10
Mon, Aug

༢༠༢༠་ལོའི་ཟླ་༥་ཚེས་༡་ཉིན། དཔལ་རྒྱལ་དབང་ཀརྨ་པ་མཆོག་གིས་བོད་མིའི་སྒྲིག་འཛུགས་ཀྱིས་བཙན་བྱོལ་བོད་མིའི་སྤྱི་ཚོགས་ཁྲོད་དུ། ཏོག་དབྱིབས་གཉན་སྲིན་སྔོན་འགོག་གི་ཐོག་གོ་རྟོགས་དང་ལས་འགུལ་སྤེལ་བཞིན་ཡོད་པར་རྒྱབ་སྐྱོར་མཚོན་ཆེད་ཧིན་སྒོར་འབུམ་བཅུ་ཞལ་འདེབས་གནང་འདུག

༢༠༢༠་ལོའི་ཟླ་༤་ཚེས་༢༥་ཉིན། བོད་མིའི་སྒྲིག་འཛུགས་ཀྱི་ཕྱི་དྲིལ་འགྲོ་བ་མིའི་ཐོབ་ཐང་ཚན་པས། པཎ་ཆེན་རིན་པོ་ཆེ་མཆོག་གློད་གྲོལ་ཐོབ་ཆེད། སྐུ་ཚབ་དོན་ཁང་ཁག་བརྒྱུད་གཞུང་འབྲེལ་མིན་པའི་བོད་དོན་རྒྱབ་སྐྱོར་ཚོགས་པ་དང་། བོད་རིགས་སྤྱི་མཐུན་ཚོགས་པ་སོགས་མཉམ་རུབ་ཀྱིས་འཛམ་གླིང་མཉམ་འབྲེལ་རྒྱལ་ཚོགས་བྱིས་པའི་ཐོབ་ཐང་སྲུང་སྐྱོབ་ཚན་པར་ཞུ་ཡིག་ཕུལ་ནས་ཟླ་ ༥ ཚེས་ ༡༧ བར་ཞུ་གཏུག་ལས་འགུལ་མུ་མཐུད་སྤེལ་རྒྱུ་ཡིན་འདུག

༢༠༢༠་ལོའི་ཟླ་༤་ཚེས་༢༢་ཉིན། སའི་གོ་ལའི་ཉིན་མོར་བཞུགས་སྒར་རྡ་སའི་རྒྱལ་བའི་ཕོ་བྲང་ནས་༸གོང་ས་མཆོག་གིས། སའི་གོ་ལ་འདི་ཉིད་རང་གཞན་ཀུན་ལ་མ་ལྟར་གྱུར་ནས་ཡོད་པས། རང་རེ་ཀུན་མ་ལས་སྐྱེས་པའི་བུ་ཕྲུག་བཞིན་གོ་ལ་འདི་ཉིད་ལ་བརྟེན་ནས་འཚོ་དགོས། དེར་བརྟེན། གོ་ལ་སྤྱི་ལ་འཕྲད་པའི་དཀའ་ངལ་སེལ་ཐབས་སུ་རང་གཞན་ཀུན་ནས་ཕྱར་གྲུ་མཉམ་འདེགས་བྱེད་རྒྱུ་ཤིན་ཏུ་གལ་ཆེ། ཞེས་བཀའ་བསྩལ།

༢༠༢༠་ལོའི་ཟླ་༣་ཚེས་༣༡་ཉིན། ༸སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་རྒྱ་གར་གྱི་སྲིད་བློན་མོ་ཌི་མཆོག་ལ་ནད་ཡམས་སྔོན་འགོག་ཐོག་རྒྱབ་སྐྱོར་གྱི་གསུང་འཕྲིན་བསྩལ། དེའི་ནང་ངོས་ཀྱི་རྒྱབ་སྐྱོར་མཚོན་ཆེད་ཏཱ་ལའི་བླ་མའི་དགེ་རྩ་ཚོགས་པ་ནས་རོགས་དངུལ་ཞལ་འདེབས་རྒྱག་རྒྱུ་ཡིན། ཞེས་གསུངས་འདུག

༢༠༢༠་ལོའི་ཟླ་༤་ཚེས་༢༣་ཉིན། བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གིས་ཐད་གཏོང་བརྒྱུད། རྒྱ་གར་ནང་ཐེམ་སྤང་དུས་ཡུན་རྫོགས་ལ་ཉེ་ཡང་། བོད་མི་ཚོས་མུ་མཐུད་ནས་ཐེམ་སྤང་བྱེད་དགོས་པ་གལ་ཆེན་པོ་རེད། གལ་སྲིད་བོད་མི་གཅིག་ལ་ནད་དུག་དེ་ཕོག་ཚེ་ཚང་མར་དཀའ་ངལ་འཕྲད་ཀྱི་རེད། ཅེས་གསུངས།

༢༠༢༠་ལོའི་ཟླ་༤་ཚེས་༧་ཉིན། བཞུགས་སྒར་རྡ་སའི་ས་གནས་འགན་འཛིན་ཀུན་དགའ་ཚེ་རིང་ལགས་ཀྱིས། བོད་མི་ཚོར་ཞོགས་པ་ཆུ་ཚོད་བརྒྱད་པ་ནས་བཅུ་གཅིག་གི་བར་མ་གཏོགས་ཕྱིར་ཐོན་མི་ཆོག གལ་སྲིད་ཐོན་པ་ཡིན་ན་རྒྱ་གར་གྱི་ཁྲིམས་གཞི་ཁག་ཅིག་འགལ་གྱི་ཡོད་པས་ངེས་པར་དུ་ཡིད་གཟབ་གནང་དགོས། ཞེས་གསལ་བསྒྲགས་སྤེལ་སོང་།

༢༠༢༠་ལོའི་ཟླ་༣་ཚེས་༣༠་ཉིན། བཞུགས་སྒར་རྡ་ས་རྒྱལ་བའི་ཕོ་བྲང་ནས་ ༸གོང་ས་མཆོག་གིས་ཏོག་དབྱིབས་ནད་ཡམས་ལ་གདོང་ལེན་བྱེད་སྟངས་ཐོག ཞུམ་པས་སྡུག་བསྔལ་ལས་མི་གྲོལ་བས་དཀའ་ངལ་ཇི་འདྲ་ཞིག་འཕྲད་ཀྱང་སྙིང་སྟོབས་བསྐྱེད་དེ་མིའི་རྣམ་དཔྱོད་དང༌། དེང་དུས་རིག་འཕྲུལ་ཟུང་འབྲེལ་གྱིས་དཀའ་ངལ་སེལ་ཐབས་བྱེད་དགོས། ཞེས་བཀའ་བསྩལ།

More Articles ...

བོད་ཀྱི་ལོ་རྒྱུས་ཡིག་ཆ།