སྤྱི་ལྷན་གྱིས་རྒྱལ་སྤྱིའི་ཚོགས་སྡེར་པཎ་ཆེན་མཆོག་མྱུར་དུ་གློད་བར་རོགས་སྐྱོར་བྱེད་པའི་འབོད་སྐུལ་ཞུས་འདུག

གོང་ཚེས་ཉིན། ༸ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་དགུང་ལོ་དྲུག་ནས་རྒྱ་གཞུང་གིས་བཙན་ཁྲིད་བྱས་ནས་མི་ལོ་༢༦ ཕྱིན་ཀྱང་། ད་དུང་ཁོང་གང་དུ་གནས་ཡོད་མེད་དང་གནས་སྟངས་སྐོར་སོགས་གང་ཡང་ཤེས་རྟོགས་བྱུང་མེད་པར་བརྟེན། བོད་མི་མང་སྤྱི་འཐུས་ལྷན་ཚོགས་ཀྱིས་རྒྱལ་སྤྱིའི་ཚོགས་སྡེ་ཁག་དང་། རྒྱལ་ཁབ་ཀྱི་དབུ་ཁྲིད། བོད་དོན་རྒྱབ་སྐྱོར་བ་སོགས་ལ་པཎ་ཆེན་ཆུང་སྲིད་རིན་པོ་མཆོག་གང་དུ་ཡོད་མེད་འཚོལ་ཞིབ་དང་མྱུར་དུ་གློད་གྲོལ་ཡོང་ཐབས་སུ་རྒྱབ་སྐྱོར་གནང་བའི་འབོད་སྐུལ་ཞུས་འདུག

དེ་ཡང་། བོད་མི་མང་སྤྱི་འཐུས་ལྷན་ཚོགས་ཀྱི་བསྒྲགས་གཏམ་ནང་དུ་འཁོད་དོན། ༸གོང་ས་༸སྐྱབས་མགོན་སྐུ་ཕྲེང་བཅུ་བཞི་པ་ཆེན་པོ་མཆོག་གིས་ ༡༩༩༥ ལོའི་ཟླ་ ༥ ཚེས་ ༡༤ ཉིན་དགེ་འདུན་ཆོས་ཀྱི་ཉི་མ་མཆོག་པཎ་ཆེན་སྐུ་ཕྲེང་བཅུ་གཅིག་པར་ངོས་འཛིན་གྱིས་རྗེ་བཙུན་བསྟན་འཛིན་དགེ་འདུན་ཡེ་ཤེས་འཕྲིན་ལས་ཕུན་ཚོགས་དཔལ་བཟང་པོ་ཞེས་སུ་མཚན་གསོལ་གྱི་མཛད་སྒོ་ཚུགས་གནང་གིས་འཛམ་གླིང་ཡོངས་ཁྱབ་ཏུ་གསལ་བསྒྲགས་གནང་བ་ལྟར་གཞིས་བྱེས་བོད་མི་རྣམས་ཀྱིས་དད་འདུན་དང་གུས་བཀུར་ཚད་མེད་ཞུས་ཡོད། དེ་ནས་ཉིན་གསུམ་གྱི་རྗེས་ཏེ་ཕྱི་ལོ་ ༡༩༩༥ ཟླ་ ༥ ཚེས་ ༡༧ ཉིན་རྒྱ་ནག་དམར་གཞུང་གིས་ཡང་སྲིད་རིན་པོ་ཆེ་མཆོག་དང་། ཁོང་གི་ཡབ་ཡུམ། ཡང་སྲིད་བརྩད་འཚོལ་འགན་ཁུར་བ་བྱ་བྲལ་རིན་པོ་ཆེ་བཅས་བཙན་ཁྲིད་ཀྱིས་གར་སོང་ཆ་མེད་དུ་གྱུར་ནས་ད་བར་མི་ལོ་ ༢༦ ཧྲིལ་པོར་འཁོར་ཡོད་པ་དང་། རྒྱ་གཞུང་ནས་ཆབ་སྲིད་ཀྱི་དགོས་མཁོ་ཁོ་ནར་དམིགས་ཏེ་རྒྱལ་མཚན་ནོར་བུ་ཞེས་པའི་ཁྱེའུ་ཞིག་པཎ་ཆེན་སྐུ་ཕྲེང་བཅུ་གཅིག་པ་ཡིན་ཚུལ་གྱིས་པཎ་ཆེན་ཨེར་ཏི་ནི་ཆོས་ཀྱི་རྒྱལ་པོ་ཞེས་པ་བཏགས་ཏེ་བེད་སྤྱོད་བྱེད་བཞིན་ཡོད་ཀྱང་། པཎ་ཆེན་སྐུ་ཕྲེང་རིམ་བྱོན་གྱི་གདུལ་བྱ་བོད་རྒྱ་ཆེའི་མང་ཚོགས་ནས་གུས་བཀུར་དང་ངོས་ལེན་བྱེད་ཀྱི་མེད།

