23
Sun, Sep
25 New Articles

བུ་མོའི་སྒེག་ཉམས་མངོན་པར་བྱེད་པའི་མི་ཉག་ཡུལ་གྱི་རྒྱན་གོས།

སྲོལ་རྒྱུན།
Typography

ཉི་ཟླ་དབྱིབས་ཅན་གྱི་གསེར་དངུལ་རྒྱན་ཆ་དེ་མི་ཉག་བུ་མོའི་སྐྲའི་ལན་བུར་བརྒྱན་ཚེ་ལྷག་པར་མཛེས་ཞིང་ལྟ་ན་སྡུག འཛམ་གླིང་ཡང་རྩེར་གནས་པའི་མཐོ་སྒང་བོད་ཀྱི་ར་བར། གངས་དཀར་རི་བོའི་སྙན་གྲགས་མདོ་ཁམས་ཀུན་ལ་ཁྱབ་ཅིང༌། སྔོ་ལྗང་གཡུ་ཡི་མེ་ལོང་འདྲ་བའི་རྩྭ་ཐང་སྟེང་དུ་གནས་རི་བཞག་བྲ་མགོན་པོས་བརྗིད་ཉམས་སྟོན།

ས་ཡི་དགེ་བཅུ་ཚང་བའི་ཡུལ་གྲུ་འདིར་ཁམས་པའི་ཕོ་རྒོད་དག་གིས་གླུ་དབྱངས་དང་ཞབས་བྲོ། རྟ་རྩེད་སོགས་ཀྱི་རྩེད་འཇོ་ཅི་དགར་རོལ། གནའ་བོའི་ཇ་འདྲེན་བརྡལ་ལམ་བརྒྱུད་ཡུལ་དུ་འཚོ་གནས་བྱེད་པའི་ཁམས་པའི་ཕོ་རྒོད་ཀྱི་སྐྲའི་རྒྱན་ཆའི་གྲངས་ནི་ལྔ་དང་བདུན། དགུ་བཅས་བཀྲ་ཤིས་པའི་གྲངས་ཀ་ལྡན་པས། ས་གནས་དེ་གའི་གནའ་བོའི་ལུགས་སྲོལ་མཚོན། རྒྱ་མཚོ་ལས་བྱུང་བའི་བྱུ་རུ་དང༌། རང་བྱུང་ཁམས་ཀྱི་གཟི་སོགས་ལས་གྲུབ་པའི་རིན་པོ་ཆེའི་ཕྲེང་བ་སོགས་ཀྱིས་ལུས་ལ་མངོན་པར་བརྒྱན།

བུད་མེད་རྣམས་ཀྱི་མགོ་ལ་གཡུ་དང་བྱུ་རུ། མུ་ཏིག་མུ་མེན་དང་བ་སོ་སོགས་རིན་ཆེན་ཕྲ་ཚོམ་དག་ནི་རྒྱུ་སྐར་ལྟར་གྲངས་མང་ལ། མེ་ཏོག་བཞིན་དུ་མདོག་ཡག ཆོས་དུང་དཀར་པོའི་སྒྲ་དང་དྲི་ཞིམ་ཕྱོགས་ཀུན་འཐུལ་བའི་ལྷ་བསང་དཀར་པོའི་ཁྲོད་དུ། ཁམས་པའི་ཕོ་གསར་རྣམས་ཀྱིས་ལག་ཏུ་དཔའ་བོ་གེ་སར་གྱི་དགྲ་སྟ་བཟུང་བ་དང༌། བྲང་ལ་བླ་མས་བྱིན་གྱིས་བརླབས་པའི་གའུ་བཏགས། རྐེད་ལ་རྐེད་གྲི་བཏགས། དགྲ་ལྷ་ཝེར་མས་གནམ་ནས་སྡོང་གྲོགས་མཛད། ཡུལ་ལྷ་གཞི་བདག་གིས་ས་ནས་རྒྱབ་རྟེན་གནང༌།

ཁམས་པའི་ཕོ་རྒོད་ཀྱི་རྒྱ་ཆེའི་བསམ་པ་དེ་ཡངས་པའི་རྩྭ་ཐང་ཁྱོན་དང་མཉམ། སྙན་འཇེབས་པི་ཝང་གི་སྒྲ་ཡི་ཁྲོད་དུ་མི་ཉག་བུ་མོའི་སྒེག་ཉམས་སྟོན་པའི་གོམ་སྟབས་བསྒྱུར། དགའ་བའི་འཛུམ་མདངས་རབ་ཏུ་རྒྱས་པའི་རྐེད་མེད་མ་ཡིས་མིག་མདའ་ཕྱོགས་བཞིར་འཕེན། བྱུ་རུས་བརྒྱན་པའི་དངུལ་ཆབ་དང་མུ་ཏིག་གིས་ལེགས་པར་སྤུད་པའི་རྐེད་རྒྱན་དག་གི་བུ་མོའི་འགྲོས་དང་བསྟུན་པའི་སྙན་སྒྲ་ནི་དབྱངས་ཅན་མ་ཡི་རྒྱུད་མངས་སྒྲ་ལས་བྱུང་བར་ངེས། བཤད་སྲོལ་ལྟར་ནམ་མཁའི་ལྷ་མོས་ཁམས་པའི་ཕོ་རྒོད་དང་མོ་སར་ལ་ལྷག་པར་གཅེས་སྐྱོང་བྱས་པས། ཕོ་སར་མོ་སར་རྣམས་ཀྱི་ལུས་ལ་རིན་པོ་ཆེའི་བསོད་ནམས་ཡོངས་སུ་འཁོར། དེ་ལྟར་དུ། ཉག་ཆུ་སྔོན་མོས་ཚེ་རབས་དུ་མར་ཁམས་པའི་ཕོ་རྒོད་དང་མི་ཉག་བུ་མོའི་ཐུན་མོང་མ་ཡིན་པའི་དགེ་མཚན་སྐྲུན་བཞིན་མཆིས།

ཡོངས་ཁུངས་ཁམས་པའི་དྲ་བ།

གསལ་བསྒྲགས་ཀྱི་ས་མིག