ང་ཚོ་དུས་རབས་ཉེར་གཅིག་པའི་ནང་པ་བྱེད་དགོས་ཞེས་༧གོང་ས་མཆོག་གིས་བཀའ་བསྕལ།

དེ་ཡང་༢༠༡༨ཟླ་༨ཚེས་༡༧ཉིན་བོད་མིའི་སྒྲིག་འཛུགས་ཕྱི་དྲིལ་ལས་ཁུངས་ཀྱི་གོ་སྒྲིག་འོག་བཞུགས་སྒར་རྡ་སའི་ཉེ་འགྲམ་དུ་ཡོད་པའི་ཨིམ་པི་རི་ཡལ་ཧ་ཡི་ཊི་Imperial Heights Resorts ཞེས་པའི་གསོལ་མགྲོན་ཁང་དུ་ལྔ་དང་ལྔ་བཅུའི་གཞོན་སྐྱེས་ཚོགས་འདུ། འབྱུང་འགྱུར་བོད་ཀྱི་མདུན་ལམ། ཞེས་པའི་ཉིན་༤རིང་ལྷན་ཚོགས་དབུ་འཛུགས་གནང་ཡོད་པ་དང་ཚེས་༢༠ཉིན་༧གོང་ས་མཆོག་གིས་འཇལ་ཁ་གནང་འདུག

ཚོགས་བཅར་རྣམས་ལ་བཀའ་སློབ་སྩལ་དོན། ཧ་ཅང་ཡག་པོ་བྱུང་འདུག ཚང་མར་བཀྲ་ཤིས་བདེ་ལེགས་ཡོད། ང་ཚོ་མིའི་སྤྱི་ཚོགས་གང་དུ་ཡིན་ནའང་རྒྱ་མིའི་སྐད་ཆའི་བཟོ་འདྲ་ཞིག་རེད། འཆར་ཅན་ལྟ་བུ་མིན་པར་མདུན་ནས་མདུན་དུ་སྐྱོད་རྒྱུར་བསམ་བློ་གཏོང་དགོས། མཁྱེན་སོང་ངམ། དེར་བརྟེན་མདུན་ནས་མདུན་དུ་གོམ་པ་སྤོ་ནས་འགྲོ་རྒྱུར་གོ་བསྡུར་བྱས་ནས་ཕྱོགས་ཡོངས་ཀྱི་གནས་ཚུལ་ལ་བསམ་བློ་བཏང་ནས་གོ་བསྡུར་བྱེད་དགོས་རྒྱུ་ཧ་ཅང་གལ་ཆེན་པོ་རེད། ལྔ་དང་ལྔ་བཅུ་ཞེས་པ་འདི་ཧ་ཅང་སྙིང་རྗེ་པོ་རེད།

མདོ་དོན་སྙིང་པོ་ངོས་ཀྱིས་ཁྱེད་རང་ཚོར་འདི་བཤད་འདོད་བྱུང་། ང་ཚོ་བོད་པས་བོད་དོན་ཞེས་བཤད་བཞིན་པ་འདི་ལུང་པ་ཆ་ང་ཆུང་ངུ་ཞིག་གིས་སོ་སོའི་ལུང་པའི་དོན་དུ་བཤད་པ་དང་ཕལ་ཆེར་འདྲ་གི་མ་རེད། མཁྱེན་སོང་ངམ། ཨ་ཧྥི་རི་ཀ་དང་དཀྱིལ་ཤར་ཨེ་ཤི་ཡ་Middle East ལུང་པ་བཟོ་འདྲ་བོ་སོ་སོའི་ལུང་པ་ནང་མང་པོ་བཤད་རྒྱུ་ཡོད་པ་རེད། ང་ཚོས་བཤད་རྒྱུ་ནི་ངོས་རང་སྒེར་གྱི་ཉམས་མྱོང་ཐོག་ནས་བཤད་པ་ཡིན་ན། འདས་པའི་ལོ་ཧ་ལམ་བཞི་བཅུ་མ་ཟིན་ཙམ་གྱི་རིང་ལ་ཚན་རིག་པ་དེ་འདྲ་དང་། འཛམ་གླིང་གི་མཁས་དབང་དེ་འདྲ་མང་པོ་ཐུག་ཡོང་དུས་ང་ཚོ་བོད་གངས་ཅན་ལ་ཡོད་པའི་རྒྱ་གར་ནཱ་ལེནྡྲ་ནས་ཡོང་བའི་ཤེས་ཡོན་འདི་དངོས་གནས་དྲང་གནས་རྒྱུ་མཚན་ལྡན་པའི་ཐོག་ནས་འགྲེལ་བཤད་རྒྱག་རྒྱུ་ཡོད་པ་འདི་ཧ་ཅང་རླབས་ཆེན་རེད་འདུག

