌། ཕྱི་ལོ་ ༢༠༢༡ ཟླ་ ༦ ཚེས་ ༡༦ གི་ཉིན་མོ་འདི་ནི། བོད་ཀྱི་རྒྱལ་ས་ལྷ་སའི་ལྷོ་ཁུལ་ལྕགས་ཚ་གྲི་གུ་ཐང་དུ་མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དབུ་བརྙེས་ནས་མི་ལོ་ཧྲིལ་པོ་ ༦༣ འཁོར་བའི་བོད་ཀྱི་དཔའ་བོའི་ཉིན་མོ་དེ་ཡིན་ལ། མདོ་ཁམས་ཆུ་བཞི་སྒང་དྲུག་གི་ཁྱབ་ཁོངས་ས་གནས་ཡོངས་སུ་རྫོགས་པས་དེ་རིང་ནི་ཉིན་བརྒྱ་དུས་གཅིག་དུས་དྲན་སྲུང་བརྩི་ཞུ་བཞིན་ཡོད།

འདིར་ཆེས་ཐོག་མར་དྲན་གསོ་དང་གུས་འདུད་ཞུ་དགོས་ས་གཙོ་བོ་ནི། ཕྱི་ལོ་ ༡༩༤༥ ནས་ད་བར་བོད་ཁ་བ་ཅན་གྱི་རྒྱལ་བསྟན་ཆབ་སྲིད་མི་རིགས་སྤྱིའི་བདག་དབང་སྲུང་སྐྱོབ་ཆེད་དུ་རྩ་ཆེའི་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་ནས་སྐུ་གཤེགས་པའི་གངས་ལྗོངས་དཔའ་བོའི་ཁྱུ་མཆོག་ཛ་སག་དམག་སྤྱི་ཨ་འབྲུག་མགོན་པོ་བཀྲ་ཤིས་མཆོག་གིས་གཙོས་པའི་ཆུ་སྒང་གི་དཔའ་རྒོད་དམ་པ་རྣམས་དང་། ད་ལྟ་ཞལ་བཞུགས་པའི་རྒྱལ་གཅེས་སྙིང་སྟོབས་དང་ལྷག་བསམ་ལྡན་པ་རྣམས་ཡིན། གོ་སྐབས་འདི་བརྒྱུད་ནས་གཤེགས་ཟིན་པའི་རྒྱལ་གཅེས་དཔའ་རྒོད་ཁོང་ཅག་ལ་ཡིད་གདུང་དྲག་པོའི་སྒོ་ནས་མྱ་ངན་གུས་འདུད་ཞུ་བཞིན་ཡོད་ལ། ཤུལ་ལུས་ལྟོས་བཅས་ཡོངས་ལ་གདུང་སེམས་མཉམ་བསྐྱེད་ཀྱང་སེམས་གཏིང་ནས་ཞུ་བཞིན་ཡོད།