པཎ་ཆེན་སྐུ་ཕྲེང་བཅུ་པ་ཆེན་པོའི་ཡང་སྲིད་འཁྲུལ་མེད་དགེ་འདུན་ཆོས་ཀྱི་ཉི་མ་མཆོག་རྒྱ་གཞུང་གིས་བཙན་ཁྲིད་བྱས་ཏེ་མི་ལོ་ ༢༦ ཕྱིན་པའི་རིང་རྒྱལ་སྤྱིའི་ནང་གི་གཞུང་དང་གྲོས་ཚོགས། འགྲོ་བ་མིའི་ཐོབ་ཐང་སྡེ་ཚན་ཁག་དུ་མ་ནས་རྒྱུན་མ་ཆད་པར་འགན་ཁུར་བཞེས་གནང་གིས་སྙན་ཐོ་རིམ་པར་བཏོན་པ་དང་། རྒྱ་གཞུང་ལ་ཐད་ཀར་རེ་འདུན་བཏོན་པ། སྐབས་བསྟུན་གྱི་ལས་འགུལ་ལ་མཉམ་ཞུགས་གནང་བ་སོགས་རེ་རེ་བཞིན་སྨོས་མ་དགོས་པར་ཐུགས་རྗེ་ཆེ་ཞུ་རྒྱུ་དང་། སླར་ཡང་གཤམ་གསལ་གྱི་གལ་ཆེའི་དོན་གནད་ཁག་ལ་ནན་སྐུལ་ཞུ་རྒྱུ།

༡༽ དེང་རབས་ཚན་རྩལ་འཕྲུལ་རིགས་ཀྱི་དངོས་པོ་ཡར་རྒྱས་ཕྱིན་ཏེ་ས་ཡི་གོ་ལ་འདིའི་ཐོག་གི་གནས་བབ་ཕལ་ཆེར་གར་ཡོད་གར་གནས་སྐོར་ཕན་ཚུན་ངོས་འཛིན་ཐུབ་པའི་ཚད་དུ་སླེབས་ཡོད་ནའང་། འགྲོ་བ་མི་ཡི་གཟུགས་སུ་གྲུབ་པ་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་གི་གནས་བབ་ཙམ་ཡང་ཤེས་མི་ཐུབ་པར་མི་ལོ་ ༢༦ ཕྱིན་པ་འདི་ནི། རྒྱ་ནག་དམར་གཞུང་ནི་སྦས་སྐུང་གི་གཡོ་སྒྱུ་ལ་ཆེས་བྱང་ཆུབ་པའམ། ཡང་ན་པཎ་ཆེན་རིན་པོ་ཆེ་མཆོག་སྐུ་འཚོ་བཞུགས་མེད་པ་བཟོས་ཚར་བའི་གནས་སྟངས་གང་རུང་ལས་མ་འདས་པས་འབྲེལ་ཡོད་ཁག་ནས་པཎ་ཆེན་རིན་པོ་ཆེ་མཆོག་ཞལ་བཞུགས་ཡོད་མེད་སྐོར་ཡིད་ཆེས་འཕེར་བའི་བརྩད་གཅོད་གནང་ཐབས་ཀྱི་རོགས་མགོན་སྐྱབས་འཇུག་ཡོང་བ་ཞུ།

༢༽ པཎ་ཆེན་རིན་པོ་ཆེ་མཆོག་མི་ལོ་ ༢༦ རིང་གར་སོང་ཆ་མེད་དུ་སོང་བ་འདི་ནི་ལོ་རྒྱུས་ཐོག་བྱུང་མ་མྱོང་བ་ལྟ་བུ་ཞིག་ཡིན་པས་འཛམ་གླིང་ལོ་རྒྱུས་ཀྱི་ཟིན་ཐོའི་ནང་འགོད་དགོས་པ་ཞིག་ཆགས་ཡོད་པས་དེ་ལུགས་མཐུན་འགྱུར་གནང་ཐབས་ཡོང་བ་ཞུ།

