ཁོང་ཁྲོ་ལངས་སྐབས་མ་ཎི་བགྲོངས་དང་སེམས་ལྷོད་དུ་འགྲོ་བ་ཡིན་ཞེས་༸གོང་ས་མཆོག་གིས་བཀའ་སྩལ།

དེ་ཡང་། ཟླ་འདིའི་ཚེས་༤་ནས་༦་བར་གྱི་གསུང་ཆོས་ནང་དུ། ཕྱི་རྒྱལ་ཁབ་ཁག་ ༦༩ ནས་ཕེབས་པའི་དད་ལྡན་ཆོས་ཞུ་བ་དང་བོད་སེར་སྐྱ་མི་མང་བཅས་ཁྱོན་མི་གྲངས་༦༥༠༠་ལྷག་བཞུགས་སྒར་རྡ་སའི་ཐེག་ཆེན་གཙུག་ལག་ཁང་དུ་འཛོམས་པའི་ཐོག ༸གོང་ས་མཆོག་གིས་བདེན་བཞི་མི་རྟག་སོགས་བཅུ་དྲུག་དང་། བྱང་ཕྱོགས་སོ་བདུན། མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་བཅས་ཀྱི་ཆོས་འགྲེལ་མཛད་ནས་དེ་རིང་ལེགས་པར་གྲུབ་སོང་།

ཉིན་དང་པོར། སྤྱི་ནོར་༸གོང་ས་སྐྱབས་མགོན་ཆེན་པོ་མཆོག་གིས་ཨེ་ཤ་ཡའི་རྒྱལ་ཁབ་ཁག་གི་དད་ལྡན་ཆོས་ཞུ་བར་གཙོས་པའི་སེར་སྐྱ་མི་མང་ལ་བདེན་བཞི་གཙོ་པའི་ནང་ཆོས་སྤྱི་བཤད་གནང་སོང་།

ཉིན་གཉིས་པར། ༸གོང་ས་མཆོག་གིས་མགོན་པོ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་ཐོག་བཀའ་སྩལ་དོན། དཔལ་མགོན་འཕགས་པ་ཀླུ་སྒྲུབ་ཀྱིས་མཛད་པའི་བྱང་ཆུབ་སེམས་འགྲེལ་གྱི་རྩ་བ་ནི་གསང་འདུས་རྩ་རྒྱུད་ཀྱི་ཚིག དངོས་པོ་ཐམས་ཅད་དང་བྲལ་བ།། ཕུང་པོ་ཁམས་དང་སྐྱེ་མཆེད་དང་།། ཞེས་སོགས་ཤོ་ལོ་ཀ་གཅིག་ལྷག་ཙམ་ཡོད་པའི་དོན་འགྲེལ་བཤད་སྐྱོན་གྱི་ཡོད། གསང་བ་འདུས་པའི་སྐོར་ལ་མགོན་པོ་ཀླུ་སྒྲུབ་ཀྱིས་ཉམས་ཞིབ་ཏན་ཏན་གནང་ཡོད་པ་རེད། ཀླུ་སྒྲུབ་ཀྱིས་གསང་བ་འདུས་པའི་བསྐྱེད་རིམ་སྐོར་ལ་མདོར་བྱས་དང་། དེ་རྩ་རྒྱུད་ཀྱི་ཁུངས་དང་སྦྱར་ནས་གསུངས་པ་མདོ་བསྲེས། དེ་ནས་མགོན་པོ་ཀླུ་སྒྲུབ་ཀྱི་སྲས་ཀྱི་ཐུ་བོའི་གྲས་སློབ་དཔོན་ཀླུ་བྱང་གི་ཡིན་པ་ཡོད་རྣམ་གཞག་རིམ་པའི་རྣམ་བཤད་ཅེས་བྱ་བ་སྐུ་གསུམ་ལམ་འཁྱེར་གྱི་གནད་རྣམས་ཧ་ཅང་ཡག་པོ་གསུངས་འདུག གསང་བ་འདུས་པའི་རྫོགས་རིམ་སྐོར་ལ་མགོན་པོ་ཀླུ་སྒྲུབ་ཀྱིས་རིམ་ལྔ་མཛད་ཡོད་པ་རེད། རིམ་ལྔའི་དོན་འགྲེལ་སློབ་དཔོན་འཕགས་པ་ལྷས་གཅེས་བསྡུས་མཛད་ཡོད། གསང་འདུས་རྩ་རྒྱུད་ཀྱི་འགྲེལ་བ་དཔལ་ལྡན་ཟླ་བ་གྲགས་པས་འགྲེལ་བ་སྒྲོན་གསལ་མཛད་ནས་ཀླུ་སྒྲུབ་ཡབ་སྲས་ཀྱིས་གསང་བ་འདུས་པའི་སྐོར་ལ་དམིགས་བསལ་གྱིས་ལེགས་བཤད་མང་པོ་བཞག་གནང་འདུག དེ་དག་སྤྱིར་གསང་སྔགས་དང་དེའི་ནང་ཚན་དུ་གསང་སྔགས་བླ་མེད་ཀྱི་ལམ་གྱི་འགྲོ་སྟངས་སྐོར་ལ་ལེགས་བཤད་ཧ་ཅང་གལ་ཆེན་པོ་ཆགས་ཡོད། དེར་བརྟེན། གསང་བ་འདུས་པ་ལ་མགོན་པོ་ཀླུ་སྒྲུབ་ཡབ་སྲས་ཀྱིས་ཐུན་མོང་མ་ཡིན་པ་ཞིག་གནང་འདུག ངོས་ཀྱིས་བྱང་ཆུབ་སེམས་འགྲེལ་གྱི་ལུང་ནི་ཁྲི་ཟུར་རི་རྫོང་རིན་པོ་ཆེའི་སྐུ་མདུན་ནས་ཞུས་པ་རེད། ཅེས་སོགས་གསུངས་སོང་།