དེང་སྐབས་ནའ་ལེནྡྲར་གྱང་ར་མ་གཏོགས་གང་ཡང་མེད། ནཱ་ལེནྡྲའི་མཁས་པོ་ནམ་རྒྱུན་ངོས་ཀྱིས་པཎ་གྲུབ་བཅུ་བདུན་ཞེས་བཤད་བཞིན་པ་དེ་འདྲའི་མཁས་པའི་དབང་པོ་དེ་དག་གིས་ཉམས་ཞིབ་གནང་ནས་སངས་རྒྱས་ཀྱི་བཀའ་རེད་ཅེས་དད་པ་ཁོ་ན་མིན་པར་སངས་རྒྱས་ཀྱི་བཀའ་ཡིན་ནའང་དོགས་པ་བཀོད་ནས་སངས་རྒྱས་ཀྱིས་བཀའ་དེ་འདྲ་ཞིག་གནང་འདུག་ཀྱང་རྒྱུ་མཚན་ཐོག་ནས་བསམ་བློ་གཏོང་ན་འགལ་འདུ་འདུག་ཅེས་དགག་པ་རྒྱག་གི་འདུག དེར་བརྟེན་ནཱ་ལེནྡྲའི་མཁས་དབང་དེ་དག་གིས་བསམ་བློ་བཏང་སྟངས་ནི་རྒྱུ་མཚན་གཙོ་བོར་བྱས་ནས་ཞིབ་འཇུག་བྱས་ནས་འགྲོ་རྒྱུ་དང་། སེམས་ཁམས་རིག་པ་དང་ཚད་མ་རིག་པ་དེ་ཚོའི་གྲས་ནི་དེང་སྐབས་འཛམ་གླིང་སྟེང་ཁྱད་དུ་འཕགས་པ་ཞིག་ཆགས་པ་དང་། འདི་ངོ་མཚར་ཆེན་པོ་ཡིན་པ་ཙམ་ལ་མི་འཇོག་པར་འཛམ་གླིང་འདིའི་སྟེང་ཁ་ཡོད་ལག་ཡོད་དགོས་མཁོ་ཡོད་པ་ཞིག་ཧ་ཅང་གསལ་པོ་རེད་འདུག

