17
Thu, Oct

༢༠༡༩་ལོའི་ཟླ་༡༠་ཚེས་༡་ཉིན། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། ཕྱི་འབྲེལ་དྲུང་ཆེ་དྭགས་པོ་བསོད་ནམ་ནོར་བུ་ལགས། དྲིལ་བསྒྲགས་དྲུང་ཆེ་ཨརྱ་ཚེ་དབང་རྒྱལ་པོ་ལགས་གསར་འགོད་བསྒྲགས་གནང་སྐབས།

བོད་དོན་གསར་འགྱུར།
Typography

༢༠༡༩་ལོའི་ཟླ་༡༠་ཚེས་༡ ཉིན། བཞུགས་སྒར་རྡ་ས་བོད་མིའི་སྒྲིག་འཛུགས་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། ལྔ་དང་ལྔ་བཅུའི་གཞོན་སྐྱེས་ཀྱི་མགྲིན་ཚབ་པ་དྲུག་བདམས་ཐོན་བྱུང་བའི་ཐོག་གསར་འགོད་གསལ་བསྒྲགས་ཤིག་གནང་སོང་།

དེ་ཡང་། གོང་ཚེས་ཉིན། གངས་སྐྱིད་ཕྱི་དྲིལ་ལྷག་པ་ཚེ་རིང་དྲན་རྟེན་ཚོགས་ཁང་དུ། བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་། ཕྱི་འབྲེལ་དྲུང་ཆེ་དྭགས་པོ་བསོད་ནམ་ནོར་བུ་ལགས། དྲིལ་བསྒྲགས་དྲུང་ཆེ་ཨརྱ་ཚེ་དབང་རྒྱལ་པོ་ལགས་བཅས་ཀྱིས། ཉེ་སྔོན་ལྔ་དང་ལྔ་བཅུ་གཞོན་སྐྱེས་ཚོགས་འདུ་ཚོགས་སྐབས། གཞོན་སྐྱེས་ཀྱི་མགྲིན་ཚབ་པ་ལྔ་འདེམས་རྒྱུ་ཡིན་པར་གསལ་བསྒྲགས་ཡོད་པ་ཇི་བཞིན། དེ་རིང་དངོས་སུ་བདམས་ཐོན་བྱུང་བའི་གཞོན་སྐྱེས་ལྔ་ཡི་ཐོག་གསལ་བསྒྲགས་ཤིག་སྤེལ་སོང་།