ཕྱི་ལོ་ ༡༩༤༩ ནས་བཟུང་དགྲ་བོ་རྒྱ་དམར་གྱིས་བོད་ས་ཡོངས་རྫོགས་དབང་བསྒྱུར་བྱེད་རྒྱུའི་བསམ་ངན་ཞེ་ལ་བཅངས། བོད་རྒྱལ་ཁབ་ཆེན་མོའི་བདག་དབང་བཙན་གྱིས་འཕྲོག་རྒྱུའི་སྦྱོར་ངན་ལག་ཏུ་བསྟར། བོད་ཡུལ་དུ་བཙན་འཛུལ་བྱེད་འགོ་བཙུགས་པ་སོགས་ཆེས་ཛ་དྲག་དང་གཉན་འཕྲང་ཅན་གྱི་དུས་སྐབས་དེར། མདོ་ཁམས་ཆུ་བཞི་སྒང་དྲུག་གི་ཁྱབ་ཁོངས་རྒྱལ་གཅེས་དཔའ་རྒོད་ཚོས་རང་ས་རང་སྲུང་གི་སྙིང་སྟོབས་དང་ཆོད་སེམས་བརྟན་པོའི་ངང་བཙན་རྒོལ་རྒྱལ་སྐྱོབ་ཆེད་དུ་རང་སྲོག་དམར་པོ་དགྲ་བོའི་རྫས་མདེལ་གྱི་སོ་ཁར་གཏད་ནས། ཐོག་མར་བོད་ཤར་ཕྱོགས་ནས་དགྲ་བོར་འགོག་རྒོལ་རིམ་པར་བྱས་ཤིང༌། མཐར་བོད་ཀྱི་རྒྱལ་ས་ལྷ་སར་བོད་རྒྱལ་ཁབ་ཆེན་མོའི་བདག་དབང་སྲུང་སྐྱོབ་དུ་ཁྲག་གི་རྒྱ་མཚོ་བསྐྱིལ་བ་དང་། རུས་པའི་རི་བོ་བརྩིགས་ནས་དགྲ་བོ་ལ་ཕར་རྒོལ་དང་དམག་འཐབ་དྲག་པོ་བཟོས་ཡོད། དགྲ་དམག་ཁྲི་ཚོ་མང་པོ་དཔུང་སྣོན་འབྱོར་ནས་མང་སྣེ་ཉུང་གིས་མ་བརྟན་པའི་དུས་སྐབས་སུའང་། རྒྱལ་གཅེས་དཔའ་རྒོད་ཚོས་དམག་འཐབ་ལས་རྒྱལ་ཁ་ལོན་ཐུབ་པའི་རེ་བ་དང་། སྙིང་སྟོབས། ཆོད་སེམས། ལར་ཞེན་སོགས་ལ་འགྱུར་བ་བཏང་མ་མྱོང་ལ། ཕྱི་ལོ་ ༡༩༥༨ ཟླ་ ༢ ཚེས་ ༡༨ ཉིན། གངས་ཅན་དཔའ་བོའི་ཁྱུ་མཆོག་དམག་སྤྱི་ཛ་སག་ཨ་འབྲུག་མགོན་པོ་བཀྲ་ཤིས་མཆོག་གིས་གཙོས་མདོ་ཁམས་ཡུལ་གྱི་གནད་ཡོད་མི་སྣ་བཞི་བཅུ་ཙམ་བོད་ཀྱི་རྒྱལ་ས་ལྷ་སའི་ཨ་འབྲུག་ཚང་གི་མཆོད་ཁང་ནང་གསང་སྟབས་ཀྱིས་འཛོམས་ཏེ། བོད་རྒྱལ་ཁབ་ཆེན་མོའི་རང་དབང་རང་བཙན་གྱི་བདག་དབང་སྲུང་སྐྱོབ་ཆེད་ལུས་སྲོག་ལོངས་སྤྱོད་དང་བཅས་བ་བློས་བཏང་སྟེ། མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་ཇི་ལྟར་གསར་འཛུགས་དགོས་མིན་སྐོར་གྱི་ཞིབ་གྲོས་དང་། དགྲ་བོ་ལ་རྒོལ་ལན་སློག་རྒྱུའི་མནའ་གན་མཐུ་མོ་ཆེ་བཞག་ནས་བོད་རྒྱལ་ཁབ་ཆེན་མོ་སྲུང་སྐྱོབ་བྱེད་རྒྱུར་ཆེས་ཐོག་མའི་དམ་བཅའ་དང་པོ་དེ་ཕུལ་ཡོད་པ་རེད།

ཕྱི་ལོ་༡༩༥༨ ཟླ་༦ ཚེས་༡༦ ས་ཕོ་ཁྱི་ལོའི་ཟླ་བ་༥ ཚེས་པ་བདུན་གྱི་ཉིན་མོར། ཡར་འབྲོག་གཡུ་མཚོའི་ཕར་འགྲམ། གཉལ་ལྷུན་རྩེ་རྫོང་གི་ཚུར་འགྲམ། ཡར་ཀླུང་ཕོ་བྲང་གི་ཕར་ནང་། མཚོ་སྣའི་ཐང་ཆེན་གྱི་ཡར་ནང་། རྒྱལ་ས་ལྷ་སའི་ལྷོ་ཁུལ། དཔལ་མགོན་པོ་ནག་པོའི་བླ་མཚོ། ལྕགས་ཚ་གྲི་གུའི་མཚོ་ཁ། ཐང་ཆེན་བཀྲ་ཤིས་མཐོང་སྨོན་གླིང་དུ་ཆུ་སྒང་གི་དཔའ་རྒོད་ཚོས་བོད་གངས་ཅན་ལྗོངས་ཀྱི་རྒྱལ་བསྟན་ཆབ་སྲིད་དང་བཅས་པའི་བདག་དབང་སྲུང་སྐྱོབ་ཆེད་དུ། བོད་བཙན་པོའི་དུས་སྐབས་ཀྱི་སྙིང་ཁམས་དང་སྟོབས་ཤུགས་སླར་གསོ་བྱས་ཏེ། མདོ་ཁམས་ཆུ་བཞི་སྒང་དྲུག་བསྟན་སྲུང་དང་བླངས་དམག་གི་སྒྲིག་འཛུགས་དངོས་སུ་དབུ་བརྙེས་ཡོད། ཅེས་ལོ་རྒྱུས་མདོར་བསྡུས་ཤིག་བཀོད་འདུག

