18
Mon, Mar
36 New Articles

རྒྱལ་སྤྱིའི་གསར་འགྱུར།
Typography

༢༠༡༩ལོའི་ཟླ་༡ཚེས་༤ཉིན་སྤེལ།ལྕམ་སྐུ་ནེན་སི་པི་ལོ་སི་མཆོག་སླར་ཡང་ཨ་རིའི་གྲོས་ཚོགས་འོག་མའི་ཚོགས་གཙོར་བདམས་ཐོན་བྱུང་རྗེས། ཟླ་༡ཚེས་༣ཉིན་གྲོས་ཚོགས་འོག་མའི་ཚོགས་གཙོའི་ལས་འཁུར་དམ་འབུལ་ཞུས་ཡོད་པ་དང་། ཁོང་མོར་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་བསུའི་འཚམས་འདྲི་དང་། བོད་དོན་འཐབ་རྩོད་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་གནང་མཛད་འདུག

དེ་ཡང་། སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགའ་བསུའི་འཚམས་འདྲི་མཛད་པའི་ནང་དུ། ཨ་རི་ནི་འཛམ་གླིང་རང་དབང་ལུང་པའི་སྣེ་འཁྲིད་མཁན་ཞིག་ཡིན་པ་དང་། གཉན་འཕྲང་ཆེ་བའི་དུས་སྐབས་འདིར་ལྕམ་སྐུ་མཆོག་གིས་ཚོགས་གཙོའི་ལས་དོན་བརྒྱུད་ཁ་ཕྱོགས་བཟང་པོ་ཞིག་ཏུ་སྣེ་འཁྲིད་ཐུབ་རྒྱུ་ཡིན་པར་མགོན་པོ་གང་ཉིད་ལ་ཡིད་ཆེས་ཡོད་ཅེས་དང་། ལྷག་པར་ལྕམ་སྐུ་མཆོག་ནི་༸གོང་ས་༸སྐྱབས་མགོན་ཆེན་པོ་མཆོག་གི་ཐུགས་བློ་ཧ་ཅང་ཉེ་བའི་གྲོགས་མོ་ཞིག་ཡིན་སྐོར་གསུངས་འདུག

གཞན་ཡང་། ༸གོང་ས་མཆོག་གིས་འདས་པའི་ལོ་ངོ་བཅུ་ཕྲག་འགའི་རིང་ལྕམ་སྐུ་མཆོག་ནས་ཆོད་སེམས་འགྱུར་མེད་ཐོག་བོད་མིའི་དྲང་བདེན་གྱི་འཐབ་རྩོད་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་གནང་མཛད་དོན། ཁྱེད་ནས་བོད་ཀྱི་ལོ་རྒྱུས་ཁྲོད་ཆེས་གཉན་འཕྲང་ཆེ་ཤོས་ཀྱི་དུས་སྐབས་འདིར་བོད་མི་རྣམས་ལ་སེམས་ཐག་ཉེས་པོའི་ཐོག་ནས་གདུང་སེམས་མཉམ་སྐྱེའི་རྒྱབ་སྐྱོར་གནང་བ་དེ་ནི།བོད་མི་རྣམས་ལ་རེ་བ་དང་སྙིང་སྟོབས་སྐྱེ་གཞི་ཞིག་ཏུ་གྱུར་ཡོད།དེ་ལ་བརྟེན་ནས་ང་ཚོས་དྲང་བདེན་དང་རང་དབང་འཐབ་རྩོད་རྒྱུན་སྐྱོང་བྱ་རྒྱུར་ཕན་ཐོགས་རླབས་ཆེན་བྱུང་སོང་། ད་ལྟའི་བོད་ནང་གི་བོད་མི་ཚོའི་དཀའ་སྡུག་གིས་གཙོས་འཛམ་གླིང་ས་ཁུལ་འདྲ་མིན་ནང་ལྷིང་འཇགས་དང་། ངེས་བརྟན་མེད་པའི་གནས་སྟངས་དེ་དག་མཐར་ཞི་ནས་དྲང་བདེན་དང་རྒྱུ་མཚན་ལ་བརྟེན་ནས་མི་སྡེའི་སྤྱི་ཚོགས་ཀྱི་དཔལ་ཡོན་དར་ཞིང་རྒྱས་པ་ཞིག་ཡོང་རྒྱུ་ཡིན་པ་ངོས་ལ་རེ་བ་དང་ཡིད་ཆེས་གཙང་མ་ཡོད། ཅེས་འཁོད་འདུག