ཐོག་མར། སྲིད་སྐྱོང་མཆོག་གིས་མགྲིན་ཚབ་པ་རྣམས་ངོ་སྤྲོད་དང་འབྲེལ་བའི་ཐོག་གསུང་དོན། བོད་མིའི་སྒྲིག་འཛུགས་ཀྱི་ལྔ་དང་སུམ་ཅུ་སོ་ལྔ་ཞེས་པའི་ནང་དུ། ལོ་ན་སུམ་ཅུ་སོ་ལྔ་འོག་གི་གཞོན་སྐྱེས་ལྔ་ཞིག་འདེམས་རྒྱུ་གསལ་བསྒྲགས་སྤེལ་ཡོད་པ་བཞིན། ཚོགས་ཆུང་ནས་གྲོས་བསྡུར་རིམ་པ་གནང་རྗེས། གཞོན་སྐྱེས་ལྔ་དང་ལྔ་བཅུའི་མགྲིན་ཚབ་ལྔ་བདམས་ཡོད། དེ་དག་ནི་རྒྱ་གར་ནི་ཡིན་པའི་ལྷ་རོང་ལགས་རེད། ཁོ་ནི་ད་ལྟའི་ཆ་རྒྱ་གར་ལྡེ་ར་ལྡུན་དུ་ཁྲིམས་ལུགས་ཐོག་རབ་འབྱམས་པའི་སློབ་སྦྱོང་གནང་བཞིན་ཡོད་པ་དང་། དེའི་སྔོན། དགའ་ལྡན་ཕོ་བྲང་སློབ་ཕྲུག་གཟེངས་རྟགས་ཐོབ་མཁན་ཞིག་ཡིན་འདུག གཉིས་པ་ནི། ཨ་རིའི་མི་ནེ་སོ་ཊ་ནས་ཡིན་པའི་བསྟན་འཛིན་ནོར་སྒྲོན་ལགས་རེད། ད་ལྟའི་ཆར་བསྟན་འཛིན་ནོར་སྒྲོན་ལགས་ཀྱིས་སན་ཊི་ཁེ་ཏི་རིན་མཐོ་སློབ(St. Catherine Univeristy)་ཏུ་འགོ་ཁྲིད་རིག་པའི་(organizational leadership)་ཐོག་རབ་འབྱམས་པའི་སློབ་སྦྱོང་གནང་མུས་ཡིན་པ་དང་། དབུ་མའི་ལམ་གྱི་སྲིད་བྱུང་སྐོར་གོ་རྟོགས་རྒྱ་ཆེར་ཡོང་ཆེད་དུ། ཁོ་མོས་བོད་མིའི་གཞོན་སྐྱེས་ཚོའི་ཆེད་དུ་དབུ་མའི་ལམ་ཞེས་ཚོགས་པ་ཞིག་བཙུགས་གནང་འདུག གསུམ་པ་དེར། ཨོ་གླིང་ནས་ཡིན་པའི་མགོན་པོ་བཀྲ་ཤིས་ལགས་ཡིན་འདུག ད་ལྟའི་ཆར་མགོན་པོ་བཀྲ་ཤིས་ལགས་ནི་ཨོ་སི་ཊོ་ལི་ཡའི་གྲོང་ཁྱེར་ཝིག་ཊོ་རི་ཡ(Victoria)་བོད་རིགས་སྤྱི་མཐུན་ཚོགས་པའི་ཚོགས་གཞོན་ཡིན་འདུག བཞི་པ་ནི། ཁེ་ན་ཌ་ནས་ཡིན་པའི་བསྟན་འཛིན་ནོར་འཛིན་ལགས་ཡིན་འདུག བསྟན་འཛིན་ནོར་འཛིན་ལགས་ནི། ད་ལྟའི་ཆར་ཁེ་ན་ཌའི་ཏོ་རོན་མཐོ་སློབ(Univeristy Toronto)་ནང་དུ་ནང་ཡམས་དཔྱད་རིག(Epidemiology)་ཐོག་རབ་འབྱམས་པའི་སློབ་སྦྱོང་གནང་མུས་ཡིན་འདུག ཁེ་ན་ཌའི་གྲོས་ཚོགས་སུ་ཉམས་མྱོང་གསོག་ཆེད་དུ་(Intern)་བྱེད་སྐབས། གྲོས་ཚོགས་ཁང་དུ་བོད་ཀྱི་ཉིན་མོ་ཞེས་པ་སྲུང་བརྩི་བྱས་པར་གོ་སྒྲིག་བྱས་འདུག ལྔ་པ་ནི། སུད་སུ་ནས་ཡིན་པའི་ལྷ་ནིང་སྐལ་བཟང་རྡོ་རྗེ་ལགས་ཡིན་པ་དང་། རྫ་རིག་ཚན་རིག་མཐོ་སློབ་ཁང་(University of Apllied Sicience of Zurich) ་དངུལ་ཁང་ཁེ་ལས་དང་དཔལ་འབྱོར་རིག་པའི་ཐོག་རབ་འབྱམས་པའི་ཆེད་སྦྱོང་གནང་འདུག་ཅེས་གསུངས་སོང་།