༣༽ གཞིས་བྱེས་བོད་མི་ཡོངས་ཀྱིས་༸གོང་ས་༸སྐྱབས་མགོན་ཆེན་པོ་མཆོག་གིས་ངོས་འཛིན་གནང་བའི་པཎ་ཆེན་དགེ་འདུན་ཆོས་ཀྱི་ཉི་མ་ལས་རྒྱ་ནག་དམར་གཞུང་གིས་ཆེད་དུ་བསྐོས་པའི་རྒྱལ་མཚན་ནོར་བུར་དད་གུས་དང་བརྩི་བཀུར་བྱེད་ཀྱི་མེད་པ་ལྟར། རྒྱ་ནག་དམར་གཞུང་དང་འབྲེལ་ལམ་གནང་སྐབས་དེ་ལུགས་གོ་བརྡ་འཕྲོད་ངེས་གནང་རོགས་ཞུ།

༤༽ ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་རྒྱ་གཞུང་གིས་བཙོན་འཇུག་བྱས་པ་ནས་བཟུང་། ཨ་རི་དང་། རྗར་མི་ནི། ཨིན་ཡུལ་སོགས་ཀྱིས་གཙོས་རྒྱལ་སྤྱིའི་ཁྱོན་ཡོངས་ཀྱི་རྒྱལ་ཁབ་མང་དག་ཅིག་གི་དབུ་ཁྲིད་རྣམ་པས། རྒྱ་གཞུང་ལ་ཀུན་གཟིགས་པཎ་ཆེན་ཆུང་སྲིད་རིན་པོ་ཆེ་སྐུ་འཚོ་བཞུགས་ཡོད་མེད་ཀྱི་གནས་ཚུལ་གསལ་སྟོན་དགོས་པའི་དགོས་འདུན་བཏོན་གནང་ཡོད་ནའང་། རྒྱ་གཞུང་གིས་དབུ་སྐོར་རྫུན་གཏམ་འབའ་ཞིག་ལ་བརྟེན་ནས་གཡོལ་ཐབས་བྱས་ཡོད། དེ་བཞིན་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་ཆེན་སྔ་རྗེས་དང་། འཛམ་གླིང་གི་རྒྱལ་ཁབ་མང་དག་ཅིག་གི་གྲོས་ཚོགས་ནང་ཀུན་གཟིགས་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་འཕྲལ་དུ་གློད་གྲོལ་དགོས་པའི་གྲོས་ཆོད་བཞག་ཡོད་པས། རྒྱབ་སྐྱོར་གནང་མཁན་གཞུང་སྒེར་ཡོངས་ལ་བོད་མི་མང་སྤྱི་འཐུས་ལྷན་ཚོགས་ནས་གཞིས་བྱེས་བོད་མི་ཡོངས་ཀྱིས་ཚབ་ཞུས་ནས་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་། མ་འོངས་པར་ཀུན་གཟིགས་པཎ་ཆེན་རིན་པོ་མཆོག་གློད་གྲོལ་མ་བྱུང་གི་བར་སྔར་བཞིན་རྒྱ་དམར་གཞུང་ལ་དགོས་འདུན་དང་སྐུལ་ལྕག་ངེས་གནང་ཡོང་བའི་འབོད་སྐུལ་ཡང་ཞུ་བཞིན་ཡོད།

༥༽ བོད་མི་ཡོངས་ཀྱི་རེ་འདུན་ཉག་གཅིག་ནི་པཎ་ཆེན་སྐུ་ཕྲེང་བཅུ་གཅིག་པ་ཆེན་པོ་མཆོག་རྒྱ་གཞུང་གི་བཙན་གནོན་འོག་ནས་ཐར་ཏེ་ཞལ་མཇལ་གསུང་ཐོས་ཐོག་གདན་ས་བཀྲ་ཤིས་ལྷུན་པོར་སྐུ་གོང་མའི་གསེར་ཁྲིར་༸ཞབས་སོར་འཁོད་རྒྱུ་དེ་ཡིན་པ་ལྟར། དེ་འདྲའི་སྐལ་བཟང་གི་ཉི་མ་གང་མགྱོགས་འཆར་ཐུབ་པའི་ཆེད་རོགས་མགོན་སྐྱབས་འཇུག་ལྷོད་ཡེངས་མེད་པར་གནང་རོགས་ཞུ་རྒྱུ་ཡིན། ཞེས་གསུངས་འདུག