བཙན་བྱོལ་བོད་མིའི་སྒྲིག་འཛུགས་ཀྱི་འཛིན་སྐྱོང་བཀའ་ཤག

བཙན་བྱོལ་བོད་མིའི་བཅའ་ཁྲིམས་ཀྱི་དགོངས་དོན་བཀའ་ཤག་ཏུ་བཀའ་བློན་ཁྲི་པ་གཅིག་དང༌། བཀའ་བློན་གཞན་བདུན་ལས་མ་མང་བ་ཞིག་དགོས་པ། བཀའ་བློན་ཁྲི་པ་བོད་མི་མང་ཚོགས་ཀྱིས་ཐད་ཀར་སྤྱི་ཡོངས་འོས་བསྡུའི་ལམ་ནས་འོས་འདེམས་བྱེད་པ་དང༌། བཀའ་བློན་ཁྲི་པས་རང་གི་ཕྱག་སྦྲེལ་བཀའ་བློན་གཞན་རྣམས་འོས་འཛུགས་མིང་འདོན་གནང་བར་ངོ་ཡོད་སྤྱི་འཐུས་ཀྱི་བརྒྱ་ཆ་ ༥༠ ལས་མི་ཉུང་བའི་རྒྱབ་སྐྱོར་འཐོབ་དགོས་པ་ཡིན། བཀའ་བློན་རྣམ་པའི་ལས་རྒྱུན་ཡུན་ཚད་ལོ་ལྔ་ཡིན།།

 བཀའ་དྲུང་ཡིག་ཚང༌།

བཀའ་ཤག་གི་ཉིན་རེའི་ལས་དོན་ལག་བསྟར་ཞུ་མཁན་གྱི་ལས་ཁུངས་ཤིག་ཡོད་པ་དེ་ལ་བཀའ་དྲུང་ཡིག་ཚང་ཟེར་ཞིང༌། ལས་ཁུངས་དེའི་སྤྱི་ཁྱབ་འགན་འཛིན་དུ་དྲུང་ཡིག་ཆེན་མོ་ཞིག་ཡོད་པར་བཀའ་དྲུང་ཞུ་ཡི་ཡོད། ལས་ཁུངས་དེས་ཆབ་སྲིད་དང༌། འཛིན་སྐྱོང༌། མང་ཚོགས་ཀྱི་བདེ་སྡུག་ལ་སོགས་པའི་ལས་དོན་མཐའ་དག་བཀའ་ཤག་ཏུ་སྙན་གསན་ཞུ་རྒྱུ་དང༌། བཀའ་ཤག་གིས་ལས་དོན་ཐག་གཅོད་ཇི་བྱུང་བློན་ཆེན་ལས་ཁུངས་གཙོས་པའི་ལས་ཁུངས་ཁག་ལ་ཕྱག་བསྟར་ཆེད་ཁུངས་ཁྱབ་དང་མཇུག་སྐྱོང་ཞུ་རྒྱུ་ཡིན། བཀའ་དྲུང་ཡིག་ཚང་གི་ཁྱབ་ཁོངས་ལས་ཁུངས་གསུམ་ཡོད་པ། འཆར་འགོད་ལྷན་ཁང་དང༌། ལོ་རྒྱུས་འབྲི་རྩོམ་དང་བར་བརྒལ་ལས་བཀོད་སྡེ་ཚན། བོད་ཀྱི་སྲིད་བྱུས་ཉམས་ཞིབ་ཁང་བཅས་ཡིན།

བཀའ་དྲུང་ཡིག་ཚང་གི་སྡེ་ཚན། བཀའ་དྲུང་ཡིག་ཚང་ལ་སྡེ་ཚན་ལྔར་དབྱེ་ཡོད།

༡་ བཀའ་ཤག་ལྷན་ཚོགས་སྡེ་ཚན། ༢་ གྲོས་ཚོགས་དང་འཆར་འགོད་འཛིན་སྐྱོང་སྡེ་ཚན། ༣་ ཕྱི་བསྐྱོད་ལག་འཁྱེར་བཀའ་འཁྲོལ་སྡེ་ཚན། ༤་ རྩིས་ཞིབ་སྙན་ཐོ་ཞིབ་འཇུག་སྡེ་ཚན། ༥་ འཛིན་སྐྱོང་སྡེ་ཚན།