དེའི་རྗེས། སྲིད་སྐྱོང་མཆོག་གིས་གཞོན་སྐྱེས་མགྲིན་ཚབ་པའི་ལས་འགན་གང་ཡིན་མིན་ཐོག་གསུང་དོན། བདམས་ཐོན་བྱུང་བའི་གཞོན་སྐྱེས་མགྲིན་ཚབ་པ་རྣམས་ཀྱིས་ལས་འགན་གཙོ་བོ་ནི། རང་ཉིད་གནས་སྡོད་བྱེད་སའི་ས་ཁུལ་གྱི་བོད་རིགས་གཞོན་སྐྱེས་རྣམས་ལ་བོད་དོན་སྤྱི་དང་། བོད་མིའི་སྒྲིག་འཛུགས་དང་། དབུ་མའི་ལམ་གྱི་སྲིད་བྱུས་བཅས་ཀྱི་ཐོག་ལ་གོ་རྟོགས་སྤེལ་རྒྱུ་དང་། དེ་བཞིན་ལོ་རྗེས་མའི་ལྔ་དང་ལྔ་བཅུའི་ཚོགས་འདུ་ཐོག་འགན་ཁུར་རྒྱུ་རེད་ཅེས་གསུངས་སོང་།

གཞོན་སྐྱེས་མགྲིན་ཚབ་རྣམས་བོད་མིའི་སྒྲིག་འཛུགས་དང་བོད་མིའི་གནས་སྟངས་ཐོག་གོ་རྟོགས་འཕེལ་ཆེད་དུ། དང་ཐོག་རྒྱ་གར་ནང་དུ་སླེབས་ནས་བོད་མིའི་སྒྲིག་འཛུགས་ཀྱི་ལས་ཁུངས་དང་མ་ལག་བཅས་ལ་ལྟ་སྐོར་དང་ཕྱག་ལས་གནང་སྟངས་ལྟ་བཅུག་རྒྱུ། དེ་ནས་མཉམ་འབྲེལ་ཚོགས་པ་དང་། རྒས་གསོ་ཁང་། སློབ་གྲྭ་ཁག དགོན་པ་སོགས་ལ་ལྟ་སྐོར་ཁྲིད་རྒྱུ་ཡིན་འདུག

ལྷ་རོང་ལགས་ནི། ད་ལྟའི་ཆར་རྒྱ་གར་ལྡེ་ར་ལྡུན་དུ་ཁྲིམས་ལུགས་ཐོག་རབ་འབྱམས་པའི་སློབ་སྦྱོང་གནང་བཞིན་ཡོད་པ་མ་ཟད། རྒྱ་གར་རྒྱལ་ཡོངས་བོད་རིགས་སློབ་ཕྲུག་མཐུན་ཚོགས་གསར་བཙུགས་གནང་མཁན་དང་ཚོགས་གཙོ་ཆེས་ཐོག་མ་དེ་ཡིན། ལྷ་རོང་ལགས་ལོ་བརྒྱད་ཡིན་སྐབས་རྒྱ་གར་ནང་བཙན་བྱོལ་དུ་འབྱོར་ཏེ་སློབ་སྦྱོང་བྱ་རྒྱུའི་གོ་སྐབས་ཐོག་མ་ཐོབ་པ་མ་ཟད། ཁོང་གི་འདོད་གཅིག་ནང་མི་ཁོངས་ནས་ཀྱང་སློབ་གྲྭར་བསྐྱོད་མཁན་ཐོག་མ་དེ་ཆགས་ཡོད། རཇ་པུར་དང་མ་སུ་རི་བོད་ཁྱིམ་ནས་སློབ་ཐར་སོན་པ་དང་། འཛིན་རིམ་བཅུ་གཉིས་རྒྱ་གར་རྒྱལ་ཡོངས་ཡིག་རྒྱུགས་ནང་གྲུབ་འབྲས་རྩེ་ཕུད་སོན་པའི་དགའ་ལྡན་ཕོ་བྲང་སློབ་ཕྲུག་གཟེངས་རྟགས་ཐོབ་ཡོད། སློབ་གྲྭའི་སྐབས་ཁོར་ཡུག་དང་འབྲེལ་བའི་སྐྱིད་སྡུག་ཚོགས་པ་གསར་འཛུགས་གནང་རྒྱུར་མཐུན་རྐྱེན་དང་། བོད་ཡིག་ཐོག་རྩོམ་ཡིག་དང་ཡིག་གཟུགས་རིགས་འགྲན་བསྡུར་གོ་སྒྲིག་གནང་ཡོད། མའེ་སོར་དུ་ཁྲིམས་ཀྱི་སློབ་སྦྱོང་གནང་བཞིན་པའི་སྐབས་བོད་པའི་སློབ་ཕྲུག་རྣམས་མའེ་སོར་ཁུལ་གྱི་མཐོ་སློབ་ཁག་ཏུ་འཛུལ་ཞུགས་སླད་རོགས་སྐྱོར་ཚོགས་པ་དང་། དེ་བཞིན་རྒྱ་གར་ལྷོ་ཕྱོགས་སྦེལ་ཀོབ་ཏུ་བྱང་ཆུབ་ལམ་རིམ་ཆེན་མོའི་གསུང་ཆོས་སྐབས་དང་བླངས་ཞབས་ཞུ་གནང་ཡོད་པ་མ་ཟད། མའེ་སོར་མཐོ་སློབ་ཏུ་བོད་ཀྱི་ཉིན་མོ་ཞེས་པའི་འགྲེམས་སྟོན་གོ་སྒྲིག་གནང་སྐབས་མཐུན་འགྱུར་གནང་ཡོད། སྐབས་དེར་རྒྱ་ནག་དང་། རྒྱ་གར། རྒྱལ་སྤྱིའི་སློབ་ཕྲུག་སྟོང་ཕྲག་མང་པོ་མཉམ་ཞུགས་གནང་ཡོད།

