ལི་ཐང་དུ་སྔར་ལས་དམ་དྲག་ཇེ་ཆེར་ཕྱིན་འདུག

བོད་མདོ་ཁམས་ལི་ཐང་ས་ཁུལ་དུ་དུས་རྒྱུན་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་༸སྐུ་པར་སྒྲིག་གཤོམ་དང་བཀའ་སློབ་སོགས་ཀྱང་གསན་གཟིགས་གནང་རྒྱུའི་གུ་ཡངས་ཀྱི་རྣམ་པ་ཡོད་ཀྱང་། ཉེ་ཆར་ནས་བཟུང་སྔར་དང་མི་འདྲ་བར་ཆོས་ལུགས་ཀྱི་གནང་སྒོར་དམ་དྲག་ཆེ་རུ་བཏང་ཡོད་པ་དང་། ལི་ཐང་རྫོང་ས་གནས་རྒྱ་ནག་སྲིད་གཞུང་དང་ཐད་ཀར་འབྲེལ་བ་ཡོད་མེད་ལ་མ་ལྟོས་པར་ས་གནས་དཔོན་རིགས་ཁག་ཅིག་གིས་དེ་སྔ་རྒྱ་གར་ནས་ཕེབས་པའི་དགེ་བཤེས་ལྷ་རམས་པ་ཚོས་ལི་ཐང་དགོན་ཆེན་དུ་དགེ་རྒན་གྱི་ཕྱག་ལས་གནང་བཞིན་ཡོད་པ་དེ་དག་གནང་མི་ཆོག་ཅེས་དགོན་པ་ནས་ཕྱིར་ཕུད་བཏང་ཡོད་པ་མ་ཟད།

མི་མང་ལ་གསུང་ཆོས་ཀྱང་གནང་མི་ཆོག་པའི་བཙན་བཀའ་ཡོད་འདུག་བཏང་འདུག དགོན་པ་ནས་དགུན་དུས་སུ་སློབ་གྲྭའི་གུང་གསེང་གི་སྐབས་དང་བསྟུན་སློབ་ཕྲུག་རྣམས་ལ་ཟུར་དུ་བོད་ཀྱི་བརྡ་སྤྲོད་རིག་པ་དང་སྙན་ངག་སོགས་སློབ་ཁྲིད་གནང་བཞིན་ཡོད་པ་དེ་དག་གནང་མི་ཆོག་པ་བཟོས་པ་དང་། ལྷག་དོན་དགོན་པའི་གྲྭ་བཙུན་ཚོས་ཀྱང་སློབ་མི་ཆོག་པའི་བཀག་སྡོམ་བྱས་འདུག དེ་བཞིན་ཤིང་སྣ་འདེབས་འཛུགས་ལ་ཁ་གཡར་ཏེ་རྒྱ་སྒོར་ཁྲི་དགུ་བརྒྱ་ལྷག་སྤྲད་དེ་ཉོས་པའི་ས་གནས་ཡུལ་མིའི་ས་ཆ་མང་པོ་ཞིག་གུན་གསབ་གང་ཡང་མ་སྤྲད་པར་བཙན་འཕྲོག་བྱས་ཡོད་འདུག་ལ་ལི་ཐང་རྟ་རྒྱུག་འགྲན་བསྡུར་བ་རྣམས་ཀྱང་རྫོང་ཉེན་རྟོག་པས་དོན་མེད་འཛིན་བཟུང་གིས་ཉེས་རྡུང་ཚད་མེད་བཏང་བ་མ་ཟད་རྟ་རྒྱུག་འགྲན་བསྡུར་གནང་མི་ཆོག་པའི་བཀག་སྡོམ་བྱས་ཡོད་འདུག

འདི་གས་གསར་འགོད་པས་འབྲེལ་ཡོད་ཀྱི་མི་སྣ་ཞིག་ལ་དེའི་སྐོར་ནས་དྲི་བ་དྲིས་པར། ཁོང་གིས་གསུང་དོན་ད་ལོར་དམིགས་བསལ་གྱིས་ལི་ཐང་དུ་དམ་དྲག་ཆེ་རུ་བཏང་སོང་། ན་ནིང་ཡིན་ན་ང་རང་བོད་ཟླ་བཞི་བའི་ནང་ལི་ཐང་རྫོང་དང་མཆོད་རྟེན་དཀར་པོའི་ཆོས་རའི་ནང་དུ་ཕྱིན་ཡིན། དེའི་དུས་མཆོད་རྟེན་དཀར་པོའི་ཆོས་རའི་ནང་དུ་༧རྒྱལ་བ་རིན་པོ་ཆེའི་བཀའ་ཆོས་སྒྲོག་བཞིན་འདུག་པ་དང་། ཧ་ཅང་གུ་ཡངས་པོ་ཞིག་ཡིན་པ་འདྲ་བསམ་སོང་། ད་ལོར་གཞུང་གིས་དོ་དམ་ཇེ་དྲག་ལ་བཏང་སོང་། ༧རྒྱལ་བ་རིན་པོ་ཆེའི་སྐུར་སྒྲིག་གཤོམ་སོགས་སྔར་ལས་ཇེ་དམ་རེད། མ་ཟད་རྫོང་ནང་གི་ལམ་བར་གང་སར་ཉེན་རྟོག་པའི་གྱོན་པ་གྱོན་མཁན་མི་སྣ་མང་པོ་བཀྲམ་འཇོག་བྱས་འདུག ང་ཚོའི་ལུས་སེམས་གཉིས་ཀས་ལས་ཀ་ནག་པོ་གང་ཡང་བྱས་མེད་ཀྱང་འགྲོ་འདུག་ལ་སྔར་ལས་ཇེ་དཀའ་འདྲ་བཟོས་བྱུང་ཞེས་བརྗོད་བྱུང་།