བཀའ་ཤག་ལྷན་ཚོགས་སྡེ་ཚན། བཀའ་ཤག་ལྷན་རྒྱས་ནམ་ཚོགས་སྐབས་བཀའ་དྲུང་དང་ལས་རོགས་བཅས་ནས་བཙན་བྱོལ་མིའི་སྒྲིག་འཛུགས་ཀྱི་ཆབ་སྲིད་དང༌། སྤྱི་ཚོགས། འཕྲོད་བསྟེན། དཔལ་འབྱོར་ལ་སོགས་པའི་སྐོར་སྲིད་སྐྱོང་མཆོག་ནས་བཀའ་ཕེབས་དང༌། ཡང་ན་འབྲེལ་ཡོད་ལས་ཁུངས་ནས་འཆར་འབུལ་གནང་བ་ཁག་བཀའ་ཤག་ལྷན་ཚོགས་ནང་བཀའ་བསྡུར་གནང་ཆེད་གྲོས་གཞི་བཟོ་རྒྱུ་དང༌། ལྷན་ཚོགས་ནང་བཀའ་བསྡུར་ཐག་གཅོད་ཇི་བྱུང་གྲོས་ཆོད་ཡིག་ཐོག་བཀོད་རྒྱུ། དེ་བཞིན་བཀའ་ཤག་ལྷན་རྒྱས་ནང་བཀའ་མོལ་ཇི་བྱུང་སྒྲ་འཛིན་འཕྲུལ་འཁོར་ནང་བཅུག་ནས་བདག་ཉར། གྲོས་ཆོད་དགོངས་དོན་འབྲེལ་ཡོད་ལས་ཁུངས་སོ་སོར་ཁུངས་ཁྱབ་བྱ་རྒྱུ་བཅས་ཡིན། དེ་བཞིན་དོལ་རྒྱལ་དང་འབྲེལ་བའི་ད་ཕན་གྱི་ཞིབ་འཇུག་ཡིག་ཆ་ཉར་རྒྱུ་དང་དེ་འབྲེལ་དོལ་རྒྱལ་སྐོར་གནས་ཚུལ་གསར་པ་ཇི་བྱུང་ལ་རྟོགས་ཞིབ་ཀྱིས་འབྲེལ་ཡོད་གོང་རིམ་ལ་སྙན་གསན་ཞུ་དགོས་ཀྱི་མཚོན་ལས་དོན་ཇི་ཡོད་བྱ་རྒྱུ་བཅས་ཡིན།

གྲོས་ཚོགས་དང་འཆར་འགོད་འཛིན་སྐྱོང་སྡེ་ཚན། བོད་མི་མང་སྤྱི་འཐུས་རྒྱུན་ལས་དང་གྲོས་ཚོགས་ནས་དྲི་བ་བྱུང་ཁག་ལ་གསལ་བཤད་ལན་འདེབས་ཟིན་བྲིས་བཟོ་རྒྱུ་དང༌། སྤྱི་འཐུས་རྣམ་པ་ཕྱོགས་མཐའ་ཁག་ལ་འཚམས་གཟིགས་ཕེབས་པའི་མང་ཚོགས་ཀྱིས་བདེ་སྡུག་དང་དྭོགས་འདྲི་ཞུས་པའི་ལས་བསྡོམས་གནང་འབྱོར་ཁག་འབྲེལ་ཆགས་ལས་ཁུངས་སོ་སོ་ནས་གསལ་བཤད་སོགས་ཇི་དགོས་བླངས་ཏེ་སྤྱི་འཐུས་ལྷན་ཁང་ལ་གསལ་བཤད་ཞུ་དགོས་རགས་ཟིན་འགོད་རྒྱུ། གྲོས་ཚོགས་སྐབས་ལས་ཁུངས་སོ་སོའི་དངོས་ཡོད་ལས་དོན་དང་འབྲེལ་བའི་གཞུང་འབྲེལ་གྲོས་འཆར་དང་སྒྲིག་ཟིན་བཟོ་རྒྱུ། བསྐྱར་བཅོས་དང་གྲོས་འཆར་འདོན་དགོས་རྒྱུ་མཚན་དང་རྒྱབ་ལྗོངས་གནས་ཚུལ་ཕྱོགས་སྒྲིག་བྱ་རྒྱུ་བཅས་ཡིན།