ལྷ་རོང་ལགས་རྒྱལ་སྤྱིའི་སློབ་ཕྲུག་གླེང་སྟེགས་ཀྱི་དྲུང་ཆེ་གནང་བའི་རིང་འགྲེམས་སྟོན་གྱི་ལམ་ནས་བོད་ཀྱི་ལོ་རྒྱུས་དང་རིག་གཞུང་ངོ་སྤྲོད་དང་། དེ་བཞིན་མའེ་སོར་ཁུལ་གྱི་ཕྱི་རྒྱལ་སློབ་ཕྲུག་ཚོགས་པ་ཁག་ནས་གྲོས་གླེང་ཚོགས་འདུ་རིགས་གོ་སྒྲིག་གནང་སྐབས་བོད་པའི་ངོ་ཚབ་གནང་སྟེ་བོད་དོན་སྐོར་གསུང་བཤད་གནང་ཡོད། མཐོ་སློབ་ཁག་ཏུ་འགྲིམ་བཞིན་པའི་སློབ་གྲོགས་རྣམས་ལ་དཔེ་དེབ་བཀླགས་པ་བརྒྱུད་ཤེས་ཡོན་གོང་མཐོར་གཏོང་ཐབས་ལ་དམིགས་ཏེ་ཨ་མའི་ནོར་བུ་དཔེ་དེབ་ཚོགས་པ་(Amay Norbu Book Club) ཞེས་པ་གསར་གཏོད་གནང་བ་མ་ཟད། བོད་མིའི་སྒྲིག་འཛུགས་ཀྱིས་གཙོས་གཞུང་འབྲེལ་མིན་པའི་ཚོགས་པ་ཁག་ནས་གོ་སྒྲིག་གནང་བའི་འགོ་ཁྲིད་ཀྱི་ཟབ་སྦྱོང་མང་དག་ཅིག་ལ་མཉམ་ཞུགས་གནང་ཡོད།

གཞན་ཡང་ལྷ་རོང་ལགས་ཀྱིས་སྤྱི་ཚོགས་ཞབས་ཞུ་སླད་དཔལ་འབྱོར་འདུ་འགོད་ཀྱི་ལས་གཞི་མང་དག་ཅིག་སྤེལ་ཡོད་པ་མ་ཟད། མང་གཙོ་གོང་འཕེལ་ཆེད་ན་གཞོན་དང་བླངས་ཚོགས་པའི་ཚོགས་མི་ཡིན་པའི་ཆ་ནས་བཙན་བྱོལ་བོད་མིའི་འོས་བསྡུ་ཆེན་མོའི་སྐབས་རྒྱ་གར་ལྷོ་ཕྱོགས་བོད་མིའི་གཞིས་ཆགས་ཁག་ཏུ་བོད་མི་མང་སྤྱི་འཐུས་འོས་མི་དང་འབྲེལ་བའི་བགྲོ་གླེང་གོ་སྒྲིག་གནང་། ཕྱི་ལོ་ ༢༠༡༦ ལོར་བོད་ཀྱི་སྐད་ཡིག་ཞབས་ཞུ་ཁང་གི་ཚོགས་མི་དང་ལྷན་མའེ་སོར་ས་གནས་བོད་མིའི་ཁྲིམས་ལུགས་རིག་པ་བའི་ཚོགས་གཞོན་གནང་ཡོད་པ་བཅས། །

