༢༠༡༧ལོའི་ཟླ་༡༡ཚེས་༡༠ཉིན་སྤེལ། བོད་ནང་གི་རྒྱ་ཆེའི་མི་མང་དེ་དག་བོད་ཀྱི་དོན་གྱི་བདག་པོ་རེད། དུས་ད་ལྟ་བར་དུ་འཛམ་གླིང་འདིར་བོད་ཅེས་མངོན་ཐུབ་པའི་མ་རྩ་ལྟ་བུ་ནི་བོད་རྒྱ་ཆེའི་མི་མང་རེད། ཅེས་བོད་ཀྱི་བླ་ན་མེད་པའི་དབུ་ཁྲིད་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་བཀའ་སློབ་ཕེབས་འདུག
ཟླ་འདིའི་ཚེས་༩ཉིན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་གིས་རྡ་ས་རིགས་ལམ་སླེབ་གཉེར་ཁང་དང་དབུས་བོད་ཀྱི་སྨན་རྩིས་ཁང་གི་སློབ་ཐོན་པ་དང༌། དེ་བཞིན་ལྷ་སྤྱི་ཚོགས་ཞབས་ཞུ་ཚོགས་པའི་འགོ་ལས་དང་དྭངས་བླངས་ཁག་ཅིག ད་དུང་རྒྱ་གར་དང་འབྲུག་པ། བོད་རིགས། ་ཡུལ་སོགས་ནས་ཕེབས་པའི་ཡུལ་སྐོར་སྤྲོ་འཆམ་པ་སོགས་ཁྱོན་མི་གྲངས་༢༠༠ཙམ་ལ་རྡ་ས་ཐེག་ཆེན་ཆོས་གླིང་གཙུག་ལག་ཁང་གི་གསུང་ཆོས་རྭ་བའི་ནང་མཇལ་ཁ་དང་སྦྲགས་བཀའ་སློབ་ཕེབས་ཡོད་པ་རེད།
དེ་ཡང་མགོན་པོ་གང་ཉིད་མཆོག་གིས། ངོས་ཀྱིས་རྒྱུན་དུ་བཤད་ཀྱི་ཡོད། བོད་ནང་གི་རྒྱ་ཆེའི་མི་མང་དེ་དག་བོད་ཀྱི་དོན་གྱི་བདག་པོ་རེད། དུས་ད་ལྟ་བར་དུ་འཛམ་གླིང་འདིར་བོད་ཅེས་མངོན་ཐུབ་པའི་མ་རྩ་ལྟ་བུ་ནི་བོད་རྒྱ་ཆེའི་མི་མང་རེད། ཁྱོད་རང་ཚོས་སེམས་ཤུགས་རི་བཞིན་བཙུགས་ཏེ་ཧ་ཅང་བརྟན་པོ་བྱས་པ་རེད། ཞེད་སྣང་དང་སྲོག་གི་ཉེན་ཁ་ཡང་ཡོད། དེ་ལྟ་བུའི་དཀའ་ངལ་གྱི་འོག་ནས་ཁྱེད་རང་ཚོ་མི་རིགས་ཀྱི་ཞེན་ཁོག་ཧ་ལས་པ་བྱས་ཏེ་བསྡད་འདུག
དེ་བཞིན་སངས་རྒྱས་པའི་ཆོས་ལ་དད་པ་བྱས་པ་དང༌། བར་སྐབས་ནས་སློབ་གཉེར་བྱ་རྒྱུ་ཡང་ཤུགས་ཆེ་རུ་འགྲོ་བ་ཞིག་ཆགས་ཀྱི་འདུག