སྐབས་༡༡༦པའི་ཨ་རིའི་གྲོས་ཚོགས་འོག་མའི་འཐུས་མིར་སླར་ཡང་བདམས་ཐོན་བྱུང་བའི་མང་གཙོ་ཚོགས་པའི་དབུ་ཁྲིད་ལྕམ་ནེན་སི་པེ་ལོ་སི་(Nancy Pelosi)མཆོག་ལ་མང་མོས་ཀྱི་ཐོག་ནས་གྲོས་ཚོགས་ཀྱི་ཚོགས་གཙོར་འདེམ་བསྐོ་བྱུང་སྟེ། ཟླ་༡ཚེས་༣ཉིན་གྲོས་ཚོགས་འོག་མའི་ཚོགས་གཙོའི་ལས་འཁུར་དམ་འབུལ་ཞུས་ཤིང་། ཁོང་ནི་ཨ་རིའི་ཆབ་སྲིད་ཀྱི་སྡིངས་ཆའི་སྟེང་གི་བུད་མེད་དབང་ཤུགས་ཆེ་ཤོས་དེ་ཆགས་ཡོད་པ་རེད།ལྕམ་ནེན་སི་པེ་ལོ་སི་མཆོག་དང་ཐོག་༡༩༨༧ལོར་ཨ་རིའི་གྲོས་ཚོགས་འོག་མའི་མང་གཙོ་ཚོགས་པའི་འཐུས་མིར་བདམས་ཐོན་བྱུང་ནས་ད་ཆར་ལོ་ངོ་༣༢སོང་ཡོད་པ་རེད།

ཨ་རིའི་གྲོས་ཚོགས་སུ་ནེན་སི་པེ་ལོ་སི་མཆོག་ནས་ཕྱི་ལོ༡༩༨༧ལོར་༧གོང་ས་༧སྐྱབས་མགོན་ཆེན་པོ་མཆོག་ལ་མཇལ་ཁ་ཐོག་མ་ཞུས་ཡོད་པ་དང་། ལྷག་པར་༢༠༠༧ལོར་ཨ་རིའི་གྲོས་ཚོགས་ཀྱིས་༧གོང་ས་སྐྱབས་མགོན་ཆེན་པོ་མཆོག་ལ་གསེར་གྱི་གཟེངས་རྟགས་ཕུལ་སྐབས། གྲོས་ཚོགས་ཀྱི་ཚོགས་གཙོའི་ཐུགས་འགན་བཞེས་མུས་ཀྱི་གནས་སྐབས་ཤིག་ཡིན་པར་མ་ཟད། ༢༠༠༨ལོར་བོད་ས་ཡོངས་ལ་ས་བྱི་ཞི་རྒོལ་ཆེན་མོའི་སྐབས་བོད་མིའི་གནས་སྟངས་ལ་གདུང་སེམས་མཉམ་བསྐྱེད་མཚོན་ཆེད། ཆེད་མངགས་བཞུགས་སྒར་རྡ་རམ་ས་ལར་ཆེད་ཕེབས་ཀྱིས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དང་། བཙན་བྱོལ་གྱི་མཛད་གཙོ་རྣམ་པ་མཇལ་འཕྲད་ཞུས་པ་སོགས་ཀྱི་ཆབ་སྲིད་ཀྱི་ཐོག་ནས་རྒྱ་ནག་གཞུང་ལ་བརྡ་ལན་གསལ་བའི་རྣམ་འགྱུར་ཡང་གསལ་སྟོན་གནང་ཡོད་པ་རེད།

