བུད་མེད་སྒེར་ལངས་ཐེངས་ ༥༩ སྲུང་བརྩི།

དེ་ཡང་ཕྱི་ཚེས་༡༢ ཉིན། བཞུགས་སྒར་དྷ་ས་མེག་གྷན་དཔའ་བོའི་རྡོ་རིང་མདུན་དུ་དབུས་བོད་ཀྱི་བུད་མེད་ལྷན་ཚོགས་ཀྱི་གོ་སྒྲིག་འོག བོད་ཀྱི་བུད་མེད་སྒེར་ལངས་ཆེན་པོ་ཐེངས་ ༥༩ པ་དེ་སྲུང་བརྩི་དང་བསྒྲགས། སྐུ་མགྲོན་གཙོ་བོ་བོད་ཁྱིམ་སྤྱི་ཁྱབ་ཀྱི་ཤེས་ཡོན་འགན་འཛིན་ཟུར་པ་བསོད་ནམས་སྒྲོལ་དཀར་དང་། དམིགས་བསལ་སྐུ་མགྲོན་བོད་ཀྱི་བུད་མེད་ལྷན་ཚོགས་ཀྱི་སློབ་སྟོན་པ་བཀའ་ཟུར་རིན་ཆེན་མཁའ་འགྲོ་དང་བོད་ཀྱི་བུད་མེད་ལྷན་ཚོགས་ཀྱི་རྒྱུན་ཟུར་དང་སྤྱི་ཟུར། སྙིང་སྟོབས་གླིང་གི་འགན་འཛིན་ངག་དབང་ལྷ་མོ། དེ་བཞིན་སྤྱི་འཐུས་དང་སྤྱི་ཟུར་ཁག་ཅིག་དང་། སློབ་མ་དང་བཙུན་མ། དྷ་སའི་ཁུལ་གྱི་བུད་མེད་མང་དག་ཅིག་བཅས་ཀྱིས་ངྷ་ཤོལ་ཀ་ཅ་རི་བར་དུ་ཞི་འབོད་ཀྱི་གོམ་སྒྲོལ་ལས་འགུལ་གནང་སོང་།

དེ་བཞིན་མཛད་སྒོའི་ཐོག་མར།  བོད་ཀྱི་བུད་མེད་ལྷན་ཚོགས་ཀྱི་སྤྱི་ཁྱབ་ཚོགས་གཙོ་སྒྲོལ་མ་དབྱངས་ཅན་གྱིས་བུད་མེད་སྒེར་ལངས་ཀྱི་དུས་དྲན་ཐེངས་༥༩ པའི་ཡོངས་ཁྱབ་གཏམ་བཤད་སྒྲོགས་སྦྱང་བྱས་པའི་ནང་། “དེ་རིང་ནི་མི་ལོ་༥༩ འཁོར་བའི་བུད་མེད་སྒེར་ལངས་ཀྱི་ཉིན་མོ་སྲུང་བརྩི་ཞུ་རྒྱུའི་དུས་དྲན་གྱི་ཉིན་མོ་ཞིག་ཡིན། དེ་ཡང་བོད་མིའི་གནས་སྟངས་ལ་ཡིད་སྐྱོ་དང་། སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གི་བླ་ན་མེད་པའི་དབུ་ཁྲིད་འོག་བོད་མི་རྣམས་ཀྱི་ལེགས་བྱས་ཀྱི་གྲུབ་འབྲས་ལ་ཡི་རངས་གཉིས་ཟུང་འབྲེལ་གྱི་སྒོ་ནས་སྲུང་བརྩི་ཞུ་རྒྱུ་ཡིན། གཞིས་ལུས་དང་བཙན་བྱོལ་བོད་ཀྱི་བུད་མེད་ཡོངས་ནས་བོད་བསྟན་སྲིད་མི་རིགས་བཅས་ཀྱི་དོན་དུ་རང་སྲོག་ཕུལ་བའི་བོད་ཀྱི་དཔའ་མོ་རྣམས་ཀྱི་སྙིང་སྟོབས་དང་ལྷག་བསམ་ལ་ཡི་རངས་ཀྱིས་བོད་མིའི་རང་དབང་གི་ཆེད་འཐབ་རྩོད་བྱེད་རྒྱུའི་དམ་བཅའ་བརྟན་པོ་བཟུང་བཞིན་ཡོད།”ཅེས་སོགས་འཁོད་འདུག་པ་དང་།