གང་ལྟར་གཞིས་ལུས་རྒྱ་ཆེའི་མི་མང་དེ་ང་ཚོ་བོད་ཀྱི་དོན་གྱི་བདག་པོ་རེད། འདས་པའི་ལོ་སྟོང་ཕྲག་རིང་ལ་ང་ཚོ་བོད་མི་རིགས་ཞེས་ཆབ་སྲིད་ཀྱི་སྒང་ལ་དར་རྒུད་སྣ་ཚོགས་ཤིག་བྱུང་ཡོད་ཀྱང༌། མི་རིགས་དང་རིག་གཞུང༌། སྐད་ཡིག་བཅས་འདས་པའི་ལོ་སྟོང་ཕྲག་གཉིས་ཙམ་རིང་གནས་པ་རེད། ང་ཚོས་ཆོས་རྒྱལ་མེས་དབོན་རྣམ་གསུམ་ཞེས་བརྗོད་པའི་དུས་ཚོད་ལ་བོད་དེ་ཨ་རིའི་གཙུག་ལག་སློབ་གྲྭ་ཆེན་མོའི་མཁས་པ་ཞིག་གིས་ཞིབ་འཇུག་བྱས་ཡོད། གཙོ་བོ་རྒྱ་ཡིག་ལ་གཞི་བཞག་ནས་ཞིབ་འཇུག་བྱས་ཏེ་དེབ་ཅིག་བཏོན་འདུག དེའི་ནང་དུ་དུས་རབས་བདུན་པ་དང་བརྒྱད་པ། དགུ་པ་བཅས་ལོ་སུམ་བརྒྱ་ལྷག་གི་རིང་ཨེ་ཤི་ཡའི་ནང་དུ་རྒྱལ་པོ་ཡོད་པའི་སྟོབས་ཆེན་རྒྱལ་ཁབ་རྒྱ་ནག་དང་སོག་པོ། བོད་བཅས་གསུམ་བྱུང་འདུག
རྒྱ་ནག་གིས་ཆབ་སྲིད་དང་སོག་པོས་དམག་གི་ཐོག བོད་ཀྱི་རྒྱལ་པོས་ཆོས་ཕྱོགས་ཀྱི་ཐོག་ལ་དོ་སྣང་ཆེན་པོ་བྱས་འདུག་ཅེས་ལོ་རྒྱུས་ཉམས་ཞིབ་བྱས་ཏེ་ཐོན་འདུག ངོས་ཀྱི་་ངོ་ཤེས་པའི་རྒྱ་མི་མཁས་དབང་ལོ་རྒྱུས་ལ་ཉམས་ཞིབ་བྱེད་མཁན་ཞིག་ཡོད། ངེད་གཉིས་ཚར་མང་པོ་ཐུག་པ་རེད། ཁོང་གིས་རྒྱ་ཡིག་གི་ཡིག་ཆའི་ནང་དུ་ཆོས་རྒྱལ་སྲོང་བཙན་སྒམ་པོའི་སྐབས་ཀྱི་རྒྱ་ནག་རྒྱལ་པོ་གོང་མ་ཐང་ནས་མར་མན་ཇུ་གོང་མ་བར་དུ་ལོ་བརྒྱ་ཕྲག་ཁ་ཤས་རིང་གི་རྒྱ་ཡིག་ཡིག་ཆའི་ནང་དུ་བོད་རྒྱ་ཁུངས་ཡིན་པ་མི་འདུག
བོད་རྒྱ་ཁུངས་ཡིན་པའི་ཁུངས་སྐྱེལ་བའི་ཡིག་ཆ་དེ་དག་བོད་ཀྱི་ཡི་གེ་རེད་ཅེས་ཟེར། ང་ཚོ་བོད་ཀྱི་མི་ཆེན་བླ་ཆེན་དེ་ཚོ་ནང་ཁུལ་མ་འཆམ་པར་རྒྱ་ནག་གོང་མའི་རྒྱབ་སྐྱོར་བཙལ་ནས་རྒྱ་ནག་གོང་མའི་ལྷ་འབངས་ཡིན་ཟེར་བ་ལྟ་བུ་དང༌། དཔེར་ན་སྐུ་མདུན་སྐུ་གོང་མའི་ྋཞལ་གདམས་ནང་དུ་དེ་ལྟ་བུ་ཞིག་ཡོང་བ་ཡོད། ཨིན་ཇིས་བཙན་འཛུལ་ཡོང་བའི་སྐབས་སུ་རྒྱ་ནག་ལ་ཕེབས་ནས་གོང་མ་ཡུམ་སྲས་ལ་བདེ་སྡུག་ཞུ་རུ་བཅར་བ་ཡིན་ཞེས་པ་ཞིག་མི་འདུག་གམ། དེ་སྔ་ངོས་ཀྱི་དྲན་པ་དེ་ྋརྒྱལ་མཆོག་བདུན་པ་བསྐལ་བཟང་རྒྱ་མཚོའི་སྐབས་སུ་དཔོན་པོ་མི་དབང་གིས་རྙོག་དྲ་ཅུང་བཟོས་པའི་སྐབས་སུ་རྒྱ་ནག་གོང་མ་ལ་འབྲེལ་བ་གནང་སྟེ། གོང་མས་ཁྲིམས་ཞིབ་པ་ལྟ་བུ་ཡར་བཏང་ནས་རྗེས་སུ་ང་ལུམ་སྦྱར་གསུམ་བསད་པ་སོགས་བྱུང་བ་རེད།