ཕྱི་བསྐྱོད་ལག་འཁྱེར་བཀའ་འཁྲོལ་སྡེ་ཚན། བཙན་བྱོལ་མིའི་སྒྲིག་འཛུགས་གི་ཆབ་འབངས་སུ་གཏོགས་པའི་བོད་མི་བཙན་བྱོལ་བ་སུ་རུང་དང་བོད་མིའི་སྒྲིག་འཛུགས་ཀྱི་གཞུང་འབྲེལ་དང་གཞུང་འབྲེལ་མ་ཡིན་པའི་ཚོགས་འདུ་དང་གཉེན་འཕྲད། ཤེས་ཡོན་དང་ལས་རིགས་སློབ་སྦྱོང༌། གཞན་ཡང་ནང་མི་ཟླ་བསྒྲིལ་བཅས་སུ་བསྐྱོད་ཆོག་པའི་བཙན་བྱོལ་མིའི་སྒྲིག་འཛུགས་གི་ཕྱི་བསྐྱོད་ལག་འཁྱེར་བཀའ་འཁྲོལ་སྲིད་བྱུས་གཏན་འབེབས་ལྟར་ཞིབ་དཔྱད་ཞུས་ཏེ་བཀའ་འཁྲོལ་གཏོང་རྒྱུ་བཅས་ཡིན།

རྩིས་ཞིབ་སྙན་ཐོ་ཞིབ་འཇུག་སྡེ་ཚན། བཙན་བྱོལ་མིའི་སྒྲིག་འཛུགས་གི་དབུས་ལས་ཁུངས་ཁག་དང་ཡན་ལག་སྡེ་ཚན་ཁག་གི་རྩིས་ཞིབ་སྙན་ཐོ་ཁག་ལ་ཞིབ་འཇུག་གིས་སྐྱོན་གནད་ཇི་ཡོད་ཟུར་འདོན་གྱིས་བཀའ་ཤག་ལ་སྙན་གསན་ཞུ་རྒྱུ་དང༌། འབྲེལ་ཡོད་ལས་ཁུངས་ལ་ཞིབ་འཇུག་ཐག་གཅོད་ཇི་འོས་བཀའ་ཕེབས་དགོངས་དོན་ལན་ཟིན་བཟོ་རྒྱུ། རྩིས་ཞིབ་ལས་ཁུངས་ཀྱི་དུས་ནས་དུས་སུ་དོགས་འདྲི་ཞུ་ཁག་དང་ལོ་མཇུག་མཚམས་ཕྱོགས་བསྡོམས་སྙན་ཐོ་ཕུལ་ཁག་ལ་ཞིབ་འཇུག་གིས་ལན་ཟིན་བཟོ་རྒྱུ། གཞན་ཡང་དབུས་ལས་ཁུངས་ཁག་དང་ཁྱབ་ཁོངས་སྡེ་ཚན་ཁག་ནས་གཞུང་འབྲེལ་ལས་དོན་ཆེད། སྒྲིག་གཞི་དགོངས་དོན་གྱི་ཕྱོགས་བསྐྱོད་བཀའ་འཁྲོལ་ཞུས་རིགས་ལ་ཞིབ་འཇུག་དང་བཀའ་འཁྲོལ་ཡིག་ཆུང་གཏོང་རྒྱུ། བར་བརྒལ་བཀའ་འཁྲོལ་འབྱོར་རིམ་བཞིན་ཞིབ་འཇུག་གིས་སྤྱི་འཐུས་རྒྱུན་ལས་ལ་རྒྱབ་གཉེར་ཞུ་སྙན་འབུལ་རྒྱུ་དང་བཀའ་འཁྲོལ་ཐོན་མཚམས་ཁུངས་སོ་སོར་ཁུངས་ཁྱབ་གཏོང་རྒྱུ་བཅས་ཡིན།

