༸གོང་ས་མཆོག་གིས་ཨུ་རུ་སུའི་ཆོས་ཞུ་བ་ཚོར་བཀའ་ཆོས་གནང་འགོ་བརྩམས་སོང་།

དེ་ཡང་ཨུ་རུ་སུའི་དད་ལྡན་ཆོས་ཞུ་བ་ ༡༡༠༠ ཐམ་པ་གཙོ་བོར་གྱུར་པའི་འཛམ་གླིང་ཡུལ་གྲུ་ཁག་ ༧༠ ནས་མི་གྲངས་ ༥༡༩༥ ཐམ་པ། དེ་བཞིན་རང་རིགས་ཆོས་ཞུ་བ་བཅས་ཁྱོན་ཆོས་ཞུ་བ་མི་གྲངས་ཁྲི་གཅིག་ལྷག་འཛོམས་ཡོད་འདུག གསུང་ཆོས་དངོས་སུ་དབུ་མ་བརྩམས་གོང་དུ་ཨུ་རུ་སུའི་སྐད་ཐོག་ནས་ཤེས་རབ་སྙིང་པོ་གསུང་འདོན་གནང་ཞིང་། དེའི་རྗེས་༸གོང་ས་མཆོག་ནས་གསུང་ཆོས་དབུ་འཛུགས་མཛད་སོང་། ཁོང་གིས་ཐོག་མར་སོག་པོའི་དད་ལྡན་པ་དང་ཐེངས་འདིའི་གསུང་ཆོས་དང་འབྲེལ་བའི་གནས་ཚུལ་གྱི་སྐོར་ནས་འདི་ལྟར་གསུངས་དོན། དེ་རིང་གཙོ་བོ་ཨུ་རུ་སུ་ཁོངས་ཀྱི་སོག་རིགས་དེ་སྔ་ནས་སངས་རྒྱས་པའི་ཆོས་ཀྱི་རྗེས་སུ་ཞུགས་མཁན་ཡིན་པ་དང་། བོད་གངས་ཅན་དང་དམིགས་བསལ་གྱི་འབྲེལ་བ་ཡོད་པ་ཁྱེད་རང་ཚོ་གཙོ་བོར་གྱུར་བའི་རྣམ་རྒྱུན་ནས་ངོ་ཤེས་པའི་ཆོས་གྲོགས་ཚོ་དེ་རིང་འདིར་འཛོམས་ཡོད། དེ་བཞིན་འཆར་ཅན་ཡོང་བཞིན་པའི་ཀོ་རི་ཡ་ནས་ཁ་ཤས་དང་རྒྱ་རིགས་ཆོས་གྲོགས་འགའ་ཤས་ཡོད་ས་རེད། བོད་རིགས་དང་ཕྱི་རྒྱལ་བ་བཅས་ང་ཚོ་ཚང་མ་དད་པ་དང་དམ་ཚིག་གཡོ་བ་མེད་པའི་སྒོ་ནས་འདིར་འདུས་པ་རེད། ལོ་ཤས་ནས་ཁལ་མུཀ་དང་། ཐུ་ཝ། བྷུར་ཡ་ཏི་ཁུལ་གྱི་ནང་པ་མང་པོ་ཞིག་ལ་འགོ་སྟོད་རྒྱལ་ས་ལྡི་ལིར་བཀའ་ཆོས་བྱ་རྒྱུ་བྱས་པ་རེད།

འོན་ཀྱང་ཕྱིས་སུ་འགྲོ་སོང་ཏོག་ཙམ་ཁག་པོ་བྱེད་ཀྱི་འདུག་ཟེར་ནས་ལ་ཏི་ཝི་ཡའི་རྒྱལ་ས་རི་ག་ནང་ལོ་ཁ་ཤས་རིང་བཀའ་ཆོས་བྱས་པ་རེད། དེ་འདྲ་བྱེད་སྐབས་ཁྱེད་རང་ཚོར་སྟབས་བདེ་པོ་ཡོད། འོན་ཀྱང་ངོས་རང་རྒྱ་གར་ནས་གནམ་གྲུའི་ནང་ཆུ་ཚོད་བརྒྱད་རིང་འགྲོ་དགོས་ཡོད་པར་བརྟེན་ཁག་པོ་བྱེད་ཀྱི་འདུག ཐེངས་འདིར་ཡང་ཐོག་མའི་ཆར་བཀའ་ཆོས་ལྡི་ལིར་བྱ་རྒྱུ་བྱས་པ་རེད། འོན་ཀྱང་ངོས་རང་བར་སྐབས་གཟུགས་པོ་མ་བདེ་བ་གང་ཙམ་བྱས་སོང་། ཉན་ཤས་གོང་སྨན་ཁང་ལ་ཕྱིན་ནས་སྨན་བཅོས་ཏོག་ཙམ་ཛ་དྲག་བྱས་དགོས་པ་དེ་འདྲ་བྱུང་། དེ་ནས་རྡ་སར་ཡར་ཡོང་ནས་ལྡི་ལིར་བསྐྱར་དུ་འགྲོ་མི་དགོས་པ་བྱས་པ་ཡིན། ཨུ་རུ་སུ་ཁོངས་ཀྱི་གསུང་ཆོས་དེ་ཕར་འགྱང་མི་དགོས་པ་འདིར་བྱས་ན་སྙམ་པ་རེད། ཁྱེད་རང་ཚོར་བརྡབ་གསིག་ཕྲན་བུ་བྱུང་ཡོད་ནའང་། དེང་སང་ལྡི་ལིར་ཚ་བ་ཆེ་བའི་དུས་སྐབས་དང་ཁ་རླུང་ཡང་ཧ་ཅང་བཙོག་པ་རེད། རྡ་སའི་ཁ་རླུང་ཧ་ཅང་གཙང་མ་ཡོད། ཁྱེད་རང་ཚོ་ཕལ་ཆེར་སྐྱིད་པོ་ཡོང་བའི་རེ་བ་ཡོད། ཅེས་གསུངས།