བསྟན་འཛིན་ནོར་སྒྲོན་ལགས་ཨ་རིའི་མི་ནེ་སོ་ཊའི་ནང་སྐྱེས་ཤིང་། མཐོ་སློབ་ཏུ་འགྲིམ་བཞིན་པའི་སྐབས་མི་ནེ་སོ་ཊའི་ནང་བོད་ཀྱི་སྲོལ་རྒྱུན་གཞས་སྣ་དང་ཞབས་བྲོ་སོགས་ལ་སྦྱང་བརྩོན་གནང་ཞིང་། མཐོ་སློབ་ཏུ་འགྲིམ་བཞིན་པའི་སྐབས་མོ་རང་གིས་བོད་ཀྱི་རུ་ཁག་དང་ཨེ་ཤི་ཡའི་སློབ་ཕྲུག་མཐུན་ཚོགས་ཀྱི་ཚོགས་མི་གནང་མྱོང་བ་མ་ཟད། ཕྱི་ལོ་ ༢༠༠༨ ལོར་བོད་མིའི་དམའ་རིམ་དང་མཐོ་འབྲིང་སློབ་ཕྲུག་ཚོའི་ཆེད་དུ་ལམ་སྟོན་ཞེས་ཟུར་ཁྲིད་འཛིན་གྲྭ་ཞིག་བཙུགས་པ་དང་། ཕྱི་ལོ་ ༢༠༠༩ ལོར་མཐོ་སློབ་ཀྱི་དབྱར་ཁའི་གུང་གསེང་དང་བསྟུན་ནོར་སྒྲོན་ལགས་ཀྱིས་བོད་ཕྲུག་ཁྱིམ་སྡེ་སློབ་གྲྭའི་འཛིན་རིམ་བདུན་པའི་སློབ་ཕྲུག་ཁག་གཅིག་ལ་ཨིན་ཡིག་སློབ་ཁྲིད་གནང་འདུག མཐོ་སློབ་ཐོན་རྗེས་ནོར་སྒྲོན་ལགས་ཀྱིས་བོད་མིའི་གཞོན་སྐྱེས་ཚོའི་ཆེད་དབུ་མའི་ལམ་ཞེས་པའི་ཚོགས་པ་ཞིག་བཙུགས་གནང་འདུག ཚོགས་པ་དེ་བརྒྱུད་དབུ་མའི་ལམ་གྱི་སྲིད་བྱུས་སྐོར་གོ་རྟོགས་རྒྱ་ཆེར་སྤེལ་འདུག ཕྱི་ལོ་ ༢༠༡༦ ལོར་ རྒྱལ་སྤྱིའི་བོད་དོན་ལས་འགུལ་ཁང་གི་གོ་སྒྲིག་འོག་ནོར་སྒྲོན་ལགས་བོད་མིའི་གཞོན་སྐྱེས་འགོ་ཁྲིད་ལས་གཞིའི་ནང་མཉམ་ཞུགས་གནང་ཡོད། ནོར་སྒྲོན་ལགས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་མི་ནེ་སོ་ཊ་མཐོ་སློབ་ཏུ་འགྲིམ་བཞིན་པའི་རྒྱ་རིགས་སློབ་ཕྲུག་དབར་གྲོས་མོལ་གོ་སྒྲིག་ཞུས་གནང་འདུག ནོར་སྒྲོན་ལགས་ཀྱིས་ཁར་ལེ་ཊོན་མཐོ་སློབ་(Carleton College) ནས་སྐྱེ་དངོས་ཚན་རིག་(Biology) ཐོག་ཉེ་བའི་རབ་འབྱམས་པའི་སློབ་སྦྱོང་གནང་ཞིང་། རྒྱ་ནག་ནང་ཟླ་བ་ལྔ་ཙམ་རིང་རྒྱ་ཡིག་སློབ་སྦྱོང་གནང་འདུག ད་ལྟའི་ཆར་བསྟན་འཛིན་ནོར་སྒྲོན་ལགས་ཀྱིས་སན་ཊི་ཁེ་ཏི་རིན་མཐོ་སློབ་(St. Catherine University) ཏུ་འགོ་ཁྲིད་རིག་པའི་ (organizational leadership) ཐོག་རབ་འབྱམས་པའི་སློབ་སྦྱོང་གནང་མུས་ཡིན།