འཛིན་སྐྱོང་སྡེ་ཚན་གྱི་ཚན་པ་ ༦ ནི། ཀ༽ སྲིད་སྐྱོང་སྒེར་དྲུང་ཚན་པ། ཁ༽ ལས་བྱེད་བཀོད་སྒྲིག་ཚན་པ། ག༽ རྩིས་ཁང་ཚན་པ། ང༽ སྤྱི་ཡོངས་ལས་ཁུངས་ཚན་པ། ཅ༽ ཞི་མོལ་ལས་དོན་ཚན་པ། ཆ༽ བོད་མིའི་ཁྱད་ལས་དང་བླངས་ཞབས་ཞུ་ཚན་པ།

སྲིད་སྐྱོང་སྒེར་དྲུང་ཚན་པ། སྲིད་སྐྱོང་མཆོག་གི་མཚན་ཐོག་ཉིན་རེའི་གནས་སྙན་ཁག་འཚེམས་མེད་དུས་ཐོག་སྙན་གསན་དང་བཀའ་ལན་བཟོ་དགོས་རིགས་ལ་ཡིག་ཟིན་བཟོ་རྒྱུ། སྲིད་སྐྱོང་དབུ་བཞུགས་ཀྱིས་ཚོགས་འདུ་རིགས་གོ་སྒྲིག་དང༌། སྒེར་དྲུང་ནས་ཚིག་ཐོ་བླང་དགོས་རིགས་ལ་ཚོགས་བཅར་ཞུ་རྒྱུ། གཞུང་འབྲེལ་ཕྱོགས་ཕེབས་ཀྱི་མཛད་འཆར་དུས་ཐོག་བཟོས་ཏེ་མཁྱེན་རྟོགས་སླད་སྤྱི་འཐུས་ཚོགས་གཙོ་མཆོག་དང་དེའི་ངོ་བཤུས་འབྲེལ་ཡོད་ལས་ཁུངས་ཁག་ལ་འབུལ་རྒྱུ། སྲིད་སྐྱོང་གི་འགྲིམ་འགྲུལ་ཕྱག་འཁྱེར་གོ་སྒྲིག་ཞུ་རྒྱུ་དང་ཉིན་རེའི་མཛད་རིམ་བཟོ་འགོད་ཀྱིས་མཇལ་དུས་ཞུ་མི་རྣམས་ལ་བརྡ་ལན་འཕྲོད་པ་བྱ་རྒྱུ། དེ་བཞིན་བཀའ་བློན་རྣམ་པའི་གཞུང་འབྲེལ་ཕྱོགས་ཕེབས་ཀྱི་མཛད་འཆར་དང་འཁོར་ཞག་དགོངས་སྙན་འབྱོར་འཕྲལ་ཐག་གཅོད་གནང་དགོས་རིགས་ལ་འབྲེལ་མཐུད་ཞུ་རྒྱུ། གསང་བའི་ཡིག་སྣོད་དང་ཡིག་ཆ་ཟུར་འཇོག་བྱ་དགོས་རིགས་ཉར་ཚགས་བྱ་རྒྱུ་བཅས་ཡིན།