འདི་ངོས་ཀྱིས་ཉམས་མྱོང་ཐོག་ནས་ཐག་བཅད་ནས་བཤད་ཐུབ་རྒྱུ་ཞིག་ལ་བོད་ཀྱིས་ནཱ་ལེནྡྲའི་རིག་གཞུང་ལོ་ངོ་སྟོང་ཕྲག་རིང་བདག་པོ་བརྒྱབ་ནས་ཡོད་པ་འདི་འཛམ་གླིང་སྤྱིའི་ཁྱད་ནོར་རམ་འཛམ་གླིང་སྤྱིའི་སྤྱི་ནོར་རེད་ཅེས་བརྗོད་ཐུབ་རྒྱུ་ཞིག་ཕལ་ཆེར་ཆགས་འདུག ང་ཚོའི་གཞོན་སྐྱེས་ཚོས་བོད་ལ་དེ་འདྲའི་རིག་གཞུང་ཡོད་པ་འདི་དེ་སྔ་བོད་ལ་གཞུང་ཆེན་སློབ་སྦྱོང་ཡོད་སའི་གདན་ས་དེ་ཚོའི་གྲས་དང་། དེའི་ནང་ནས་དགེ་བཤེས་ཚོ་རེད་མ་གཏོགས་མང་ཆེ་བར་ཧ་ཅང་ཡོད་མ་རེད། ཕྱི་ལོ་༡༩༥༨ ལོར་སེ་འབྲས་ཚོར་གྲྭ་སྐོར་ཕྱིན་ནས་གྲྭ་སྐོར་བཞག་པ་རེད། དེ་དུས་འབྲས་སྤུངས་བློ་གསལ་གླིང་དུ་དགེ་འདུན་པ་ག་ཚོད་ཡོད། ཅེས་ངོས་ཀྱིས་བཀའ་འདྲི་ཞུས་མྱོང་། དགེ་འདུན་པ་ལྔ་སྟོང་ཡོད་གསུངས་པ་རེད། དཔེ་ཆ་ལྟ་མཁན་ག་ཚོད་ཡོད་དྲིས་པས་སྟོང་ཕྲག་གཅིག་ལས་མེད། གྲྭ་བ་བཞི་སྟོང་གིས་འགྱེད་དེ་དག་བླངས་པ་དང་གྲྭ་ཆས་གྱོན་པ་མ་གཏོགས་དཔེ་ཆ་ལྟ་གི་མི་འདུག ཞབས་འདྲེན་མིན་ནམ། དགེ་འདུན་པ་སྟོང་ཕྲག་ལྔ་ཡོད་པའི་ནང་ནས་སྟོང་ཕྲག་གཅིག་མ་གཏོགས་དཔེ་ཆ་མི་ལྟ་མཁན་ཆགས་པ་དེ་ཞབས་འདྲེན་མིན་ནམ། ང་ཚོ་རྒྱ་གར་དུ་སླེབས་ནས་དེ་སྔ་དཔེ་ཆ་མ་ལྟ་མཁན་དགོན་པ་ཚོས་དཔེ་ཆ་ལྟ་དགོས་ཞེས་བརྗོད། དཔེར་ན་རྣམ་རྒྱལ་གྲྭ་ཚང་མཚོན་པའི་རྒྱུད་གྲྭ་སྟོད་སྨད་ཚོས་དཔེ་ཆ་ལྟ་གི་མེད་པ་དེ་དག་གིས་དཔེ་ཆ་ལྟ་དགོས་རེད་ཅེས་དང་། དེ་ནས་བཙུན་མ་ཚོས་དཔེ་ཆ་ལྟ་དགོས་པ་རེད་ཅེས་ངོས་ཀྱིས་དེ་ལྟར་འབོད་སྐུལ་བྱས་པ་རེད། མི་མང་སྐྱ་བོ་ཕོ་མོ་ཚོ་ཡིན་ནའང་དཔེ་ཆ་ལྟ་དགོས་སློབ་གཉེར་རྒྱག་དགོས།