རྒྱ་མིས་དེས་བོད་རྒྱ་ཁུངས་ཡིན་པའི་སྒྲུབ་བྱེད་བཀོད་པ་དེ་ཚོ་གཙོ་བོ་གུང་ཁྲན་ཏང་དང་གོ་མིང་ཏང་གཉིས་ཀས་བོད་ཡིག་བེད་སྤྱོད་གཏོང་གི་འདུག རྒྱ་ཡིག་ནང་དུ་ཁྱོན་ནས་མི་འདུག་ཅེས་ཟེར། གང་ལྟར་བོད་མི་རིགས་དེ་གཞན་དང་མི་འདྲ་བའི་མི་རིགས་ཤིག་རེད། ང་ཚོ་ཆོས་ཕྱོགས་ཀྱི་ཐོག་ནས་བོད་ཁ་བ་གངས་ཅན་འཕགས་པ་སྤྱན་རས་གཟིགས་ཀྱི་གདུལ་ཞིང་ཡིན། སངས་རྒྱས་བཅོམ་ལྡན་འདས་རང་གིས་ལུང་བསྟན་པའི་ལུང་པ་ཞིག་ལ་ཡིད་ཆེས་བྱེད་ཀྱི་ཡོད།
ངོས་རང་བཙན་བྱོལ་ལ་སླེབས་ནས་ལོ་ ༥༨ ཕྱིན་འདུག སྐུ་མདུན་ྋསྐུ་གོང་མ་དགུང་ལོ་ ༥༩ བཞུགས་པ་རེད། ཕལ་ཆེར་སྐུ་མདུན་ྋསྐུ་གོང་མའི་མི་ཚེ་ལྟ་བུ་ཞིག་ང་ཚོ་བཙན་བྱོལ་ལ་བསྡད་པ་རེད། ད་ལོ་ ༨༢ སླེབ་ཡོད། ད་ལྟ་གཟུགས་པོ་ཧ་ཅང་ཡག་པོ་ཡོད། མཁྱེན་སོང་ངམ། བར་སྐབས་ནས་ཐང་ཆད་རྒྱུ་ཕྲན་བུ་སྡུག་ཏུ་ཕྱིན་འདུག་མ་གཏོགས་གཞན་གཟུགས་པོའི་མ་རྩ་ཡག་ཐག་ཆོད་ཡོད། ཁྱོད་རང་ཚོས་བློ་བདེ་བོ་བྱོས། རྒྱ་ནག་ལ་ག་ལེར་ག་ལེར་འགྱུར་བ་ཏན་ཏན་འགྲོ་གི་རེད་བསམ་གྱི་འདུག སྔ་མོ་ཞིས་ཅིན་ཕིན་གྱིས་པེ་རི་སུ་དང་ལྡི་ལིར་ནང་པའི་ཆོས་དེ་རྒྱ་ནག་གི་རིག་གཞུང་ནང་དུ་གལ་ཆེན་པོ་ཞིག་ཡིན་ཞེས་བཤད་ཡོད། ཞིས་ཅིན་ཕིན་གྱི་ཨ་མ་ནང་པ་རེད། ཁོ་རང་གི་བཟའ་ཟླ་དེའང་ནང་པ་ཡིན་པ་ལྟ་བུ་འདུག རྒྱ་ནག་ནང་དུ་དེང་སང་ནང་པ་ས་ཡ་བཞི་བརྒྱ་ལྷག་ཡོད་པ་བཤད་ཀྱི་འདུག ཕལ་ཆེར་རྒྱ་ནག་ནང་དུང་ཕྱུར་བཞི་ཙམ་འདུག ནང་པ་ཧ་ཅང་མང་པོ་འཕེལ་ཡོང་གི་འདུག དེར་བརྟེན་འགྱུར་བ་འགྲོ་བའི་རེ་བ་ཏན་ཏན་ཡོད། ཁྱོད་རང་ཚོ་སེམས་ཤུགས་མ་ཆགས་པར་སེམས་སྐྱིད་པོ་བྱས་ནས་སྡོད། ཅེས་སོགས་ཀྱི་བཀའ་སློབ་སྩལ།།
གསར་འགོད་པ་ཡེ་ཤེས་ཆོས་བཟང༌།