ལས་བྱེད་བཀོད་སྒྲིག་ཚན་པ། ལས་བྱེད་གསར་བསྐོ་དང༌། གནས་སྤོ། གནས་སྤར། གནས་སྐབས་དགོངས་ཞུ། རྩ་དགོངས། དེ་བཞིན་རྒས་ཡོལ་དང་རྒས་ཡོལ་ཕར་འགྱངས། བསྐྱར་བསྐོ། ཆོད་གན། ཞབས་གཡར། དམིགས་བསལ་བསྐོ་གཞག འཕྲལ་སེལ། རང་ཁོངས་ལས་བྱེད་བཅས་ཀྱི་ཡིག་ཆ་གོ་སྒྲིག་ཞུ་དག་དང༌། བསྐོ་གཞག ས་མིག་ཕྱོགས་བསྡོམས་ཞིབ་འཇུག་ཞུ་རྒྱུ། གཞུང་ཞབས་ལས་བྱེད་དུས་ནས་དུས་སུ་བརྗེ་འགྱུར་འགྲོ་བསྟུན་མཚན་གཞུང་དུས་ཐོག་ འགྱུར་བཅོས་ཁ་སྐོང་བྱ་རྒྱུ། ལས་བྱེད་རྣམས་ཀྱི་ཞུ་སྙན་ཡིག་འབྲེལ་ལ་ལན་འདེབས་བཟོ་གཏོང༌། ལས་བྱེད་ཀྱི་ལོ་རྒྱུས་ཁ་གསལ་འགོད་ཉར་བྱ་རྒྱུ་བཅས་ཡིན།

རྩིས་ཁང་ཚན་པ། བཀའ་དྲུང་ཡིག་ཚང་དང་ཁྱབ་ཁོངས་འཆར་འགོད་ལྷན་ཁང་དང༌། ངེས་མེད་ལས་གཞི་སྡེ་ཚན། བོད་ཀྱི་སྲིད་བྱུས་ཉམས་ཞིབ་ཁང་བཅས་ཀྱི་དམིགས་བསལ་དང༌། རྒྱུན་གྲོན། དམིགས་བཀར་རྩིས་ཁྲ་འགོད་ཉར། དབང་ལྡན་འགན་འཛིན་དང་གོ་བསྡུར་ཐོག་སྔོན་རྩིས་འཆར་གཞི་ཟིན་བྲིས་བཟོ་རྒྱུ། བཀའ་ཤག་དང་ཐད་འབྲེལ་རྩིས་ཁྲ་རིགས་འགོད་ཉར། བཀའ་བློན་རྣམ་པ་དང༌། བཀའ་དྲུང་ཡིག་ཚང་དང་ཁྱབ་ཁོངས་ལས་ཁུངས་གཉིས་ཀྱི་ལས་བྱེད་རྣམ་པའི་དགོངས་ཞུ་ཟླ་གསུམ་མཚམས་ཕྱོགས་བསྡོམས་ཞུ་རྒྱུ། མཆོད་ཁང་གི་རྟེན་དངོས་དང༌། འཛིན་ཆས། ཡོ་བྱད་བདག་ཉར་དང་ཉམས་གསོ། གསར་བརྗེ་ཇི་དགོས་ལྟ་རྟོགས་བྱ་རྒྱུ། དེ་བཞིན་གཞུང་འབྲེལ་སྣེ་ལེན་ཁག་གོ་སྒྲིག་བྱ་རྒྱུ་བཅས་ཡིན།

