སྲིད་སྐྱོང་གིས་བོད་ནི་རྒྱ་ནག་འགྱུར་བ་གཏོང་རྒྱུའི་ལྡེ་མིག་རེད་ཅེས་གསུངས་འདུག

དེ་ཡང་དབུས་བོད་མིའི་སྒྲིག་འཛུགས་ཀྱི་དྲ་ཚིགས་སུ་སྤེལ་བར་ལྟར་ན། དཔལ་ལྡན་སྲིད་སྐྱོང་མཆོག་ལ་ཕེབས་བསུའི་སྣེ་ལེན་མཛད་སྒོའི་ཐོག་ཉེ་ཧོང་གཞུང་གི་སྐུ་ཚབ་དང༌། ཉེ་ཧོང་གྲོས་ཚོགས་འཐུས་མི། ཆོས་ཚོགས་ཁག་གི་སྐུ་ཚབ། དེ་བཞིན་གཞུང་འབྲེལ་མིན་པའི་ཚོགས་སྐྱིད་ཁག་གི་སྐུ་ཚབ་སོགས་ཆེད་ཕེབས་གནང་འདུག

དཔལ་ལྡན་སྲིད་སྐྱོང་མཆོག་གིས་ད་ལྟའི་ཆར་ང་ཚོར་འདེམས་ཀ་གང་ཡང་མེད་པའི་འོག་བོད་ནི་ཞི་བདེ་དང་རྣམ་པར་རྒྱལ་བ་བཟོ་ཐབས་ཡིན་ཡང༌། རྒྱ་ནག་ཏང་གི་ཚོགས་ཆེན་༡༩པའི་སྐབས་རྒྱ་ནག་གི་སྲིད་འཛིན་ཞི་ཅིང་ཕིན་གྱིས་སྤྱི་ཚོགས་རིང་ལུགས་དང་རྒྱ་ནག་གི་ཁྱད་ཆོས་གཉིས་དུས་རབས་གསར་པའི་ཐོག་བསྐྱོད་རྒྱུ་ཡིན་པ་རྒྱ་ནག་གིས་སྒྲུབ་དགོས་པའི་ལས་དོན་ཞིག་ཡིན་སྐོར་གསུངས་ཡོད་པ་དང༌། སྤྱི་ཚོགས་རིང་ལུགས་དང་རྒྱ་ནག་གི་ཁྱད་ཆོས་ཟེར་བ་དེ་ནི་མང་གཙོའི་རང་དབང་དང་སྨྲ་བརྗོད་ཀྱི་རང་དབང་མེད་པའི་ཚོགས་སྡེ་གཅིག་གིས་སྲིད་དབང་སྒེར་འཛིན་བྱེད་རྒྱུ་དེ་ཡིན་སྐོར་གསུངས་ཡོད་པ་རེད།

མའོ་ཙེ་ཏུང་གི་དུས་སྐབས་དེ་རྒྱ་ནག་གཅིག་གྱུར་གྱི་དུས་སྐབས་ཡིན་པ་དང༌། ཏིང་ཞའོ་ཕིང་གྱི་དུས་སྐབས་དེ་རྒྱ་ནག་དཔལ་འབྱོར་ཡར་རྒྱས་གཏོང་རྒྱུ་ཡིན་པ། ཞི་ཅིང་ཕིན་གྱི་དུས་སྐབས་དེ་རྒྱ་ནག་ཚོགས་པ་གཅིག་གི་དབང་འཛིན་བཟོ་རྒྱུ་ཡིན་པར་བརྟེན། རྒྱ་ནག་མང་གཙོའི་རྒྱལ་ཁབ་ཞིག་ཏུ་འགྱུར་ཐབས་དང༌། དེ་མིན་རྒྱལ་སྤྱིའི་སྤྱི་ཚོགས་དེ་རྒྱ་ནག་ལྟ་བུར་འགྱུར་རྒྱུ་མ་གཏོགས། གཞན་ང་ཚོར་འདེམས་ཀ་གང་ཡང་མེད། གལ་སྲིད་རྒྱ་ནག་འགྱུར་བ་གཏོང་དགོས་ཀྱི་ཡོད་ན། བོད་ནི་རྒྱ་ནག་འགྱུར་བ་གཏོང་རྒྱུའི་ལྡི་མིག་ཡག་ཤོས་ཡིན་སྐོར་གསུངས་འདུག