དེ་བཞིན་༧སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས་དུས་ཀུན་ལམ་སྟོན་གནང་དོན་ལྟར་བོད་ཀྱི་བྱུང་རབས་ལོ་རྒྱུས་ཁྲོད་ཀྱི་རྒྱལ་གཅེས་དཔའ་བོ་དཔལ་བོ་འདས་གསོན་ཡོངས་ཀྱི་ལོ་རྒྱུས་བསྡུ་སྒྲིག་དང༌། བོད་བསྟན་སྲིད་ཆེད་ལུས་སྲོག་ལོངས་སྤྱོད་དང་བཅས་པ་བློས་བཏང་གནང་མྱོང་མཁན་གྱི་རྒན་རབས་ཚོར་བཀའ་དྲིན་རྗེས་དྲན་ཆེད་རྒྱུན་དུ་ནས་ཆུ་སྒང་རྒན་གསོ་ཁང་དུ་རྒན་རབས་ཚོར་ལྟ་སྐྱོང་གང་ལེགས་བྱེད་བཞིན་ཡོད་པ་ཙམ་དུ་མ་ཟད། རྒན་རབས་གྲངས་༡༥༧ ལ་འཚོ་སྣོན་རོགས་སྐྱོར་ལོ་ལྟར་འབུལ་བཞིན་ཡོད། དེ་བཞིན་དྷ་ས་ཆུ་སྒང་རིག་གནས་འཛིན་གྲྭར་སྐད་ཡིག་སློབ་སྦྱོང་སྤྲོད་བཞིན་པ་མ་ཟད། མ་འོངས་བོད་ཀྱི་སོན་རྩར་གྱུར་པའི་སློབ་ཕྲུག་ཚོར་སྐུལ་ལྕག་དང་རྒྱབ་སྐྱོར་ཆེད་ལོ་ལྟར་མཐོ་སློབ་འགྲིམ་མཁན་གྱི་སློབ་མ་༢༠ དང༌། གཙུག་ལག་རབ་འབྱམས་པ་འགྲིམ་བཞིན་པའི་གཞོན་སྐྱེས་༢༠ བཅས་བསྡོམས། མཐོ་རིམ་སློབ་ཕྲུག་ ༡༠༠ ཐམ་པར་སློབ་ཡོན་འབུལ་བཞིན་པའི་ལས་དོན་འདི་ཡང་ྋགོང་ས་མཆོག་གི་བཀའི་ཆ་ཤས་ཙམ་སྒྲུབ་ཐབས་ལ་འབད་རྩོན་བྱས་པ་ཡིན། ཞེས་བཀོད་འདུག

ད་ལྟར་གཞིས་བཞུགས་སྤུན་ཟླ་ཚོ་མུ་མཐུད་ནས་བཙོན་འཇུག་དང་། རྡུང་རྡེག མནར་གཅོད་སྣ་མང་སོགས་མྱོང་བཞིན་ཡོད། བོད་རྒྱལ་ཁབ་ཀྱི་བདག་དབང་སླར་གསོའི་ཆེད་དུ་མི་ལོ་༦༣ ནང་བོད་མི་རིགས་ཀྱིས་ཚེ་སྲོག་གི་འགྲོ་གྲོན་བཏང་ནས་དུས་རབས་ཤིག་གི་རྫོགས་ཚིག་བཀོད་བཞིན་ཡོད་པ་འདི་འཛམ་གླིང་མཉམ་འབྲེལ་རྒྱལ་ཚོགས་གཙོས་དྲང་བདེན་ལ་དགའ་བའི་བོད་དོན་རྒྱབ་སྐྱོར་གནང་མཁན་རྒྱལ་ཁབ་དང་། ཚོགས་སྒེར་གྱི་སྐྱེ་བོ་ཡོངས་ཀྱིས་བོད་རྒྱའི་དཀའ་རྙོག་སེལ་སླད་དུ་བོད་དོན་རྒྱབ་སྐྱོར་སྔར་ལྷག་གནང་རོཊ་ཞེས་པའི་འབོད་སྐུལ་ནན་མོ་མུ་མཐུད་ཞུ་བཞིན་ཡོད། ཅེས་སོགས་བཀོད་འདུག