སྤྱི་ཡོངས་ལས་ཁུངས་ཚན་པ། ཡི་གེ་འབྱོར་རིགས་འབྱོར་དེབ་ནང་དེབ་འགོད་ཞུ་རྒྱུ་དང༌། ཕྱིར་གཏོང་ཡིག་རིགས་ཀྱང་འཚེམས་ལུས་མེད་པ་གཏོང་གཞུང་ནང་ཐོ་འགོད་ཀྱིས་ཁུངས་སོ་སོར་གཏོང་རྒྱུ། དེ་བཞིན་ཡིག་རིགས་དེ་དག་ཁུངས་གཏོགས་ཡིག་སྣོད་དུ་དབྱེ་ནས་དཀར་ཆག་འགོད་རྒྱུ། བཀའ་དྲུང་ཡིག་ཚང་གི་ཡིག་ཆ་ཇི་ཡོད་བདག་ཉར་བྱ་རྒྱུ། རྒྱུན་ཏུ་བཀའ་དྲུང་དང་བཀའ་དྲུང་ལས་འཕར་ནས་བཀོད་མངགས་ཇི་བྱུང་ལྟར་ཞུ་རྒྱུ། བཀའ་ཤག་དང་བཀའ་དྲུང་ཡིག་ཚང་དུ་བཅར་མཁན་རྣམས་བཅར་འཐུས་བཀའ་འཁྲོལ་ཡོད་མེད་ཞིབ་འཇུག་གིས་བཀའ་འཁྲོལ་ཡོད་རིགས་ཀྱི་མིང་དང་ལོརྒྱུས་འགོད་དེབ་ནང་ཁ་གསལ་བཀོད་དེ་ཚུལ་བཞིན་སྣེ་ལེན་བྱ་རྒྱུ། དེ་མཚུངས་ནང་འབྱོར་དང་ཕྱིར་གཏོང་ཞལ་པར་ཁག་བཏང་འཛིན་གྱིས་དེའི་ཞིབ་ཕྲའི་གནས་ཚུལ་ཐོ་བཀོད་བྱ་རྒྱུ། བཀའ་དྲུང་དང་བཀའ་དྲུང་ལས་འཕར་གྱི་བཀོད་མངགས་བཞིན་ལས་ཁུངས་ཁག་ལ་གཏོང་རྒྱུའི་ཡིག་ཆུང་རགས་ཟིན་བཟོ་རྒྱུ། འབྲེལ་ཡོད་ཡིག་ཆ་འཚོལ་རྒྱུ་དང་བདག་ཉར་བྱ་རྒྱུ་བཅས་ཡིན།

ཞི་མོལ་ལས་དོན་ཚན་པ། བོད་རྒྱ་ཞི་མོལ་དང་འབྲེལ་བའི་ཡིག་ཆ་ཁག་བདག་ཉར་བྱེད་རྒྱུ་དང༌། བོད་རྒྱ་ཞི་མོལ་ལས་དོན་ཚོགས་ཆུང་གི་ཚོགས་འདུ་གོ་སྒྲིག་ཞུ་རྒྱུ། སྐབས་འབྲེལ་ཡིག་ཆ་ཕྱོགས་སྒྲིག་དང་ཕབ་བསྒྱུར་དགོས་རིགས་སོགས་ཀྱི་ལས་དོན་བཀོད་སྒྲིག་ཇི་གནང་འབད་བསྒྲུབས་བྱ་རྒྱུ་བཅས་ཡིན།

བོད་མིའི་ཁྱད་ལས་དང་བླངས་ཞབས་ཞུ་ཚན་པ། དམིགས་ཡུལ་རྩོ་བོ་ནི་བོད་མིའི་འཐབ་རྩོད་མུ་མཐུད་སྲ་བརྟན་རྒྱུན་གནས་དང། ནུས་ཤུགས་ཆེ་རུ་གཏོང་རྒྱུ། དེ་བཞིན་ཡར་རྒྱས་བཏང་སྟེ་བོད་དང་བོད་མིར་མི་རབས་ནས་མི་རབས་བར་ཐུགས་ཕན་གསོས་ཆེད་བཙན་བྱོལ་བོད་མིའི་སྤྱི་ཚོགས་ཁྲོད་དུ་ཡོད་པའི་ལས་ཐོག་དང་ལས་ཡོལ་ཟིན་པའི་ཁྱད་ལས་པ་དང། ན་གཞོན་འགོ་ཁྲིད་རྣམས་མཉམ་རུབ་ཀྱིས་དང་བླངས་ཀྱི་སྒོ་ནས་ཞབས་འདེགས་ཞུ་མཁན་གྱི་སྡེ་ཚན་ཞིག་བསྐྲུན་ཐབས་ཞུ་རྒྱུ་དེ་ཡིན། www.tibetcorps.org