ཉིན་གསུམ་པར། ༸གོང་ས་མཆོག་གིས་དེ་རིང་ནས་བཟུང་ཁྱོད་ཚོར་བར་ཆད་བྱེད་མཁན་དང་། གནོད་པ་གཏོང་མཁན་རྣམས་སྙིང་རྗེ་བའི་ཡུལ་ལ་བསྟེན་ནས་སེམས་ཅན་ཐམས་ཅད་བདག་གི་མགྲོན་དུ་གཉེར་ཞེས་མཉམ་དུ་སྡོད་པ་ཞིག་དགོས། གནོད་པ་བཟློག་ཐབས་ཡག་ཤོས་དེ་རེད། དེ་མིན་རང་གཅེས་འཛིན་གྱི་བསམ་བློས་ང་ལ་གནོད་ཀྱི་རེད་བསམས་ནས་ལྷ་དྲག་པོ་ཞིག་གི་སྔགས་བགྲངས་པ་ཡིན་ན་ཕན་ཐོགས་ཆེན་པོ་ཡོང་གི་ཡོད་མེད་མི་ཤེས། གནོད་བྱེད་མཁན་རྣམས་རང་གཅེས་འཛིན་གྱི་གཞན་དབང་དུ་ཕྱིན་པ་དང་། བདེན་འཛིན་གྱི་གཞན་དབང་ལ་ཕྱིན་ནས་གནོད་ཡོང་གི་ཡོད་པ་རེད། སྙིང་རྗེ་བའི་ཡུལ་རེད། དེར་བརྟེན། དེ་ལྟ་བུའི་གནོད་བྱེད་ལ་དམིགས་ནས་སྙིང་རྗེ་སྒོམ་རྒྱུ་མ་གཏོགས་གནོད་བྱེད་ཀྱིས་ང་ལ་གནོད་ཀྱི་རེད་བསམ་པའི་འཇིགས་སྣང་དང་དངངས་སྐྲག་བྱེད་དགོས་པ་ཁྱོན་ནས་ཡོད་པ་མ་རེད། ཞེས་བཀའ་སློབ་སྩལ་སོང་།

དེ་ནས་ཐུབ་པའི་མཚན་སྔགས་དང་། སྤྱན་རས་གཟིགས་ཀྱི་གཟུངས་སྔགས། འཇམ་པའི་དབྱངས་ཀྱི་གཟུངས་སྔགས། སྒྲོལ་མའི་གཟུངས་སྔགས་བཅས་ཀྱི་ལུང་སྩལ་རྗེས་བཀའ་ཕེབས་དོན། ཁྱོད་རང་ཚོ་ནད་དང་ན་ཚ་ཡོད་མཁན་ཡོད་ན་སྒྲོལ་མའི་གཟུངས་སྔགས་བགྲངས་ཚེ་ཕྲན་བུ་ཕན་ཐོགས་ཡོང་གི་རེད། ཁྱོད་རང་ཚོ་རང་ཉིད་དང་ཕྲུ་གུ་ཚོར་ཨ་ར་པཱ་ཙ་ཡག་པོ་བགྲངས་བཅུག་དང་རིག་པ་ཡག་རུ་འགྲོ་བར་ཧ་ཅང་ཕན་ཐོགས་ཡོད་པ་རེད། དེ་བཞིན་སེམས་རྒྱུད་འདུལ་བ་དང་སེམས་ལྷོད་ལྷོད་བྱེད་པ། དེ་བཞིན་ཁོང་ཁྲོ་ཟ་བའི་སྐབས་སུ་མ་ཎི་བགྲོངས་དང་སེམས་ལྷོད་དུ་འགྲོ་གི་རེད། ད་ཐེངས་འདིའི་ཆོས་འབྲེལ་ལེགས་པར་ཟིན་པ་ཡིན། ལོ་རྗེས་མར་སྒུག ཅེས་བཀའ་སློབ་སྩལ་ནས་ཉིན་གསུམ་གྱི་གསུང་ཆོས་ལེགས་པར་གྲུབ་སོང་།