དེ་ནས་མགོན་པོ་གང་ཉིད་ཀྱིས་སངས་རྒྱས་ཀྱི་བསྟན་པ་དང་དེའི་དར་སའི་ཡུལ་དང་འབྲེལ་བའི་སྐོར་ལ་འདི་ལྟར་གསུངས་དོན། སངས་རྒྱས་བཅོམ་ལྡན་འདས་ཀྱིས་མདོ་ཞིག་གི་ནང་ “ ང་ཡི་བསྟན་པ་བྱང་ནས་བྱང་དུ་དར་རོ།” ཞེས་གསུང་པའི་གསུང་རྒྱུན་ཡོད། དེ་སྔ་བོད་ལ་ཡིན་ན་དེར་གོ་བ་ལེན་སྟངས་དེ་རྒྱ་གར་གྱི་བྱང་བོད་དང་། བོད་ཀྱི་བྱང་སོར་རིགས་སོགས་ཨུ་རུ་སུའི་ཁོངས་དེ་དག་ལ་གོ་གི་ཡོད། ཕལ་ཆེར་དངོས་ཡོད་གནས་ཚུལ་ལ་འདི་བདེན་པ་ཆགས་འདུག སྤྱིར་ནང་ཆོས་རྒྱ་གར་ནས་བོད་ལ་མ་དར་གོང་རྒྱ་ནག་ནང་དར་བ་རེད། དུས་རབས་བདུན་པའི་སྐབས་སུ་ཆོས་རྒྱལ་སྲོང་བཙན་སྒམ་པོ་རྒྱ་བཟའ་དང་གཉེན་སྒྲིག་གནང་བའི་ཐོག་ནས་ལྷ་སའི་ཇོ་བོ་རྒྱ་ནག་ནས་ཡར་གདན་དྲངས་བ་རེད། དམིགས་བསལ་གྱི་འབྲེལ་བ་བྱུང་ཡོད། དེ་ནས་དུས་རབས་བརྒྱད་པའི་སྐབས་ཁྲི་སྲོང་ལྡེའུ་བཙན་གྱིས་སངས་རྒྱས་པའི་ཆོས་འདི་ཐད་ཀར་རྒྱ་གར་ནས་ཚུར་བཞེས་རྒྱུར་དགོངས་པ་བཞེས་ཏེ། དཔལ་ནཱ་ལེནྡྲའི་མཁས་པའི་གཙུག་རྒྱན་གྲས་མཁན་ཆེན་ཞི་བ་འཚོ་བོད་དུ་གདན་ཞུ་གནང་། ཁོང་གིས་ནཱ་ལེནྡྲའི་ཆོས་ཀྱི་འགྲོ་སྟངས་བཙུགས་པ་རེད། སངས་རྒྱས་པའི་ཆོས་ལ་པཱ་ལིའི་ཆོས་བརྒྱུད་དང་། ལེགས་སྦྱར་གྱི་ཆོས་བརྒྱུད་བཅས་གཉིས་ཡོད། པཱ་ལིའི་ཆོས་བརྒྱུད་ནི་སངས་རྒྱས་པའི་ཆོས་ཀྱི་རྨང་གཞི་ཆགས་ཡོད། དེང་སྐབས་འཛམ་གླིང་འདིའི་སྟེང་གི་ནང་པའི་ཡུལ་གྲུ་ཚང་མས་པཱ་ལིའི་གཞུང་ནས་གསུང་པའི་སྡེ་སྣོད་གསུམ་གྱི་བརྗོད་བྱ་བསླབ་པ་གསུམ་དང་། འདུལ་བའི་ཉམས་ལེན་དེ་དག་ཕལ་ཆེ་བ་གཅིག་གྱུར་ཆགས་འདུག ཅེས་སོགས་ཀྱི་བཀའ་སློབ་སྩལ།

ཐེངས་འདིའི་གསུང་ཆོས་སྐད་རིགས་དུ་མའི་ནང་དུ་གསུང་སྒྱུར་གནང་གི་ཡོད་འདུག་ཅིང་། དེ་ཡང་ཨུ་རུ་སུ་དང་། ཧིན་ངྷི། སོག་པོ། རྒྱ་ནག ཨིན་ཇི། ཉི་ཧོང་། ཝི་ཏི་ནམ། ཀོ་རི་ཡ། ཨི་ཊ་ལི། ཕ་རན་སི། སི་པན། འཇར་མན་བཅས་ཀྱི་སྐད་ཡིག་ནང་གསུང་སྒྱུར་ཞུ་བཞིན་ཡོད་པར་མ་ཟད། དྲ་ལམ་ཐོག་ནས་ཐད་ཀར་གསན་གཟིགས་ཐུབ་རྒྱུའི་མཐུན་རྐྱེན་ཡང་བསྐྲུན་འདུག ད་ཐེངས་ཨུ་རུ་སུའི་དད་ལྡན་ཆོས་བ་ཞུ་རྣམས་ལ་བཀའ་ཆོས་བསྐྱངས་ཐེངས་བཅུ་གཅིག་པ་ཆགས་དེ་འདུག་ཡོད་འདུག