ང་ཚོ་ནང་པའི་ཆོས་བྱེད་མཁན་ཚོ་དུས་རབས་ཉེར་གཅིག་པའི་ནང་པ་བྱེད་དགོས། ང་ཚོའི་པ་ལགས་དང་ཨ་མ་ལགས་ཚོ་སྐྱབས་སུ་མཆི་ཟེར་བ་དང་སྔགས་བགྲངས་བ་ལྟར་མིན་པ་ནང་ཆོས་ཀྱི་འགྲོ་སྟངས་ག་འདྲ་ཡིན་པ། ནཱ་ལེནྡྲའི་མཁས་པ་ཚོས་བཅོམ་ལྡན་འདས་ཀྱི་བཀའ་རང་ལའང་དགག་པ་བརྒྱབ་པ་དེ་འདྲའང་ཡོད་པ་རེད། འདི་རྒྱ་མཚན་ག་འདྲ་ཞིག་གི་ཐོག་ནས་འགག་པ་བརྒྱབ་འདུག བཅོམ་ལྡན་འདས་ལ་མ་གུས་པ་མ་རེད། བཅོམ་ལྡན་འདས་ཀྱིས་དེ་ལྟར་གསུང་པ་དེ་དགོས་དབང་གིས་གསུང་པ་རེད། གསུང་ས་གདུལ་བྱ་ཚོའི་ཁམས་དང་མོས་པར་བསྟུན་ནས་གསུང་པ་རེད། ང་ཚོས་འདི་སྒྲ་ཇི་བཞིན་ཁས་བླང་ན་རུང་གི་མ་རེད། དཔེར་ན་རྒྱ་ནག་ཆ་བཞག་ན་མདོ་སྡེ་དགོངས་འགྲེལ་ཧ་ཅང་རྩ་ཆེན་པོ་རྩི་གི་ཡོད་པ་རེད། མགོན་པོ་ཀླུ་སྒྲུབ་ཡབ་སྲས་ཀྱིས་མདོ་སྡེ་དགོངས་འབྲེལ་དྲང་དོན་རེད་ཅེས་དགག་པ་བསྐྱོན་ཡོད། ང་ཚོ་བོད་ལ་ཡོད་པའི་སངས་རྒྱས་པའི་ཆོས་འདི་རིག་པའི་ལམ་ནས་འགྲོ་བཞིན་པ་དང་། དེ་འདྲའི་རིགས་ལམ་སྐོར་ཆ་བཞག་ན་རྒྱ་ནག་ལ་ཚད་མ་རིག་པའི་སྐོར་དེ་ཚོའི་གྲས་ཚ་ཚང་བསྒྱུར་མི་འདུག བོད་སྐད་ཐོག་ཆ་ཚང་བསྒྱུར་ཡོད་པ་རེད། སློབ་དཔོན་ཕྱོགས་གླང་དང་ཆོས་གྲགས་ཀྱིས་གཞུང་དེ་དག་ཆ་ཚང་བསྒྱུར་ཡོད་པ་དང་། དེ་དག་ལ་སློབ་གཉེར་ཧ་ཅང་ཤུགས་ཆེན་པོ་བྱེད་ཀྱི་ཡོད་པ་རེད། བོད་གངས་ཅན་པ་རང་གི་ས་སྐྱ་པཎྜི་ཏ་ཀུན་དགའ་རྒྱལ་མཚན་ལ་ཆ་བཞག་ཁོང་གིས་ཚད་མའི་གཞུང་མཛད་ཡོད། རྒྱ་ནག་ནང་དེ་ལྟར་ཚད་མའི་གཞུང་དེ་ཙམ་མི་འདུག འབར་མ་དང་ཐེ་ལན་ཌི། ཤྲཱི་ལངྐ་དེ་དག་པཱ་ལིའི་གཞུང་ཡིན་སྟབས། ཚད་མའི་སྐོར་ཁྱོན་ནས་མེད།

དེར་བརྟེན་ནང་པའི་གཞུང་དངོས་གནས་དྲང་གནས་ཚད་མ་རིག་པ་ཐེ་བའི་གཞུང་ཆེན་དེ་ཚོ་མང་པོ་ཞིག་སློབ་གཉེར་བྱེད་རྒྱུ་ཡོད་པ་ཕལ་ཆེར་བོད་གཅིག་པོ་རེད་འདུག གཉིས་ནས་ང་ཚོའི་གཟི་བརྗིད་ངོམ་རྒྱུ་ལྟ་བུ་ཞིག་ནི། ང་ཚོར་བཀའ་འགྱུར་པོ་ཏི་བརྒྱ་དང་། བསྟན་འགྱུར་པོ་ཏི་ཉིས་བརྒྱ་ཉི་ཤུ་རྩ་གྲངས་ཡོད་པ་དེ་དག་ཚང་མ་བོད་ནང་ཡོད་པ་མ་གཏོགས་ལེགས་སྦྱར་སྐད་སློབ་མི་དགོས། ནཱ་ལེནྡྲའི་མཁས་པའི་དབང་པོ་དེ་དག་གི་གཞུང་སྦྱང་དུས་སོ་སོ་རང་གི་སྐད་ཡིག་ཐོག་ནས་སྦྱང་གི་ཡོད་པ་རེད་མ་གཏོགས་ལེགས་སྦྱར་སྐད་དང་པཱ་ལིའི་གཞུང་སྦྱང་ཀྱི་མེད། འདི་སྔར་ཆོས་རྒྱལ་སྲོང་བཙན་སྒམ་པོའི་སྐབས་ནས་བཟུང་གང་ལྟར་ཧ་ལས་པའི་དགོངས་པ་རྒྱ་ཆེན་པོ་རེད་འདུག