མགོན་པོ་བཀྲ་ཤིས་ལགས་ནི། བོད་ནང་སྐྱེས་ཤིང་རྒྱ་གར་ནང་འཚར་ལོངས་བྱུང་ཡོད། ཕྱི་ལོ་ ༢༠༡༢ ལོར་མ་སུ་རི་བོད་ཁྱིམ་ནས་འཛིན་རིམ་བཅུ་གཉིས་ཐོན་ཡོད་པ་མ་ཟད། དགའ་ལྡན་ཕོ་བྲང་སློབ་ཕྲུག་གཟེངས་རྟགས་ཀྱང་ཐོབ་ཡོད། ད་ལྟའི་ཆར་ཨོ་སི་ཊོ་ལི་ཡར་རྟེན་གཞི་བྱས་པའི་ཝིག་ཊོ་རི་ཡ་ཁྲིམས་ཀྱི་སློབ་གྲྭར་ (Victoria Law School) ཁྲིམས་ལུགས་སློབ་སྦྱོང་གནང་བཞིན་ཡོད། ཕྱི་ལོ་ ༢༠༠༨ ལོར་བོད་ནང་ས་བྱི་ཞི་རྒོལ་ཆེན་མོ་བྱུང་བའི་རྐྱེན་གྱིས་ཕ་མ་གཉིས་རྒྱ་གར་ནང་བྲོས་བྱོལ་དུ་ཡོང་དགོས་བྱུང་ཡོད། ཁོང་ལྡི་ལི་གཙུག་ལག་སློབ་གཉེར་ཁང་དུ་སྲིད་དོན་ཚན་རིག་ཐོག་སློབ་གཉེར་གནང་བཞིན་པའི་སྐབས་སྡེ་ཚན་དེའི་ཚོགས་གཞོན་དུ་འོས་འདེམས་བྱུང་ཡོད་པ་མ་ཟད། བོད་དོན་དང་འབྲེལ་བའི་བགྲོ་གླེང་ཚོགས་འདུ་དང་། རྔམ་སྟོན་ཁྲོམ་སྐོར་སོགས་བོད་རང་དབང་ལས་འགུལ་ཁག་གི་ནང་དུའང་མཉམ་ཞུགས་གནང་ཡོད། ཕྱོགས་མཚུངས་རྒྱ་གར་ནང་ཡོད་པའི་སྤྱིར་བཏང་སློབ་ཕྲུག་ཡར་རྒྱས་ཚོགས་པའི་ཚོགས་མི་ཡང་ཡིན། ཚོགས་པ་དེ་ནི་བོད་མི་གཞོན་སྐྱེས་དང་ལྷན་ཕྱག་ལས་གནང་གི་ཡོད། ད་ལྟའི་ཆར་མགོན་པོ་བཀྲ་ཤིས་ལགས་ནི་ཨོ་སི་ཊོ་ལི་ཡའི་གྲོང་ཁྱེར་ཝིག་ཊོ་རི་ཡ་(Victoria) བོད་རིགས་སྤྱི་མཐུན་ཚོགས་པའི་ཚོགས་གཞོན་དང་། On-Call Interpreters and Translators ཞེས་པའི་ནང་བོད་ཀྱི་སྐད་སྒྱུར་ཡང་གནང་བཞིན་ཡོད་པ་མ་ཟད། ཨོ་སི་ཊོ་ལི་ཡའི་བོད་དོན་ལྷན་ཚོགས་ནས་གོ་སྒྲིག་གནང་བའི་ཨོ་སི་ཊི་ལི་ཡས་བོད་དོན་ཆེད་གླེང་སློང་གནང་གི་མེད་པ་དང་། ཨི་སི་ཊི་ལི་ཡའི་ནང་འཕེལ་བཞིན་པའི་རྒྱ་ནག་གི་ཤུགས་རྐྱེན་ཞེས་པའི་ལས་འགུལ་ནང་མཉམ་ཞུགས་གནང་ཡོད། གཞན་ཡང་མགོན་པོ་བཀྲ་ཤིས་ལགས་ནི་སྤྱི་ཚོགས་ཞབས་ཞུ་དང་འབྲེལ་བའི་ཕྱག་ལས་མང་དག་ཅིག་གནང་བཞིན་ཡོད་པ་མ་ཟད། ཝིག་ཊོ་རི་ཡ་ཁྲིམས་ཀྱི་སློབ་ཕྲུག་གི་ཚོགས་མི་ཡང་ཡིན།