དེ་རྗེས་དམིགས་བསལ་སྐུ་མགྲོན་བཀའ་ཟུར་རིན་ཆེན་མཁའ་འགྲོས་བརྗོད་དོན། “ང་ཚོས་ ༡༩༥༩ ཉིན་མོ་དེར་ངོ་རྒོལ་གྱི་ཉིན་མོ་ཧ་ཅང་གལ་ཆེན་པོ་ཞིག་ཏུ་བརྩི་ཡི་ཡོད་སྟབས་འདིར་འཛོམས་པ་རེད་། དེ་སྔོན་བོད་ནང་རྒྱ་མིས་བཙན་འཛུལ་མ་བྱས་གོང་རྒྱལ་ཁབ་གཞན་གྱི་གནས་སྟངས་རྟོགས་མཁན་དང་། དེང་སང་ནང་བཞིན་སློབ་སྦྱོང་ཡོད་མཁན་གྱི་བུད་མེད་མང་པོ་དེ་ཙམ་བྱུང་མེད་རུང་། སོ་སོའི་རྒྱལ་ཁབ་དེ་སོ་སོར་དབང་གི་ཡོད་པ་མཁྱེན་པའི་ཐོག་ནས་ལུས་སྲོག་བློས་གཏོང་བྱས་ཏེ། རྒྱ་ནག་གི་བཙན་འཛུལ་ལ་ངོ་རྒོལ་གྱིས་རྒྱ་མི་རྣམས་སོ་སོའི་ལུང་པར་ལོག་དགོས་པ་དང་། བོད་རྒྱལ་ཁབ་བོད་པར་དབང་བའི་འབོད་སྒྲ་བསྒྲགས་ཤིང་། ད་ལྟའི་བུད་མེད་སློབ་སྦྱོང་ཡོད་མཁན་དང་ཕྱིའི་རྒྱལ་ཁབ་ཀྱི་གནས་སྟངས་རྟོགས་མཁན་ཚོའི་ནང་ལ་དེ་སྔོན་གྱི་དཔའ་མོ་ཚོ་ནང་བཞིན་བསམ་བློ་གཏོང་ཐུབ་མཁན་མེད་ཚེ་ཡོད་པ་བཟོ་རྒྱུ་གལ་ཆེ་སྐོར་དང་། ད་ལྟའི་དུས་སྐབས་འདི་ལྷོད་ལྷོད་ངང་ཡིན་ལ་མིན་ལ་བྱས་ཏེ་གཏན་ནས་སྡོད་ཁོམ་མེད་པར་བོད་རྩ་དོན་གྱི་ཆེད་དུ་འབད་འབུངས་བྱེད་དགོས།" ཅེས་བརྗོད་སོང་།

དེ་རྗེས་སྐུ་མགྲོན་གཙོ་བོ་བོད་ཁྱིམ་སྤྱི་ཁྱབ་ཤེས་ཡོན་འགན་འཛིན་ཟུར་པ་བསོད་ནམས་སྒྲོལ་དཀར་གྱིས་བརྗོད་པར། “བོད་ཀྱི་བུད་མེད་ལྷན་ཚོགས་འདི་ང་ཚོ་བོད་པ་ཡིན་ན་གཅིག་སྤོབས་པ་སྐྱེ་དགོས་པའི་ཚོགས་པ་གནད་འགག་ཆེན་པོ་ཞིག་ཆགས་ཡོད་རེད་བསམ་གྱི་འདུག དེ་ཆགས་ཡ་དེ་བོད་ལ་བུད་མེད་དཔའ་མོ་ཚོས་སྐུ་ལས་བསྐྱོན་པ་དང་། རྒྱ་གར་ལ་ཕེབས་ནས་སླར་གསོ་གནང་སྟེ་དེའི་རྗེས་སུ་མུ་མཐུད་བུད་མེད་མང་པོ་ཞིག་གིས་སྐུ་ངལ་འཛེམས་མེད་ཐོག་སྐུ་ལས་བསྐྱོན་པའི་གྲུབ་འབྲས་ཤིག་རེད་བསམ་གྱི་འདུག དེར་བརྟེན་དེ་རིང་ང་ཚོས་ཉིན་མོ་འདིར་ཁོང་རྣམ་པས་སྐུ་ལས་བསྐྱོན་པར་རྗེས་སུ་ཡི་རངས་དང་དྲན་སྐུལ་ཞུ་བའི་དུས་ཚོད་ཅིག་ཆགས་ཡོད་རེད་”ཅེས་བརྗོད་སོང་།

དེ་མིན་ཞི་བའི་གོམ་སྒྲོལ་སྐད་འབོད་གནང་སྟེ་ངྷ་ཤོལ་ཀ་ཅ་རི་ནས། རྒྱུན་ལས་ཟུར་བ་ངག་དབང་ལྷ་མོའི་གཏམ་བཤད་དུ། "ག་རེ་བྱས་ནས་ང་ཚོས་བུད་མེད་སྒེར་ལངས་བྱེད་དགོས་སོང་པ་རེད། ཁོང་ཚོའི་དམ་བཅའ་ནི་ད་ལྟ་ང་ཚོས་འགྲུབ་ཡོད་དམ་མེད་ཅེས་ཐུགས་ལ་འཇོག་རོགས་གནང་། མ་འོངས་པར་ང་ཚོས་འཕྱ་གྲུ་མཉམ་འདེགས་གནང་རོགས་གནང་། "ཞེས་བརྗོད་སོང་།

མཐར། ཕྱི་ལོ་ ༡༩༥༩ ལོའི་ཟླ་ ༣ ཚེས་ ༡༢ ཉིན་བོད་ཀྱི་རྒྱལ་ས་ལྷ་སར་བོད་ཀྱི་བུད་མེད་རྣམས་ཀྱིས་བོད་རྒྱལ་ཁབ་ཀྱི་བདག་དབང་སྲུང་སྐྱོབ་ཆེད་རྒྱ་དམར་གྱི་དབང་བསྒྱུར་དང་བཙན་གནོན་ལ་ཞི་བའི་ངོ་རྒོལ་སྒེར་ལངས་བྱས་ནས་ལོ་ངོ་ ༥༩ འཁོར་བའི་ཉིན་མོ་དེ་ཡིན་པ་བཅས།།