འཆར་འགོད་ལྷན་ཁང༌། བཀའ་དྲུང་ཡིག་ཚང་གི་ཁྱབ་ཁོངས་འཆར་འགོད་ལྷན་ཁང་ནི་བཙན་བྱོལ་བོད་མིའི་སྒྲིག་འཛུགས་གི་ལས་ཁུངས་མ་ལག་དང་བཅས་པའི་འཆར་གཞི་ཁག་གི་འཆར་འགོད་ཆེད་ཟུར་འཛུགས་གནང་བ་ཡིན། དེས་བཙན་བྱོལ་བོད་མིའི་སྤྱི་ཚོགས་ཁྲོད་ཀྱི་མི་དང༌། དངོས་པོའི་ནུས་པ། དཔལ་འབྱོར་བཅས་ཀྱི་ཐོན་སྐྱེད་ནུས་ཤུགས་འཕེལ་རིམ་ལ་གཞིགས་པའི་དགེ་བེད་ལོངས་སྤྱོད་རྒྱུའི་འཆར་གཞི་ཁག་འགོད་འདོམས་གནང་གི་ཡོད། སྤྱི་ཁྱབ་འཆར་འགོད་པའི་འོག་ལས་བྱེད་དྲུག་ཡོད་པའི་ལས་ཁུངས་ཟུར་འཛུགས་ཡོད་ཀྱང་རྩིས་དང་འབྲེལ་བའི་འཛིན་སྐྱོང་བཀའ་དྲུང་ལས་འཕར་གྱིས་འགན་འཁུར་གནང་གི་ཡོད།

ལོ་རྒྱུས་འབྲི་རྩོམ་དང་བར་བརྒལ་ལས་བཀོད་སྡེ་ཚན། ལོ་རྒྱུས་འབྲི་རྩོམ་ཚན་པ་ནི་གཏན་འཇགས་ཀྱི་ཚན་པ་ཞིག་ཡིན་པ་དེས་ཕྱི་ལོ་ ༡༩༥༩ ཚུན་གྱི་བཙན་བྱོལ་བོད་གཞུང་གི་ལོ་རྒྱུས་རྩོམ་སྒྲིག་དང་དེའི་རྒྱུ་ཆ་འཚོལ་ཞིབ་བྱེད་ཀྱི་ཡོད། བར་བརྒལ་ལསབཀོད་ཚན་པ་ནི་ལས་བྱེད་ས་གནས་གཅིག་ནས་ལས་ཐོན་གྱིས་ས་གནས་གཞན་དུ་བཀོད་སྒྲིག་མ་ཐུབ་པར་བར༌བརྒལ་གྱི་ལས་བཀོད་བྱ་ཡུལ་ཞིག་ཡིན།

བོད་ཀྱི་སྲིད་བྱུས་ཉམས་ཞིབ་ཁང། བོད་ཀྱི་སྲིད་བྱུས་ཉམས་ཞིབ་ཁང་གིས་སའི་གོ་ལའི་ཐོག་ཡོད་པའི་རང་རེའི་མཁས་པ་དང་ཉམས་ཞིབ་པ་ཚོས་བློ་གྲོས་ཀྱི་ནུས་མཐུ་སྤེལ་ཡུལ་གྱི་ལྟེ་གནས་ཁང་ཞིག་ཏུ་བསྒྱུར་རྒྱུའི་འབད་བརྩོན་ཞུ་རྒྱུ་དང་སྦྲགས་རྒྱལ་སྤྱིའི་ཐོག་བོད་དང་བོད་མིའི་གནད་དོན་ཁག་གསལ་ཁ་དོད་པོས་ཁྱབ་བརྡལ་གཏོང་རྒྱུ་དང། དེ་བཞིན་བཙན་བྱོལ་བོད་མིའི་སྒྲིག་འཛུགས་ཀྱི་མཁས་པའི་བང་མཛོད་ལྟ་བུར་མ་འོངས་པར་བོད་དང་བོད་མིར་འཕྲད་ངེས་ཀྱི་དཀའ་ངལ་ཁག་ལ་གདོང་ལེན་བྱ་ཐབས་ཀྱི་ལས་བྱུས་ཁག་དཔལ་ལྡན་བཀའ་ཤག་ལ་སྙན་གསན་གྱིས་དགོངས་པའི་དཔྱད་གཞིར་འབུལ་རྒྱུ་བཅས་ཡིན།