བསྟན་འཛིན་ནོར་འཛིན་ལགས་རྒྱ་གར་ནང་སྐྱེས་ཤིང་ཕྱིས་སུ་ཁེ་ན་ཌ་ནང་གནས་སྤོ་གནང་། བསྟན་འཛིན་ནོར་འཛིན་ལགས་ཀྱིས་ཁེ་ན་ཌའི་ཊོ་རོན་ཊོ་མཐོ་སློབ་(University of Toronto) ནང་ནད་ཡམས་དཔྱད་རིག་(Epidemiology) ཐོག་རབ་འབྱམས་པའི་སློབ་སྦྱོང་གནང་མུས་ཡིན་པ་དང་། ད་ལྟའི་ཆར་མོ་རང་རབ་འབྱམས་པའི་ལོ་རིམ་དང་པོ་རེད། བསྟན་འཛིན་ནོར་འཛིན་ལགས་ཀྱིས་རེ་ཡར་སན་མཐོ་སློབ་(Ryerson University) ནས་སྐྱེ་དངོས་སྨན་དཔྱད་ཚན་རིག་(Biomedical Sciences) ཐོག་ཉེ་བའི་རབ་འབྱམས་པའི་ཆེད་སྦྱོང་གནང་འདུག བསྟན་འཛིན་ནོར་འཛིན་ལགས་རེ་ཡར་སན་མཐོ་སློབ་ཏུ་ལོ་རིམ་བཞི་པར་འགྲིམ་བཞིན་པའི་སྐབས། མོ་རང་གིས་མཐོ་སློབ་ཏུ་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་གནང་མྱོང་ཡོད་པ་མ་ཟད། འགྲོ་བ་མིའི་ཐོབ་ཐང་དང་། བོད་དོན་ལས་འགུལ། བོད་མིའི་སློབ་ཕྲུག་ཚོར་སོ་སོའི་ངོ་བོ་དང་བཙན་བྱོལ་བའི་གནས་སྟངས། དེ་བཞིན་སློབ་ཕྲུག་ནང་ཁུལ་དབར་བོད་ཀྱི་རིག་གཞུང་སྐོར་གོ་རྟོགས་རྒྱ་ཆེར་སྦེལ་གནང་འདུག བསྟན་འཛིན་ནོར་འཛིན་ལགས་ཀྱིས་དང་བླངས་ཐོག་བོད་མིའི་ཆེད་ལས་དང་བླངས་ཞབས་ཞུ་ཁང་(Tibet Corps) བརྒྱུད་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་འཕྲོད་བསྟེན་གྲངས་ཐོ་དབྱེ་ཞིབ་དང་། དེ་བཞིན་བོད་མིའི་སྒྲིག་འཛུགས་ཀྱི་འཕྲོད་བསྟེན་ལས་ཁུངས་ཀྱི་ཁྱབ་ཁོངས་རྒྱ་གར་ལྷོ་ཕྱོགས་སྦེལ་ཀོབ་འཚོ་བྱེད་སྨན་ཁང་བཅས་སུ་ཞབས་ཞུ་གཟེངས་སུ་ཐོན་པ་བསྒྲུབས་གནང་ཡོད། བསྟན་འཛིན་ནོར་འཛིན་ལགས་ནས་ཁེ་ན་ཌའི་ཨོན་ཊ་རིའོ་གྲོས་ཚོགས་ཁང་ནང་ཉམས་མྱོང་གསོག་(intern) ཆེད་ཕྱག་ལས་གནང་མྱོང་བ་མ་ཟད། གྲོས་ཚོགས་ཁང་དུ་བོད་ཀྱི་ཉིན་མོ་ཞེས་པའི་སྲུང་བརྩི་གོ་སྒྲིག་ཞུས་པ་དང་། དེ་བཞིན་གྲོས་ཚོགས་འཐུས་མི་དང་ལས་བྱེད་རྣམས་ལ་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་དང་རིག་གཞུང་སོགས་ཀྱི་སྐོར་གོ་རྟོགས་རྒྱ་ཆེར་སྤེལ་ཡོད། བསྟན་འཛིན་ནོར་འཛིན་ལགས་ལ་ཉམས་ཞིབ་དང་འགོ་ཁྲིད་སོགས་ཀྱི་གཟེངས་རྟགས་མང་དག་ཅིག་ཐོབ་མྱོང་ཡོད་པ་མ་ཟད། ཕྱི་ལོ་ ༢༠༡༩ ལོའི་ཏཱ་ལའི་བླ་མའི་དགེ་རྩ་ཚོགས་པའི་སློབ་ཡོན་ཐོབ་འདུག