དེ་བཞིན་༢༠༡༧ལོར་ཁོང་གིས་དབུ་ཁྲིད་པའི་ཨ་རིའི་གྲོས་ཚོགས་ཀྱི་སྐུ་ཚབ་ཚོ་ཁག་ཅིག་ཡང་བསྐྱར་བཞུགས་སྒར་རྡ་རམ་ས་ལ་ཕེབས་བཅར་ཞུས་ཤིང་། སྐབས་དེར་ལྕམ་(Nancy Pelosi) མཆོག་གིས་དེ་སྔ་ཕྱི་ལོ་༢༠༡༥ལོར་བོད་ནང་དུ་གཟིགས་སྐོར་ཕེབས་པའི་སྐོར་ལ་གསུང་དོན། ང་ཚོ་སྐུ་ཚབ་འཐུས་མི་བཞི་བོ་བོད་དུ་བསྐྱོད་སྐབས། ཕོ་བྲང་པོ་ཏཱ་ལའི་༧རྒྱལ་བའི་གཟིམ་ཆུང་ནང་ང་ཚོས་༧གོང་ས་ཏཱ་ལའི་བླ་མ་མཆོག་སླར་ཡང་གཟིམ་ཆུང་དེར་གདན་འདྲེན་ཞུ་མ་ཐུབ་བར་དུ་རང་ནུས་གང་ཡོད་ཀྱིས་འབད་བརྩོན་ཞུ་རྒྱུའི་ཁས་ལེན་དམ་བཅའ་བཞག་པ་ཡིན་ཅེས་དང་། རྒྱ་ནག་གཞུང་གིས་དཔལ་འབྱོར་གྱི་སྟོབས་ཤུགས་ངོམས་ནས་བོད་དོན་རྒྱབ་སྐྱོར་བ་ཚོར་གནོན་ཤུགས་སྤྲོད་ཐབས་བྱེད་བཞིན་ཡོད། གལ་ཏེ་ང་ཚོས་རྒྱ་ནག་གི་དཔལ་འབྱོར་གྱི་གནོན་ཤུགས་ལ་བརྟེན་ནས་བོད་དང་རྒྱ་ནག་ནང་གི་འགྲོ་བ་མིའི་ཐོབ་ཐང་ལ་རྒྱ་ནག་གཞུང་གིས་དྲག་གནོན་བྱེད་བཞིན་པ་དེར་ངོ་རྒོལ་མ་བྱས་ཚེ་ང་ཚོས་འཛམ་གླིང་ས་ཕྱོགས་གཞན་གང་དུའང་འགྲོ་བ་མིའི་ཐོབ་ཐང་སྲུང་སྐྱོབ་སྐོར་ལ་སྐད་ཆ་ཤོད་རྒྱུའི་བཟང་སྤྱོད་ཀྱི་ཐོབ་ཐང་དེ་རང་བཞིན་གྱི་བརླག་རྒྱུ་རེད། དེར་བརྟེན་ང་ཚོས་བོད་དོན་རྒྱབ་སྐྱོར་མཚམས་འཇོགས་ནམ་ཡང་བྱེད་རྒྱུ་མེད་ཅེས་གསུངས་ཡོད། དེ་བཞིན་༢༠༡༨ལོར་ཨ་རིའི་གྲོས་ཚོགས་སུ་བོད་ནང་ཕར་འགྲོ་ཚུར་འོང་གི་ཁྲིམས་གཞི་དེར་ཐོག་མར་གྲོས་ཚོགས་ནང་རྒྱབ་སྐྱོར་གནང་མཁན་གཙོ་བོ་གྲས་ཤིག་ཀྱང་ཆགས་ཀྱི་ཡོད་འདུག

གསལ་བསྒྲགས་ཀྱི་ས་མིག