ནང་ཆོས་རྒྱ་གར་ནས་ཚུར་དར་བ་རེད། རྒྱ་ནག་བརྒྱུད་ནས་ནང་ཆོས་མ་བཞེས་པར་གཙོ་བོ་རྒྱ་གར་རང་ནས་ཐད་ཀར་བཞེས་པ་རེད། བོད་ཡིག་རྒྱ་ཡིག་ནས་དཔེ་མ་བལྟས་པར་རྒྱ་གར་གྱི་ཡི་གེར་དཔེ་བལྟས། དབྱངས་དང་གསལ་བྱེད་བྱས་ནས་ཡོད་པ།དེ་འདྲའི་ཡི་གེ་བོད་པ་རང་གི་དངོས་གནས་ རང་མཚན་ལྟ་བུ་རེད། དངོས་གནས་དྲང་གནས་ང་ཚོའི་སྐད་ཡིག་ནི། སྤྱིར་དཔེ་བླངས་ས་རྒྱ་གར་ནས་དབྱངས་དང་གསལ་བྱེད་བྱས་ནས་དཔེ་བླངས་པ་རེད། འོན་ཀྱང་རྒྱ་གར་དང་རྒྱ་ནག་སྐད་དང་མི་འདྲ་བ་སོ་སོའི་ཐུན་མོང་མིན་པའི་སྐད་ཡིག་ཅིག་བཟོས། སྐད་ཡིག་འདིའི་ནང་བཀའ་འགྱུར་བསྟན་འགྱུར་པོ་ཏི་སུམ་བརྒྱ་ལྷག་ཙམ་ཡོད་པ་དེའི་ཐོག་ནས་དཔལ་ནཱ་ལེནྡྲའི་མཁས་པའི་དབང་པོ་ཚོའི་གཞུང་ཆེན་གྱི་འགྲེལ་བ་ཡོད་པ་དེ་དག་ཚང་མ་བོད་ཡིག་ནང་ཡོད།

ང་ཚོ་མང་པོ་ཞིག་གིས་བཀའ་འགྱུར་བསྟན་འགྱུར་ཞེས་དད་པ་རྩི་ཡུལ་དུ་འཇོག་བཞིན་ཡོད། གདན་ས་ཁག་དེ་ཚོའི་གྲས་ཀྱི་གཞུང་ཆེན་དེ་ཚོའི་གྲས་ལྟ་ཡི་ཡོད་པ་རེད། དེ་སྔ་བོད་ལ་ལོ་ངོ་ཉི་ཤུ་སུམ་བཅུ་ལྟ་གི་ཡོད་པ་རེད། རིས་མེད་ཀྱི་ཆོས་སྒར་དང་ཆོས་སྡེ་སྔ་མོ་ས་སྐྱ་གཞུང་ཆེན་སློབ་རྒྱུར་ཧ་ཅང་ཡག་པོ་ཡོད་པ་རེད། ཕྱིས་སུ་དགེ་ལུགས་གཙོ་བོ་ལྟ་བུ་རེད་འདུག གང་ལྟར་བོད་གངས་ཅན་གྱི་ལྗོངས་ལ་སངས་རྒྱས་པའི་ཆོས་རིག་པའི་ལམ་ནས་གཏན་ལ་བབ་རྒྱུ་ཡོད་པ་འདི་དེང་སྐབས་ཚན་རིག་པ་དང་མཉམ་དུ་གོ་བསྡུར་བྱེད་ཐུབ་པ་ཞིག་འདུག སངས་རྒྱས་གསུང་པ་རེད་ཅེས་དད་པ་གཅིག་པུའི་ཐོག་ནས་ཕྱིན་པ་ཡིན་ན། ཚན་རིག་པ་དང་མཉམ་དུ་གོ་བསྡུར་བྱེད་རྒྱུ་མེད། ཐེངས་ཤིག་ལྡི་ལིར་ཐེ་ལན་ཌི་མཁས་དབང་གང་ཙམ་དང་ཐུག་པ་རེད། བྷེང་ཀོག་ནང་པའི་མཐོ་སློབ་ཀྱི་མཁས་དབང་དེ་འདྲ་རེད། ང་ཚོ་ཐེག་པ་ཆེ་ཆུང་ཟེར་ནའང་འདྲ། པཱ་ལི་དང་ལེགས་སྦྱར་གཉིས་ཀར་ཐུན་མོང་ཡིན་པ་དེ་ཚོའི་གྲས་ཀྱི་བདེན་བཞི་མི་རྟག་སོགས་བཅུ་དྲུག་དང་བྱང་ཕྱོགས་སོ་བདུན་དེ་ཚོའི་གྲས་ཐུན་མོང་རེད། ཅེས་སོགས་ཀྱི་བཀའ་སློབ་སྩལ།།