ལྷ་ནིང་སྐལ་བཟང་རྡོ་རྗེ་ལགས་ནི། སུད་སི་ནང་སྐྱེས་ཤིང་འཚར་ལོངས་བྱུང་། རྫུ་རིག་ཚན་རིག་མཐོ་སློབ་ཁང་(University of Applied Sciences of Zurich) ནས་དངུལ་ཁང་ཁེ་ལས་དང་དཔལ་འབྱོར་རིག་པའི་ཐོག་རབ་འབྱམས་པའི་ཆེད་སྦྱོང་གནང་འདུག ལོ་ན་ ༡༦ ལ་སོན་སྐབས་ཡུ་རོབ་བོད་ཀྱི་གཞོན་ནུ་ལྷན་ཚོགས་ནང་འཛུལ་ཞུགས་གནང་། ལོ་ ༡༨ ཐོག་སུད་སིའི་གཞི་རིམ་དམག་མིའི་སྦྱོང་བརྡར་ཐོབ། དེ་བཞིན་དམག་སྒར་ནང་ལོ་གསུམ་རིང་ཞབས་འདེགས་བསྒྲུབས་ཡོད་པ་མ་ཟད། དམག་དཔོན་གཞོན་པའི་གོ་གནས་ཐོབ་འདུག སུད་སིའི་ནང་ཡོད་པའི་ཧི་མ་ལ་ཡའི་རྩེད་རིགས་ཚོགས་པའི་ཚོགས་མི་ཡིན་པ་དང་། གཞུང་འབྲེལ་མ་ཡིན་པའི་ཨེ་ལི་ཇེ་ཊེ་དངུལ་ཁང་(LGT Bank) དང་། དེ་བཞིན་ཇུ་ལི་སི་བྷར་དངུལ་ཁང་(Bank Julius Baer & Co. Ltd) ནང་ལོ་བཞི་ཕྱག་ལས་གནང་། རྫུ་རིག་ཁན་ཊོ་ནལ་དངུལ་ཁང་(Zurich Cantonal Bank) ནང་ལོ་བརྒྱད་རིང་ཕྱག་ལས་གནང་ཡོད། །

བོད་ཀྱི་ལོ་རྒྱུས་ཡིག་ཆ།